ZAKARI
1 Kɛ Dariisi+ kacili famiɛn’n, i afuɛ nɲɔn su’n i anglo mɔcuɛ su’n, Zoova kannin ndɛ kleli Ɲanmiɛn nuan ijɔfuɛ Zakari,*+ m’ɔ ti Berekia i wa’n, mɔ i kusu ti Ido i wa’n. Ɔ seli kɛ: 2 “Zoova fali ya dan kpa amun si’m be wun.+
3 “Se be kɛ: ‘Ndɛ nga Zoova m’ɔ ti sonja’m be su kpɛn’n kan’n yɛ: “Zoova m’ɔ ti sonja’m be su kpɛn’n waan: ‘Amun sa amun sin min wun, yɛ n kusu ń sá min sin amun wun.’+ Ndɛ nga Zoova m’ɔ ti sonja’m be su kpɛn’n kan’n yɛ ɔ o lɛ-ɔ.”’
4 “‘Nán amun yo kɛ amun si’m be sa. Laa’n, Ɲanmiɛn nuan ijɔfuɛ’m be seli be kɛ: “Ndɛ nga Zoova m’ɔ ti sonja’m be su kpɛn’n kan’n yɛ: ‘Amun yaci, amun yaci atin tɛ’n su falɛ, yɛ amun yaci sa tɛtɛ nga amun yo be’n.’”’+
“‘Sanngɛ b’a tieman, b’a faman be su b’a sieman min nuan bo,’+ ndɛ nga Zoova kan’n yɛ ɔ o lɛ-ɔ.
5 “‘?Amun si’m be o nin andɛ? ?Yɛ Ɲanmiɛn nuan ijɔfuɛ’m be kali nguan nun tititi? 6 Sanngɛ amun si’m be wunnin kɛ min ndɛ nin min mmla nga n fa mannin min nuan ijɔfuɛ mɔ be ti min sufuɛ’n be kɛ be kan’n, be kpɛnnin su. ?Nɛ́n i-ɔ?’+ Ɔ maan be sali be sin min wun, kpɛkun be seli kɛ: ‘Atin nga e fali’n, ɔ nin sa nga e yoli’n, be su yɛ Zoova m’ɔ ti sonja’m be su kpɛn’n niannin yoli e sa-ɔ, kɛ ng’ɔ fuali kɛ ɔ́ yó’n sa.’”+
7 Kɛ Dariisi+ kacili famiɛn’n i afuɛ nɲɔn su’n i anglo blu-nin-kun (11) su’n mɔ yɛle Seba anglo’n,* i cɛn ba ablaɔn-nin-nnan (24) su’n, Zoova kannin ndɛ kleli Ɲanmiɛn nuan ijɔfuɛ Zakari m’ɔ ti Berekia i wa’n, mɔ i kusu ti Ido i wa’n. Ɔ seli kɛ: 8 “N wunnin like kun aolia nun kɔnguɛ. Bian kun o nnɛn kpanngɔ ɔkwlɛ kun su, ɔ jin mirti waka’m be afiɛn, kongo kun nun. Yɛ nnɛn kpanngɔ wie’m be o i sin lɔ, wie ti ɔkwlɛ, wie ti ɔkwlɛ kankan, yɛ wie ti ufue.”
9 Ɔ maan n seli kɛ: “?Min min, wan mun yɛle be nga be o yɛ’n?”
Anzi ng’ɔ nin min su ijɔ’n tɛli min su kɛ: “Ń má kán be ndɛ ń klé wɔ.”
10 Yɛ bian ng’ɔ jin mirti waka’m be afiɛn’n seli kɛ: “Be yɛ Zoova sunmannin be kɛ be ko wlanwlan asiɛ’n su’n niɔn.” 11 Kpɛkun be seli Zoova i anzi ng’ɔ jin mirti waka’m be afiɛn’n i kɛ: “E ko wlanwlannin asiɛ’n su, yɛ e wunnin kɛ asiɛ wunmuan’n su ti diin, yɛ ɔ ti fɔuun.”+
12 Ɔ maan Zoova i anzi’n seli kɛ: “?Ee Zoova, wɔ mɔ a ti sonja’m be su kpɛn’n, Zerizalɛmun nin Zida klɔ mɔ a fali be wun ya i afuɛ ableso (70) yɛ’n,+ cɛn benin ko yɛ á sí be aunnvɔɛ-ɔ?”+
13 Zoova tɛli anzi ng’ɔ nin min su ijɔ’n i su, ɔ kannin ndɛ’n amanniɛn su, ɔ kannin ndɛ m’ɔ fɔnvɔ sran’n. 14 Yɛ anzi ng’ɔ nin min su ijɔ’n seli min kɛ: “Kpan se kɛ: ‘Ndɛ nga Zoova m’ɔ ti sonja’m be su kpɛn’n kan’n yɛ: “Ń má tú min klun ń kplí Zerizalɛmun nin Siɔn be ti, ń kplí be ti juejue su.+ 15 M’an fa ya dan kpa, m’an fa ya nvle nga be o lɛ diin’n be wun,+ afin kɛ n fali ya kan’n,+ be ukali ɲrɛnnɛn’n su.”’+
16 “I sɔ’n ti’n, ndɛ nga Zoova kan’n yɛ: ‘“Ń má sá min sin Zerizalɛmun, yɛ ń sí i aunnvɔɛ,+ bé kplán min sua’n lɔ,+ yɛ ń tínngɛ like sunnzunlɛ ɲanman kun nun Zerizalɛmun su,”+ ndɛ nga Zoova m’ɔ ti sonja’m be su kpɛn’n kan’n yɛ ɔ o lɛ-ɔ.’
17 “Kpan ekun se kɛ: ‘Ndɛ nga Zoova m’ɔ ti sonja’m be su kpɛn’n kan’n yɛ: “Ninnge kpakpa’m bé bú min klɔ’m be su ekun. Zoova wá fɔ́nvɔ Siɔn+ ekun, yɛ ɔ́ fá Zerizalɛmun ekun.”’”+
18 I sin’n, n mannin min ɲin su, kpɛkun n wunnin nnɛn wɛ+ nnan. 19 Yɛ n usali anzi ng’ɔ nin min su ijɔ’n i kɛ: “?Ngue yɛle nga mun?” Ɔ tɛli su kɛ: “Nnɛn wɛ nga be yoli mɔ Zida,+ nin Izraɛli,+ ɔ nin Zerizalɛmun+ be nun sanngannin’n niɔn.”
20 I sin’n, Zoova kleli min ajuin difuɛ nnan. 21 N usali kɛ: “?Ngue yɛ sran nga mun be su bɛ i yolɛ-ɔ?”
Ɔ tɛli su kɛ: “Nnɛn wɛ nga be yoli mɔ Zida nun sanngannin dan mɔ sran fi w’a kwlá mɛnmɛn i ti’n su’n mun-ɔn. Sran nga mun bé wá klé be ɲrɛnnɛn, bé wá búbú nvlenvle’m be wɛ mun, bé búbú nvlenvle’m be wɛ mɔ be mannin su Zida mɛn’n i wun naan i nun sanngan’n.”
2 Kpɛkun ń nían-ɔn, sran kun yɛ ɔ o yɛ, like sunnzunlɛ ɲanman kun+ o i sa nun. 2 Ɔ maan n usɛli i kɛ: “?Nin yɛ a su kɔ-ɔ?”
Ɔ tɛli su kɛ: “N su ko sunnzun Zerizalɛmun, naan ń sí i tɛtrɛ nun’n nin i tɛnndɛn nun’n.”+
3 Kpɛkun anzi ng’ɔ nin min su ijɔ’n jasoli min wun lɛ, yɛ anzi uflɛ nin i be yiali. 4 I sin’n, ɔ seli i kɛ: “Wanndi kɔ le sa naan ko se gbanflɛn ng’ɔ o lɔ’n kɛ: ‘“Bé wá trán Zerizalɛmun klɔ’n nun+ kɛ klɔ kan wie mɔ i wun timan sisiwa’n sa, i nun sran mun nin i nun nnɛn mɔ be sɔnnin’n ti.+ 5 Ń káci sin yɛ ń bó sín yíɛ i kɛ talɛ sa,+ ń káci aɲrunɲan i afiɛn,”+ ndɛ nga Zoova kan’n yɛ ɔ o lɛ-ɔ.’”
6 Zoova waan: “An bla! An bla! Amun jaso mɛn m’ɔ o nglo lɔ lika’n nun’n i nun,+
afin m’an yo maan amun a bo b’a sanndi ɲanmiɛn su lɔ aunmuan’n i bue nnan’n be su,”+ ndɛ nga Zoova kan’n yɛ ɔ o lɛ-ɔ.
7 “Siɔn, bla! Wɔ mɔ a nin Babilɔnin+ talua’n be tran’n, wanndi. 8 Afin Zoova m’ɔ ti sonja’m be su kpɛn’n, mɔ kɛ be mɛnmɛnnin i’n, ɔ sunmannin min, nvle nga be fɛnnin amun bo ninnge’m be sin’n, i ndɛ ng’ɔ kan’n yɛ:+ ‘Sran ng’ɔ kan amun’n, nn w’a kan min ɲinma su sranʼn.+ 9 Afin ń má tínndin min sa’n be wun, yɛ be bɔbɔ be kanga’m bé fɛ́n be bo ninnge mun.’+ Kpɛkun amún wá sí kɛ Zoova m’ɔ ti sonja’m be su kpɛn’n yɛ ɔ sunmannin min-ɔn.
10 “Ee, Siɔn i wa bla, kpan aklunjɔɛ kpanlɛ,+ afin n su ba,+ yɛ ń má trán ɔ afiɛn,”+ ndɛ nga Zoova kan’n yɛ ɔ o lɛ-ɔ. 11 “Blɛ sɔ’n nun’n, nvle kpanngban bé bá Zoova sin,+ yɛ bé káci min sran. Yɛ ń trán ɔ afiɛn.” Kpɛkun amún wá sí kɛ Zoova m’ɔ ti sonja’m be su kpɛn’n yɛ ɔ sunmannin min amun sin-ɔn. 12 Zoova wá fá Zida naan ɔ kaci i liɛ, asiɛ m’ɔ ti i liɛ klonglo’n su, yɛ ɔ́ fá Zerizalɛmun ekun.+ 13 Klɔ sran mun, maan amun kwlaa amun muan amun nuan Zoova ɲrun, afin ɔ o i tranwlɛ m’ɔ ti i liɛ klonglo’n nun lɔ ɔ su fa ajalɛ.
3 Kpɛkun ɔ kleli min Zozie+ m’ɔ ti Ɲanmiɛn ɲrun jranfuɛ dan’n, ɔ jin Zoova i anzi’n i ɲrun lɛ, yɛ Satan+ jin i sa fama su naan ɔ́ tɛ́nndɛn i ɲrun. 2 I sin’n, Zoova i anzi’n seli Satan kɛ: “Ee, Satan, maan Zoova tu ɔ fɔ,+ ɛɛn-ɛn, maan Zoova m’ɔ fali Zerizalɛmun’n,+ ɔ tu ɔ fɔ! ?Bian nga timan kɛ yie mɔ sin o nun mɔ b’a tu i sin nun’n sa?”
3 Kɛ ɔ́ yó sɔ’n nn tralɛ fiɛn wie’m be wla Zozie i wun, yɛ ɔ jin anzi’n i ɲrun lɛ. 4 Anzi’n seli be nga be jinjin i ɲrun lɛ’n be kɛ: “Amun yi i wun tralɛ fiɛn mun.” I sin’n, ɔ seli i kɛ: “Nian, m’an nunnun ɔ sa tɛ’n, yɛ á wá wlá tralɛ kpakpa mun.”+
5 Ɔ maan n seli kɛ: “Maan be fa tannin tanmue sanwun kun be cici i ti.”+ Kpɛkun be fali tannin tanmue sanwun’n be cicili i ti, yɛ be fali tralɛ wie mun wlɛli i wun. Kɛ ɔ́ yó sɔ’n, nn Zoova i anzi’n jin i wun lɛ. 6 I sin’n, Zoova i anzi’n seli Zozie kɛ: 7 “Ndɛ nga Zoova m’ɔ ti sonja’m be su kpɛn’n kan’n yɛ: ‘Sɛ a nanti min atin’m be su naan a di junman ng’ɔ fata kɛ a di man min’n, á yó jɔlɛ difuɛ min sua’n nun,+ á nían min awlo klun’m be lika,* yɛ ń mán wɔ atin naan a tran be nga be jinjin yɛ’n be nun wie.’
8 “‘Ee Zozie, wɔ mɔ a ti Ɲanmiɛn ɲrun jranfuɛ dan’n, a nin ɔ wiengu mɔ be titi ɔ ɲrun lɛ’n, amun yaci, amun tie, afin sran nga mun be ti nzɔliɛ like. An nian! Min sufuɛ+ nga be flɛ i kɛ Aɲɛn’n+ yɛ ɔ o yɛ! 9 An nian yɔbuɛ nga n fa sieli i Zozie i ɲrun’n! Ɲinma nso wo yɔbuɛ kunngba sɔ’n su, ń má klɛ́ ndɛ kun su, yɛ ń núnnún mɛn nga i sa tɛ’n cɛn kunngba,’+ ndɛ nga Zoova m’ɔ ti sonja’m be su kpɛn’n kan’n yɛ ɔ o lɛ-ɔ.
10 “Cɛn sɔ’n nun’n, amun tinuntinun amún yía amun mantanfuɛ mun amun viɲin nin amun figie waka’m be bo,+ ndɛ nga Zoova m’ɔ ti sonja’m be su kpɛn’n kan’n yɛ ɔ o lɛ-ɔ.”
4 Anzi ng’ɔ nin min ijɔli’n ɔ sɛli i sin, yɛ ɔ tinngeli min, kɛ nga be fa tinnge sran kun m’ɔ su lafi’n sa. 2 I sin’n, ɔ seli min kɛ: “?Ngue yɛ a wun i-ɔ?”
Ɔ maan n seli kɛ: “N wun kannin siewlɛ kun, i wunmuan’n ti sika ɔkwlɛ,+ kpongbo kun o i ti su nglo. Kannin siewlɛ’n i su kannin’m be ti nso,+ ɛɛn-ɛn, be ti nso, yɛ kannin’m be o i ti su nglo, i sama’m be ti nso, yɛ kunman o be klun. 3 Olivie waka nɲɔn be o i wun lɛ,+ kun o kpongbo’n i fama su, yɛ kun o i bɛ su.”
4 I sin’n, n usali anzi ng’ɔ nin min su ijɔ’n kɛ: “?Min min, ninnge nga mun be bo yɛle benin?” 5 Ɔ maan anzi ng’ɔ nin min su ijɔ’n usali min kɛ: “?A siman ninnge nga’m be bo?”
N tɛli su kɛ: “Ɛɛn-ɛn, min min, n siman be bo.”
6 I sin’n, ɔ seli min kɛ: “Ndɛ nga Zoova kan kle Zorobabɛli’n yɛ: ‘“Nán sonja mun yɛ bé yó-ɔ, yɛ nán klɔ sran’m be wunmiɛn’n niɔn,+ sanngɛ min wawɛ’n niɔn,”+ ndɛ nga Zoova m’ɔ ti sonja’m be su kpɛn’n kan’n yɛ ɔ o lɛ-ɔ. 7 ?Ee, oka dan, ngue yɛle wɔ? Á wá káci lika kpɛtɛkplɛɛ+ Zorobabɛli+ i ɲrun. Yɛ ɔ́ wá fá yɔbuɛ m’ɔ o nglo lɔ’n bá, yɛ bé bó ndɛ bé sé kɛ: “Ɔ yo ɲɛnmɛn-o! Ɔ yo ɲɛnmɛn-o!”’”
8 Zoova kannin ndɛ kleli min ekun, i waan: 9 “Zorobabɛli i sa mun yɛ be wlali sua nga i bo ase-ɔ,+ yɛ i bɔbɔ i sa mun yɛ bé wíe i kplán-ɔn.+ Yɛ amún wá sí kɛ Zoova m’ɔ ti sonja’m be su kpɛn’n, ɔ sunmannin min amun sin. 10 ?Wan yɛ ɔ yoli cɛn nga ninnge’m be boli be bo kannganngan’n* i finfin-ɔn?+ Be klun wá jɔ́, yɛ bé wún ɲanman mɔ sunmun o i nuan’n* Zorobabɛli i sa nun. Ɲinma nso nga mun be ti Zoova i ɲinma m’ɔ fa niannian asiɛ wunmuan’n su’n.”+
11 I sin’n n usɛli i kɛ: “?Olivie waka nɲɔn mɔ be o kannin siewlɛ’n i fama su nin i bɛ su’n, be ti ngue nzɔliɛ?”+ 12 N usɛli i kpɛ nɲɔn su kɛ: “N wunnin olivie waka sama nɲɔn* mɔ be su fa ngo mɔ i ɲin blo kɛ sika ɔkwlɛ sa’n be guɛ i sika ɔkwlɛ tiyo nɲɔn’m be nun’n. ?Olivie waka sama nɲɔn sɔ’m be ti ngue nzɔliɛ?”
13 Ɔ usali min kɛ: “?A siman ninnge sɔ’m be bo?”
N tɛli i su kɛ: “Ɛɛn-ɛn, min min, n siman be bo.”
14 Ɔ seli kɛ: “Be yɛle sran nɲɔn mɔ Ɲanmiɛn kpali be sieli be ngunmin’n mɔ be jin asiɛ wunmuan’n i Min’n i wun lɛ’n.”+
5 N mannin min ɲin su ekun, kpɛkun n wunnin fluwa kun m’ɔ su tu kɔ’n. 2 Ɔ usali min kɛ: “?Ngue yɛ a wun i-ɔ?”
N tɛli su kɛ: “N wun fluwa kun m’ɔ su tu kɔ’n, i tɛnndɛn nun’n ti kude* ablaɔn (20), yɛ i tɛtrɛ nun’n ti kude blu.”
3 Yɛ ɔ seli min kɛ: “Sannzan ng’ɔ tru asiɛ wunmuan’n su’n yɛ ɔ o lɛ-ɔ, afin sran kwlaa ng’ɔ wua’n,+ kɛ ng’ɔ ti klɛwa i bue kun su sa’n, be tumɛn i fɔ, yɛ sran kwlaa ng’ɔ ta ato nda’n,+ kɛ ng’ɔ ti klɛwa i bue kun’n su lɔ’n sa’n, be tumɛn i fɔ. 4 ‘N sunmannin sannzan sɔ’n, yɛ ɔ́ wlú awiefuɛ’n i sua’n nun, ɔ́ wlú sran ng’ɔ ta ato nda min dunman nun’n i sua’n nun, yɛ ɔ́ ká sua sɔ’n nun lele ɔ́ sáci sua sɔ’n nin i waka nin i yɔbuɛ mun,’ ndɛ nga Zoova m’ɔ ti sonja’m be su kpɛn’n kan’n yɛ ɔ o lɛ-ɔ.”
5 I sin’n, anzi ng’ɔ nin min su ijɔ’n bali min wun lɛ, kpɛkun ɔ seli min kɛ: “Yaci, man ɔ ɲin su naan nian like ng’ɔ su fite’n.”
6 Ɔ maan n usɛli i kɛ: “?Ngue like-ɔ?”
Ɔ tɛli su kɛ: “Efa* gbogbo’n yɛ ɔ o lɛ-ɔ.” Ɔ kan guali su kɛ: “Asiɛ wunmuan’n su’n, kɛ be ti sɔ-ɔ.” 7 Kpɛkun n wunnin kɛ b’a mɛn i tre kukluku mɔ sunmun yɛ be fa yoli’n su, yɛ bla kun ti gbogbo’n i klun lɔ. 8 Ɔ maan ɔ seli kɛ: “Klunwi’n yɛ ɔ o lɛ-ɔ.” I sin’n, ɔ suli bla’n i bo yili i efa gbogbo’n nun lɔ, kpɛkun ɔ fɛli i tre m’ɔ yo nɔnnin’n, mɔ sunmun yɛ be fa yoli’n ɔ fa tinnin gbogbo’n i nuan’n su.
9 I sin’n, n mannin min ɲin su, kpɛkun n wunnin bla nɲɔn mɔ be su ba’n, aunmuan’n fa be kɔ ndɛndɛ kpa. Be ndɛwa’m be ti kɛ anunman ɔngɔ ndɛwa sa. Kpɛkun be mannin gbogbo’n su nglo, asiɛ’n nin ɲanmiɛn’n be afiɛn’n nun. 10 Ɔ maan n usali anzi ng’ɔ nin min su ijɔ’n kɛ: “?Nin yɛ be su fa efa gbogbo’n be kɔ-ɔ?”
11 Ɔ tɛli su kɛ: “Be su fɛ i kɔ Sinea* mɛn’n+ nun lɔ, naan bé kó kplán sua kun bé mɛ́n i. Kɛ be ko wie i kplan’n, bé fɛ́ i bé síe i lika sɔ m’ɔ ti i liɛ’n nun lɔ.”
6 I sin’n, n mannin min ɲin su ekun, kpɛkun n wunnin kakaklolo nnan mɔ be fin oka nɲɔn be afiɛn be su ba’n, yɛ oka’m be ti aaba. 2 Kakaklolo klikli’n i nnɛn kpanngɔ’m be ti ɔkwlɛ, yɛ kakaklolo nɲɔn su’n i nnɛn kpanngɔ’m be ti ble tuun.+ 3 Kakaklolo nsan su’n i nnɛn kpanngɔ’m be ti ufue, yɛ kakaklolo nnan su’n i nnɛn kpanngɔ’m be wunnɛn’n tata nun, wie’m be wunnɛn’n tata nun kanngan, yɛ wie’m be wunnɛn’n tata nun dandan.+
4 N usali anzi ng’ɔ nin min su ijɔ’n i kɛ: “?Ngue yɛle kakaklolo nga mun?”
5 Anzi’n tɛli min su kɛ: “Ɲanmiɛn su lɔ wawɛ+ nnan nga be ko jrannin asiɛ wunmuan’n i Min’n i ɲrun mɔ be su fite’n, be yɛ be o lɛ-ɔ.+ 6 Kakaklolo nga i nnɛn kpanngɔ’m be ti ble tuun’n ɔ su kɔ mɛn ng’ɔ o nglo lɔ lika’n nun’n i nun lɔ.+ Nnɛn kpanngɔ ufue’m be su kɔ jenvie’n i sin lɔ, yɛ nnɛn kpanngɔ nga be wunnɛn’n tata nun kanngan’n be su kɔ mɛn ng’ɔ o ja ngua lɔ lika’n nun’n i nun lɔ. 7 Nnɛn kpanngɔ nga be wunnɛn’n tata nun dandan’n be liɛ’n, be wun blibli be kɛ bé kó wlánwlán asiɛ’n su.” I sin’n ɔ seli kɛ: “Amun wɔ, amun ko wlanwlan asiɛ’n su.” Kpɛkun be ɔli asiɛ’n su wlanwlanlɛ.
8 I sin’n, ɔ flɛli min kpɛkun ɔ seli kɛ: “Be nga be su kɔ mɛn ng’ɔ o nglo lɔ lika’n nun’n i nun’n, be yoli maan Zoova i wawɛ’n trannin mɛn ng’ɔ o nglo lɔ lika’n nun’n su.”
9 Zoova kannin ndɛ kleli min ekun, ɔ seli kɛ: 10 “Be nga be trali be ɔli’n be ninnge nga Ɛldai nin Tobiya, ɔ nin Zedaia be fa bali’n, fa ninnge sɔ mun be sa nun. Yɛ cɛn sɔ’n nun’n, maan a nin sran sɔ mɔ be fin Babilɔnin bali’n be wɔ Zoziasi m’ɔ ti Sofonin i wa’n i awlo lɔ. 11 Fa sika nin sika ɔkwlɛ’n fa yo famiɛn kle kun,* kpɛkun fa wla Zozadaki i wa Zozie m’ɔ ti Ɲanmiɛn ɲrun jranfuɛ dan’n i ti.+ 12 Yɛ se i kɛ:
“‘Ndɛ nga Zoova m’ɔ ti sonja’m be su kpɛn’n kan’n yɛ: “Bian nga be flɛ i kɛ Aɲɛn’n+ yɛ ɔ o yɛ. Ɔ́ wá fífí i bɔbɔ i lika’n nun, yɛ ɔ́ kplán Zoova i sua’n.+ 13 I yɛ ɔ́ wá kplán Zoova i sua’n niɔn, kpɛkun i yɛ ɔ́ wá ɲán aɲrunɲan’n niɔn. Ɔ́ wá trɛ́n i famiɛn bia’n su, yɛ ɔ́ dí famiɛn. Asa ekun’n, kɛ ɔ o i famiɛn bia’n su’n ɔ́ yó Ɲanmiɛn ɲrun jranfuɛ,+ yɛ anuansɛ trán be nɲɔn’n* be afiɛn. 14 Kpɛkun famiɛn kle’n* wá yó Elɛmun, nin Tobiya, nin Zedaia,+ ɔ nin Sofonin i wa Ɛnin be wla kpɛnlɛ like Zoova i sua’n nun lɔ. 15 Yɛ be nga be o mmua kpa’n bé bá, bé kplán Zoova i sua’n wie.” Yɛ amún wá sí kɛ Zoova m’ɔ ti sonja’m be su kpɛn’n sunmannin min amun sin. Sɛ amun tie amun Ɲanmiɛn Zoova i aniɛn’n sakpa’n, saan sa sɔ’n jú.’”
7 Kɛ Famiɛn Dariisi kacili famiɛn’n i afuɛ nnan su’n, Zoova kannin ndɛ kleli Zakari.+ Ɔ kannin ndɛ’n kleli i anglo ngwlan su mɔ yɛle Kisilɛvu* anglo’n i cɛn ba nnan su’n nun. 2 Betɛlifuɛ’m be sunmannin Sarezɛɛ, ɔ nin Regɛmun-Melɛki nin i sran mun kɛ be ko kpata Zoova naan ɔ si be aunnvɔɛ, 3 naan be se Ɲanmiɛn ɲrun jranfuɛ nga be o Zoova m’ɔ ti sonja’m be su kpɛn’n i sua’n nun lɔ’n, ɔ nin Ɲanmiɛn nuan ijɔfuɛ’m be kɛ: “?Ɔ fata kɛ n sun yɛ nán n di aliɛ anglo nnun su’n su,+ kɛ nga n fa yoli i afuɛ kpanngban’n sa?”
4 Zoova m’ɔ ti sonja’m be su kpɛn’n ɔ kannin ndɛ kleli min ekun. I waan: 5 “Se nvle’n nunfuɛ’m be kwlaa, ɔ nin Ɲanmiɛn ɲrun jranfuɛ’m be kɛ: ‘?Blɛ mɔ amun cili nglɛmun mɔ amun yili ngwlɛ anglo nnun su’n nun, nin anglo nso su’n+ nun’n lele afuɛ ableso’n (70),+ min yɛ amun cili nglɛmun sɔ’n mannin min sakpa-ɔ? 6 ?Yɛ kɛ amun di like mɔ amun nɔn nzan’n, nán amun bɔbɔ amun liɛ ti yɛ amun di like mɔ amun nɔn nzan-ɔn? 7 ?Blɛ mɔ sran’m be tran Zerizalɛmun nin klɔ nga be mɛntɛn i’n be su mɔ be tran fɔuun’n, mɔ sran’m be tran Negɛbu nin Sefela’n, ndɛ nga Zoova sinnin i nuan ijɔfuɛ’m be lika kannin’n, ɔ fataman kɛ amun nanti su?’”+
8 Zoova kannin ndɛ kleli Zakari ekun, i waan: 9 “Ndɛ nga Zoova m’ɔ ti sonja’m be su kpɛn’n kan’n yɛ: ‘Maan amun di jɔlɛ nanwlɛ su,+ maan amun yi klolɛ dan’n+ nin aunnvɔɛ silɛ’n be nglo amun wiengu i lika. 10 Nán amun bu angbeti bla’n nin ba ng’ɔ leman si’n,*+ nin aofuɛ’n,+ ɔ nin yalɛfuɛ’n+ be lufle. Yɛ nán amun bu amun wiengu i tɛ yolɛ akunndan amun klun lɔ.’+ 11 Sanngɛ b’a kplinman su kɛ bé tíe,+ be yoli ɲin kekle,+ yɛ be tanninnin be su mun naan b’a timan.+ 12 Be keteli be awlɛn’n kɛ diaman* sa,+ b’a nantiman mmla’n nin ndɛ nga Zoova m’ɔ ti sonja’m be su kpɛn’n sinnin i wawɛ’n i lika kan kleli laa Ɲanmiɛn nuan ijɔfuɛ mun’n su.+ Ɔ maan Zoova m’ɔ ti sonja’m be su kpɛn’n fali be wun ya dan.”+
13 “‘Kɛ n* flɛli be’n b’a tieman,+ n kusu sɛ be flɛ min’n n su tieman,’+ ndɛ nga Zoova m’ɔ ti sonja’m be su kpɛn’n kan’n yɛ ɔ o lɛ-ɔ. 14 ‘Yɛ n fali aunmuan dan kun n sanngannin be nun, ɔ maan be ɔli nvle kwlaa nga be siman be’n be nun.+ Mɛn’n tɔli srolo be sin lɔ, sran fi sinman lɔ, yɛ sran fi sɛmɛn i sin lɔ.+ Afin be yoli maan lika klanman sɔ’n kacili lika kain.’”
8 Zoova m’ɔ ti sonja’m be su kpɛn’n kannin ndɛ kleli min ekun. Ɔ seli kɛ: 2 “Ndɛ nga Zoova m’ɔ ti sonja’m be su kpɛn’n kan’n yɛ: ‘Ń má tú min klun ń kplí Siɔn i ti, ń kplí i ti juejue su.+ Ń má fá ya dan kpa ń kplí i ti juejue su.’”
3 “Ndɛ nga Zoova kan’n yɛ: ‘Ń má sá min sin Siɔn+ yɛ ń trán Zerizalɛmun lɔ.+ Bé wá flɛ́ Zerizalɛmun kɛ nanwlɛ klɔ,+ yɛ bé flɛ́ Zoova m’ɔ ti sonja’m be su kpɛn’n i oka’n kɛ oka m’ɔ ti Ɲanmiɛn liɛ klonglo’n.’”+
4 “Ndɛ nga Zoova m’ɔ ti sonja’m be su kpɛn’n kan’n yɛ: ‘Yasua nin bla oke’m bé wá trán Zerizalɛmun klɔ’n i gua’m be su ekun, be tinuntinun nin be sa nun kpɔnman, afin b’a yo oke.+ 5 Yɛ yasua kanngan nin bla kanngan kpanngban bé wá kán ngowa klɔ’n i gua’m be su.’”+
6 “Ndɛ nga Zoova m’ɔ ti sonja’m be su kpɛn’n kan’n yɛ: ‘Nvlefuɛ nga mun be nun nga bé ká lɛ blɛ sɔ’n nun’n, be kwla bu i kɛ i sɔ yolɛ’n ti kekle. ?Sanngɛ i sɔ yolɛ’n ti kekle min sa nun?’ Ndɛ nga Zoova m’ɔ ti sonja’m be su kpɛn’n kan’n yɛ ɔ o lɛ-ɔ.”
7 “Ndɛ nga Zoova m’ɔ ti sonja’m be su kpɛn’n kan’n yɛ: ‘Ń má dé min nvlefuɛ mun mɛn nga be o wia afiliɛ lɔ’n nin wia atɔliɛ lɔ’n be sa nun.+ 8 Kpɛkun ń fá be ń bá, yɛ bé trán Zerizalɛmun.+ Bé yó min nvle, yɛ n kusu ń káci be Ɲanmiɛn+ m’ɔ ti nanwlɛfuɛ’n, m’ɔ yo sa i nuan su sɛsɛ’n.’”
9 “Ndɛ nga Zoova m’ɔ ti sonja’m be su kpɛn’n kan’n yɛ: ‘Maan amun jran kekle,*+ amun mɔ andɛ’n amun su tie ndɛ yɛ’n Ɲanmiɛn nuan ijɔfuɛ’m be nuan nun’n,+ i nun mɔ bé wlá Zoova m’ɔ ti sonja’m be su kpɛn’n i sua’n i bo ase naan bé kplán’n, ndɛ kunngba sɔ’n yɛ be kannin-ɔn. 10 Afin ka naan blɛ sɔ’n w’a ju’n, be manman sran nin nnɛn’m be akatua.+ Yɛ be kpɔfuɛ’n ti’n lika kɔlɛ’n ti kekle, afin n yoli maan sran’m be kwlaa be jasoli be wiengu’m be wun.’
11 “‘Sanngɛ siɛn’n, n su yoman nvlefuɛ nga be kali’n be kɛ laa’n sa kun,’+ ndɛ nga Zoova m’ɔ ti sonja’m be su kpɛn’n kan’n yɛ ɔ o lɛ-ɔ. 12 ‘Afin bé wá lúa fɔundi’n i mma’n. Viɲin’n sú mma yɛ asiɛ’n yó like ye.+ Yɛ ɲanmiɛn’n gúɛ i bɔlɛ’n i ase. Kpɛkun ń má yó maan ninnge kwlaa sɔ mun bé yó nvlefuɛ nga be kali lɛ’n be aja like.+ 13 Ee, Zida nvle nin Izraɛli nvle, kɛ nga nvlenvle’m be fa boli amun sannzan sa’n,+ ń má dé amun, yɛ bé bó muae bé mán amun.+ Nán maan srɛ kun amun!+ Maan amun jran kekle.’*+
14 “Ndɛ nga Zoova m’ɔ ti sonja’m be su kpɛn’n kan’n yɛ: ‘Zoova m’ɔ ti sonja’m be su kpɛn’n waan: “N fuali kpa kɛ ń fá ɲrɛnnɛn ń yí amun su, afin amun nannan’m be yoli maan n fali ya dan, yɛ i sɔ’n w’a yoman min nsisɔ.+ 15 I wafa kunngba’n, m’an fua kpa siɛn’n kɛ ń yó Zerizalɛmun nin Zida i awlo’n be ye.+ Nán maan srɛ kun amun!”’+
16 “‘Like ng’ɔ fata kɛ amun yo’n yɛ: Maan amun kan ndɛ nanwlɛ kle amun wiengu,+ yɛ jɔlɛ nga amun di be amun anuan’m be nun’n, maan ɔ yo nanwlɛ su yɛ maan ɔ yo naan sran’m be tran fɔuun.+ 17 Nán amun sunnzun amun awlɛn’n nun lɔ kɛ amún yó amun wiengu tɛ.+ Yɛ nán amun klo ato nda talɛ.+ Afin n kpɔ ninnge sɔ’m be kwlaa,’+ ndɛ nga Zoova kan’n yɛ ɔ o lɛ-ɔ.”
18 Zoova m’ɔ ti sonja’m be su kpɛn’n kannin ndɛ kleli min ekun. Ɔ seli kɛ: 19 “Ndɛ nga Zoova m’ɔ ti sonja’m be su kpɛn’n kan’n yɛ: ‘Nglɛmun nga amun ci i anglo nnan su’n,+ nin anglo nnun su’n,+ nin anglo nso su’n,+ nin anglo blu su’n,+ bé wá yó aklunjɔɛ dilɛ blɛ, bé yó Zida i awlo’n i aklunjɔɛ blɛ, bé yó aklunjɔɛ cɛn dilɛ.+ I sɔ’n ti’n, maan amun klo nanwlɛ’n nin fɔundi’n.’
20 “Ndɛ nga Zoova m’ɔ ti sonja’m be su kpɛn’n kan’n yɛ: ‘Sanngɛ blɛ wie wá jú’n, nvlenvle mun nin klɔ kpanngban be su sran mun bé wá bá. 21 Yɛ klɔ kun sufuɛ’m bé kɔ́ bé kó sé klɔ uflɛ sufuɛ’m be kɛ: “Maan e wɔ naan e ko tu e klun e srɛ Zoova naan ɔ si e aunnvɔɛ, yɛ maan e wɔ e ko kunndɛ Zoova m’ɔ ti sonja’m be su kpɛn’n. E bɔbɔ e su kɔ wie.”+ 22 Yɛ sran kpanngban, ɔ nin nvle mɔ be le kwlalɛ’n, bé bá Zerizalɛmun bé wá kúnndɛ Zoova m’ɔ ti sonja’m be su kpɛn’n,+ yɛ bé srɛ́ Zoova kɛ ɔ si be aunnvɔɛ.’
23 “Ndɛ nga Zoova m’ɔ ti sonja’m be su kpɛn’n kan’n yɛ: ‘Blɛ sɔ’n nun’n, sran blu mɔ be fin nvlenvle’m be nun’n, mɔ be kan aniɛn wafawafa kwlaa’n+ bé trá Zifu kun* i tralɛ’n,* bé trɛ́ i kekle kpa, kpɛkun bé sé kɛ: “E kunndɛ kɛ e nin amun é kɔ́,+ afin e tili i kɛ Ɲanmiɛn nin amun o nun.”’”+
9 Ndɛ cinnjin kun:
“Zoova kan ndɛ’n wɔ Adraki mɛn’n,
Damasi yɛ ɔ kan wɔ i kpa’n niɔn.+
(Afin Zoova ɲin ta klɔ sran mun,+
ɔ nin Izraɛli akpasua’m be kwlaa.)
2 Yɛ ɔ kan wɔ Amati,+ m’ɔ nin i be ja awɛ’n,
3 Tir kplannin talɛ* kun i bɔbɔ i wun.
Ɔ tiannin sika i nuan kɛ ndutre sa,
ɔ tiannin sika ɔkwlɛ i nuan kɛ akpɔ su nnɔtiɛ sa.+
Kpɛkun sin dí i.+
5 Askalɔn wún i, yɛ srɛ kún i.
Gaza i wla wá bó i wun dan kpa,
yɛ Ekrɔn i wla wá bó i wun dan wie, afin klɔ m’ɔ fɛli i wla guɛli i su’n i ɲin w’a gua ase.
Gaza su ɲanman famiɛn kun,
yɛ sran su tranman Askalɔn lɔ kun.+
6 Aofuɛ kun yɛ ɔ́ wá trán Asdɔdu lɔ-ɔ,
yɛ ń má yó maan Filistifuɛ’n i wun tulɛ’n wíe.+
7 Ń má yí ninnge nga mmoja o be wun’n i nuan nun,
ɔ nin ninnge kainkain mun i je’n nun,
yɛ sran ng’ɔ́ ká lɛ’n ɔ́ yó e Ɲanmiɛn’n i liɛ.
8 Ń má jrán min sua’n i wun lɛ naan ń sɛ́sɛ́ i.+
I liɛ’n, sran fi su wluman lɔ yɛ sran fi su fiteman.
9 Ee, Siɔn i wa bla, maan ɔ klun jɔ.
Ee, Zerizalɛmun i wa bla, kpan aklunjɔɛ kpanlɛ.
10 Ń má núnnún alɛ kunlɛ kakaklolo’n Efraimun lɔ,
ɔ nin nnɛn kpanngɔ’n Zerizalɛmun lɔ.
Ń má núnnún alɛ kunlɛ ta’n.
Yɛ ɔ́ kán fɔundi dilɛ ndɛ klé nvlenvle mun.+
I sielɛ’n fɛ́ i jenvie’n i bue kun su lele fá jú i bue kun’n su lɔ,
11 Ee mmo bla, ɔ kusu, ɔ aenguɛ’n i mmoja’n ti’n,
ń má fá ɔ bisuafuɛ mun kunman mɔ nzue nunman nun’n i nun ń fíte.+
12 Bisuafuɛ mun, amun mɔ amun wla o like su’n, amun sa amun sin fiawlɛ’n nun.+
Ń kán klé wɔ andɛ:
‘Mmo bla, ń má túa ɔ kalɛ sɔ kpɛ nɲɔn.+
13 Afin ń má blí Zida* kɛ min ta sa.
Yɛ ń fá Efraimun ń wlɛ́ i ta’n nun.
Ee Siɔn, ń má yó maan ɔ mma mun
bé jáso Glɛki mɛn’n nun ba mun be wun,
yɛ ń má yó maan á káci kɛ safuɲrɛn kun i tokofi’n sa.’
14 Bé wá wún Zoova be ti su nglo,
yɛ i ta mma’n wá sín kɛ ɲanmiɛn m’ɔ kpa sin’n sa.
Miɛn Zoova m’ɔ Sie Like Kwlakwla’n ɔ́ wá bó awɛ’n,+
yɛ ɔ nin ja ngua lɔ aunmuan dan’n yɛ bé bá-ɔ.
15 Zoova m’ɔ ti sonja’m be su kpɛn’n, ɔ́ kplí be ti,
yɛ bé wá dí kpafloko’m be nun yɔbuɛ mun, kpɛkun bé ɲán kwlalɛ be su.+
Bé nɔ́n nzan, yɛ be ɲin su’n yó be kɛ b’a nɔn duvɛn sa.
Bé yí kɛ kpongbo ba sa,
bé yó kɛ tɛ yiwlɛ’n i cɔnjɔ mun sa.+
16 Cɛn sɔ’n nun’n, be Ɲanmiɛn Zoova dé be,
ɔ́ wá dé i nvlefuɛ mun kɛ nga nnɛn kankanfuɛ kun fa de i nnɛn mun’n sa.+
Afin bé wá yó kɛ famiɛn kle’n i nun yɔbuɛ kpakpa mɔ be bo mianmian’n sa i asiɛ’n su.+
17 Afin i klun ufue’n ti dan,+
yɛ ɔ yo ɲɛnmɛn dan!
Ble’n wá mán gbanflɛn’m be wunmiɛn,
yɛ duvɛn lɔflɛ’n mán talua mɔ be nin-a siman bian’n be wunmiɛn.”+
10 “Amun srɛ Zoova naan nzue tɔ munngun nun.
Zoova yɛ ɔ yo maan nzue’n mlan m’ɔ tɔ dan’n niɔn,
i yɛ ɔ yo maan nzue’n tɔ man be-ɔ,+
i yɛ ɔ yo maan fie su ninnge’m be fifi mɔ sran kwlaa ɲan wie’n niɔn.
2 Afin amuin ba* nga be sɛli be’n, be kannin ato ndɛ,
yɛ wunnzue yifuɛ’m be wunnin aolia nun like m’ɔ timan nanwlɛ’n,
be kan laliɛ finfin’m be ndɛ,
be waan bé fɔ́nvɔ sran mun, sanngɛ ɔ yoman ye.
I sɔ’n ti yɛ bé wá wlánwlán kɛ bua sa’n niɔn,
bé wá fɛ́, afin be leman sunianfuɛ.
3 M’an fa bua sunianfuɛ’m be wun ya dan kpa,
yɛ be nga be dun nvlefuɛ’m be ɲrun mmua mɔ be kle be yalɛ’n,* ń má úsa be like nga be yo’n i su sa.
Afin Zoova m’ɔ ti sonja’m be su kpɛn’n w’a kpɛ i ɲin i bua fa’n su,+ w’a kpɛ i ɲin Zida i awlo’n su,
yɛ w’a yo maan b’a yo kɛ i nnɛn kpanngɔ m’ɔ le ɲrun alɛ kunlɛ nun’n sa.
4 Sran cinnjin kpafuɛ’n* fin i,
siefuɛ m’ɔ suan sran bo’n* fin i,
alɛ kunlɛ ta’n fin i,
i wun lɔ yɛ junman sunianfuɛ’m* be kwlaa be fin-ɔn, be kwlaa be fite likawlɛ.
5 Yɛ bé káci kɛ safuɲrɛn sa,
alɛ kunlɛ nun’n, bé tíatía akpɔ’n su nnɔtiɛ’n nun.
6 Ń má yó maan Zida i awlo’n ɔ́ ɲán kwlalɛ,
yɛ ń dé Zozɛfu i awlo’n.+
Ń má fá be ń sá be sin be mɛn’n nun,
afin ń má sí be aunnvɔɛ.+
Yɛ bé yó kɛ n nin-a yiman be blo le sa,+
afin n ti be Ɲanmiɛn Zoova, yɛ ń má tɛ́ be su.
7 Efraimunfuɛ’m bé káci kɛ safuɲrɛn m’ɔ le wunmiɛn kpa’n sa,
be klun jɔ́ kpa kɛ b’a nɔn duvɛn sa,+
be mma’m bé wún i sɔ’n yɛ be klun jɔ́,
be klun jɔ́ Zoova dunman nun.+
9 Ń má sánndi be nvlenvle’m be nun kɛ like mma sa,
sanngɛ bé wlá kpɛ́n min su lika mmua’m be nun,
be nin be mma mun bé ɲán wunmiɛn ekun, yɛ bé sá be sin.
10 Ń má fá be Ezipti mɛn’n nun ń bá,
ń yíayía be, yɛ ń fá be Asiri lɔ ń bá,+
ń má fá be ń kɔ́ Galaadi+ nin Liban mɛn’n nun,
yɛ lika’n su juman be.+
11 Kɛ ɔ́ sín jenvie’n nun’n i wla bó i wun,
yɛ kɛ ɔ o jenvie’n nun’n ɔ́ kwlá jenvie m’ɔ bo’n.+
Nili Nzue’n i bo’n kwlaa wú kee.
Asiri i wun tulɛ’n ɔ́ kán ase,
yɛ Ezipti i kpɔnman’n kɔ́.+
12 Ń má yó maan Zoova ti’n bé ɲán kwlalɛ,+
yɛ bé nánti i dunman nun,’+ ndɛ nga Zoova kan’n yɛ ɔ o lɛ-ɔ.”
11 “Ee Liban, tike ɔ anuan mun,
naan sin yra ɔ sɛdri waka mun.
2 Wɔ, zenevrie waka, kpan, afin sɛdri waka’n w’a tɔ.
B’a bubu waka mɔ be le ɲrun’n!
Basan lɔ sɛnin waka mun, amun kpan,
afin b’a saci bo ble’n!
3 Tie nnɛn kankanfuɛ’m be awuyomo mɔ be bo’n!
Afin be aɲrunɲan’n w’a saci.
Tie asɔmɔli gbanflɛn’m* be kpanlɛ’n!
Afin Zurdɛn i nuan ijre kpanngban’n w’a saci.
4 “Ndɛ nga min Ɲanmiɛn Zoova kan’n yɛ: ‘Nian bua mɔ be su wa kun be’n be lika.+ 5 Be nga be to be’n, be kpɛ be kɔmin,+ yɛ be seman be kɛ be yoli sa tɛ. Kpɛkun be nga be yo be atɛ’n+ be se kɛ: “Maan manmanlɛ’n yo Zoova liɛ, afin ń má káci aɲanbeunfuɛ.” Be kankanfuɛ’m be siman be aunnvɔɛ.’+
6 “Afin n su siman nvle’n nunfuɛ’m be aunnvɔɛ kun. I sɔ’n ti’n, ń má yó maan sran’m bé síe be wiengu yɛ be famiɛn’n kusu síe be. Bé wá sáci mɛn’n, yɛ n su deman be be sa nun. Ndɛ nga Zoova kan’n yɛ ɔ o lɛ-ɔ.”
7 Ee, bua mɔ be kle be yalɛ’n, amun dunman nun’n, n niannin bua mɔ be su wa kun be’n be lika.+ I sɔ’n ti’n, n fali kpɔnman nɲɔn, n flɛli kun kɛ Klanman, yɛ n flɛli kun kɛ Anuansɛ,+ kpɛkun n niannin bua’m be lika. 8 Yɛ n tuli bua sunianfuɛ nsan be junman nun anglo kunngba nun. Afin m’an kwlá traman min awlɛn be wun, yɛ be kusu be kpɔli min wie. 9 Yɛ n seli kɛ: “N su nianman amun lika kun. Sran ng’ɔ su wu’n, maan ɔ wu, yɛ sran nga be su kun i’n, maan be kun i. Be nga be kali lɛ’n, maan be di be wiengu i nnɛn’n.” 10 Ɔ maan n fali min kpɔnman Klanman’n+ kpɛkun n kpɛkpɛli nun, n sacili aenguɛ nga e nin nvlefuɛ’m be kwlaa e trali’n. 11 Ɔ maan ɔ sacili cɛn sɔ’n nun, kpɛkun bua mɔ be kle be yalɛ’n, mɔ be su nian min’n be wunnin kɛ ndɛ sɔ’n fin Zoova.
12 I sin’n, n seli be kɛ: “Sɛ ɔ ti amun klun su’n, amun fa min akatua’n be man min, sɛ kusu ɔ timan amun klun su’n, amun fa.” Yɛ be fali* min akatua’n be mannin min-ɔn, be mannin min sika mma ablasan (30).+
13 I sin’n, Zoova seli min kɛ: “Fa guɛ i ninnge kpakpa’m be guawlɛ’n nun lɔ. Min akatua dan nga be fa mannin min’n yɛ ɔ o lɛ-ɔ.”+ Ɔ maan n fali sika mma ablasan’n (30) kpɛkun n fa guɛli i Zoova i sua’n nun lɔ ninnge kpakpa’m be siewlɛ’n nun.+
14 I sin’n, n kpɛkpɛli min kpɔnman nɲɔn su’n mɔ yɛle Anuansɛ’n+ nun, n sacili anuansɛ ng’ɔ o Zida nin Izraɛli be afiɛn’n.+
15 Kpɛkun Zoova seli min kɛ: “Fa bua sunianfuɛ kun m’ɔ siman junman di’n,+ i junman dilɛ ninnge mun. 16 Afin ń má mán bua sunianfuɛ kun i atin naan ɔ sie mɛn’n. Ɔ su nianman bua nga be su wu’n be lika.+ Ɔ su kunndɛman be nun kanngan mun, ɔ su yoman be nga be kpinndinman’n be ayre,+ yɛ ɔ su manman be nga be kwla jran be ja’m be su’n be aliɛ. Sanngɛ ɔ́ dí be nga b’a lo kpa’n be nnɛn’n,+ yɛ ɔ́ tútú bua’m be ja bui mun.+
17 Min bua sunianfuɛ finfinfuɛ+ m’ɔ yaci bua mun’n,+ i yako!
Tokofi kun wá fín i sa’n nin i ɲinma fama’n.
I sa’n wú i wun mlɔnmlɔn,
yɛ i ɲinma fama’n ɔ́ sí mlɔnmlɔn.”
12 Ndɛ cinnjin kun:
“Izraɛli i su ndɛ nga Zoova kan’n,” ndɛ nga Zoova kan’n yɛ ɔ o lɛ-ɔ,
i m’ɔ trɛli ɲanmiɛn’n nun’n,+
m’ɔ wlali asiɛ’n i bo ase’n,+
m’ɔ fali wunmiɛn m’ɔ man nguan’n wlali klɔ sran nun’n.
2 “Ń má fá Zerizalɛmun ń yó klowa* kun. Klowa sɔ’n wá yó maan nvle nga be mantan Zerizalɛmun’n bé bó tanngan. Bé wá bó nanmue Zida nin Zerizalɛmun klɔ’n be wun.+ 3 Cɛn sɔ’n nun’n, ń má yó maan Zerizalɛmun káci kɛ yɔbuɛ nɔnnin wie sa nvlenvle’m be kwlaa be ɲrun. Be kwlaa nga be kunndɛ kɛ bé mɛ́n i su’n, saan bé yó be wun like yaya kpa.+ Yɛ nvlenvle’m be kwlaa be bo yó kún i wun.+ 4 Cɛn sɔ’n nun’n, ń yó maan srɛ dan kpa kún nnɛn kpanngɔ mun, yɛ be su fufuɛ’m bé bó fia. Ń má fá min ɲin ń síe i Zida i awlo’n su, sanngɛ ń má yó maan nvlenvle’m be nnɛn kpanngɔ’m be kwlaa be ɲinma sí,” ndɛ nga Zoova kan’n yɛ ɔ o lɛ-ɔ. 5 “Zida lɔ sɛki’m* bé wá sé be klun lɔ kɛ: ‘Zerizalɛmunfuɛ’m be ti min wunmiɛn, be Ɲanmiɛn Zoova m’ɔ ti sonja’m be su kpɛn’n i dunman nun.’+ 6 Cɛn sɔ’n nun’n, Zida lɔ sɛki’m bé yó kɛ kpongbo kun mɔ sin o nun, m’ɔ taka yie kwle kun i afiɛn’n sa, yɛ bé yó kɛ tɛ mɔ b’a sɔ i nuan’n sa, ble mɔ b’a kpɛ mɔ b’a tiɛn i nuan’n i afiɛn.+ Bé yrá nvlenvle nga be bo sin yia be mɔ be o be fama su nin be bɛ su’n be kwlaa,+ yɛ Zerizalɛmunfuɛ’m bé wá trán be klɔ’n su* ekun, bé trán Zerizalɛmun lɛ.+
7 “Yɛ Zoova dún mmua dé Zida i tannin sua mun. I liɛ’n, Davidi i awlo’n nin Zerizalɛmunfuɛ’m be su yoman klanman dan traman Zida. 8 Cɛn sɔ’n nun’n, Zoova wá kplí Zerizalɛmunfuɛ’m be ti.+ Cɛn sɔ’n nun’n, be nun sran nga i ja kpla’n, ɔ́ yó kɛ Davidi sa, yɛ Davidi i awlo’n yó kɛ Ɲanmiɛn sa, ɔ́ yó kɛ Zoova i anzi m’ɔ dun be ɲrun mmua’n sa.+ 9 Cɛn sɔ’n nun’n, ń má núnnún nvlenvle kwlaa nga be jaso Zerizalɛmun wun’n.+
10 “Ń má fá min wawɛ’n ń mán Davidi i awlo’n, ɔ nin Zerizalɛmunfuɛ mun. Min klun wá jɔ́ be wun, yɛ bé wá tú be klun bé srɛ́ min, bé wá nían sran nga be wɔli i cua’n,+ kpɛkun bé wá sún i kɛ nga be fa sun ba yasua kunngba cenje’n sa, yɛ bé wá sún i kpa kɛ nga be fa sun ba yasua klikli’n sa. 11 Cɛn sɔ’n nun’n, sunlɛ’n wá yó dan Zerizalɛmun lɔ, ɔ́ yó kɛ sunlɛ nga be sunnin Adadrimɔn lɔ Megido lika kpɛtɛkplɛɛ’n+ nun lɔ’n sa. 12 Mɛn’n yí ngwlɛ, awlobo’m be tinuntinun bé yí ngwlɛ: Davidi i osu’n nunfuɛ’m bé yí be liɛ, yɛ be nun bla’m bé yí be liɛ. Natan+ i osu’n nunfuɛ’m bé yí be liɛ, yɛ be nun bla’m bé yí be liɛ. 13 Levi+ i osu’n nunfuɛ’m bé yí be liɛ, yɛ be nun bla’m bé yí be liɛ. Simeifuɛ’m+ bé yí be liɛ, yɛ be nun bla’m bé yí be liɛ. 14 Yɛ awlobo kwlaa nga be kali lɛ’n, be tinuntinun bé yí be liɛ, yɛ be nun bla’m bé yí be liɛ.
13 “Cɛn sɔ’n nun’n, bé wá tíke gbo kun su bé mán Davidi i awlo’n, ɔ nin Zerizalɛmunfuɛ mun naan be fa yo be wun sanwun, be sa tɛ’n nin fiɛn nun mɔ be wluli’n ti.+
2 “Cɛn sɔ’n nun’n, ń má núnnún amuin’m be dunman’n mɛn’n nun,+ yɛ be wla su kpɛnman be su kun. Ń má núnnún Ɲanmiɛn nuan ijɔfuɛ mun,+ ɔ nin wawɛ fiɛn’n mɛn’n nun,” ndɛ nga Zoova m’ɔ ti sonja’m be su kpɛn’n kan’n yɛ ɔ o lɛ-ɔ. 3 “Yɛ sɛ sran kun ijɔ Ɲanmiɛn nuan ekun’n, sran sɔ’n i si nin i nin mɔ be wuli i’n, bé sé i kɛ: ‘A su kaman nguan nun, afin a kannin ato ndɛ Zoova dunman nun.’ Kpɛkun i si nin i nin mɔ be wuli i’n, bé wɔ́ i cua, ndɛ ng’ɔ kannin’n ti.+
4 “Cɛn sɔ’n nun’n, kɛ Ɲanmiɛn nuan ijɔfuɛ’m bé kán like nga be wunnin i aolia nun’n i ndɛ’n ɲannzuɛn kún be. Yɛ be su wlaman nnɛn ndrɛ tralɛ mɔ be fa di junman’n+ be fa lakaman sran mun. 5 Yɛ be tinuntinun bé sé kɛ: ‘N timan Ɲanmiɛn nuan ijɔfuɛ. N ti fie difuɛ, afin i nun mɔ n ti kaan’n sran kun toli min.’ 6 Yɛ sɛ sran kun usɛ i kɛ: ‘?Ngue yɛle kanninkannin nga be o ɔ walɛ’m be afiɛn* yɛ’n?’ Ɔ́ tɛ́ su kɛ: ‘Min janvuɛ’m* be awlo lɔ yɛ be boli min kannin sɔ mun-ɔn.’”
7 “Ee, tokofi, jaso min nnɛn kankanfuɛ’n+ i wun,
jaso sran m’ɔ ti min janvuɛ’n i wun,” ndɛ nga Zoova m’ɔ ti sonja’m be su kpɛn’n kan’n yɛ ɔ o lɛ-ɔ.
“Yo nnɛn kankanfuɛ’n i like yaya+ naan nnɛn’m* be bo sanndi.+
Yɛ ń má mán min sa’n su be nga be leman ɲrun’n be wun.”
8 Zoova waan: “Mɛn’n i kwlaa nun’n,
sɛ be bu sran’m be nun bue nsan’n, bue nɲɔn bé wú,
kpɛkun bue nsan su’n yɛ ɔ́ ká lɛ-ɔ.
9 Ń má fá be bue nsan su ng’ɔ kali lɛ’n ń yí i sin nun,
yɛ ń yí be nun fiɛn’n kɛ nga be fa yi sika nun fiɛn’n sa,
ń sá be ń nían kɛ nga be fa sa sika ɔkwlɛ’n be nian’n sa.+
Bé wá bó min dunman,
yɛ ń tɛ́ be su.
Ń sé kɛ: ‘Be ti min sran,’+
yɛ be kusu bé sé kɛ: ‘Zoova ti e Ɲanmiɛn.’”
14 “Nian! Cɛn kun su ba. Cɛn sɔ’n ti Zoova liɛ. Cɛn sɔ’n nun’n, ninnge nga be fali be ɔ lɔ’n,* bé wá cɛ́cɛ́ be nun ɔ afiɛn. 2 Ń má yíayía nvlenvle mun naan be fa alɛ wla Zerizalɛmun sin, bé fá klɔ’n, bé fɛ́n sua’m be nun ninnge mun, yɛ be nin bla mun bé lá kekle nun. Sɛ be bu klɔ’n nunfuɛ’m be nun nɲɔn’n, bé trá be bue kun bé kɔ́, sanngɛ be nga be ka lɛ’n be su faman be klɔ’n su be kɔman.
3 “Zoova wá fíte yɛ ɔ nin nvle sɔ’m bé kún,+ kɛ ng’ɔ fa kun alɛ alɛ kunlɛ cɛn’n nun’n sa.+ 4 Cɛn sɔ’n nun’n, ɔ́ jrán Olivie Oka+ m’ɔ o Zerizalɛmun i ɲrun ndɛnman su wia afiliɛ lɔ’n i su. Yɛ Olivie Oka’n i nun kpáci nɲɔn, ɔ́ fɛ́ i wia afiliɛ lɔ lele fá jú wia atɔliɛ lɔ, ɔ́ káci kongo dan kpa kun. Yɛ oka’n i bue kun kɔ́ nglo lɔ lika’n nun, yɛ i bue kun kɔ́ ngua lɔ lika’n nun. 5 Amún wá wánndi bé kɔ́ min oka’m be kongo’n nun lɔ, afin oka’m be kongo’n ɔ́ kɔ́ lele jú Azɛli. Amún wá wánndi kɛ Famiɛn Oziasi m’ɔ ti Zida famiɛn’n+ i blɛ su mɔ asiɛ’n kejeli mɔ amun wanndili’n sa. Yɛ min Ɲanmiɛn Zoova wá bá, ɔ nin be mɔ be ti i liɛ klonglo’n yɛ bé bá-ɔ.+
6 “Cɛn sɔ’n nun’n, be su wunman kannin m’ɔ le ɲrun’n,+ ninnge’m bé kéte.* 7 Yɛ ɔ́ yó cɛn kun mɔ sran kwlaa sí kɛ ɔ ti Zoova liɛ-ɔ.+ Lika su cɛnman yɛ lika su sanman. Nnɔsua nun bɔbɔ’n, lika’n kpája. 8 Blɛ sɔ’n nun’n, nzue m’ɔ man nguan’n+ ɔ́ sónji Zerizalɛmun lɔ bá.+ I bue kun sónji kɔ́ jenvie ng’ɔ o wia afiliɛ lɔ’n*+ su, yɛ i bue kun sónji kɔ́ jenvie’n i bue ng’ɔ o wia atɔliɛ lɔ’n*+ su. Ɔ́ yó sɔ munngun nun nin wawa nun. 9 Yɛ Zoova yó Famiɛn asiɛ wunmuan’n su.+ Cɛn sɔ’n nun’n, Zoova yó kunngba,+ yɛ i dunman’n yó kunngba.+
10 “Mɛn wunmuan’n yó kɛ Araba’n+ sa, ɔ́ fɛ i Geba+ lele fá jú Rimɔn+ m’ɔ o Zerizalɛmun i ja ngua lɔ lika’n nun’n su. Zerizalɛmun wá jáso ekun i osu’n nun, yɛ bé trán lɔ ekun,+ ɔ́ fɛ́ i Bɛnzamɛn Anuan’n+ su lele fá jú Anuan Klikli’n i lika liɛ’n nun lɔ, ɔ́ kɔ́ lele jú Cɔnjɔ su Anuan’n su, yɛ ɔ́ fɛ́ i Ananɛli Sua Fleiin’n+ su lele fá jú famiɛn i duvɛn yiwlɛ’m* be su lɔ. 11 Nvlefuɛ’m bé trán lɔ ekun, yɛ be su bumɛn i fɔ kɛ bé núnnún i kun,+ yɛ be nga bé wá trán Zerizalɛmun’n bé trán fɔuun.+
12 “Ɲrɛnnɛn nga Zoova wá fá yí i nvlenvle kwlaa nga be fa alɛ be wla Zerizalɛmun sin’n be su’n yɛ:+ Blɛ mɔ be jin nglo’n, be wunnɛn’n kplɔ́, be ɲinma’n kplɔ́ be ti nun, yɛ be taaman’n kplɔ́ be nuan nun.
13 “Cɛn sɔ’n nun’n, Zoova wá yó maan be nun sánngan dan kpa. Yɛ cɛn sɔ’n nun’n, sran kun trɛ́ i wiengu sa, yɛ sran kun yó i wiengu like yaya.*+ 14 Zida wá kún alɛ Zerizalɛmun lɔ wie. Yɛ bé wá tían nvlenvle nga be mantan be’n be aɲanbeun ninnge’m be nuan: Sika ɔkwlɛ, nin sika, nin tralɛ kpanngban kpa.+
15 “Yɛ ɲrɛnnɛn kunngba sɔ’n i wunsu wá tɔ́ nnɛn kpanngɔ mun, nin milɛ mun, nin ɲɔnngɔnmin mun, ɔ nin nnɛn nga be o nanmue sɔ’m be nun’n be kwlaa be su wie.
16 “Nvlenvle nga be fa alɛ wla Zerizalɛmun sin’n be nunfuɛ kwlaa ng’ɔ ka lɛ’n, afuɛ kwlaa nun’n,+ ɔ́ kɔ́ kó kóto Famiɛn’n i bo, ɔ́ kóto Zoova m’ɔ ti sonja’m be su kpɛn’n i bo,+ yɛ ɔ́ dí Kpata Bo Tranlɛ Cɛn’n.+ 17 Sanngɛ sɛ asiɛ’n su awlobo’m be nun sran kun kɔman Zerizalɛmun naan ɔ ko kotoman Famiɛn’n i bo’n, naan ɔ ko kotoman Zoova m’ɔ ti sonja’m be su kpɛn’n i bo’n, nzue su tɔman.+ 18 Sɛ Ezipti awlobo’n w’a baman naan w’a wluman klɔ’n nun’n, nzue su tɔman. Yɛ ɲrɛnnɛn nga Zoova fa yi i nvlenvle nga be baman be wa diman Kpata Bo Tranlɛ Cɛn’n be su’n, ɔ́ fá yí be su wie. 19 Ezipti i sa tɛ’n, ɔ nin nvle kwlaa nga be baman be wa diman Kpata Bo Tranlɛ Cɛn’n be sa tɛ’n ti’n, fɔ nga bé wá fá tú be’n yɛ ɔ o lɛ-ɔ.
20 “Cɛn sɔ’n nun’n, bé wá klɛ́ nnɛn kpanngɔ’m be gleinglein’m be su kɛ: ‘Sanwun yolɛ’n ti Zoova liɛ.’+ Yɛ Zoova i sua’n nun lɔ sɛ nga be tɔn be nun like’n,*+ bé yó kɛ kpongbo ba+ nga be o tɛ yiwlɛ’n i ɲrun’n sa. 21 Yɛ like tɔnlɛ sɛ nga be o Zerizalɛmun nin Zida lɔ’n bé yó sanwun, yɛ bé yó Zoova m’ɔ ti sonja’m be su kpɛn’n i liɛ. Be kwlaa nga bé wá yí tɛ’n bé bá, yɛ bé fá be nun wie mun bé tɔ́n like. Cɛn sɔ’n nun’n, Kanaanfuɛ* fi su tranman Zoova m’ɔ ti sonja’m be su kpɛn’n i sua’n nun kun.”+
I bo’n yɛ: “Zoova i Wla Kpɛnnin su.”
Nian Nd. B15 nun.
Annzɛ “ń fá wlá ɔ sa nun, á nían su.”
Annzɛ “yoli ninnge kanngan’m be cɛn’n.”
Annzɛ “yɔbuɛ’n”, “etɛn’n.”
Yɛle kɛ, waka sama mɔ mma o be su’n.
Kude kun ti santimɛtri 44,5. Nian Nd. B14 nun.
Efa kun ti litri 22. Nian Nd. B14 nun.
Yɛle kɛ, Babilɔnin.
Annzɛ “famiɛn kle dan kun.”
Yɛle kɛ, i famiɛn dilɛ junman’n nin i Ɲanmiɛn ɲrun jranlɛ junman’n.
Annzɛ “famiɛn kle dan’n.”
Nian Nd. B15 nun.
Annzɛ “aika ba’n.”
Be kwla se ekun kɛ “yɔbuɛ kekleke kun,” kɛ yɔbuɛ nga be flɛ i emiri’n sa.
Ebr., “ɔ.”
Ebr., “Maan amun sa’m be ɲan wunmiɛn.”
Ebr., “Maan amun sa’m be ɲan wunmiɛn.”
Ebr., “Zifu yasua kun.”
Annzɛ “tralɛ’n i nuan su’n.”
Annzɛ “fiawlɛ lika.”
Be kwla se ekun kɛ “jenvie’n su lɔ.”
Akpasua’m be su kpɛnngbɛn mun yɛ be flɛ be kɛ sɛki’n niɔn.
Annzɛ “yalɛ klefuɛ.”
Ɔ ti weiin kɛ i nvlefuɛ’m be ɲrɛnnɛn’n i ndɛ yɛ ɔ kan-ɔn.
Annzɛ “ɔ kwla.”
Annzɛ “aflunmun yasua kun.”
Yɛle kɛ, Efrati.
Ebr., “ń má tía Zida su.”
Annzɛ “awlo amuin mun.” Ebr., “terafimun mun.”
Ebr., “boli yasua mun.”
Ebr., “Sua fleiin m’ɔ o talɛ’n i cɔnjɔ’n su’n.” I sɔ’n kle kɛ sran’n ti cinnjin yɛ ɔ le ɲrun, kpɛnngbɛn kun-ɔn.
Ebr., “kpɛngbɛ’n,” i sɔ’n kle kɛ ɔ suan sran bo, siefuɛ kun-ɔn.
Annzɛ “junman su kpɛn mun.”
Annzɛ “asɔmɔli gbanflɛn mɔ be kɔmin nun ndrɛ’n ti vɔɔ’n.”
Ebr., “be sunnzunin.”
Annzɛ “kpongbo ba.”
Akpasua’m be su kpɛnngbɛn mun yɛ be flɛ be kɛ sɛki’n niɔn.
Annzɛ “i osu m’ɔ ti i liɛ’n nun.”
Ebr., “ɔ sa’m be afiɛn.” Yɛle kɛ, ɔ wue nun annzɛ ɔ wiasin.
Annzɛ “be nga be klo min’n.”
Annzɛ “bua mun.”
Yɛle kɛ, klɔ nga be kɛnnin i ndɛ ndɛ mma 2 nun’n.
Annzɛ “be su kwlá tuman be bo,” kɛ ayrɛ’n yɛ w’a kete be sa.
Yɛle kɛ, Jenvie ng’ɔ ti Njin Nzue Kakla’n.
Yɛle kɛ, Mediterane’n.
Annzɛ “viɲin nzue guawlɛ mun.”
Ebr., “i sa’n yó i wiengu’n i sa’n i like yaya.”
Annzɛ “like tɔnlɛ sɛ mɔ be nuan’n ti dan’n.”
Be kwla se ekun kɛ “aata difuɛ.”