MALASI

1 Ndɛ cinnjin kun:

Ndɛ nga Zoova waan Malasi* kan kle Izraɛlifuɛ mun’n yɛ:

2 “N kleli kɛ n klo amun,”+ Zoova yɛ ɔ kan sɔ-ɔ.

Sanngɛ amun se kɛ: “?Wafa sɛ yɛ a kleli kɛ a klo e-ɔ?”

Zoova waan: “?Nán Zakɔbu i niaan bian yɛle Ezau?+ Sanngɛ n kloli Zakɔbu, 3 yɛ Ezau liɛ’n n kpɔli i.+ N sacili i oka mun.+ Yɛ n yacili i aja like’n blo alua nga be o aawlɛ flɛnnɛn’n nun lɔ’n be sa nun.”+

4 “Kannzɛ Edɔmun se kɛ: ‘B’a bubu e sekeseke, sanngɛ é sá e sin yɛ é kplán lika ng’ɔ bubuli’n i uflɛ ekun’n,’ sanngɛ Zoova m’ɔ ti sonja’m be su kpɛn’n waan yoo: ‘Bé kplán, sanngɛ ń búbú i, yɛ dunman nga bé fá tɔ́n be’n, yɛle “klunwi lika,” nin “sran mɔ Zoova w’a bu be fɔ mlɔnmlɔnmlɔn’n.”+ 5 Amun bɔbɔ amun ɲinma wún i sɔ liɛ’n, yɛ amún sé kɛ: “Maan be kan Zoova i dan m’ɔ ti’n i ndɛ Izraɛli nvle wunmuan’n nun.”’”

6 “‘Ba’n bu i si sran,+ yɛ junman difuɛ’n bu i min’n i sran. ?Sɛ n ti amun si’n,+ ngue ti yɛ amun buman min sran-ɔn?+ ?Yɛ sɛ n ti amun min’n,* ngue ti yɛ amun sroman* min-ɔn?’ Min bɔbɔ Zoova mɔ n ti sonja’m be su kpɛn’n, yɛ n usa amun mɔ amun ti min ɲrun jranfuɛ’n mɔ amun yo min dunman’n i finfin’n+ amun sɔ-ɔ.

“‘Sanngɛ amun se kɛ: “?Ɔ dunman’n i finfin nga e yoli’n yɛle benin?”’

7 “‘Amun fa aliɛ* ng’ɔ ti fiɛn’n kɔ min tɛ yiwlɛ’n su lɔ.’

“‘Yɛ amun se kɛ: “?Wafa sɛ yɛ e yoli ɔ fiɛn-ɔn?”’

“‘Amun seli kɛ: “Zoova i tabli’n+ timan like fi.” 8 Kɛ amun fa nnɛn nga i ɲinma ti siwa’n fa yi tɛ’n, amun se kɛ: “Ɔ timan tɛ.” Yɛ kɛ amun fa nnɛn nga i ja’n ti buwa’n annzɛ nga tukpacɛ o i wun’n ba’n, amun se kɛ: “Ɔ timan tɛ.”’”+

“Amun yaci, amun ko fa man amun siefuɛ’n be nian. ?I klun jɔ́ amun wun? ?Ɔ́ sɔ́ amun nun klanman?” Zoova m’ɔ ti sonja’m be su kpɛn’n yɛ ɔ kan sɔ-ɔ.

9 “Ɔ maan siɛn’n, amun kpan flɛ* Ɲanmiɛn naan ɔ si e aunnvɔɛ. ?Kɛ amun fa like kɛ ngalɛ’n sa be ba’n, min klun jɔ́ amun nun kun sa i wun?” Zoova m’ɔ ti sonja’m be su kpɛn’n yɛ ɔ kan sɔ-ɔ.

10 “?Amun nun onin yɛ ɔ klo kɛ ɔ́ ɲín min anuan* mun-ɔn?+ Afin min tɛ yiwlɛ’n i sin’n i nuan trɔlɛ ngbɛn sa’n,+ saan bé mán amun like naan amun a trɔ. Min klun jɔman amun wun. Yɛ n sɔman ninnge nga amun fa blɛ min’n be wie fi nun,”+ Zoova m’ɔ ti sonja’m be su kpɛn’n yɛ ɔ kan sɔ-ɔ.

11 “Afin kɛ ɔ fɛ i wia afiliɛ lɔ lele m’ɔ́ fá jú wia atɔliɛ lɔ’n, min dunman’n fú nvlenvle’m be nun.+ Lika kwlaa nun’n, sran’m bé yí tɛ naan sin wunsrɛn’n fite, yɛ bé mán like min dunman nun. Nanwlɛ, like nga bé mán’n, ɔ́ yó sanwun. Afin min dunman’n yó dan nvlenvle’m be nun,”+ Zoova m’ɔ ti sonja’m be su kpɛn’n yɛ ɔ kan sɔ-ɔ.

12 “Sanngɛ amun yo i finfin.*+ Amun se kɛ: ‘Zoova i tabli’n ti fiɛn. Like nga be fa sie su’n, yɛle kɛ aliɛ ng’ɔ o su’n, ɔ timan like fi.’+ 13 Amun se ekun kɛ: ‘I kwlaa nga ti afɛ ngbɛn!’ Kpɛkun amun yo amun ɲrun’n kɛ ɔ ti finfin like sa.” Zoova m’ɔ ti sonja’m be su kpɛn’n, yɛ ɔ kan sɔ-ɔ. “Yɛ amun fa nnɛn nga be wuali’n nin nga be ja ti buwa’n, nin nga tukpacɛ o be wun’n be ba. Nanwlɛ, amun fɛ i sɔ ninnge mun blɛ min. ?Ɔ́ yó sɛ naan m’an sɔ nun?”+ Zoova yɛ ɔ kan sɔ-ɔ.

14 “Sɛ sran kun i nnɛn’m be nun kun ti kpa, naan ɔ ta nda kpɛkun nnɛn ng’ɔ timan kpa’n* yɛ ɔ fa yi tɛ man Zoova’n, gblɛfuɛ sɔ’n i liɛ su yoman ye le. Afin n ti Famiɛn dan kun.+ Yɛ bé sró min dunman’n nvlenvle’m be nun,”+ Zoova m’ɔ ti sonja’m be su kpɛn’n, yɛ ɔ kan sɔ-ɔ.

2 “Siɛn’n, min ɲrun jranfuɛ mun, mmla nga ti amun liɛ.+ 2 Sɛ amun a faman su’n naan amun faman min dunman’n yoman amun awlɛn su like’n, ń yó maan sannzan nga n boli’n, i nuan like’n tɔ́ amun su.+ Yɛ ń yó maan amun muae’n káci sannzan.+ Nanwlɛ, n yoli maan amun muae’n kacili sannzan afin amun a fa yoman amun awlɛn su like,” Zoova m’ɔ ti sonja’m be su kpɛn’n yɛ ɔ kan sɔ-ɔ.

3 “Amun nian, amun ti’n, ń sáci* ninnge nga amun luali’n.+ Kpɛkun ń fá nnɛn nga amun fa be yili tɛ amun cɛn dilɛ’n nun’n be wakasu’n, ń gúa amun ɲrun nun. Yɛ bé fá amun kó síe i lɔ.* 4 I liɛ’n, amún wá wún i wlɛ kɛ min yɛ n mannin amun mmla nga-ɔ, naan n te di aenguɛ nga e nin Levi e trali’n su,”+ Zoova m’ɔ ti sonja’m be su kpɛn’n yɛ ɔ kan sɔ-ɔ.

5 “Aenguɛ nga e nin i e trali’n ɔ sɛsɛli i maan ɔ kali nguan nun yɛ i wun jɔli i fɔuun, kpɛkun ɔ sroli min.* Ɔ sroli min, yɛ ɔ sroli min dunman’n. 6 Nanwlɛ’n i mmla’n* yɛ ɔ o i nuan-ɔn.+ B’a timan ndɛ tɛ kun sa i nuan nun. E afiɛn sɛli, yɛ ɔ nin min nantili klanman.+ Kpɛkun ɔ fali sran kpanngban jasoli atin tɛ’n su. 7 Afin min ɲrun jranfuɛ’n yɛ ɔ fata kɛ ɔ kle sran mun Ɲanmiɛn i su like-ɔ. Yɛ ɔ fata kɛ sran’m be fa be su sie i nuan bo naan b’a si mmla’n,+ afin Zoova m’ɔ ti sonja’m be su kpɛn’n yɛ ɔ sunmɛnnin i-ɔ.

8 “Sanngɛ amun liɛ’n, amun jasoli atin’n su. Amun yoli maan sran kpanngban kpa b’a diman mmla’n* su kun.+ Kpɛkun amun sacili aenguɛ nga e nin Levi e trali’n.”+ Zoova m’ɔ ti sonja’m be su kpɛn’n yɛ ɔ kan sɔ-ɔ. 9 “I sɔ’n ti’n, ń yó amun finfin yɛ ń gúa amun ɲin ase sran’m be kwlaa be ɲrun. Afin amun a nantiman min atin’n su. Sanngɛ mmla’n i su dilɛ nun’n, amun buli sran wie kpa trali wie.”+

10 “?E kwlaa e si’n timan kun?+ ?Nán Ɲanmiɛn kunngba’n yɛ ɔ yili e-ɔ? ?Sɛ ɔ ti sɔ’n, ngue ti yɛ e bu e wiengu lufle,+ mɔ e saci aenguɛ nga e nannan’m be trali’n niɔn? 11 Zidafuɛ’m b’a nantiman klanman kpɛkun be boli tete Izraɛli nin Zerizalɛmun lɔ. Afin Zidafuɛ’m be yoli Zoova i sanwun m’ɔ ti’n*+ i finfin, kusu nn Ɲanmiɛn i like cinnjin-ɔn. Kpɛkun be ko jali nvle wie nun amuin’n i wa bla’n.+ 12 Sran kwlaa ng’ɔ yo sɔ’n, kannzɛ ɔ ti sɛ ti sɛ’n,* kannzɛ bɔbɔ ɔ fa like ko man Zoova m’ɔ ti sonja’m be su kpɛn’n, Zoova wá núnnún i naan w’a tranman Zakɔbu i tannin sua’m be nun.”+

13 “Yɛ amun yo sa kun ekun. Sa sɔ’n ti’n, sran’m be ɲinmuɛn’n w’a kata Zoova i tɛ yiwlɛ’n su. Yɛ be ti be sunlɛ’n nin be kplinlɛ’n i ngan lɔ. I sɔ’n ti’n, ɔ nianman like nga amun fa mɛn i’n i lɔ kun, yɛ ɔ sɔman amun sa nun like wie fi nun.+ 14 Kpɛkun amun se kɛ: ‘?Ngue ti-ɔ?’ Zoova buli amun fɔ ti-ɔ. Afin amun gbanflɛn nun bla’n, m’ɔ ti amun janvuɛ’n, mɔ nda nga amun tali’n ti’n ɔ kacili amun yi’n,* amun buli i lufle.+ 15 Sanngɛ sran kun o lɛ’n, w’a yoman sɔ wie, afin Ɲanmiɛn wawɛ’n i kan te o i su. ?Yɛ ngue yɛ i sɔfuɛ’n kunndɛ-ɔ? Ɲanmiɛn i osu’n nunfuɛ’n yɛ ɔ kunndɛ i-ɔ. I sɔ’n ti’n, amun nian akunndan nga amun bu’n su kpa yɛ nán amun bu amun gbanflɛn nun bla’n i lufle. 16 Afin Zoova m’ɔ ti Izraɛli Ɲanmiɛn’n waan yoo: “Min ɲin ci* be wun yralɛ’n+ ɔ nin sran ng’ɔ yo nzaje sa’n.* Amun nian akunndan nga amun bu’n su kpa yɛ nán amun bu amun wiengu lufle,”+ Zoova m’ɔ ti sonja’m be su kpɛn’n yɛ ɔ kan sɔ-ɔ.

17 “Amun fali amun nuan nun ndɛ’n kleli Zoova i yalɛ.+ Sanngɛ amun se kɛ: ‘?Yalɛ nga e kleli i’n yɛle benin?’ Yɛle kɛ amun se kɛ: ‘Sran kwlaa ng’ɔ yo sa tɛ’n, ɔ ti sran kpa Zoova ɲrun, naan ɔ klo i sɔfuɛ’n,’+ annzɛ amun se kɛ: ‘?Ɲanmiɛn m’ɔ yo sa i nuan su’n o nin li?’”

3 “Amun nian, n su sunman min ngaliɛ kanfuɛ’n. Ɔ́ kó bó* min ɲrun atin.+ Kpɛkun Miɛn kpafuɛ’n mɔ i yɛ amun kunndɛ i’n ɔ́ bɛ́ i sua’n nun.+ Yɛ aenguɛ’n i ngaliɛ kanfuɛ’n mɔ i yɛ amun minndɛ i aklunjɔɛ nun’n, ɔ́ bá. Amun nian, saan ɔ́ bá,” Zoova m’ɔ ti sonja’m be su kpɛn’n yɛ ɔ kan sɔ-ɔ.

2 “?Sanngɛ cɛn ng’ɔ́ bá’n, wan yɛ ɔ́ kwlá jrán kekle-ɔ? ?Kɛ ɔ́ fíte’n, wan yɛ ɔ́ kwlá jrán nglo-ɔ? Afin ɔ́ yó kɛ sika nun fiɛn yifuɛ’n i sin’n sa. Ɔ́ yó kɛ ninnge kpufuɛ’n i sanmlan’n+ sa. 3 Yɛ ɔ́ trán ase kɛ sran m’ɔ yi sika’n i nun fiɛn+ naan ɔ yo sika jrɛiin’n sa. Ɔ́ yó Levi i mma’m be sanwun. Ɔ́ yí be nun fiɛn’n kɛ be fa yi sika ɔkwlɛ’n nin sika’n be nun fiɛn’n sa. Kpɛkun Zoova ɲrun’n, saan bé káci kɛ sran nga be yi tɛ mɛn i mɔ be yo sa i nuan su sɛsɛ’n sa. 4 Kpɛkun like nga Zidafuɛ mun nin Zerizalɛmunfuɛ’m be fa man’n, ɔ́ jɔ́ Zoova klun* kɛ lalafuɛ nun’n sa.+

5 “Ń má wúnnge lɔ naan ń dí amun jɔlɛ. Be nga be di bae’n,+ nin be nga be kunndɛ bla be yi bo annzɛ bian be wun bo’n, nin be nga be ta ato nda mun’n,+ nin be nga be di be junman difuɛ m’ɔ fata kɛ be tuɛ i kalɛ’n+ nin angbeti bla mun nin ba nga be leman si’n*+ be lufle’n, ɔ nin be nga be kloman kɛ bé úka aofuɛ mun’n,*+ ń kó bú be fɔ ndɛndɛ. I sɔfuɛ’m b’a sroman min,” Zoova m’ɔ ti sonja’m be su kpɛn’n yɛ ɔ kan sɔ-ɔ.

6 “Afin n ti Zoova. N kaciman.*+ Yɛ Zakɔbu i wa yɛle amun. Amun nin-a nunnunman. 7 Kɛ ɔ fɛ i amun nannan’m be blɛ su lele’n, amun yacili min mmla’m be su falɛ, amun a nantiman be su.+ Amun sa amun sin min wun, yɛ n kusu ń sá min sin amun wun,”+ Zoova m’ɔ ti sonja’m be su kpɛn’n yɛ ɔ kan sɔ-ɔ.

Sanngɛ amun se kɛ: “?E sin salɛ nga ɔ waan e sa’n yɛle benin?”

8 “?Klɔ sran sa’n ɔ kwla wua Ɲanmiɛn? Sanngɛ amun wuali min.”

Yɛ amun se kɛ: “?Wualɛ nga e wuali wɔ’n yɛle benin?”

“Yɛle blusu’n nin like nga amun fa ba min manlɛ’n. 9 Nanwlɛ, amun liɛ su yoman ye le,* afin amun wua min. Nvle wunmuan’n yɛ ɔ yo sɔ-ɔ. 10 Maan amun fa blusu’n i ngba fa bla ninnge siewlɛ’n nun+ lɔ naan be ɲan aliɛ min sua’n nun.+ I lɛ nun’n, amun yaci, amun sa min be nian. Sɛ m’an tikeman ɲanmiɛn su lɔ nzue’n i anuan mun’n,+ yɛ sɛ m’an yraman amun su lele naan like fi w’a mianman amun sa’n,+ amun ko kan,” Zoova m’ɔ ti sonja’m be su kpɛn’n yɛ ɔ kan sɔ-ɔ.

11 “Kpɛkun ń tú kakaa nga be saci amun ninnge mun’n* be fɔ mán amun. Yɛ be su saciman amun fie’n su ninnge mun kun, yɛ amun viɲin fie’m be su kaman lɛ ngbɛn, bé sú,”+ Zoova m’ɔ ti sonja’m be su kpɛn’n yɛ ɔ kan sɔ-ɔ.

12 “Nvle’m be kwlaa bé sé amun kɛ amun liɛ su ti ye.+ Afin amun nvle’n i nun tranlɛ wá yó fɛ,” Zoova m’ɔ ti sonja’m be su kpɛn’n yɛ ɔ kan sɔ-ɔ.

13 Zoova se kɛ: “Amun kan min wun ndɛ tɛtɛ.”

Yɛ amun se kɛ: “?Ɔ wun ndɛ nga e kɛnnin i e afiɛn wa’n yɛle benin?”+

14 “Amun se kɛ: ‘Ɲanmiɛn i sulɛ’n ti be wun yalɛ klelɛ ngbɛn.+ E yoli like ng’ɔ fata kɛ e yo mɛn i’n. Yɛ kɛ é nánti’n e yoli e wun aunnvɔɛaunnvɔɛ Zoova m’ɔ ti sonja’m be su kpɛn’n i ɲrun. ?Sanngɛ ngue yɛ e ɲɛnnin i nun-ɔn? 15 Siɛn’n e se kɛ be nga be di tutre’n, be liɛ su ti ye. Asa ekun’n, be nga be yo sa tɛtɛ mun’n, be liɛ yo ye.+ Be jaso be sa Ɲanmiɛn be nian, sanngɛ sa fi ɲanman be.’”

16 Blɛ sɔ’n nun’n, be nga be sro Zoova’n be kokoli yalɛ, sran kun kan ndɛ kle i wiengu. Zoova kusu fɛ i ɲin sie su yɛ ɔ sie i su tie. Kpɛkun be klɛli fluwa kun i ɲrun lɛ,+ naan be wla kpɛn be nga be sro Zoova mɔ be bu i dunman’n i su akunndan’n* be su.+

17 Zoova m’ɔ ti sonja’m be su kpɛn’n waan yoo: “Cɛn nga ń má fá be ń yó min awlɛn su like’n,*+ bé yó min liɛ mlɔnmlɔn.+ Ń sí be aunnvɔɛ kɛ sran kun si i wa m’ɔ su i’n i aunnvɔɛ’n sa.+ 18 Kpɛkun ngbaciɛ ng’ɔ o sran kpa’n nin klunwifuɛ’n be afiɛn’n,+ ɔ nin ngbaciɛ ng’ɔ o sran ng’ɔ su Ɲanmiɛn’n nin ng’ɔ sumɛn i’n be afiɛn’n, amún wún i ekun.”

4 “Afin cɛn’n su ba. Ɔ lo fiaan kɛ fuu sa.+ Cɛn sɔ’n nun’n, be kwlaa nga be tu be wun’n, ɔ nin be kwlaa nga be yo sa tɛtɛ mun’n, bé káci kɛ ijre kee sa. Bé wá núnnún be sekeseke cɛn sɔ’n nun. Be bo olui nin be sama wie fi su kaman lɛ,” Zoova m’ɔ ti sonja’m be su kpɛn’n yɛ ɔ kan sɔ-ɔ. 2 “Sanngɛ amun mɔ amun bo min dunman kpa’n* amun liɛ’n, sa i nuan su sɛsɛ yolɛ’n i wia’n, ɔ́ bó amun su. Yɛ wia sɔ’n i je* m’ɔ́ gúa amun wun’n, ɔ́ yó amun juejue. Ɔ maan amún tú kpɛ́n kɛ nannin ba nga b’a cɛn lɔklɔɔ’n sa.”

3 “Cɛn nga ń má yó sa sɔ’n, amún tíatía klunwifuɛ’m be su, afin bé yó kɛ ndutre sa amun ja bo,” Zoova m’ɔ ti sonja’m be su kpɛn’n yɛ ɔ kan sɔ-ɔ.

4 “Maan amun wla kpɛn min sufuɛ Moizi i Mmla’n, nin ndɛ fanunfanun nga n seli Izraɛlifuɛ’m be kwlaa Orɛbu lɔ kɛ be fa su’n be su.+

5 “Amun nian! Ń má súnman Eli m’ɔ ti min nuan ijɔfuɛ’n+ amun sin kwlaa naan Zoova i cɛn dan sroesroe’n w’a ju.+ 6 Kɛ ɔ ko yo naan m’an ɔman m’an ko finman asiɛ’n i like naan m’an sacimɛn i mlɔnmlɔn’n ti’n, ɔ́ yó maan siɛ’m be awlɛn’n káci kɔ́ ba’m be su,+ yɛ ba’m be awlɛn’n káci kɔ́ siɛ’m be su.”

(Ɲanmiɛn Ndɛ nga laa be klɛli i Ebre nin Aramun aniɛn’n nun’n i awieliɛ yɛ. Ng’ɔ su i su’n yɛle Ɲanmiɛn Ndɛ nga laa be klɛli i Glɛki aniɛn’n nun’n.)