FLUWA NGA PƆLU KLƐLI EBRE MUN’N

1 Lalafuɛ nun’n, Ɲanmiɛn yoli maan i nuan ijɔfuɛ’m be kɛnnin i ndɛ mun kpɛ sunman kleli e nannan mun. Ɔ yoli i sɔ wafa kpanngban.+ 2 Sanngɛ kɛ blɛ sɔ’n sinnin’n, ɔ sinnin i Wa’n i lika kannin ndɛ kleli e.+ Ɔ fɛ i sieli like kwlaa su,+ yɛ ɔ sinnin i lika yili mɛn’n.*+ 3 Ɔ ti kɛ Ɲanmiɛn bɔbɔ sa,+ yɛ ɔ le ɲrun kpa kɛ i sa.+ Asa ekun’n, ɔ fɛ i ndɛ m’ɔ le ta dan’n fa suan ninnge’m be kwlaa be bo. Ɔ wunnzinnin e maan e sa tɛ’m be wieli,+ i sin’n ɔ ɔli ɲanmiɛn su lɔ. Ɔ ko trannin Sran ng’ɔ le ɲrun kpa’n i sa fama su.+ 4 Ɔ maan ɔ yoli kpa trali anzi mun,+ afin dunman nga be fa mɛnnin i’n, i dan tra be liɛ’n.+

5 Afin Ɲanmiɛn seli kɛ: “A ti min wa. Andɛ m’an kaci ɔ si.”+ Ɔ kɛnnin i ekun kɛ: “Ń káci i si, yɛ ɔ́ káci min wa.”+ ?Anzi’m be nun oninfuɛ’n yɛ Ɲanmiɛn w’a se i sɔ le-ɔ? 6 Sanngɛ kɛ ɔ́ fɛ́ i Wa Kpɛn’n+ bá asiɛ’n su wa ekun’n, ɔ seli kɛ: “Maan Ɲanmiɛn i anzi’m be kwlaa be koto i bo.”

7 Asa ekun’n, ɔ kannin anzi’m be ndɛ seli kɛ: “Ɔ yoli maan i anzi’m be le fanngan kpa, yɛ ɔ yoli maan i junman difuɛ’m+ be kacili kɛ sin taaman sa.”+ 8 Sanngɛ kɛ ɔ́ kɛ́n i Wa’n i ndɛ’n, ɔ seli kɛ: “Ɲanmiɛn yɛ ɔ ti ɔ famiɛn bia+ tititi-ɔ. Yɛ ɔ Famiɛn dilɛ kpɔnman’n ti sa kpa yolɛ* kpɔnman. 9 A kloli sa nuan su sɛsɛ yolɛ’n, yɛ a kpɔli mmla fɔnlɛ’n. I sɔ’n ti’n, Ɲanmiɛn m’ɔ ti ɔ Ɲanmiɛn’n, ɔ guali ɔ ti su ngo,+ kpɛkun ɔ yoli maan ɔ klun jɔli kpa trali ɔ wiengu mun.”+ 10 “E Min, i bo bolɛ nun’n a wlali asiɛ’n i bo ase. Yɛ ɲanmiɛn m’ɔ la nglo lɔ plaii’n ti ɔ sa nuan like. 11 Bé núnnún, sanngɛ ɔ liɛ’n, á ká lɛ, yɛ bé yó nvuɛn kɛ nga tralɛ fa yo nvuɛn’n sa. 12 Á ɲɔ́nɲɔ́n be kɛ tralɛ annzɛ tannin wie sa, yɛ bé káci. Sanngɛ ɔ liɛ’n, a kaciman le, yɛ ɔ afuɛ’m be su wieman le.”+

13 Ɲanmiɛn seli kɛ: “Tran ase min sa fama su lele maan n fa ɔ kpɔfuɛ mun n sie ɔ ja bo kɛ like mɔ be fa be ja be takataka su’n sa.” ?Anzi’m be nun oninfuɛ’n yɛ Ɲanmiɛn w’a se i sɔ le-ɔ?+ 14 Anzi’m be kwlaa be ti aolia nun sran,+ yɛ be ti Ɲanmiɛn junman difuɛ. ?Nɛ́n i-ɔ? ?Yɛ nán be yɛ Ɲanmiɛn sunman be kɛ be uka be nga bé ɲán be ti’n niɔn?

2 I sɔ’n ti’n, ɔ ti cinnjin kɛ e fa e ɲin e sie i ndɛ nga e tili be’n be su kpa tra laa’n,+ kɛ ɔ ko yo naan y’a yaciman atin’n ti.+ 2 ?Afin sɛ ndɛ nga be fa wlali anzi’m be nuan mɔ be kannin’n+ ɔ yoli su’n, yɛ sɛ be tuli sa tɛ yofuɛ mun nin ɲin keklefuɛ’m be fɔ kɛ ɔ fata’n sa’n,+ 3 ɔ́ yó sɛ naan e mɔ e yoli e delɛ m’ɔ ti like dan’n i finfin’n y’a ɲan e ti?+ Afin e Min’n dun mmua kannin ndɛ sɔ’n,+ yɛ be nga be tili i ndɛ’n be seli e kɛ ɔ ti nanwlɛ. 4 Kɛ ɔ́ yó sɔ’n, nn Ɲanmiɛn klé kɛ ndɛ sɔ’n ti nanwlɛ wie. I sɔ’n ti’n, ɔ yoli sa dandan mun nin abonuan sa mun, ɔ nin sa kekleekle mun.+ Asa ekun’n, ɔ fɛli i wawɛ’n mannin sran mun kɛ i bɔbɔ fa klo’n sa.+

5 Afin Ɲanmiɛn w’a faman anzi mun kɛ be sie mɛn* m’ɔ́ wá bá’n,+ mɔ e kɛn i ndɛ’n. 6 Sanngɛ sran kun m’ɔ ti lalofuɛ’n, ɔ klɛli i kɛ: “?Wan yɛle klɔ sran mɔ a bu i akunndan-ɔn? ?Yɛ wan yɛle klɔ sran mɔ a niɛn i lika-ɔ?+ 7 A yoli maan anzi’m be kpa trɛli i kan. A yoli maan ɔ ɲannin ɲrun nin sasu, yɛ a fɛli i sieli ninnge nga a yili be’n be su. 8 A fali like kwlaa sieli i ja bo.”+ Kɛ Ɲanmiɛn fali like kwlaa sieli i ja bo’n,+ w’a yaciman like fi lɛ m’ɔ siemɛn i-ɔ.+ Dɔ nga su’n, e wunman ninnge ng’ɔ sie be’n be kwlaa.+ 9 Sanngɛ e wun Zezi mɔ Ɲanmiɛn kɛnnin i ase kan’n. I sɔ’n ti’n, anzi’m be kpa trɛli i.+ Siɛn’n, Ɲanmiɛn w’a yo maan w’a ɲan ɲrun nin sasu. Afin ɔ wuli ɲrɛnnɛn wie+ naan Ɲanmiɛn i aklunye dan’n ti’n, ɔ si like nga be flɛ i wie’n sran’m be kwlaa be dunman nun.+

10 Afin sran nga like kwlaa ti i liɛ mɔ i yɛ maan like kwlaa o lɛ’n, ɔ yoli maan i wa kpanngban kpa be ɲannin ɲrun.+ I sɔ’n ti’n, ɔ fata kɛ ɔ yo naan Sran cinnjin kpafuɛ nga ti yɛ sran’m bé ɲán be ti’n,+ ɔ wun ɲrɛnnɛn naan ɔ yo kpa.+ 11 Afin sran ng’ɔ yo sran’m be sanwun’n, ɔ nin be nga be yo be sanwun’n,+ be bue nɲɔn’n be fin sran kunngba’n.+ I sɔ’n ti’n, kɛ ɔ́ flɛ́ be i niaan’n ɲannzuɛn kunmɛn i.+ 12 Afin ɔ se kɛ: “Ń bó ɔ dunman ń klé min niaan mun. Kɛ n wo ɔ sran mɔ b’a yia’n be afiɛn’n, ń mánmán wɔ.”+ 13 Ɔ se ekun kɛ: “Ń fá min wla ń gúɛ i su.”+ Yɛ ɔ se ekun kɛ: “An nian! E nin ba kanngan nga Zoova* fa be mannin min’n, yɛ e o yɛ.”+

14 I sɔ’n ti’n, kɛ mɔ “ba kanngan mun” be ti klɔ sran mɔ be le mmoja nin wunnɛn’n ti’n, i kusu kacili sɔ wie,+ naan i wie’n ti’n, ɔ kwla nunnun Suɛn Tɔnfuɛ mɔ i ti yɛ sran wu’n,+ i mlɔnmlɔn.+ 15 I liɛ’n, ɔ́ kwlá dé be kwlaa nga kɛ be wuli be lele’n, wie’n i srolɛ’n ti’n, b’a kaci kɛ kanga sa’n.+ 16 Afin nán anzi mun yɛ ɔ bali be ukalɛ-ɔ. Sanngɛ Abraamun i osu’n nunfuɛ mun+ yɛ ɔ bali be ukalɛ-ɔ. 17 I sɔ’n ti’n, sa’n kwlaa nun’n ɔ fata kɛ ɔ kaci kɛ i “niaan mun” sa.+ I liɛ’n, ɔ́ yó Ɲanmiɛn ɲrun jranfuɛ dan mɔ kɛ ɔ́ dí Ɲanmiɛn junman’n ɔ si aunnvɔɛ, yɛ ɔ di i nanwlɛ su’n, naan tɛ ng’ɔ́ yí’n ti’n,+ sran’m be nin Ɲanmiɛn be afiɛn sɛ ekun.*+ 18 Kɛ be sɛli i niannin’n, ɔ wunnin i ɲrun.+ Ɔ maan ɔ kwla uka be nga be sa be nian’n.+

3 I sɔ’n ti’n, min niaan mun, amun mɔ be flɛli* amun ɲanmiɛn su lɔ’n,+ an fa amun ɲin sie Zezi su. I yɛ e si kɛ* ɔ ti akoto nin Ɲanmiɛn ɲrun jranfuɛ dan’n niɔn.+ 2 W’a kpɔciman Sran ng’ɔ fali junman wlɛli i sa nun’n.+ I nun nga Moizi o Sran sɔ’n i sua’n nun’n, ɔ yoli sɔ wie.+ 3 Ɔ* le ɲrun+ tra Moizi. Afin sran ng’ɔ kplan sua’n, ɔ le ɲrun tra sua’n bɔbɔ. 4 I yo, sran yɛ ɔ kplan sua kwlaa-ɔ. Sanngɛ Ɲanmiɛn yɛ ɔ yili ninnge’n kwlaa-ɔ. 5 Kusu’n Moizi yoli junman difuɛ kpa Ɲanmiɛn i awlo wunmuan’n nun. I sɔ m’ɔ yoli’n, ɔ ti sa nga cɛn wie lele bé kán be ndɛ’n be nzɔliɛ. 6 Sanngɛ Klisi liɛ’n ɔ yoli ba+ kpa Ɲanmiɛn i awlo’n i su nianlɛ’n nun. Sɛ e kan ndɛ yakpa su titi naan e lafi like nga e wla o su mɔ e fa di e nuan’n su tankaan kpa titi lele e guɛ ti nin i bo’n, nn e ti Ɲanmiɛn i awlo.+

7 I sɔ’n ti’n, kɛ nga Ɲanmiɛn wawɛ’n fa kan’n sa’n,+ “Andɛ’n sɛ amun ti i nɛn’n, 8 nán amun kete amun awlɛn’n kɛ i nun mɔ amun nannan’m be klɔklɔli min lele n fali ya ble’n sa, kɛ blɛ mɔ be sali min niannin aawlɛ flɛnnɛn’n nun lɔ’n sa.+ 9 Amun nannan’m be klɔklɔli min lika sɔ’n nun, be sali min niannin, kusu nn be wunnin ninnge nga n yoli be’n, lele afuɛ ablanan (40).+ 10 I sɔ’n ti’n, min ɲin tuli sran sɔ’m be su. Kpɛkun n seli kɛ: ‘Be awlɛn’n fa atin tɛ su titi. B’a siman min atin mun.’ 11 I sɔ’n ti’n kɛ n fali ya’n, n tali nda n seli kɛ: ‘Be su wluman min wunmiɛn lolɛ lika’n nun.’”+

12 Aniaan mun, an nian amun wun, nán maan amun nun wie i awlɛn’n yo tɛ naan ɔ yaci Ɲanmiɛn su lafilɛ naan ɔ kpɔci Ɲanmiɛn m’ɔ lafiman’n.+ 13 Sanngɛ kɛ blɛ mɔ be flɛ i kɛ “Andɛ’n”+ te o lɛ’n, maan amun wla amun wiengu fanngan cɛn kwlakwla. I liɛ’n, sa tɛ yolɛ m’ɔ laka sran’n ɔ su yoman naan amun awlɛn’n w’a kete. 14 Afin sɛ ndɛ nga e lafili su i bo bolɛ nun’n, e fa e wla e gua su kpa lele ju i awieliɛ’n, yɛ é ɲán like nga Klisi’n ɲɛnnin i’n wie-ɔ.+ 15 I sɔ yɛ be klɛli-ɔ. Be klɛli i kɛ: “Andɛ’n sɛ amun ti i nɛn’n, nán amun kete amun awlɛn’n kɛ nga blɛ kun nun’n, amun nannan’m be klɔklɔli min lele n fali ya ble’n sa.”+

16 ?Wan mun yɛ be tili i nɛn m’ɔ nin i sɔ ngba’n be klɔklɔli i lele m’ɔ fali ya ble’n niɔn? ?Nán be nga Moizi fa be Ezipti lɔ fiteli’n niɔn?+ 17 ?Asa ekun’n, wan mun yɛ Ɲanmiɛn i ɲin tuli be su afuɛ lele ablanan’n (40) niɔn?+ ?Nán be nga be yoli sa tɛ mɔ be wuli mɔ be saka’m be kali aawlɛ flɛnnɛn’n nun lɔ’n niɔn?+ 18 ?Yɛ wan mun yɛ ɔ tali be nda kɛ be su wluman i wunmiɛn lolɛ lika nun’n niɔn? ?Nán be nga be yoli ɲin kekle i su’n niɔn? 19 Ɔ maan e wun kɛ, kɛ mɔ b’a lafimɛn i su’n, i ti yɛ b’a wluman lɔ-ɔ.+

4 I sɔ’n ti’n, kɛ mɔ nda nga Ɲanmiɛn tɛli i kɛ é wlú i wunmiɛn lolɛ lika’n nun’n te o lɛ’n ti’n, maan e nian e wun su. Sɛ w’a yoman sɔ’n, ɔ cɛman naan amun nun wie’m b’a ɲanman nda sɔ’n i nuan like.+ 2 Afin be boli jasin fɛ’n be kleli e+ kɛ nga be bo kleli be’n sa. Sanngɛ ndɛ nga be tili’n w’a yoman be ye. Afin be nin be nga be tili ndɛ’n be bo w’a yoman kun naan b’a lafi Ɲanmiɛn su. 3 E mɔ e lafili i su’n, é wlú i wunmiɛn lolɛ lika’n nun, kɛ ng’ɔ fa kannin’n sa. Ɔ seli kɛ: “I sɔ’n ti’n kɛ n fali ya’n, n tali nda n seli kɛ: ‘Be su wluman min wunmiɛn lolɛ lika’n nun,’”+ kusu nn kɛ mɛn’n boli i bo’n,* yɛ i junman’n wieli-ɔ.+ 4 Afin Ɲanmiɛn Ndɛ’n i bue kun nun’n, ɔ kannin cɛn nso su’n i ndɛ seli kɛ: “Cɛn nso su’n, Ɲanmiɛn loli wunmiɛn, ɔ yacili junman dilɛ.”+ 5 Ɔ kɛnnin i ekun kɛ: “Be su wluman min wunmiɛn lolɛ lika’n nun.”+

6 I sɔ’n ti’n, sran wie mun ekun bé kwlá wlú lɔ. Afin be nga be dun mmua boli jasin fɛ’n kleli be’n, be ɲin kekle’n ti’n, b’a kwlá wluman lɔ.+ 7 Ɔ maan ɔ wa sieli cɛn kun. Ɔ kɛnnin i ndɛ i osu w’a cɛ kpa Davidi i jue fluwa’n nun. Ɔ flɛli cɛn sɔ’n kɛ “Andɛ.” Kɛ nga e dun mmua e kannin’n sa’n, be klɛli i kɛ “Andɛ’n sɛ amun ti i nɛn’n, nán amun kete amun awlɛn’n.”+ 8 Afin sɛ ɔ ti kɛ Zozie+ fa be wluli wunmiɛn lolɛ lika kun nun sa’n, nn Ɲanmiɛn w’a kanman cɛn uflɛ ndɛ. 9 Ɔ maan Ɲanmiɛn i sran’m be wunmiɛn-lolɛ-cɛn kun ekun te o lɛ.+ 10 Sran ng’ɔ wlu Ɲanmiɛn i wunmiɛn lolɛ lika’n nun’n, nn w’a yaci junman dilɛ. Ɔ su lo wunmiɛn kɛ nga Ɲanmiɛn wieli i junman’n i di m’ɔ loli wunmiɛn’n sa.+

11 I sɔ’n ti’n, maan e mian e ɲin naan e wlu wunmiɛn lolɛ lika sɔ’n nun. I liɛ’n, e nun wie fi su yoman ɲin kekle kɛ be sa.+ 12 Afin Ɲanmiɛn i ndɛ’n le ta kpa, ɔ yo maan sran kaci,+ ɔ la tra tokofi m’ɔ lɛ i ɲrun lɛ i sin’n.+ Kɛ ɔ wɔ’n, ɔ wlu lele, kpɛkun wafa nga sran kun fa ti i klun lɔ’n nin i nzuɛn’n be ɲin fite weiin. Ɔ wlu ju i kpɔlɛkpɔlɛ mun nin i owie’m be klun lui’n nun lɔ. Ɔ kwla si sran kun i akunndan’n nin sa ng’ɔ o i awlɛn’n nun’n. 13 Ninnge nga Ɲanmiɛn yili be’n, wie fi nunman lɛ m’ɔ ti fiawa i ɲrun-ɔn.+ Ɲanmiɛn mɔ é kán sa nga e yoli’n i ndɛ é klé i’n, like fi nunman lɛ m’ɔ wunmɛn i-ɔ, i ɲin ta like kwlaa.+

14 E le Ɲanmiɛn ɲrun jranfuɛ dan kun m’ɔ leman wunsu-ɔ, ɔ ɔli ɲanmiɛn su. Sran sɔ’n yɛle Ɲanmiɛn i Wa Zezi.+ I sɔ’n ti’n, maan e kɛn i su mɔ e lafi’n i ndɛ e kle sran mun titi.+ 15 Afin Ɲanmiɛn ɲrun jranfuɛ dan nga e le i’n, ɔ si afɛ ng’ɔ o e su’n, kpɛkun ɔ si e aunnvɔɛ.+ Afin sa kwlaa nun’n, be sɛli i niannin kɛ e sa. Sanngɛ sa tɛ w’a trɛnmɛn i wun.+ 16 I sɔ’n ti’n, maan e wunnge famiɛn bia nga kɛ be mɛntɛn i lɔ’n be ɲan ye’n i wun lɔ, yɛ kɛ é srɛ́ Ɲanmiɛn’n nán maan e klun titi e.+ I liɛ’n, Ɲanmiɛn sí e aunnvɔɛ, ɔ́ yó e ye. Ɔ maan é ɲán ukalɛ blɛ ng’ɔ ti su’n i nun.

5 Sran kwlaa nga be fɛ i sran’m be nun kɛ ɔ yo Ɲanmiɛn ɲrun jranfuɛ dan’n, be sie i kɛ ɔ jran sran’m be nuan ɔ di Ɲanmiɛn junman.+ Ɔ maan ɔ yi sraka, yɛ ɔ yi tɛ sran’m be sa tɛ’m be ti.+ 2 Sran sɔ’n kwla si be nga be wunman sa wlɛ’n, ɔ nin be nga b’a mlin’n,* be aunnvɔɛ. Afin i bɔbɔ’n, fɔ’n wo i nun wie. 3 I sɔ’n ti’n, ɔ fata kɛ ɔ yi i bɔbɔ i sa tɛ’m be ti tɛ kɛ ng’ɔ fa yi nvlefuɛ’m be sa tɛ’m be ti tɛ’n sa.+

4 Sran fi kwlá simɛn i wue nun kɛ ɔ́ dí aɲrunɲan junman sɔ’n, saan Ɲanmiɛn bɔbɔ w’a flɛ i w’a fa wlɛ i sa nun kɛ Aarɔn liɛ’n sa.+ 5 Klisi’n kusu’n, nán dunman kunndɛlɛ+ ti yɛ ɔ kacili Ɲanmiɛn ɲrun jranfuɛ dan-ɔn. Sanngɛ Ɲanmiɛn mɔ i ti yɛ ɔ ɲannin ɲrun’n, ɔ seli i kɛ: “A ti min wa. Andɛ m’an kaci ɔ si.”+ 6 Ɔ kɛnnin i lika uflɛ ekun kɛ: “A ti Ɲanmiɛn ɲrun jranfuɛ kɛ Mɛlkisedɛki sa, yɛ á ká sɔ tititi.”+

7 I nun mɔ Klisi o asiɛ’n su wa’n, ɔ tuli i klun srɛli Sran ng’ɔ kwla de i wie’n i sa nun’n. Yɛ ɔ srɛli i kɛ ɔ yo ninnge wie mun mɛn i. Kɛ ɔ́ yó sɔ’n, nn ɔ́ kpán kekle kpa, nn i ɲinmuɛn nzue’n gúa.+ Kɛ m’ɔ sro Ɲanmiɛn ti’n, Ɲanmiɛn sieli i su kpa tili i ndɛ’n. 8 Kannzɛ bɔbɔ ɔ ti i wa’n, sanngɛ afɛ ng’ɔ tɔli i su’n ti’n, ɔ suannin aɲinyiɛ’n.+ 9 I sin’n, ɔ yoli kpa guɛli i ti nin i bo.+ Ɔ maan be kwlaa nga be ɲin yi i’n, bé ɲán be ti mlɔnmlɔn i dunman nun.+ 10 Afin Ɲanmiɛn sieli i kɛ ɔ yo i ɲrun jranfuɛ dan kɛ Mɛlkisedɛki sa.+

11 E kwla kan sran sɔ’n i su ndɛ kpanngban, sanngɛ ndɛ sɔ’m be bo tulɛ ti kekle, afin amun su ti tankaan. 12 Afin dɔ nga su’n, amun m’ɔ fata kɛ amun kle amun wiengu’m be like’n, amun yɛ ɔ fata kɛ be kle amun Ɲanmiɛn i ndɛ’n i bo bolɛ ninnge mun-ɔn.+ Ɔ maan ɔ ti kɛ amun te nɔn wunflɛn sa, amun diman sran nga b’a tin’n be aliɛ liɛ’n. 13 Kusu sran ng’ɔ te nɔn wunflɛn’n, ɔ siman Ɲanmiɛn ndɛ’n, afin ɔ te yo bakan.+ 14 Sanngɛ aliɛ’n ɔ ti be nga b’a tin’n be liɛ. Ɔ ti be nga be bu sa sin mɔ be wun sa kpa nin sa tɛ’n be ngbaciɛ’n, be liɛ.

6 I sɔ’n ti’n, kɛ mɔ y’a wie Klisi’n i su ndɛ klikli nga be kleli e’n+ i su like suan’n, maan e mian e ɲin e yo sran e wɔ e ɲrun titi.+ Nán maan e ka Ɲanmiɛn ndɛ’n i bo bolɛ ninnge’m be su like suanlɛ’n su sa trilili. Yɛle kɛ nán maan e sa e sin e suan ninnge ngbɛnngbɛn m’ɔ fata kɛ e yaci be’n, ɔ nin Ɲanmiɛn sulafilɛ’n, 2 ɔ nin batɛmun wafawafa mun, ɔ nin be sa mɔ be fa fuɛ i sran’m be su’n,+ ɔ nin sran cɛnlɛ’n,+ ɔ nin jɔlɛ nga Ɲanmiɛn di m’ɔ ti anannganman’n, be su like ekun. 3 Yɛ sɛ Ɲanmiɛn mɛn i sɔ yolɛ i wun atin’n, é mían e ɲin é yó sran é kɔ́ e ɲrun titi.

4 Be nga laa Ɲanmiɛn fɛli i kannin’n kpajali be su’n,+ mɔ Ɲanmiɛn fali ɲanmiɛn su kɔlɛ’n cɛli be’n, mɔ Ɲanmiɛn fɛli i wawɛ’n mannin be’n, 5 mɔ be wunnin kɛ Ɲanmiɛn i ndɛ’n ti kpa’n, mɔ be wunnin ye nga cɛn wie lele Ɲanmiɛn yó sran mun mɛn* ng’ɔ́ bá lɔ’n nun’n, 6 m’ɔ nin i sɔ ngba’n, be lafiman Ɲanmiɛn su kun’n,+ be kwlá ukaman be kun naan be kaci be akunndan’n. Afin b’a bobo Ɲanmiɛn i Wa’n waka’n su ekun, yɛ b’a guɛ i ɲin ase sran’m be ɲrun.+ 7 Nzue m’ɔ tɔ asiɛ’n su titi’n, ɔ ti asiɛ’n i su yralɛ m’ɔ fin Ɲanmiɛn-ɔn. Kɛ ɔ nɔnnɔn nzue’n, ninnge nga be luali be’n be yo kpa man be nga be luali’n. 8 Sanngɛ sɛ owieowie yɛ ɔ fifi su’n, be bumɛn i like fi yɛ ɔ nin sannzan bolɛ nunman mmua. Kpɛkun i agualiɛ su’n, bé wɔ́ nun.

9 Kannzɛ e kan sɔ’n, sanngɛ amun mɔ amun ti e sran kpa’n, e lafi su kɛ amun liɛ’n, amún yó kpa. Yɛle kɛ amún fíte nun. 10 Afin Ɲanmiɛn yoman sa m’ɔ timan su’n. Ɔ maan junman nga amun di mɛnnin i’n, ɔ nin klolɛ nga an fa kloli i dunman’n+ mɔ i ti’n, amun dili junman mɛnnin i sran mun’n, mɔ amun te di te man be’n, i wla su fiman su. 11 Sanngɛ e klo kɛ amun kwlakwla amun mian amun ɲin yo kɛ nga an yo i laa’n sa naan amun ɲan like nga amun wla o su kɛ amún ɲɛ́n i’n+ i kwlaa lele fa ju i awieliɛ.+ 12 E kunndɛman kɛ amun yo nvɛɛfuɛ.+ Sanngɛ be nga be lafi Ɲanmiɛn su mɔ be tra be awlɛn lele be ɲan like nga Ɲanmiɛn fa sie be ɲrun’n, amun nian be liɛ’n su yo wie.

13 Kɛ Ɲanmiɛn kán sa nga i waan ɔ́ yó mán Abraamun i ndɛ klé i’n, ɔ tali nda. Kɛ mɔ sran fi nunman lɛ m’ɔ le ɲrun trɛ i’n ti’n, ɔ boli i bɔbɔ i dunman tali nda.+ 14 Ɔ seli kɛ: “Ń má yrá ɔ su, yɛ ń má yó maan ɔ osu’n ɔ́ trɛ́ kpa.”+ 15 Yɛ kɛ Abraamun trɛli i awlɛn’n, ɔ ɲannin like nga Ɲanmiɛn seli kɛ ɔ́ fá mɛ́n i’n. 16 Kɛ sran’m bé tá nda’n, sran ng’ɔ le ɲrun tra be’n i dunman yɛ be bo-ɔ. Yɛ kɛ be ko yo sɔ’n, nn akplowa kwlaa w’a wie, afin ndɛ nga be kannin’n, bé yó i nuan su sa sakpa.+ 17 I wafa kunngba’n, Ɲanmiɛn kleli be nga i waan ɔ́ mán be like’n+ be kɛ saan i klun sa’n ɔ́ kpɛ́n su. I sɔ’n ti’n, ɔ tali su nda. 18 Ɔ maan like nga Ɲanmiɛn seli kɛ ɔ́ yó’n, ɔ nin nda ng’ɔ tali’n be kwlá kaciman. Afin Ɲanmiɛn kwlá buaman ato.+ I sɔ’n ti’n, e mɔ e fia Ɲanmiɛn sin’n, e kwla ɲan wunmiɛn e fa e wla e guɛ i like nga be fa sieli e ɲrun mɔ e wla o su kpa’n i su. 19 Like sɔ mɔ e wla o su’n,+ ɔ tra e ase kɛ like ng’ɔ tra mmeli’n i ase’n* sa naan e ɲan nguan. Ɔ yo maan e jran kekle kpa, yɛ e akunndan’n yoman nɲɔnnɲɔn. Ɔ fa e kɔ rido m’ɔ kpɛ Ɲanmiɛn sua’n nun’n i sin lɔ.+ 20 Zezi dunnin mmua e ɲrun wluli lɔ, ɔ tikeli atin’n yɛ ɔ siesieli i ye mannin e.+ Ɔ kacili Ɲanmiɛn ɲrun jranfuɛ dan kɛ Mɛlkisedɛki sa, yɛ ɔ́ ká sɔ tititi.+

7 Mɛlkisedɛki sɔ’n ɔ ti Salɛmun famiɛn, yɛ ɔ ti Ɲanmiɛn m’ɔ o Like Kwlaa Ti Su’n i ɲrun jranfuɛ. Kɛ Abraamun nin famiɛn’m be ko kunnin m’ɔ kwlali be’n, m’ɔ́ bá’n, ɔ nin Mɛlkisedɛki be yiali, kpɛkun Mɛlkisedɛki boli muae mɛnnin i.+ 2 Abraamun fali ninnge kwlaa i blusu’n mɛnnin i. Bian sɔ’n i dunman’n i bo’n yɛle “Sa Nuan Su Yolɛ Famiɛn,” kpɛkun i kunngba’n ɔ ti Salɛmun famiɛn, yɛle kɛ ɔ ti “Fɔundi Famiɛn.” 3 Bian sɔ’n, ɔ leman si, ɔ leman nin, ɔ leman osufuɛ, ɔ leman awuliɛ cɛn, yɛ ɔ leman wie cɛn. Sanngɛ ɔ yoli kɛ Ɲanmiɛn i Wa’n sa. Ɔ́ ká Ɲanmiɛn ɲrun jranfuɛ tititi.+

4 Bian sɔ’n, ɔ ti sran dan sakpa. Afin Abraamun m’ɔ ti awlobo kpɛn’n, ɔ fali sran’m be bo ninnge ng’ɔ fɛnnin be’n be nun kpakpafuɛ’m be blusu’n mɛnnin i.+ 5 Mmla’n waan nvlefuɛ’m be fa be ninnge’m be blusu’n be man+ Levi i mma yasua+ nga be sieli be Ɲanmiɛn ɲrun jranfuɛ’n. Kusu nn nvlefuɛ sɔ’m be ti be niaan, yɛle kɛ be ti Abraamun i osu’n nunfuɛ wie. 6 Sanngɛ bian sɔ m’ɔ timan Levi i osu’n nunfuɛ wie’n, ɔ fali Abraamun i ninnge’m be blusu’n. Kpɛkun ɔ boli muae mannin Abraamun mɔ Ɲanmiɛn tɛli i nda’n.+ 7 Sran ng’ɔ le ɲrun’n yɛ ɔ yra sran ng’ɔ leman ɲrun’n i nguan-ɔn. Akplowa nunman nun. 8 Sran akpasua klikli nga sran’m be yi blusu’n be man be’n, be liɛ’n be kwla wu. Sanngɛ kunfuɛ nga be yi blusu’n be mɛn i’n, Ɲanmiɛn Ndɛ’n kle kɛ ɔ o nguan nun.+ 9 Yɛ e kwla se kɛ Levi bɔbɔ m’ɔ deli blusu’n, ɔ sinnin Abraamun i lika mannin blusu’n wie. 10 Afin kɛ Mɛlkisedɛki nin Abraamun bé yía’n, nn ɔ te o i nannan’n i klun.+

11 Mmla nga be fa mannin nvlefuɛ mun’n i nun’n, be seli kɛ Levi i osu’n nunfuɛ mun yɛ be yo Ɲanmiɛn ɲrun jranfuɛ-ɔ.+ ?Sɛ Ɲanmiɛn ɲrun jranfuɛ nga be ti Levi i osu’n nunfuɛ’n be kwla yo naan fɔ’n tu klɔ sran nun’n, nn ɔ fata kɛ Ɲanmiɛn ɲrun jranfuɛ m’ɔ ti kɛ Mɛlkisedɛki sa’n,+ ɔ bla ekun? ?Sɛ Ɲanmiɛn ɲrun jranfuɛ kun m’ɔ ti kɛ Aarɔn sa’n ɔ o lɛ’n ɔ timan kpa sɔ? 12 Afin kɛ mɔ be su kaci Ɲanmiɛn ɲrun jranlɛ junman’n, ɔ fata kɛ be kaci Mmla’n wie kusu.+ 13 Afin sran nga be kɛn i ndɛ wa’n, ɔ fin akpasua uflɛ nun. Kusu akpasua sɔ’n i nunfuɛ’m be wie fi w’a yoman tɛ yifuɛ.+ 14 Ɔ ti weiin kɛ Zida osu’n nun yɛ e Min’n fin-ɔn.+ Kusu Moizi w’a seman kɛ akpasua sɔ’n i nunfuɛ’m bé yó Ɲanmiɛn ɲrun jranfuɛ.

15 Ng’ɔ ti weiin kpa ekun’n, yɛle kɛ Ɲanmiɛn ɲrun jranfuɛ uflɛ+ ng’ɔ́ bá’n, ɔ́ yó kɛ Mɛlkisedɛki sa.+ 16 B’a nianman mmla’n m’ɔ taka asiɛ’n su wa ninnge’m be su’n i su naan b’a fa junman sɔ’n b’a wlɛ i sa nun. Sanngɛ wunmiɛn mɔ maan ɔ kwla ɲan nguan m’ɔ saciman’n,+ i ti yɛ be fali junman sɔ’n be wlɛli i sa nun-ɔn. 17 Afin be kannin sran sɔ’n i ndɛ seli kɛ: “A ti Ɲanmiɛn ɲrun jranfuɛ kɛ Mɛlkisedɛki sa, yɛ á ká sɔ tititi.”+

18 Ɔ maan mmla ng’ɔ o lɛ laa’n, e diman su kun. Afin ɔ kwlá ukaman sran mun kun, kpɛkun ɔ yoman sa fi ye.+ 19 Mmla’n kwlá ukaman e naan y’a yo like kwlaa nga Ɲanmiɛn waan e yo’n.+ Sanngɛ like kun mɔ i kpa trɛ i mɔ e fa e wla guali su’n,+ i lifuɛ’n ɔ kwla uka e naan y’a yo like kwlaa nga Ɲanmiɛn waan e yo’n. Like sɔ’n ti’n, e kwla fa e wun mantan Ɲanmiɛn.+ 20 Ka naan Ɲanmiɛn w’a sie Zezi kɛ ɔ yo i ɲrun jranfuɛ’n, ɔ dun mmua tali nda. 21 (Afin kwlaa naan b’a sie sran wie mun Ɲanmiɛn ɲrun jranfuɛ’n, b’a taman be nda. Sanngɛ i liɛ’n, Ɲanmiɛn dun mmua tɛli i nda. Ɔ seli kɛ: “Zoova* tali nda, ɔ su kaciman akunndan,* ‘A ti Ɲanmiɛn ɲrun jranfuɛ, yɛ á ká sɔ tititi.’”)+ 22 Aenguɛ uflɛ sɔ’n i kpa tra laa liɛ’n, yɛ Zezi yɛ maan e si kɛ ɔ ti kpa sakpa-ɔ.+ 23 Asa ekun’n, sran kpanngban be kaci Ɲanmiɛn ɲrun jranfuɛ,+ afin wie’n ti’n, Ɲanmiɛn ɲrun jranfuɛ’m be kwlá diman be junman’n be guɛmɛn i ti nin i bo. Ɔ maan kɛ wie’m bé wú’n, nn wie’m bé sín be osu. 24 Sanngɛ i liɛ’n, ɔ́ trán nguan nun tititi.+ I sɔ’n ti’n, sran fi su sinmɛn i osu jranman Ɲanmiɛn ɲrun. 25 Ɔ maan be nga be sin i lika be fa be wun mantan Ɲanmiɛn’n, ɔ kwla de be mlɔnmlɔnmlɔn. Afin ɔ o lɛ titi ɔ kpata be ti.+

26 Sɛ sran kɛ ngalɛ sa’n ti Ɲanmiɛn ɲrun jranfuɛ dan’n, i sɔ’n ti kpa man e. Afin w’a kpɔciman Ɲanmiɛn le, w’a yoman sa tɛ le, fiɛn kaan sa nunmɛn i wun,+ ɔ nin sa tɛ yofuɛ’m be timan kun kaan sa, kpɛkun ɔ ɲannin ɲrun nglo mmuammua lɔ.+ 27 Ɔ timan kɛ Ɲanmiɛn ɲrun jranfuɛ dan onga’m be sa, yɛle kɛ i liɛ’n, ɔ nunman nun kɛ ɔ yi tɛ cɛn kwlakwla,+ ɔ nunman nun kɛ ɔ dun mmua yi i bɔbɔ i sa tɛ’m be ti tɛ, kpɛkun i sin’n, ɔ yi nvlefuɛ’m be sa tɛ’m be ti tɛ.+ Afin ɔ yili tɛ kpɛ kunngba cɛ, yɛ ɔ su yomɛn i sɔ kun. Yɛle kɛ ɔ fɛli i wun mannin.+ 28 Be nga Mmla’n maan be sie be Ɲanmiɛn ɲrun jranfuɛ dan’n, be ti sa tɛ yofuɛ.+ Sanngɛ kɛ Mmla’n bali’n, nda nga i sin’n be tali’n+ ti’n be sieli Ɲanmiɛn i mma’m be nun kun Ɲanmiɛn ɲrun jranfuɛ dan. Ba sɔ’n yoli kpa,+ yɛ ɔ́ ká sɔ tititi.

8 Ndɛ nga e su kan’n i cinnjin lika’n yɛ: E le Ɲanmiɛn ɲrun jranfuɛ dan kun.+ Ɔ trannin ase Sran ng’ɔ le ɲrun kpa’n i famiɛn bia m’ɔ o ɲanmiɛn su lɔ’n i fama su.+ 2 Ɔ di junman lika m’ɔ ti Ɲanmiɛn liɛ klonglo’n+ m’ɔ o tannin sua kpakpafuɛ’n nun’n i nun lɔ. Tannin sua sɔ’n Zoova* yɛ ɔ yoli-ɔ, nán sran yɛ ɔ yoli-ɔ. 3 Afin sran kwlaa nga be sie i Ɲanmiɛn ɲrun jranfuɛ dan’n, be sie i naan ɔ sɔ ninnge nga sran’m be waan bé fá mán Ɲanmiɛn’n, ɔ nin tɛ nga be waan bé yí’n be nun ɔ fa man Ɲanmiɛn. Ɔ maan ɔ fata kɛ Ɲanmiɛn ɲrun jranfuɛ dan nga kusu ɔ ɲan like kun m’ɔ́ fá mán Ɲanmiɛn-ɔn.+ 4 Sɛ ɔ ti kɛ ɔ o asiɛ’n su wa sa’n, nn w’a yoman Ɲanmiɛn ɲrun jranfuɛ.+ Afin be nga Mmla’n waan be sɔ sran’m be ninnge’m be nun be man Ɲanmiɛn’n, be o lɛ laa. 5 Junman nga sran sɔ’m be di’n, ɔ fa ɲanmiɛn su lɔ liɛ’n,+ yɛ ɔ ti i nzɔliɛ.+ Ɔ ti kɛ Moizi liɛ’n sa. Kɛ ɔ́ wá kplán tannin sua’n, Ɲanmiɛn mɛnnin i mmla. Ɔ seli kɛ: “Nian nun yo be kwlaa sɛsɛsɛ kɛ be nzɔliɛ nga n fa kleli wɔ oka’n su lɔ’n sa.”+ 6 Sanngɛ junman nga be fa wlɛli i Zezi sa nun’n, i kpa tra Ɲanmiɛn ɲrun jranfuɛ kun nga’m be junman liɛ’n. Afin i yɛ ɔ ti aenguɛ mɔ i kpa tra laa liɛ’n+ i nun jranfuɛ’n+ niɔn. Aenguɛ sɔ’n, ɔ taka like nga Ɲanmiɛn waan ɔ́ yó’n mɔ i kpa tra laa liɛ’n su.+

7 Sɛ ɔ ti kɛ aenguɛ klikli’n yoli kpa sa’n, nn b’a traman aenguɛ uflɛ kun.+ 8 Ɔ maan ɔ ijɔli i sran mun. Afin “Zoova* waan: ‘An nian! Cɛn wie lele’n, e nin Izraɛli nvle’n nin Zida nvle’n é trá aenguɛ uflɛ kun.’ 9 Zoova* seli ekun kɛ, ‘Aenguɛ sɔ’n su yoman kɛ aenguɛ nga e nin be nannan mun e trali’n sa. Kɛ n trali be nannan’m be sa mɔ n fa be Ezipti lɔ n fiteli’n,+ yɛ e nin be trali aenguɛ sɔ’n niɔn. Sanngɛ b’a diman min aenguɛ’n su. I sɔ’n ti’n, m’an nianman be lika kun.’

10 “Zoova* waan: ‘Kɛ cɛn sɔ’m be ko sin’n, aenguɛ nga e nin Izraɛlifuɛ mun é trá’n yɛ: Ń fá min mmla mun ń wlá be akunndan’n nun, yɛ ń klɛ́ min mmla mun be awlɛn’n nun.+ Ń yó be Ɲanmiɛn, yɛ be kusu bé yó min sran.+

11 “‘Sran fi su klemɛn i wiengu like kun, yɛ sran fi su semɛn i niaan kun kɛ: “Si Zoova!”* Afin be nga be leman ɲrun-o, be nga be le ɲrun-o, be kwlaa bé sí min. 12 Kannzɛ be yoli sa tɛ’n, ń sí be aunnvɔɛ, yɛ min wla su kpɛnman be sa tɛtɛ’m be su kun.’”+

13 Kɛ ɔ kan “aenguɛ uflɛ” ndɛ’n, i sɔ’n kle kɛ i ɲrun’n, laa liɛ’n w’a yo nvuɛn.+ Yɛ kusu kɛ like kun i blɛ’n ko sin m’ɔ ko yo nvuɛn’n, nn ɔ cɛ kan’n be su wunmɛn i kun.+

9 I nun nga sran’m be te di aenguɛ laa’n su’n, be nian mmla wie’m be su yɛ be di Ɲanmiɛn junman’n niɔn. Kpɛkun tannin sua nga be su Ɲanmiɛn nun’n+ wo asiɛ’n su wa. 2 Afin kɛ sran’m be yoli tannin sua’n i sua ba klikli’n, be fali kannin siewlɛ+ nin tabli nin kpanwun nga be siesie be Ɲanmiɛn ɲrun’n,*+ be fa sieli nun. Kpɛkun be flɛli sua ba sɔ’n kɛ Sua Ba m’ɔ ti Ɲanmiɛn liɛ Klonglo’n.+ 3 Sanngɛ rido nɲɔn su’n+ i sin lɔ sua ba liɛ’n, be flɛli i kɛ Sua Ba Ngunmin Kun m’ɔ ti Ɲanmiɛn liɛ Klonglo’n.+ 4 Sua ba sɔ’n nun yɛ ansan yrawlɛ mɔ be fa sika ɔkwlɛ be yoli’n,+ ɔ nin aenguɛ’n i alaka+ mɔ be fali sika ɔkwlɛ kɛtɛli i wun’n+ be wo-ɔ. Be fali sika ɔkwlɛ sɛ mɔ manin o nun’n,+ ɔ nin Aarɔn i waka m’ɔ fɛfɛli’n,+ ɔ nin yɔbuɛ paplaapla+ nga aenguɛ’n i nun ndɛ’n klɛklɛ su’n, be sieli be alaka sɔ’n nun. 5 Seribɛn mɔ be le ɲrun kpa’n be o alaka’n su, yɛ be ndɛwa’n kata alaka’n i tre’n* su.+ Sanngɛ nán ninnge sɔ’m be ndɛ kanlɛ nin i nun yiyilɛ blɛ yɛle nga.

6 I sin’n, kɛ be wie ninnge sɔ’m be siesie’n, Ɲanmiɛn ɲrun jranfuɛ’m be wlu tannin sua’n i sua ba klikli’n nun titi be ko di Ɲanmiɛn junman’n.+ 7 Sanngɛ afuɛ nuan kwlaa nun’n, Ɲanmiɛn ɲrun jranfuɛ dan’n wlu sua ba nɲɔn su’n nun kpɛ kunngba.+ Ɔ fa mmoja yɛ ɔ wlu lɔ-ɔ.+ Ɔ fa yi i bɔbɔ i ti tɛ,+ yɛ ɔ fa yi nvlefuɛ’m be sa tɛ+ nga nán be ɲinfu yɛ be yoli’n, be ti tɛ wie. 8 Ɔ maan Ɲanmiɛn wawɛ’n kle weiin kɛ i nun mɔ tannin sua klikli’n te o lɛ’n, b’a faman atin nga be fa kɔ lika m’ɔ ti Ɲanmiɛn liɛ klonglo’n nun lɔ’n b’a kleman sran fi.+ 9 Tannin sua sɔ’n ti ng’ɔ o lɛ andɛ’n i nzɔliɛ.+ Yɛ i sɔ’n ti’n, sran’m be kwla fa like be man Ɲanmiɛn, kpɛkun be kwla yi tɛ be mɛn i.+ Sanngɛ ninnge kwlaa sɔ’m be kwlá yoman naan sran ng’ɔ di Ɲanmiɛn junman’n i akunndan’n w’a yaci i fɔ bulɛ.+ 10 Afin ninnge sɔ’m be ti aliɛ dilɛ nin nzan nɔnlɛ nin be wun sanwun yolɛ liɛ* ngunmin.+ Asa ekun’n, be wunnɛn’n su ninnge’m be yolɛ’n i su mmla’n+ wo lɛ wie. Ɔ fata kɛ sran’m be fa su lele fa ju cɛn nga bé síesíe ninnge’m be sɛsɛsɛ’n.

11 Sanngɛ Klisi bali ɔ wa yoli Ɲanmiɛn ɲrun jranfuɛ dan naan e ɲan ninnge kpakpa nga e le be dɔ nga su’n. Yɛ ɔ wluli tannin sua kun nun. Tannin sua sɔ’n ti dan, ɔ ti kpa tra tannin sua onga mun. Nán sran yɛ ɔ kplannin-ɔn, yɛ ɔ nunman asiɛ’n su wa. 12 Ɔ wluli lika m’ɔ ti Ɲanmiɛn liɛ klonglo’n nun. Sanngɛ kɛ ɔ́ wlú lɔ’n, nán boli nin nannin gbanflɛn mmoja yɛ ɔ fa wluli lɔ-ɔ. I bɔbɔ i mmoja’n+ yɛ ɔ fa wluli lɔ-ɔ. Ɔ yoli sɔ kpɛ kunngba cɛ. Ɔ maan ɔ deli e* mlɔnmlɔn.+ 13 Ɲanmiɛn ɲrun jranfuɛ’m be fa boli nin nannin tola mmoja+ be kpɛntɛnkpɛntɛn be nga be o fiɛn nun’n be wun, yɛ be fa nannin talua mɔ be yrɛ i’n i nzuɛn’n be fa guagua be wun wie naan be yo sanwun.+ 14 Sɛ ɔ ti sɔ’n, Klisi i mmoja’n+ kwla yo sɔ tra su. Afin Ɲanmiɛn wawɛ’n m’ɔ o lɛ titi’n yoli maan ɔ fɛli i wun mannin Ɲanmiɛn kɛ like mɔ be fa man Ɲanmiɛn mɔ fiɛn kaan sa nunmɛn i wun’n sa. I mmoja’n yoli e akunndan’n i sanwun, yɛ e yoman sa ngbɛnngbɛn mun.+ Ɔ maan e kwla su Ɲanmiɛn m’ɔ lafiman’n.+

15 I sɔ’n ti yɛ ɔ ti aenguɛ uflɛ’n i nun jranfuɛ’n niɔn.+ Ɔ yoli sɔ naan be nga be flɛli be’n be kwla ɲan like kpa m’ɔ su wieman le mɔ be tali be nda kɛ bé fá mán be’n. I wie’n ti yɛ i kwlaa sɔ’n kwla yoli ye-ɔ, yɛ ɔ kpɔli be ti.+ I sɔ’n ti’n, be kwla ɲan be ti sa tɛ nga i nun mɔ be te di aenguɛ laa’n su’n be yoli’n, i sa nun.+ 16 Kɛ be tra aenguɛ’n, ɔ ti cinnjin kɛ sran ng’ɔ jrannin aenguɛ sɔ’n nun’n, ɔ wu. 17 Afin ka naan b’a di aenguɛ su’n, ɔ fata kɛ sran annzɛ nnɛn wu. Sɛ sran ng’ɔ jrannin aenguɛ sɔ nun’n ɔ te o nguan nun’n, be diman su. 18 I sɔ’n ti yɛ be dun mmua guali mmoja ase ka naan b’a di aenguɛ laa’n su’n niɔn. 19 Afin kɛ Moizi boli Mmla’n i nun ndɛ’m be kwlaa be su kleli nvlefuɛ’m be kwlaa wieli’n, ɔ fali nannin gbanflɛn nin boli’m be mmoja sanngannin nzue nun. Kpɛkun ɔ fali bua ndrɛ ɔkwlɛ bioun nin izɔpu sama ɔ fa boli nun, kpɛkun ɔ fa kpɛntɛnkpɛntɛnnin fluwa’n nin nvlefuɛ’m be kwlaa be su. 20 Yɛ ɔ seli kɛ: “Mmoja mɔ maan Ɲanmiɛn nin amun trali aenguɛ’n mɔ i waan amun di su’n, yɛ ɔ o yɛ.”+ 21 Ɔ fali mmoja’n wie kpɛntɛnkpɛntɛnnin tannin sua’n nin kpongbo nga be fa di Ɲanmiɛn junman’n be kwlaa be su.+ 22 Nanwlɛ, kɛ nga Mmla’n fa kan’n sa’n, mmoja yɛ be fa yo ninnge sunman sanwun-ɔn.+ Yɛ sɛ b’a guaman mmoja ase’n, be kwlá yaciman sran kun i wun sa’n be cɛmɛn i.+

23 I sɔ’n ti’n, ɔ fata kɛ be fa nnɛn nga be fa yili tɛ’n be mmoja’n be yo ninnge nga be fa+ ɲanmiɛn su lɔ ninnge mun’n, be sanwun.+ Sanngɛ kɛ ɔ ko yo naan ninnge nga be o ɲanmiɛn su lɔ’n b’a yo sanwun’n, ɔ fata kɛ be fa like wie mɔ i kpa tra tɛ nga be fa nnɛn be yi’n. 24 Afin lika m’ɔ ti Ɲanmiɛn liɛ klonglo mɔ Klisi wluli nun’n, ɔ timan sran sa nuan like+ m’ɔ fa lika m’ɔ ti Ɲanmiɛn liɛ klonglo’n i kpakpafuɛ’n niɔn.+ Sanngɛ ɲanmiɛn su lɔ yɛ ɔ ɔli-ɔ.+ Ɔ maan siɛn’n, ɔ jran Ɲanmiɛn ɲrun man e.+ 25 W’a fɛmɛn i wun w’a manman kpɛ sunman, kɛ Ɲanmiɛn ɲrun jranfuɛ dan’n mɔ afuɛ nuan kwlaa’n,+ ɔ fa mmoja m’ɔ timɛn i bɔbɔ i mmoja’n ɔ wlu lika m’ɔ ti Ɲanmiɛn liɛ klonglo’n nun lɔ’n sa. 26 Sɛ ɔ ti kɛ ɔ yoli sɔ’n, nn kɛ ɔ fɛ i mɛn’n i bo bolɛ nun lele’n,* ɔ fɛli kpɛ sunman. Sanngɛ ɔ fɛli i wun kleli kpɛ kunngba cɛ. Ɔ yoli sɔ mɛn’n i awieliɛ blɛ nga nun,* naan tɛ m’ɔ fɛ i wun yili’n ti’n, sa tɛ’n wie mlɔnmlɔnmlɔn.+ 27 Klɔ sran’m be liɛ’n, be wu kpɛ kunngba cɛ. Yɛ i sin’n, bé dí be jɔlɛ. 28 I kunngba’n yɛle Klisi’n i liɛ’n. Ɔ fɛli i wun mannin kpɛ kunngba cɛ naan ɔ́ súa sran kpanngban be sa tɛ’n.+ Kɛ ɔ́ wá yí i wun nglo ekun’n, nán kɛ sa tɛ’n i nunnunlɛ ti-ɔ. Sanngɛ ɔ́ bá naan be nga be kunndɛ kpa kɛ ɔ de be’n, be wun i.+

10 Afin Mmla’n ti ninnge kpakpa nga bé wá bá’n, be nzɔliɛ.+ Ɔ timan ninnge’m be bɔbɔ ba’n. I sɔ’n ti’n, ɔ* kwlá yoman naan tɛ nga be yi i afuɛ kwlaa nun’n w’a yo be nga be fa be wun mantan Ɲanmiɛn’n be sanwun.+ 2 Sɛ ɔ ti kɛ tɛ sɔ’m be yo sran sanwun mlɔnmlɔn ɔ yo ye’n, nn be yacili be yilɛ. ?Nɛ́n i-ɔ? Sɛ ɔ ti sɔ’n, nn kɛ be nga be di Ɲanmiɛn junman’n be ko yo sanwun ko wie’n, be akunndan’n su buman be fɔ kun sa tɛ mɔ be yo’n ti. 3 Sanngɛ ɔ timan sɔ. Afin tɛ sɔ’m be yo maan sran’m be wla kpɛn be sa tɛ’m be su afuɛ kwlaa.+ 4 Afin nannin mmoja nin boli mmoja’n be kwlá nunnunman sa tɛ’n.

5 I sɔ’n ti’n, kɛ ɔ bali mɛn’n nun’n, ɔ seli Ɲanmiɛn kɛ: “‘W’a kunndɛman kɛ be yi tɛ be man wɔ annzɛ be man wɔ like. Sanngɛ a mannin min wunnɛn kun. 6 Ɔ klun w’a jɔman tɛ nga kɛ bé yí’n be yra nnɛn’n i kɔlikɔli’n nin sa tɛ’n i ti tɛ’n be su.’+ 7 I ti’n, n seli kɛ: ‘Nian! N bali. Be klɛli min su ndɛ fluwa’n nun. Min Ɲanmiɛn, ɔ klun sa yolɛ’n ti yɛ n bali-ɔ.’”+ 8 Ɔ dun mmua seli Ɲanmiɛn kɛ: “W’a kunndɛman kɛ be yi tɛ be man wɔ annzɛ be man wɔ like annzɛ be yi tɛ nga kɛ bé yí’n be yra nnɛn’n i kɔlikɔli’n, annzɛ be yi sa tɛ’n i ti tɛ be man wɔ, yɛ ɔ klun w’a jɔman be su.” Mmla’n i ti yɛ be yi tɛ sɔ mun-ɔn. 9 I sin’n, ɔ seli kɛ: “Nian! N bali ɔ klun sa yolɛ.”+ Kɛ ɔ ko yo naan w’a kwla taka like nɲɔn su ng’ɔ kɛnnin i ndɛ’n, ɔ nunnunnin klikli’n. 10 Ɲanmiɛn i “klun sa”+ sɔ’n ti’n, y’a yo sanwun. Afin Zezi Klisi fɛli i wun mannin, ɔ yoli i sɔ kpɛ kunngba cɛ, ɔ su yomɛn i kun.+

11 Asa ekun’n, Ɲanmiɛn ɲrun jranfuɛ kwlaa di i Ɲanmiɛn junman’n cɛn kwlakwla,+ yɛ ɔ yi tɛ kunngba sɔ mun kpɛ sunman.+ Sanngɛ i sɔ m’ɔ yo’n kwlá nunnunman sa tɛ mun mlɔnmlɔnmlɔn.+ 12 Sran sɔ’n i liɛ’n, ɔ yili sa tɛ’n i ti tɛ kpɛ kunngba cɛ, yɛ ɔ su yiman uflɛ kun. Kpɛkun ɔ trannin ase Ɲanmiɛn i sa fama su.+ 13 Siɛn’n, ɔ o lɔ mínndɛ kɛ be fɛ i kpɔfuɛ’m be sie i ja bo kɛ like mɔ be fa be ja takataka su’n sa.+ 14 Afin ɔ yili tɛ kunngba naan be nga be ti yɛ ɔ yili tɛ sɔ’n be yo sanwun kpa+ tititi. 15 Asa ekun’n, Ɲanmiɛn wawɛ’n kle e weiin kɛ ɔ ti sɔ sakpa. Afin ɔ seli kɛ: 16 “Zoova* waan: ‘Kɛ cɛn sɔ’m be ko sin’n, aenguɛ nga e nin be é trá’n yɛ: Ń fá min mmla mun ń wlá be awlɛn’n nun, yɛ ń klɛ́ min mmla mun be akunndan’n nun.’”+ 17 I sin’n, ɔ se kɛ: “Min wla su kpɛnman be sa tɛtɛ nin ɲin kekle nga be yoli be’n be su kun.”+ 18 Kɛ be ko yaci sa sɔ mun ko cɛ be’n, be yiman sa tɛ’n i ti like kun.

19 Aniaan mun, Zezi i mmoja’n ti’n, kɛ é fá atin m’ɔ kpɛn Ɲanmiɛn i lika m’ɔ ti i liɛ klonglo’n su’n,+ e klun titiman e. 20 Atin sɔ m’ɔ yili mannin e’n ti atin uflɛ, yɛ ɔ man nguan. I nun ng’ɔ sinnin rido m’ɔ kpɛ Ɲanmiɛn sua’n nun’n i sin lɔ’n, yɛ ɔ yili atin sɔ’n niɔn. Rido+ sɔ’n yɛle i wunnɛn’n. 21 Ɔ maan e le Ɲanmiɛn ɲrun jranfuɛ dan kun. I yɛ ɔ nian Ɲanmiɛn i awlo’n su-ɔ.+ 22 I sɔ’n ti’n, maan e fa e wun mantan Ɲanmiɛn, nán maan akunndan tɛ tran e klun, kpɛkun maan e lafi i su kpa. Ka naan y’a yo sɔ’n, maan e awlɛn’n yo sanwun, kpɛkun nán e akunndan’n bu e fɔ kun,+ yɛ e fa nzue klengle e wunnzin naan e wunnɛn’n yo sanwun.+ 23 Maan e kan like nga e lafi su’n i ndɛ titi, nán maan e kpɔnzɔ.+ Afin sran ng’ɔ seli kɛ ɔ́ yó like kpa mán e’n, ɔ ti nanwlɛfuɛ. 24 Maan e wiengu ndɛ lo e,* maan e wla e wiengu fanngan naan e yi klolɛ’n i nglo, naan e yo sa kpa.+ 25 Nán maan e yaci yialɛ+ kɛ be wie’m be yo’n sa. Sanngɛ maan e wla e wiengu fanngan.+ Yɛ kɛ mɔ e wun kɛ cɛn sɔ’n su mantan koko’n, maan e yo i sɔ tra su.+

26 Afin sɛ e si ndɛ nanwlɛ’n naan e ɲinfu e yo sa tɛ’n,+ be kwlá yiman e sa tɛ’m be ti tɛ kun.+ 27 Like ng’ɔ ka m’ɔ yo sro’n yɛle fɔ nga Ɲanmiɛn wá bú be nga be yo ɲin kekle i su’n, ɔ nin Ɲanmiɛn i ya m’ɔ jue kɛ sin sa m’ɔ́ yrá be’n.+ 28 Sran kwlaa ng’ɔ fɔn Moizi i Mmla’n, sɛ sran nɲɔn annzɛ sran nsan be di i wun lalo’n, be simɛn i aunnvɔɛ, be kun i.+ 29 ?Ɔ maan sran ng’ɔ bu Ɲanmiɛn i Wa’n i finfinfuɛ’n, m’ɔ buman mmoja nga be fa trali aenguɛ+ m’ɔ yoli i sanwun’n i like fi’n, m’ɔ kpɛ Ɲanmiɛn wawɛ’n mɔ i dunman nun ti’n Ɲanmiɛn si e aunnvɔɛ i nzowa’n, amun bumɛn i kɛ i fɔ tulɛ liɛ’n ɔ́ yó dan trá kunfuɛ’n i liɛ’n?+ 30 Afin e si Sran ng’ɔ seli kɛ: “Min yɛ n tu klunngbɔ’n niɔn. Min yɛ ń túa be kalɛ-ɔ.” Ɔ se ekun kɛ: “Zoova* dí i sran’m be jɔlɛ.”+ 31 Nanwlɛ, sran ng’ɔ tɔ Ɲanmiɛn m’ɔ lafiman’n i sa nun’n, i yako!

32 Sanngɛ maan amun wla kpɛn sa nga be juli laa’n be su titi. Afin kɛ Ɲanmiɛn i kannin’n kpajali amun su’n,+ be kleli amun yalɛ kpa, yɛ amun wunnin ɲrɛnnɛn. 33 Blɛ wie nun’n, be kpɛli amun nzowa, yɛ be kleli amun yalɛ sran’m be kwlaa be ɲrun. Yɛ blɛ wie nun’n, amun jrannin be nga sa sɔ’m be o be su’n be sin. 34 Amun sili be nga be o bisua’n be aunnvɔɛ, yɛ aklunjɔɛ su’n amun kplinnin su kɛ be de amun ninnge mun,+ afin amun si kɛ like nga amún wá ɲɛ́n i’n ɔ ti kpa dan, yɛ ɔ su saciman le.+

35 I sɔ’n ti’n, nán amun yaci yakpa yolɛ, afin like nga bé fá yó amun mo’n ti dan.+ 36 Ɔ fata kɛ amun tra amun awlɛn.+ I liɛ’n, kɛ amun ko yo Ɲanmiɛn i klun sa’n ko wie’n, amún ɲán like nga be seli kɛ bé fá mán amun’n. 37 Afin “ɔ ka kaan sa’n,”+ “sran m’ɔ o atin’n su’n, ɔ́ bá. Ɔ su kaman siɛn.”+ 38 “Sanngɛ min sran kpa’n i Ɲanmiɛn sulafilɛ’n ti yɛ ɔ́ ɲán nguan-ɔn.”+ “Sɛ ɔ cuɛn i wun kɔ siɛn’n, min klun su jɔmɛn i wun.”+ 39 E timan kɛ be nga be cuɛn be wun be kɔ siɛn mɔ bé núnnún be’n be sa.+ Sanngɛ e liɛ’n, e ti kɛ be nga be lafi Ɲanmiɛn su mɔ i sɔ’n ti’n bé ká nguan nun’n be sa.

11 Ɲanmiɛn sulafilɛ’n, yɛle kɛ e si jrɛiin kɛ like nga e wla o su’n, é ɲɛ́n i sakpa.+ Yɛ e si weiin kɛ ninnge nga sran ɲinma wunman be’n, be o lɛ sakpa. 2 Ɲanmiɛn su mɔ laa sran mun* be lafili’n ti’n, Ɲanmiɛn kleli kɛ i klun jɔ be wun.

3 Ɲanmiɛn su mɔ e lafi’n ti’n, e wun i wlɛ kɛ Ɲanmiɛn nuan ndɛ’n ti yɛ mɛn’n* wo lɛ-ɔ. Ɔ maan like nga e wunmɛn i’n ti yɛ ninnge nga e wun be’n be o lɛ-ɔ.

4 Ɲanmiɛn su mɔ Abɛli lafili’n ti’n, tɛ m’ɔ yi mannin Ɲanmiɛn’n i kpa trali Kaɛn liɛ’n.+ Yɛ i Ɲanmiɛn sulafilɛ sɔ’n ti’n, Ɲanmiɛn kleli i kɛ ɔ ti sran kpa. Afin Ɲanmiɛn sɔli ninnge ng’ɔ mɛnnin i’n nun.+ Ɔ maan kannzɛ ɔ wuli’n, Ɲanmiɛn m’ɔ lafili i su’n ti’n, ɔ te ijɔ.+

5 Ɲanmiɛn su mɔ Enɔku lafili’n ti’n,+ Ɲanmiɛn fɛ i ɔli lika uflɛ, kɛ ɔ ko yo naan w’a wunman ɲrɛnnɛn naan w’a wu’n ti. B’a wunmɛn i lika fi, afin Ɲanmiɛn fɛ i sieli i lika uflɛ.+ Sanngɛ ka naan Ɲanmiɛn w’a yo sɔ’n, ɔ kleli i kɛ i klun jɔ i wun kpa. 6 Afin sran ng’ɔ lafiman Ɲanmiɛn su’n, Ɲanmiɛn klun jɔmɛn i wun mlɔnmlɔn. Afin sran ng’ɔ fɛ i wun mantan Ɲanmiɛn’n, ɔ fata kɛ ɔ lafi su kɛ ɔ o lɛ, naan ɔ yo be nga be tu be klun be kunndɛ i’n be ye.+

7 Ɲanmiɛn su mɔ Nowe lafili’n ti’n,+ kɛ Ɲanmiɛn boli sa nga be nin-a juman’n be su kleli i’n,+ i ɲin yili Ɲanmiɛn, yɛ ɔ boboli mmeli* kun+ ɔ fa deli i awlofuɛ mun. I Ɲanmiɛn sulafilɛ sɔ’n ti’n, ɔ buli mɛn nunfuɛ’m be fɔ.+ Kpɛkun be buli i sran kpa Ɲanmiɛn su m’ɔ lafili’n ti.

8 Ɲanmiɛn su mɔ Abraamun lafili’n ti’n,+ kɛ Ɲanmiɛn flɛli i’n, ɔ ɔli lika mɔ Ɲanmiɛn waan ɔ́ fá mɛ́n i’n nun. I ɲin m’ɔ yi Ɲanmiɛn’n ti yɛ ɔ yoli sɔ-ɔ. Kannzɛ ɔ siman lika ng’ɔ su kɔ’n, sanngɛ ɔ ɔli.+ 9 Ɲanmiɛn su m’ɔ lafili’n ti’n, ɔ ɔli aofuɛ ko trannin asiɛ nga Ɲanmiɛn waan ɔ́ fá mɛ́n i’n su.+ Ɔ nin Izaaki nin Zakɔbu mɔ asiɛ nga Ɲanmiɛn waan ɔ́ fá mɛ́n i’n, ɔ́ yó be liɛ wie’n,+ be trannin tannin sua nun.+ 10 Afin ɔ su minndɛ klɔ mɔ be wlɛli i bo ase kpa’n. Ɲanmiɛn bɔbɔ yɛ ɔ jajali yɛ ɔ kplannin-ɔn.+

11 Ɲanmiɛn su mɔ Sara lafili’n ti’n, kannzɛ ɔ yoli kpɛnngbɛn’n ɔ wunnzɛli,+ afin ɔ buli Sran ng’ɔ tɛli i nda’n i nanwlɛfuɛ. 12 I sɔ’n ti’n, sran m’ɔ ti kɛ w’a wu sa’n,+ ɔ wuli ba.+ Ba sɔ’m be sɔnnin kpa kɛ ɲanmiɛn su lɔ nzraama mun nin jenvie nuan aunɲan mɔ be kwlá kaman be’n sa.+

13 Be kwlaa be lafili Ɲanmiɛn su lele be fa wuli. Kannzɛ b’a ɲanman ninnge nga Ɲanmiɛn waan ɔ́ fá mán be’n,+ sanngɛ be ɲin tali be mmua lɔ,+ yɛ be sɔli be nun. Kpɛkun be kɛnnin i sran’m be kwlaa be ɲrun kɛ be ti aofuɛ nin wlanwlanfuɛ lika sɔ’n nun. 14 Afin be nga be kan sɔ’n, be kle weiin kɛ be bɔbɔ be tranwlɛ yɛ be kunndɛ-ɔ. 15 Nanwlɛ, sɛ ɔ ti kɛ be buli lika nga be fin lɔ’n i akunndan trilili’n,+ nn be sali be sin lɔ. 16 Sanngɛ siɛn’n, be su kunndɛ lika kpa kun. Lika sɔ’n wo ɲanmiɛn su lɔ. I sɔ’n ti’n, kɛ be kpan flɛ be Ɲanmiɛn’n ɲannzuɛn kunmɛn i.+ Afin w’a kplan klɔ kun w’a sie be.+

17 Ɲanmiɛn su mɔ Abraamun lafili’n ti’n, kɛ be sɛli i niannin’n,+ ɔ ti kɛ nn w’a fa Izaaki w’a man sa. Abraamun m’ɔ sɔli nda nga Ɲanmiɛn tɛli i’n nun aklunjɔɛ su’n ɔ kunndɛli kɛ ɔ́ fɛ́ i wa kunngba cɛ’n ɔ́ mán,+ 18 kusu nn b’a dun mmua b’a se i kɛ: “Be nga bé flɛ́ be kɛ ɔ osu’n nunfuɛ mun’n, bé fín Izaaki.”+ 19 Sanngɛ ɔ seli i klun lɔ kɛ kannzɛ Izaaki wu’n, Ɲanmiɛn kwla cɛn i. Kpɛkun Ɲanmiɛn fɛli i wa’n mɛnnin i. Sa sɔ’n ti sa nzɔliɛ.+

20 Ɲanmiɛn su mɔ Izaaki lafili’n ti’n, ɔ boli muae mannin Zakɔbu+ nin Ezau.+ Ɔ kannin sa ng’ɔ́ wá jú be ɲrun lɔ’n i ndɛ kleli be.

21 Ɲanmiɛn su mɔ Zakɔbu lafili’n ti’n, kɛ ɔ́ wá wú’n+ ɔ boli muae mannin Zozɛfu i mma mun.+ Kpɛkun ɔ trɛli i kpɔnman’n, ɔ kisali su suli Ɲanmiɛn.+

22 Ɲanmiɛn su mɔ Zozɛfu lafili’n ti’n, kɛ ɔ́ wá wú’n ɔ kannin Izraɛli i mma’m be Ezipti lɔ tulɛ’n i ndɛ. Kpɛkun like ng’ɔ klo kɛ be fɛ i owie’m be yo’n,* ɔ kleli be.+

23 Ɲanmiɛn su mɔ Moizi i si nin i nin be lafili’n ti’n, kɛ be wuli i’n be fɛ i fiali anglo nsan,+ afin be wunnin kɛ ba’n ti klanman.+ Yɛ b’a sroman famiɛn’n, ɔ maan b’a dimɛn i mmla’n su.+ 24 Ɲanmiɛn su mɔ Moizi lafili’n ti’n, kɛ ɔ ɲinnin’n+ w’a kplinman su kɛ be flɛ i kɛ Faraɔn i wa bla’n i wa.+ 25 Sanngɛ ɔ kloli kɛ be kle i nin Ɲanmiɛn i nvle’n be ɲrɛnnɛn tra kɛ ɔ yo sa tɛ naan ɔ di mɛn le nɲɔn kun’n. 26 Afin kɛ Ɲanmiɛn kpɛli i’n, finfin nga sran’m be yoli i’n ɔ wunnin kɛ ɔ ti kpa tra Ezipti lɔ ninnge kpakpa mun lele. Ɔ maan ɔ fɛ i ɲin sieli akatua m’ɔ́ wá ɲɛ́n i’n su. 27 Ɲanmiɛn su m’ɔ lafili’n ti’n, kɛ ɔ́ tú Ezipti lɔ’n,+ w’a sroman famiɛn’n,+ sanngɛ ɔ yoli yakpa. Afin ɔ ti kɛ w’a wun Ɲanmiɛn mɔ sran kwlá wunmɛn i’n sa.+ 28 Ɲanmiɛn su m’ɔ lafili’n ti’n, ɔ dili Zifu’m be Delɛ Cɛn’n, kpɛkun ɔ fali mmoja kliklili anuan’m be kadri’m be su, kɛ ɔ ko yo naan like sacifuɛ’n w’a yoman be mma’m be like yaya’n ti.*+

29 Ɲanmiɛn su mɔ be lafili’n ti’n, be kpɛli Jenvie Ɔkwlɛ’n kɛ asiɛ kee su yɛ be su nanti sa.+ Sanngɛ kɛ Eziptifuɛ’m be waan bé yó sɔ wie’n, jenvie’n katali be su.+

30 Ɲanmiɛn su mɔ nvlefuɛ’m be lafili’n ti’n, kɛ be nantili be bo sin yiali Zeriko klɔ’n cɛn ba nso’n, klɔ’n i wun talɛ’n bu guali.+ 31 Ɲanmiɛn su mɔ Raabu m’ɔ ti tekle bla’n ɔ lafili’n ti’n, kɛ bé kún ɲin keklefuɛ mun’n, b’a kunmɛn i wie. Afin ɔ sɔli be nga be ɔli klɔ’n i kpla nianlɛ’n be nun klanman.+

32 ?Yɛ ń sé sɛ ekun? Afin sɛ min waan ń kán Zedeɔn+ nin Baraki+ nin Samsɔn+ nin Zɛfte+ nin Davidi+ nin Samiɛli+ yɛ Ɲanmiɛn nuan ijɔfuɛ onga’m be ndɛ’n, n su ɲanman blɛ n kɛnmɛn i ngba. 33 Ɲanmiɛn su mɔ be lafili’n ti’n, be kwlali nvle mun,+ be yoli sa ng’ɔ ti i nuan su’n, kpɛkun like nga be wla o su’n be ɲɛnnin i sakpa,+ be katali asɔmɔli’m be nuan’n su,+ 34 sin’n w’a ɲanman ta be su,+ sran wie’m be waan bé kún be nin tokofi sanngɛ w’a yoman ye,+ be ti fakafaka sanngɛ be ɲannin fanngan,+ be yoli yakpa alɛ kunlɛ nun,+ be yoli maan sonja mɔ be bali be klɔ’n i utulɛ’n be wanndili.+ 35 Bla wie’m be sran nga be wuli’n be cɛnnin.+ Sran wie’m be liɛ’n, be kleli be ɲrɛnnɛn. Afin b’a kplinman su kɛ be fa like uflɛ kpɔ be ti, kɛ ɔ ko yo naan b’a cɛn be naan b’a ɲan nguan kpafuɛ’n ti. 36 Wie’m be liɛ’n, be yoli be finfin, kpɛkun be boli be. I kpa bɔbɔ’n be cili be,+ be wlali be bisua.+ 37 Be finfinnin be yɔbuɛ,+ be sali be niannin, be kpacili be nun nɲɔn, be fali tokofi kunnin be,+ be wlali bua nin boli kplo be wlanwlannin.+ Kɛ ɔ́ yó sɔ’n nn be leman like fi, nn bé wún ɲrɛnnɛn,+ nn bé yó be tɛtɛ.+ 38 Kɛ mɔ be ti sran kpa’n ti’n, be nin mɛn nga fataman. Be wlanwlannin aawlɛ flɛnnɛn’n nun nin oka’m be su daan, be trannin yɔbuɛ buɛ+ nin kunman’m be nun.

39 Be kwlaa sɔ’n, kannzɛ be kannin be wun ndɛ kpa Ɲanmiɛn su mɔ be lafili’n ti’n, sanngɛ b’a ɲanman like nga be waan bé fá mán be’n. 40 Afin Ɲanmiɛn buli like kun m’ɔ ti kpa tra su’n i akunndan sieli e w’a cɛ, kɛ ɔ ko yo naan b’a yoman kpa b’a yaciman e’n ti.+

12 I sɔ’n ti’n, kɛ mɔ lalofuɛ kpanngban kpa sɔ’m be bo sin yia e’n ti’n, maan e gua ninnge nga be ti kɛ trɔ sa’n be ase. Yɛ e kpalo sa tɛ nga ɔ cɛman nn w’a tanndan e ja nun’n,+ naan e tra e awlɛn e wanndi e ju lika nga be waan e wanndi e ju’n.+ 2 Kɛ é yó sɔ’n, maan e ɲin tran Zezi su kpa. I yɛ ɔ ti Sran cinnjin kpafuɛ m’ɔ kle e atin naan y’a lafi Ɲanmiɛn su-ɔ,+ yɛ i yɛ ɔ yo maan e lafi Ɲanmiɛn su kpa-ɔ. Afin aklunjɔɛ mɔ be fa sieli i ɲrun’n ti’n, kɛ be fɛ i sieli ɲrɛnnɛn waka’n* su’n, ɔ trɛli i awlɛn yɛ ɲannzuɛn w’a kunmɛn i. Kpɛkun i sin’n, ɔ trannin Ɲanmiɛn i bia’n i fama su.+ 3 Maan amun bu sran sɔ’n i akunndan kpa. Kɛ sa tɛ yofuɛ’m be kɛnnin i ndɛ tɛtɛ’n,+ ɔ trɛli i awlɛn, kusu nn be su yo be bɔbɔ be wun tɛ. Sɛ amun bu sran sɔ’n i akunndan’n amun su fɛman, yɛ amun sa sin su bubuman amun.+

4 Amun nin sa tɛ sɔ’n be kplili. Sanngɛ kplilɛ nga amun nin i be kpli lele mɔ amun mmoja gua’n, amun nin-a kpliman sɔ le. 5 Amun wla fili afɔtuɛ nga be fa mannin amun’n i su mlɔnmlɔnmlɔn. Sran m’ɔ fali amun yoli i mma mun’n yɛ ɔ mannin amun afɔtuɛ sɔ’n niɔn. Ɔ seli kɛ: “Min wa, sɛ Zoova* tu ɔ fɔ’n, nán ɔ ɲin kpa su. Sɛ ɔ ijɔ wɔ’n, nán ɔ sa sin bubu wɔ. 6 Afin Zoova* tu be ng’ɔ klo be’n be fɔ. Yɛ sran kwlaa ng’ɔ fɛ i kɛ i wa sa’n, ɔ fa ɲantiaan bo i.”*+

7 Kɛ afɛ o amun su mɔ an jran kekle’n, ɔ ti amun fɔ tulɛ’n* i wafa’n kun. Afin Ɲanmiɛn w’a fa amun w’a yo i wa.+ ?Yɛ ba benin yɛ i si tumɛn i fɔ-ɔ?+ 8 Sanngɛ sɛ b’a tuman amun kwlaa amun fɔ wie’n, nn nanwlɛ, gua su ba yɛle amun, amun timɛn i wa. 9 I kpa bɔbɔ’n, e si’m be tu e fɔ titi, yɛ i sɔ’n ti’n, e bu be sran. ?Yɛ e Si m’ɔ fɛli i wawɛ’n kpali e’n nin? ?Ɔ fataman kɛ e lo e wun kpa e mɛn i naan e ɲan nguan?+ 10 Afin fɔ nga be tu e’n, ɔ ti le nɲɔn kun liɛ. Be nian sa ng’ɔ ti kpa be ɲrun’n i su be tu e fɔ. Sanngɛ i liɛ’n, e kpa yolɛ ti yɛ ɔ tu e fɔ-ɔ. Ɔ yo sɔ naan e yo sanwun kɛ i sa.+ 11 Nanwlɛ, fɔ tulɛ kwlaa, kɛ bé tú e’n, i klikli nun’n ɔ yo e ya, ɔ yoman e fɛ. Sanngɛ sɛ e sɔ nun klanman’n, i sin’n ɔ yo e ye. Yɛle kɛ e di alaje yɛ e yo sran kpa.

12 I sɔ’n ti’n, an wla be nga be sa w’a kan ase’n nin be nga be ja w’a kpɔ’n, be fanngan.+ 13 Yɛ an yo naan amun ɲrun atin’n yo kpa titi.+ I liɛ’n, sran nga i ja timan kpa’n, ɔ su yoman tɛ ukaman su, sanngɛ ɔ́ yó juejue. 14 Maan amun nin sran’m be kwlaa be di anuansɛ.+ Yɛ maan an yo sanwun titi.+ Afin sran nga w’a yoman sɔ’n, ɔ su kwlá wunman e Min’n. 15 Maan an nian amun wun su kpa naan ye nga Ɲanmiɛn yo sran mun’n, w’a to w’a fuanman amun nun wie fi. Ɔ timɛn i ti’n, sa tɛ wie trá ndin amun nun, yɛ ɔ́ klé amun yalɛ, kpɛkun ɔ́ yó maan sran kpanngban bé yó fiɛn.+ 16 Asa ekun’n, an nian amun wun su naan amun nun wie fi w’a kunndɛman bla nin bian sukusuku annzɛ w’a yomɛn i wunsu ɲannzuɛn sa.* Yɛ nán amun nun wie yo Ɲanmiɛn ninnge’m be finfin kɛ Ezau mɔ aliɛ ti’n, ɔ fɛli i kpɛnngbɛn’n mannin sran uflɛ’n sa.+ 17 Afin amun si kɛ, kɛ i sin ɔ kunndɛli kɛ be yrɛ i su’n, b’a niɛnmɛn i lɔ. Kannzɛ bɔbɔ ɔ miɛnnin i ɲin kpa naan i si kaci i akunndan’n, yɛ kannzɛ ɔ sunnin kpa ploploplo’n,+ sanngɛ ɔ yoli ngbɛn.

18 Afin amun liɛ’n, oka mɔ amun kwla kɛn i’n,+ m’ɔ jue’n, mɔ sin wunsrɛn o su’n,+ mɔ w’a wla aosin’n, mɔ aunmuan dan’n fita su lɔ’n, amun a wunngemɛn i wun lɔ.+ 19 Be tili awɛ’n i tɛlɛ’n,+ ɔ nin ndɛ nga be kɛn i ɲanmiɛn su lɔ’n.+ Kɛ nvlefuɛ’m be tili i sɔ’n, be srɛli Moizi kɛ nán maan be kan ndɛ uflɛ be kle be kun.+ 20 Afin b’a kwlá faman mmla kun su. Mmla sɔ’n se kɛ: “Sɛ ɔ wie nnɛn bɔbɔ yɛ ɔ kan oka’n, maan be finfin i yɔbuɛ.”+ 21 Asa kusu’n, like nga Moizi wunnin i’n, ɔ kunnin i srɛ dan. I sɔ’n ti’n, ɔ seli kɛ: “Srɛ kun min, yɛ min wun usu min.”+ 22 Sanngɛ amun wunngeli Siɔn Oka’n+ i wun lɔ. Amun wunngeli Ɲanmiɛn m’ɔ lafiman’n i klɔ’n i wun lɔ. Klɔ sɔ’n yɛle Zerizalɛmun ng’ɔ o ɲanmiɛn su lɔ’n,+ ɔ nin anzi akpiakpi kpanngban 23 mɔ b’a yia’n,+ kpɛkun amun wunngeli ba klikli’n i sran nga be yiali be ɲanmiɛn su lɔ’n, ɔ nin Ɲanmiɛn m’ɔ ti sran’m be kwlaa be Jɔlɛ Difuɛ’n+ be wun lɔ. Amun wunngeli sran kpa’m be wun lɔ. Ɲanmiɛn wawɛ’n boli sran sɔ’m be uflɛ,+ kpɛkun be yoli kpa.+ 24 Amun wunngeli Zezi m’ɔ ti aenguɛ uflɛ’n+ i nun jranfuɛ’n+ i wun lɔ, nin mmoja mɔ be guɛli i ase’n, mɔ sɛ é kwlá sé’n, ndɛ ng’ɔ kan’n i kpa tra Abɛli liɛ’n,+ i wun lɔ.

25 Maan amun nian amun wun su. Nán amun se kɛ amun su sieman amun su sran ng’ɔ su kan ndɛ’n i nuan bo. Afin be nga b’a kplinman su kɛ bé síe be su sran ng’ɔ kannin Ɲanmiɛn ndɛ’n asiɛ’n su wa’n i nuan bo’n, b’a fiteman nun. ?Sɛ e kusu e kaci e sin e si sran ng’ɔ o ɲanmiɛn su lɔ m’ɔ kan ndɛ’n, é fíte nun? Ɔ si’ɛ!+ 26 Blɛ sɔ’n nun’n, i nɛn’n i tɛlɛ’n ti’n, asiɛ’n kejeli.+ Sanngɛ siɛn’n, w’a ta nda w’a se kɛ: “Nán asiɛ’n su wa ninnge’m be ngunmin yɛ ń má kéje be ekun-ɔn. Ń má kéje ɲanmiɛn su lɔ ninnge mun wie.”+ 27 Yɛ kɛ be se kɛ “ekun’n,” i sɔ’n kle kɛ ninnge nga be kejeli be’n, mɔ nán Ɲanmiɛn yɛ ɔ yoli be’n, bé wá yí be lɛ, naan ninnge nga b’a kejeman be’n, be ka lɛ. 28 I sɔ’n ti’n, kɛ mɔ e wun i wlɛ kɛ é wá dí famiɛn naan sran fi kwlá saciman famiɛn dilɛ sɔ’n, maan e yo naan Ɲanmiɛn yi i aklunye dan’n i nglo e lika tititi. Ye sɔ’n ti yɛ sɛ e su Ɲanmiɛn’n, ɔ kwla sɔ nun klanman-ɔn. Kɛ é yó sɔ’n, maan e bu i sran, yɛ e sro i. 29 Afin e Ɲanmiɛn’n ti kɛ sin m’ɔ yra like kɔlikɔli’n sa.+

13 Maan amun klo amun wun kɛ sran kun nin i niaan sa titi.+ 2 Maan amun sɔ sran nun* titi.+ Afin sran wie’m be yoli sɔ, yɛ be sɔli anzi’m be nun b’a siman nun.+ 3 Nán an wla fi be nga be o bisua’n* be su.+ An yo kɛ amun bɔbɔ amun nin be o bisua lɔ sa.+ Yɛ nán amun wla fi be nga be yo be tɛtɛ’n be su. Afin amun bɔbɔ amun te o asiɛ’n su wa.* 4 Maan sran’m be kwlaa be bu aja’n i like dan. Yɛ maan be nga b’a ja bla annzɛ bian’n be aja’n yo sanwun titi.+ Afin Ɲanmiɛn wá bú be nga be kunndɛ bian nin bla sukusuku mɔ be yo i wunsu ɲannzuɛn sa mun’n,* ɔ nin be nga be kunndɛ bian be wun bo annzɛ bla be yi bo’n be fɔ.+ 5 Nán amun klo sika.+ Maan like nga amun le i dɔ nga su’n, ɔ ju amun.+ Afin ɔ seli kɛ: “N su yiman wɔ ase le, yɛ n su yaciman wɔ le.”+ 6 I sɔ’n ti’n, e le wunmiɛn e se kɛ: “Zoova* ti min ukafuɛ. Ɔ maan srɛ su kunman min. ?Ngue yɛ klɔ sran kwla yo min-ɔn?”+

7 Maan amun wla kpɛn be nga be kle amun atin’n,+ mɔ be kannin Ɲanmiɛn ndɛ be kleli amun’n be su. An fa amun ɲin sie be ayeliɛ’n i agualiɛ’n su, yɛ an lafi Ɲanmiɛn su kɛ be sa.+

8 Zezi Klisi kaciman. Kɛ ɔ fa ti laa’n, ɔ ti sɔ andɛ, yɛ ɔ́ ká sɔ tititi.

9 Nán maan like wafawafa nga sran’m be kle’n, m’ɔ nin e liɛ’n timan kun’n, ɔ yo maan amun mlin. Afin sɛ ye mɔ Ɲanmiɛn yo e’n ti’n e tra e awlɛn kpa’n, ɔ ti kpa tra aliɛ su mmla’m be su nantilɛ’n. Afin be nga mmla sɔ’m be ti be cinnjin’n, be ɲanman su ye.+

10 E le tɛ yiwlɛ kun. Be nga be di junman Ɲanmiɛn i tannin sua’n nun lɔ’n be leman atin be diman like ng’ɔ o su’n.+ 11 Afin Ɲanmiɛn ɲrun jranfuɛ dan’n fa nnɛn’m be mmoja’n wlu lika m’ɔ ti Ɲanmiɛn liɛ klonglo’n i nun lɔ, ɔ fa yi sa tɛ’n i ti tɛ. Kpɛkun be yra nnɛn sɔ mun nanmue’n i sin lɔ.+ 12 Ɔ maan Zezi kusu wunnin ɲrɛnnɛn klɔ’n i sin lɔ+ naan ɔ́ fɛ́ i mmoja’n yó sran’m be sanwun.+ 13 I sɔ’n ti’n, maan e kusu e ko to i nanmue’n i sin lɔ naan ɲannzuɛn ng’ɔ wunnin i’n, e wun wie.+ 14 Afin e leman klɔ kpa kun wa m’ɔ́ ká lɛ-ɔ. I sɔ’n ti’n, e ɲin o klɔ nga cɛn wie lele bé kplán’n i sin kpa.+ 15 Zezi ti’n, maan e manman Ɲanmiɛn titi.+ Maan ɔ yo kɛ tɛ yɛ e su yi e mɛn i sa.+ Maan e bo i dunman’n naan sran’m be ti.+ 16 Asa ekun’n, nán an wla fi sa kpa yolɛ’n su. Kpɛkun like nga an le i’n, an man amun wiengu wie.+ Afin ayeliɛ sɔ mun yɛ Ɲanmiɛn klo be-ɔ. Ɔ ti kɛ tɛ yɛ e su yi e mɛn i sa.+

17 Maan amun ɲin yi be nga be kle amun atin’n,+ yɛ amun lo amun wun man be.+ Afin be nian amun su, yɛ bé wá kán be junman’n i su ndɛ klé Ɲanmiɛn.+ Maan amun yo naan be di junman sɔ’n aklunjɔɛ su, nán maan be kplin. Ɔ timɛn i ti’n, i bo su guaman kpa manman amun.

18 Amun srɛ Ɲanmiɛn man e titi. Afin e si e klun lɔ weiin kɛ e ti nanwlɛfuɛ.* Yɛ e klo kɛ é yó nanwlɛfuɛ sa kwlaa nun.+ 19 Sanngɛ ń sé amun kpa kɛ amun srɛ Ɲanmiɛn naan n kwla sa min sin amun wun lɔ ndɛndɛ.

20 Maan Ɲanmiɛn m’ɔ man fɔundi’n, m’ɔ cɛnnin e Min Zezi m’ɔ ti bua tafuɛ danfuɛ’n+ mɔ i mmoja’n ti’n Ɲanmiɛn nin klɔ sran’m be trali aenguɛ m’ɔ su saciman le’n, 21 ɔ man amun like kpa kwlaa naan amun yo i klun sa’n. Maan ɔ uka e naan Zezi Klisi i dunman nun’n, e yo like ng’ɔ yo i fɛ’n. Maan manmanlɛ’n yo i liɛ tititi. Maan ɔ yo sɔ.

22 Siɛn’n, ń srɛ́ amun kɛ amun sɔ ndɛ m’ɔ wla fanngan mɔ n kan kleli amun yɛ’n nun kpa. Afin ndɛ nga n klɛli amun’n w’a sɔnman. 23 Min waan ń kán klé amun kɛ b’a yaci e niaan bian Timote nun. Ɔ maan sɛ ɔ to min wa koko nga nun’n, e nin i é kó nían amun osu.

24 Ń yó be kwlaa nga be kle amun atin’n nin Ɲanmiɛn i sran’m be kwlaa be like. Be nga be o Itali+ wa’n bé yó amun like.

25 Maan Ɲanmiɛn yo amun kwlaa amun ye.