FLUWA NGA ZAKI KLƐLI’N

1 Min Zaki,+ n ti Ɲanmiɛn nin e Min Zezi Klisi be kanga. Amun mɔ amun ti akpasua blu-nin-nɲɔn (12) mun be nunfuɛ mɔ amun a bo b’a sanndi mɛn’n nun’n:

Ń yó amun like!

2 Min niaan mun, kɛ sa fanunfanun tɔ amun su’n, maan amun klun jɔ.+ 3 Afin amun si kɛ sɛ Ɲanmiɛn su mɔ amun lafi’n ti’n, be sa amun nian naan amun sa sin bubuman amun’n, i sɔ’n yó maan amún káci sran m’ɔ trɛ i awlɛn-ɔn.+ 4 Sɛ an tra amun awlɛn lele guɛ i ti nin i bo’n, i sɔ’n úka amun. Ɔ maan amún yó sran kpa, yɛ sa tɛ kaan sa su tranman amun wun, kpɛkun amun sa su mianman like fi wun.+

5 I sɔ’n ti’n, sɛ amun nun wie wunman sa wlɛ’n, maan ɔ srɛ Ɲanmiɛn titi kɛ ɔ mɛn i ngwlɛlɛ.+ Like ng’ɔ srɛ i’n, ɔ́ fá mɛ́n i.+ Afin Ɲanmiɛn liɛ’n, ɔ man sran’m be kwlaa be like klun ufue su,+ yɛ kɛ ɔ́ yó sɔ’n ɔ ijɔmɛn i sin. 6 Sanngɛ blɛ kwlaa ng’ɔ́ srɛ́ Ɲanmiɛn’n, maan ɔ lafi i su,+ yɛ nán maan i akunndan’n yo nɲɔnnɲɔn.+ Afin sran nga i akunndan’n ti nɲɔnnɲɔn’n, ɔ ti kɛ jenvie mɔ aunmuan’n fɛ i kɔ wa kɔ wa’n sa. 7 Nán maan sran sɔ’n lafi su kɛ ɔ́ ɲán like Zoova* sa nun. 8 Afin i akunndan’n ti nɲɔnnɲɔn,+ yɛ like kwlaa ng’ɔ́ yó’n nun’n, ɔ wunman ajalɛ trele ng’ɔ́ fá-ɔ.

9 Aniaan bian ng’ɔ ti yalɛfuɛ’n i sasu mɔ be mannin’n ti’n, maan i klun jɔ.*+ 10 Yɛ aniaan bian ng’ɔ ti aɲanbeunfuɛ’n i ɲrun m’ɔ lemɛn i kun’n ti’n, maan i klun jɔ wie.+ Afin be su wunmɛn i kun kɛ fie su lɔ ijre nɲrɛ wie sa. 11 Kɛ wia’n tu i bo’n, ɔ bo ijre’n fiaan lele ɔ wu, yɛ i nɲrɛ’n gua, kpɛkun be wunmɛn i klanman’n kun. I kunngba’n, aɲanbeunfuɛ’n wú aɲanbeun ninnge’m be kunndɛlɛ nun.+

12 Sran nga sa tɔ i su titi m’ɔ trɛ i awlɛn’n, i liɛ su ti ye.+ Afin Ɲanmiɛn klun jɔ́ i wun, kpɛkun mo yolɛ like*+ nga Zoova tali nda kɛ ɔ́ fá mán be nga be klo i titi’n,+ ɔ́ mɛ́n i wie. 13 Sɛ sa o sran kun su’n, nán maan ɔ se kɛ: “Ɲanmiɛn yɛ ɔ su sa min nian-ɔn.” Afin sran fi kwlá lakaman Ɲanmiɛn kɛ ɔ yo sa tɛ. Yɛ kusu Ɲanmiɛn faman sa tɛ saman sran fi nianman. 14 Sanngɛ sran kun bɔbɔ i konvi’n yɛ ɔ lɛkɛ i-ɔ. I konvi sɔ’n kaci kɛ aya sa. Ɔ tɔ nun, kpɛkun ɔ trɛ i.+ 15 I sin’n, kɛ konvi’n ko yo dan’n, ɔ yo maan sran’n yo sa tɛ.* Like ng’ɔ su sa tɛ mɔ be yo’n su’n yɛle wie’n.+

16 I sɔ’n ti’n, min niaan kpa mun, nán amun laka amun wun. 17 Like kpa kwlaa nin like nga fiɛn kaan sa nunmɛn i wun mɔ be fa cɛ sran’n, be fin ɲanmiɛn su.+ Be fin Sran ng’ɔ boli ninnge nga be o ɲanmiɛn su lɔ mɔ be kpaja’n.+ Sran sɔ’n, ɔ timan kɛ fɔnvɔ m’ɔ kaman lika kunngba nun’n sa.+ 18 Ɲanmiɛn i klun klo su’n, ɔ fali ndɛ nanwlɛ’n mannin e nguan.+ Ɔ yoli sɔ naan e kaci kɛ ninnge ng’ɔ yili be’n, be nun klikli’n sa.+

19 Min niaan kpa mun, amun fa amun ɲin sie i ndɛ nga su: Maan sran ngba klo kpa kɛ ɔ́ tíe ndɛ nga be kan kle i’n. Nán maan sran fi kpli kan ndɛ,+ nán maan sran fi fa ya ndɛndɛ.+ 20 Afin kɛ sran kun fa ya’n, ɔ kwlá yoman sa ng’ɔ ti kpa Ɲanmiɛn ɲrun’n.+ 21 I sɔ’n ti’n, an kpalo ninnge fiɛnfiɛn’m be kwlaa, yɛ an nunnun sa tɛtɛ’n i osu kanngan ng’ɔ ka’n i kwlaa.*+ Kpɛkun amun kan amun wun ase be sɔ Ɲanmiɛn ndɛ’n nun,* yɛ an mɛn i atin naan ɔ tra ndin amun awlɛn’n nun, afin ndɛ sɔ’n kwla de amun.

22 Sanngɛ Ɲanmiɛn ndɛ nga amun ti’n, maan amun nanti su.+ Sɛ amun ti i ngbɛn naan amun faman su’n, nn amun su laka amun wun. 23 Afin sɛ sran kun ti Ɲanmiɛn ndɛ’n m’ɔ faman su’n,+ ɔ ti kɛ sran kun m’ɔ niɛn i ɲrun niannun nun’n sa. 24 Afin kɛ ɔ ko niɛn i wun niannun nun mɔ w’a wɔ’n, i wla ka lɛ fi sran wafa ng’ɔ ti’n su. 25 Sanngɛ sran ng’ɔ nian mmla kpa+ mɔ maan sran ɲɛn i ti’n nun’n, m’ɔ yo sɔ titi’n, ɔ su yoman ndɛ tiefuɛ ngbɛn, ɔ́ yó sran m’ɔ fa mmla’n su’n. Yɛ i sɔ m’ɔ yo’n ti’n, ɔ́ dí aklunjɔɛ.+

26 Sran kwlaa ng’ɔ se i wun kɛ ɔ ti Ɲanmiɛn sufuɛ mɔ sanngɛ ɔ niɛnmɛn i nuan’n su’n,+ ɔ su lɛkɛ i bɔbɔ wun, kpɛkun i Ɲanmiɛn sulɛ’n ti ngbɛn. 27 Ɲanmiɛn sulɛ m’ɔ ti kpa mɔ fiɛn kaan sa nunmɛn i wun e Si Ɲanmiɛn i ɲrun’n, yɛle aika ba+ nin angbeti bla+ mɔ ɲrɛnnɛn o be su’n+ be lika nianlɛ, ɔ nin be wun su mɔ be niɛn i titi naan b’a yoman mɛn’n nun sa tɛtɛ’m be nun wie fi’n.+

2 ?Min niaan mun, kɛ amun bu sran wie kpa tra wie’n, i sɔ’n kle kɛ amun lafi e Min Zezi Klisi m’ɔ le ɲrun kpa’n i su yɛ ɔ o lɛ-ɔ?+ 2 ?Afin sɛ sran kun ba amun aɲia’n i bo naan i sa mma ti nga’m be ti sika ɔkwlɛ’n, yɛ i wun tralɛ’n ti klanman’n naan yalɛfuɛ wie nin i wun tralɛ fiɛn ba lɛ wie’n, 3 amún bú sran ng’ɔ wlali tralɛ klanman’n i sran, ɔ maan amún sé i kɛ: “Tran bia klanman nga su,” yɛ amún sé yalɛfuɛ’n kɛ: “Ɔ liɛ’n, jran nglo,” annzɛ “Tran asiɛ ba’n su”?+ 4 ?Sɛ amun yo sɔ’n, i sɔ’n kleman kɛ amun bu sran wie kpa tra wie yɛ ɔ o lɛ-ɔ?+ ?Yɛ nn amun a kaciman kɛ jɔlɛ difuɛ m’ɔ diman nanwlɛ’n sa?+

5 Min niaan kpa mun, amun sie amun su. ?Be nga mɛn’n nunfuɛ’m be bu be yalɛfuɛ’n, Ɲanmiɛn w’a faman be kɛ be yo aɲanbeunfuɛ i su mɔ be lafi’n ti?+ ?Yɛ famiɛn m’ɔ seli kɛ be nga be klo i’n bé dí’n, w’a kpaman be kɛ be di wie?+ 6 Sanngɛ amun liɛ’n, amun guali yalɛfuɛ’m be ɲin ase. ?Nán aɲanbeunfuɛ mun yɛ be mianmian amun,+ kpɛkun be fa amun kɔ jɔlɛ difuɛ’m be ja su’n niɔn? 7 ?Nán be yɛ be yo dunman dan ng’ɔ o amun su’n i finfin’n niɔn? 8 Sanngɛ siɛn’n, sɛ amun fa famiɛn’n i mmla m’ɔ o Ɲanmiɛn ndɛ’n nun’n su’n, ɔ ti kpa. Mmla sɔ’n se kɛ: “Klo ɔ wiengu kɛ a fa klo ɔ bɔbɔ wun’n sa.”+ 9 Sanngɛ sɛ an te bu sran wie kpa te tra wie’n, nn sa tɛ yɛ amun su yo-ɔ.+ Ɔ maan mmla’n bu amun fɔ kɛ amun ti sa tɛ yofuɛ.+

10 Afin sɛ sran kun fa Mmla’n i kwlaa su naan i ja kpla kun su i su nantilɛ’n nun’n, nn w’a fɔn Mmla’n i kwlaa.+ 11 Mmla’n se kɛ: “Nán kunndɛ bla ɔ yi bo annzɛ bian ɔ wun bo.”+ Mmla kunngba’n kɛn i ekun kɛ: “Nán kun sran.”+ Ɔ maan sɛ w’a kunndɛman bla ɔ yi bo annzɛ bian ɔ wun bo naan a kun sran’n, nn a ti mmla fɔnfuɛ. 12 Maan ndɛ ng’ɔ fin amun nuan fite’n nin amun nzuɛn’n be kle titi kɛ mmla m’ɔ yo maan sran ɲɛn i ti’n yɛ ɔ kle amun atin-ɔn. Mmla sɔ’n yɛ bé wá jrán su bé dí amun jɔlɛ-ɔ.+ 13 Afin sran ng’ɔ siman sran aunnvɔɛ’n, kɛ bé wá dí i jɔlɛ’n, be su simɛn i aunnvɔɛ wie.+ Aunnvɔɛ silɛ’n ti kpa tra fɔ bulɛ’n.

14 ?Min niaan mun, sɛ sran kun se kɛ ɔ lafi Ɲanmiɛn su naan be wunmɛn i sɔ’n i nzuɛn’n nun’n, i sɔ’n yo ngue ye?+ ?I Ɲanmiɛn sulafilɛ sɔ’n kwla de i?+ 15 ?Sɛ aniaan bian annzɛ aniaan bla kun leman tralɛ* naan ɔ leman like diman’n, 16 naan amun nun wie se i kɛ: “Maan ɔ wun jɔ wɔ fɔuun, maan a ɲan like kata ɔ wun, maan a ɲan like di’n,” naan sanngɛ amun mɛnmɛn i like nga i sa miɛn i wun’n, i sɔ’n yo ngue ye?+ 17 I wafa kunngba’n, sɛ sran kun se kɛ ɔ lafi Ɲanmiɛn su naan be wunmɛn i sɔ’n i nzuɛn’n nun’n, i Ɲanmiɛn sulafilɛ’n ti ngbɛn.+

18 Wienun-ɔn, sran wie kwla se kɛ: “A lafi Ɲanmiɛn su, yɛ n kusu n yo sa kpa. Kle min ɔ Ɲanmiɛn sulafilɛ mɔ be wunmɛn i ɔ nzuɛn’n nun’n, yɛ n kusu ń fá sa nga n yo’n ń klé wɔ kɛ n lafi Ɲanmiɛn su.” 19 A lafi su kɛ Ɲanmiɛn ti kunngba. ?Nɛ́n i-ɔ? Sɛ a lafi su sɔ’n, ɔ ti kpa. Mmusu mun bɔbɔ be lafi su sɔ wie. I sɔ’n ti’n, be usu.+ 20 ?Wɔ mɔ a siman sa’n, a siman kɛ sɛ sran kun lafi Ɲanmiɛn su naan be wunmɛn i sɔ’n i nzuɛn’n nun’n, nn i Ɲanmiɛn sulafilɛ sɔ’n ti ngbɛn? 21 ?Kɛ e si Abraamun fɛli i wa Izaaki sieli i tɛ yiwlɛ’n su mannin Ɲanmiɛn’n, Ɲanmiɛn w’a bumɛn i sran kpa sa sɔ’n ti?+ 22 A wun kɛ sa ng’ɔ yoli’n kle kɛ ɔ lafi Ɲanmiɛn su. Yɛ i Ɲanmiɛn sulafilɛ sɔ’n i ɲin fiteli weiin sa ng’ɔ yoli’n ti.+ 23 Ɔ maan Ɲanmiɛn ndɛ nga kpɛnnin su: “Abraamun lafili Zoova* su, yɛ i sɔ’n ti’n, ɔ buli i sran kpa,”+ yɛ be wa flɛli i Zoova* i janvuɛ.+

24 A wun kɛ nán Ɲanmiɛn su mɔ sran kun lafi’n i ngunmin ti yɛ bé bú i sran kpa-ɔ, sanngɛ ɔ fata kɛ be wun i sɔ’n i nzuɛn’n nun wie. 25 ?I wafa kunngba’n, kɛ Raabu m’ɔ ti tekle bla’n sɔli be nga be sunmannin be’n be nun klanman m’ɔ yoli maan be fali atin uflɛ be ɔli’n, Ɲanmiɛn w’a bumɛn i sran kpa sa sɔ’n ti?+ 26 Sɛ sran kun loman wunmiɛn’n, nn w’a wu.+ I wafa kunngba’n, sɛ sran kun se kɛ ɔ lafi Ɲanmiɛn su naan be wunmɛn i sɔ’n i nzuɛn’n nun’n, nn i Ɲanmiɛn sulafilɛ sɔ’n ti ngbɛn.+

3 Min niaan mun, nán amun nun kpanngban be yo like klefuɛ. Afin amun si kɛ jɔlɛ nga bé wá dí e’n, ɔ́ yó kekle kpa trá be onga’m be liɛ’n.+ 2 E kwlaa e fɔn kpɛ sunman.+ Sɛ sran kun i nuan fiteman tɛtɛ’n, nn fɔ nunmɛn i nun. Yɛ sa kwlaa nun’n, ɔ kwla niɛn i wun su kpa. 3 E wla nnɛn kpanngɔ’m be nuan nun blalɛ naan be yo like kwlaa nga e klo’n. Kɛ ɔ ko yo sɔ’n, lika kwlaa nga e waan be wɔ’n, be kɔ. 4 Amun nian mmeli mun. Kannzɛ be ti dan kpa naan aunmuan dan yɛ ɔ fa be kɔ’n, sanngɛ like kaan sa yɛ be fa kpɛ i wun-ɔn. Yɛ be kanfuɛ’m be fa be kɔ lika nga be klo’n.

5 Kɛ e taaman’n kusu ti sɔ wie-ɔ. Ɔ ti kaan sa, sanngɛ ɔ kan ndɛ dandan. Sin kaan kwla yra bo dan. 6 E taaman’n kusu ti kɛ sin sa.+ Ɔ ti e wunnɛn’n i lika kun m’ɔ yo sa tɛ dan-ɔn. Ɔ saci e wunnɛn’n kwlaa.+ Ɔ kwla saci sran. Ɔ ti kɛ Zeɛnin’n* sa, afin ɔ saci like. 7 Klɔ sran’m be kwla sie blo nnɛn nin anunman nin nnɛn nga be cuɛn be wun ase’n nin jenvie’n nun ninnge wafawafa kwlaa. Be sie be bɔbɔ. 8 Sanngɛ e taaman’n i liɛ’n, klɔ sran fi kwlá siemɛn i. Be kwlá yomɛn i like fi, ɔ ti tɛ, ɔ ti kɛ ayre tɛ wie sa.+ 9 E fa e taaman’n e manman Zoova* m’ɔ ti e Si’n, kpɛkun e fa e taaman kunngba’n e fa bo sran mɔ Ɲanmiɛn yili be “kɛ i bɔbɔ sa’n,”+ be sannzan. 10 E nuan kunngba’n, e fa bo muae, kpɛkun e fa bo sannzan.

Min niaan mun, i sɔ yolɛ’n nin i fataman.+ 11 ?Nzue ti kun i bue kwla yo fɛ, kpɛkun i bue kwla yo wi? 12 Min niaan mun, figie kwlá suman olivie mma, yɛ viɲin kwlá suman figie mma. ?Nɛ́n i-ɔ?+ Yɛ nzue ng’ɔ yo fɛ’n kusu ɔ finman nzue ti mɔ njin o nun’n i nun. ?Nɛ́n i-ɔ?

13 ?Amun nun onin yɛ ɔ si ngwlɛlɛ kpɛkun ɔ wun sa wlɛ-ɔ? Maan i ayeliɛ kpa’n ɔ kle sɔ. Maan sa ng’ɔ yo be’n be kle kɛ ɔ ti wɛtɛɛfuɛ naan i wɛtɛɛ yolɛ sɔ’n fin ngwlɛlɛ m’ɔ si i’n. 14 Sanngɛ sɛ amun ɲin ci sran tɛtɛ kpa+ naan amun ti ndɛnnganfuɛ’n,*+ nán amun di amun nuan.+ Sɛ amun yo sɔ’n, nn amun ti ato buafuɛ. 15 I sɔ ngwlɛlɛ liɛ’n finman ɲanmiɛn su. Ɔ ti asiɛ’n su wa liɛ,+ ɔ ti be nga klɔ sran nzuɛn’n sie be’n be liɛ, ɔ ti mmusu’m be liɛ. 16 Afin lika nga be ɲin ci sran lɛ mɔ ndɛnnganndɛnngan o lɛ’n,* sa sukusuku nin sa tɛtɛ kwlaa be o lɛ wie.+

17 Sanngɛ ngwlɛlɛ m’ɔ fin ɲanmiɛn su’n, fiɛn kaan sa nunmɛn i wun,+ ɔ klo anuansɛ.+ I like yolɛ yoman ya,+ ɔ sisimɛn i bo naan w’a yo like nga be se i kɛ ɔ yo’n, ɔ si aunnvɔɛ dan, ɔ yo sa kpakpa mun,+ ɔ kpaman sran nun,+ ɔ timan gblɛfuɛ.+ 18 Asa ekun’n, sɛ sa nuan su sɛsɛ yolɛ’n ti like mma’n, nn é sé kɛ kɛ be luɛ i fɔundi blɛ nun’n,+ mma ng’ɔ su’n ti be nga be yo maan fɔundi tran lɛ’n be liɛ.*+

4 ?Utre nin akplowa nga be o amun afiɛn’n be fin nin? Be fin amun konvi m’ɔ nin amun su kpli kpa naan ɔ́ kwlá amun’n.+ 2 Amun konvi sɔ like, sanngɛ amun ɲɛnmɛn i. Amun kun sran, yɛ amun ɲin blo sran like su, sanngɛ amun kwlá ɲɛnmɛn i. Amun si akplowa, yɛ amun di utre.+ Like nga amun klo kɛ amún ɲɛ́n i’n, amun ɲɛnmɛn i. Afin amun srɛman Ɲanmiɛn kɛ ɔ fa man amun. 3 Kɛ amun srɛ like’n, amun ɲɛnmɛn i, afin amun akunndan’n timan kpa. Yɛle kɛ amun kunndɛ kɛ amún fá yó amun klun sa.

4 ?Amun mɔ amun kunndɛ bian amun wun bo’n,* amun siman kɛ sran ng’ɔ klo mɛn nun ninnge mun’n, ɔ ti Ɲanmiɛn i kpɔfuɛ? Sran ng’ɔ klo mɛn nun ninnge mun’n, ɔ kaci Ɲanmiɛn i kpɔfuɛ.+ 5 Ɲanmiɛn ndɛ’n se kɛ: “E konvi sɔ ninnge mun dan.”+ ?An bu i kɛ ngbɛn ti yɛ be klɛli ndɛ sɔ’n niɔn? 6 Sanngɛ ye nga Ɲanmiɛn yo sran mun’n ti dan. I sɔ’n ti’n, Ɲanmiɛn ndɛ’n se kɛ: “Ɲanmiɛn nin be nga be tu be wun’n be lɛ i.+ Sanngɛ ɔ yo wun ase kanfuɛ’m be ye.”+

7 I sɔ’n ti’n, an lo amun wun man Ɲanmiɛn.+ Sanngɛ an jran Suɛn Tɔnfuɛ’n i ɲrun kekle,+ i liɛ’n ɔ́ wánndi amun.+ 8 An fa amun wun mantan Ɲanmiɛn, yɛ ɔ́ fɛ́ i wun mántan amun.+ Sa tɛ yofuɛ mun, an yaci sa tɛ’n i yolɛ.+ Amun mɔ amun akunndan’n ti nɲɔnnɲɔn’n, an yaci akunndan tɛtɛ’n.+ 9 An tran aunnvɔɛaunnvɔɛ, an bo awuyomo, yɛ an sun.+ Yɛ srisrilɛ mɔ amun srisri’n, maan ɔ kaci sunlɛ. Maan aklunjɔɛ mɔ amun di’n, ɔ kaci awlabɔɛ. 10 An kan amun wun ase Zoova* ɲrun,+ yɛ ɔ́ yó maan amún ɲán ɲrun.+

11 Aniaan mun, an yaci amun wiengu wun ndɛ tɛ kanlɛ.+ Sran ng’ɔ kɛn i niaan wun ndɛ tɛ’n annzɛ ɔ di i jɔlɛ’n, nn mmla’n yɛ ɔ su kɛn i ndɛ tɛ-ɔ, yɛ ɔ su di mmla’n i jɔlɛ. Yɛ sɛ a di mmla’n i jɔlɛ’n, nn a nantiman mmla’n su, sanngɛ a ti jɔlɛ difuɛ. 12 Sran kunngba cɛ yɛ ɔ ti Mmla Kpɛfuɛ nin Jɔlɛ Difuɛ-ɔ.+ Sran sɔ’n kwla de sran, yɛ ɔ kwla nunnun sran.+ ?Sanngɛ wɔ, a ti ɔ liɛ sɛ ti yɛ a di ɔ wiengu jɔlɛ-ɔ?+

13 Amun nun wie’m be se kɛ: “Andɛ annzɛ ainman, é kɔ́ klɔ nga su, é dí afuɛ kun lɔ. É dí aata lɔ, yɛ é ɲán sika,”+ 14 sanngɛ nn amun siman sa ng’ɔ́ ɲán amun ainman’n.+ Afin amun ti kɛ bɔlɛ ufue sa. Ɔ cɛman nn w’a titi.+ 15 Sanngɛ ndɛ ng’ɔ fata kɛ amun kan’n yɛ: “Sɛ Zoova* di su’n,+ yɛ sɛ aliɛ kpa cɛn e’n, é yó nga annzɛ nga.” 16 Sanngɛ amun liɛ’n, amun tu amun wun, yɛ amun fɛ i sɔ’n di amun nuan. Amun nuan dilɛ sɔ’n timan kpa mlɔnmlɔn. 17 Ɔ maan sɛ sran kun si like ng’ɔ ti kpa’n naan ɔ yoman’n, nn w’a yo sa tɛ.+

5 Amun mɔ amun ti aɲanbeunfuɛ’n, an sie amun su! Ɲrɛnnɛn m’ɔ́ wá tɔ́ amun su’n ti’n, maan amun sun, yɛ an bo awuyomo.+ 2 Amun aɲanbeun ninnge’m b’a saci, yɛ kakaa’m b’a didi amun tralɛ mun.+ 3 Amun sika ɔkwlɛ’n nin amun sika’n b’a di annganblalɛ. Yɛ annganblalɛ sɔ’n, ɔ́ wá klé kɛ an yoli sa tɛ, yɛ ɔ́ dídí amun wunnɛn’n. Ninnge nga amun a tiantian be nuan’n, bé káci kɛ sin sa mɛn’n i awieliɛ blɛ’n nun.+ 4 An nian! Junman difuɛ mɔ be titili amun fie’m be su ninnge mun’n, be te kpan. Afin be sika’n te o amun su. Kpanlɛ mɔ be kpan’n, Zoova* m’ɔ ti sonja’m be su kpɛn’n ɔ tili.+ 5 Amun trannin pɔɔ nun, yɛ ninnge nga amun konvi sɔ be’n yɛ amun yoli be asiɛ’n su wa-ɔ. Amun a cɛn lɔklɔlɔklɔ kɛ nannin mɔ w’a lo mɔ bé wá kún i’n sa.+ 6 Be nga be yo sa kpa’n, amun buli be fɔ, yɛ amun kunnin be. I sɔ’n ti yɛ ɔ tanndan amun ɲrun’n niɔn.

7 Aniaan mun, an tra amun awlɛn be minndɛ lele fa ju blɛ mɔ e Min’n sɛ́ i sin’n.*+ An nian! Fie difuɛ’n trɛ i awlɛn minndɛ lele i fie’n su ninnge’m be yo kpa. Ɔ trɛ i awlɛn, ɔ minndɛ nzue ng’ɔ tɔ wawa blɛ nin munngun blɛ nun’n.+ 8 Amun kusu an tra amun awlɛn,+ an jran kekle, afin blɛ mɔ e Min’n sɛ́ i sin’n* w’a mantan koko.+

9 Aniaan mun, nán an kan amun wiengu wun ndɛ tɛ amun konviabo. I liɛ’n, be su diman amun jɔlɛ.+ Afin Jɔlɛ Difuɛ’n jin anuan’n i sin lɛ. 10 Aniaan mun, an nian be nga be ijɔli Zoova* i dunman nun’n+ be liɛ’n su. Afin be wunnin ɲrɛnnɛn,+ sanngɛ be trali be awlɛn.+ 11 An nian! Be nga be trali be awlɛn’n, e se kɛ be liɛ su ti ye.+ Amun tili Zɔbu i awlɛn m’ɔ trali’n i su ndɛ’n.+ Yɛ amun wunnin kɛ Zoova* maan i bo guali kpa mɛnnin i.+ I lɛ’n nun’n, Zoova* kleli kɛ ɔ klo sran dan naan ɔ si sran aunnvɔɛ.+

12 Aniaan mun, like ng’ɔ ti cinnjin kpa’n yɛle kɛ nán amun flɛ ɲanmiɛn ng’ɔ la nglo lɔ plaii’n, annzɛ asiɛ’n, annzɛ like uflɛ be ta nda kun. Sɛ amun se kɛ “ɛɛn-ɛn” maan ɔ ka su, yɛ sɛ amun se kɛ “cɛcɛ”+ maan ɔ ka su naan b’a diman amun jɔlɛ.

13 ?Amun nun wie su wun ɲrɛnnɛn? Maan ɔ srɛ Ɲanmiɛn titi.+ ?Amun nun wie i klun ti jɔwa? Maan ɔ to jue manman Ɲanmiɛn.+ 14 ?Amun nun wie kpinndinman? Maan ɔ flɛ asɔnun kpɛnngbɛn mun+ naan be srɛ Ɲanmiɛn be mɛn i, naan be guɛ i su ngo+ Zoova* i dunman nun. 15 Ɲanmiɛn i srɛlɛ mɔ be lafi i su be srɛ i’n, ɔ́ yó sran ng’ɔ kpinndiman’n* i juejue, yɛ Zoova* maan ɔ́ jáso. Asa ekun’n, sɛ ɔ yoli sa tɛ wie’n, ɔ́ yáci cɛ́ i.

16 I sɔ’n ti’n, amun di amun sa tɛ’m be nanwlɛ+ kle amun wiengu, yɛ amun srɛ Ɲanmiɛn man amun wiengu. I liɛ’n, amún yó juejue. Sran kpa’n i Ɲanmiɛn srɛlɛ’n le ta, yɛ ɔ yo sa ye kpa.+ 17 Eli ti sran kɛ e sa. Sanngɛ kɛ ɔ tuli i klun srɛli Ɲanmiɛn kpa kɛ nán nzue tɔ’n, nzue w’a tɔman nvle’n nun afuɛ lele nsan nin anglo nsiɛn.+ 18 I sin’n, ɔ srɛli Ɲanmiɛn ekun, kpɛkun nzue tɔli, yɛ ninnge’m be yoli kpa.+

19 Min niaan mun, sɛ amun nun kun yaci nanwlɛ atin’n naan ɔ fa atin uflɛ’n, sɛ sran kun ukɛ i naan ɔ sɛ i sin’n, 20 maan amun si kɛ sran ng’ɔ ukɛli i m’ɔ sɛli i sin’n+ ɔ́ dé i wie’n i sa nun, yɛ ɔ́ yó maan bé yáci i wun sa kpanngban bé cɛ́ i.+