SA NGA BE YILI I NGLO KLELI ZAN’N

1 Ɲanmiɛn maan Zezi Klisi yili sa ng’ɔ cɛ kan bé wá jú’n, be nglo kleli+ i sran mun.+ Zezi sunmɛnnin i anzi’n Zan+ m’ɔ ti i sran’n i sin naan ɔ fa sa nga bé wá jú’n, ɔ kle i aolia nun. 2 Ndɛ nga Ɲanmiɛn nin Zezi Klisi be kannin’n, Zan kannin be ndɛ. Ɔ maan, ɔ kannin like kwlaa ng’ɔ wunnin i’n i ndɛ. 3 Sran ng’ɔ mɛn i nɛn’n su kanngan Ɲanmiɛn i ndɛ nga nun’n, ɔ nin be nga be sie be su’n, ɔ nin be nga be fɛ i nun ndɛ’n su’n, be liɛ su ti ye.+ Afin blɛ nga be kleli’n, w’a mantan koko kpa.

4 Min Zan, ń klɛ́ fluwa nga ń blɛ́ asɔnun nso+ nga be o Azi akpasua’n su’n:

Maan “Sran m’ɔ o lɛ’n, mɔ kɛ ɔ fɛ i laa lele’n ɔ o lɛ’n, m’ɔ su ba’n”+ ɔ nin wawɛ nso+ nga be o i famiɛn bia’n i ɲrun lɛ’n, be yo amun ye, yɛ maan amun wun jɔ amun fɔuun. 5 Asa ekun’n, maan Zezi Klisi m’ɔ ti “Lalofuɛ nanwlɛfuɛ’n,”+ m’ɔ ti “Ɲanmiɛn i wa’n, m’ɔ ti be nga be cɛnnin be’n be nun klikli’n”*+ mɔ kusu ɔ ti “asiɛ’n su famiɛn’m be kwlaa be Siefuɛ’n”+ ɔ yo amun ye, yɛ maan ɔ yo naan amun wun jɔ amun fɔuun.

Ɔ klo e,+ yɛ ɔ fɛli i bɔbɔ i mmoja’n deli e. Ɔ maan e ɲannin e ti e sa tɛ’m be sa nun.+ 6 Ɔ yoli maan e kacili famiɛn,+ yɛ e kacili i Si m’ɔ ti i Ɲanmiɛn’n i ɲrun jranfuɛ.+ Maan aɲrunɲan’n nin kwlalɛ’n be yo i liɛ titi. Maan ɔ yo sɔ.

7 An nian! Ɔ o ɲanmiɛn ble’n nun ɔ su ba.+ Sran’m be kwlaa bé wá wún i. Be nga be wɔli i cua’n, bé wún i wie. Yɛ i ti’n, asiɛ’n su sran’m be kwlaa be wla m’ɔ́ bó be wun’n ti’n, bé fínfín be wue’n nun.+ Sa sɔ’n, ɔ́ yó sɔ sakpa. Maan ɔ yo sɔ.

8 Ɲanmiɛn Zoova* se kɛ: “N ti Alfa nin Omega.*+ N ti Sran m’ɔ o lɛ’n, mɔ kɛ ɔ fɛ i laa lele’n ɔ o lɛ’n, m’ɔ su ba’n. N ti Ɲanmiɛn m’ɔ Kwla Like Kwlaa Yo’n.”+

9 Min Zan mɔ n ti amun niaan’n, Zezi mɔ e nin i e o nun’n ti’n be kle min ɲrɛnnɛn kɛ amun sa,+ ń ɲán sielɛ’n+ i nun like wie kɛ amun sa, yɛ n jran kekle+ kɛ amun sa.+ Kɛ mɔ n kannin Ɲanmiɛn nin Zezi be ndɛ n kleli sran mun’n ti’n, n trannin lika mɔ nzue bo sin yiɛ i’n, mɔ be flɛ i Patimɔsu’n i nun lɔ. 10 Ɲanmiɛn wawɛ’n i fanngan nun’n, be fa min ɔli e Min’n i cɛn’n nun. Kpɛkun n tili sran kun nɛn min sin lɔ. Ɔ tɛ kekle kpa kɛ awɛ sa. 11 Ɔ seli kɛ: “Klɛ like kwlaa nga a wun i’n fluwa su naan fa ko man asɔnun nso mun: Efɛzi+ nin Simirinin+ ɔ nin Pɛɛgamun+ nin Tiatii,+ ɔ nin Sadi+ nin Filadɛlfi+ nin Laodise asɔnun’n.”+

12 N kpɛli min ɲin naan ń nían sran ng’ɔ su kan ndɛ kle min’n. Kɛ n kpɛli min ɲin’n, n wunnin sika ɔkwlɛ kannin siewlɛ nso.+ 13 Yɛ sran kun m’ɔ fa sran wa’n,+ ɔ jin kannin siewlɛ’m be afiɛn. Tralɛ ng’ɔ wlɛ i wun’n, ɔ guɛ i ja ngbabua’n su. Kpɛkun like ng’ɔ ci i wue’n nun’n ti sika ɔkwlɛ. 14 Asa ekun’n, i timuɛn’n ti fuaii kɛ fɔkɔ sa, ɔ fɛn fitafita. Yɛ i ɲinma’m be ti kɛ sin taaman sa.+ 15 I ja’m be ti kɛ aaba kpakpa+ m’ɔ su klo sin’n nun m’ɔ bo mianmian’n sa. I nɛn’n kusu tɛ kɛ nzue dan m’ɔ su sonji’n sa. 16 Nzraama nso be o i sa fama’n nun.+ Kpɛkun tokofi tɛnndɛn m’ɔ lɛ i ɲrun lɛ i sin’n, ɔ fin i nuan nun fite.+ I ɲrun’n ti kɛ wia m’ɔ kpaja kpa’n sa.+ 17 Kɛ n wunnin i’n, n tɔli i bo lɛ kɛ m’an wu sa.

Ɔ fɛli i sa fama’n fuali min su, kpɛkun ɔ seli min kɛ: “Nán srɛ kun wɔ. Min yɛ n ti Klikli’n+ nin Kasiɛn’n+ niɔn. 18 N wo nguan nun.+ N wuli,+ sanngɛ siɛn’n, n wo nguan nun. Yɛ ń ká nguan nun tititi.+ Yɛ wie’n nin Ndia’n* be lakle’n wo min sa nun.+ 19 I sɔ’n ti’n, ninnge nga a wunnin be’n, ɔ nin ninnge nga be o lɛ dɔ nga su’n, klɛ be. Yɛ ninnge nga be su sin’n, ɔ nin ninnge nga bé wá bá’n, klɛ be wie. 20 Nzraama nso nga a wunnin be min sa fama’n nun’n, ɔ nin sika ɔkwlɛ kannin siewlɛ nso’m be su ndɛ’n ti nvialiɛ nun ndɛ. Nzraama nso mun yɛle asɔnun nso’m be anzi mun. Kpɛkun kannin siewlɛ nso mun yɛle asɔnun nso mun.+

2 “Klɛ ndɛ yɛ’n ko man Efɛzi+ lɔ asɔnun’n i anzi’n:+ Sran nga nzraama nso o i sa fama’n nun’n, m’ɔ nantinanti sika ɔkwlɛ kannin siewlɛ nso’m be afiɛn’n,+ i ndɛ m’ɔ kan’n yɛ: 2 ‘N si like nga a yo’n, n si kɛ afɛ o ɔ su, yɛ n si kɛ a tra ɔ awlɛn. N si ekun kɛ a nin sran tɛ be kwlá tranman. Ɔ maan be nga be waan be ti akoto+ kusu nn be timan akoto’n, a sa be niannin. Kpɛkun a wunnin kɛ be ti ato buafuɛ. 3 A kle kɛ a tra wɔ awlɛn, yɛ min dunman’n ti’n, w’a yacimɛn i sɔ yolɛ.+ Asa ekun’n, w’a kpɔnzɔman.+ 4 Sanngɛ ɔ wun sa o min klun. Yɛle kɛ a yiman klolɛ’n i nglo kɛ i klikli’n nun’n sa kun.

5 “‘I sɔ’n ti’n, maan ɔ wla kpɛn lika nga a o mɔ a tɔli’n su. Kpɛkun kaci ɔ akunndan’n+ naan yo ninnge nga a yoli be i klikli’n nun’n. Sɛ w’a yoman sɔ’n, ń má tó wɔ lɔ. Yɛ sɛ w’a kaciman ɔ akunndan’n,+ ń yí ɔ kannin siewlɛ’n+ i osu’n nun lɛ. 6 Sanngɛ a yo like kun m’ɔ ti kpa-ɔ. Yɛle kɛ a kpɔ ninnge nga Nikolafuɛ’m be yo’n.+ N kusu n kpɔ ninnge sɔ mun wie. 7 Amun sie amun su kpa be tie ndɛ nga Ɲanmiɛn wawɛ’n kan kle asɔnun mun’n:+ Sran ng’ɔ kwla’n,+ ń yó maan ɔ́ dí nguan waka+ m’ɔ o Ɲanmiɛn i mɛn klanman’n nun’n, i mma’n wie.’

8 “Klɛ ndɛ yɛ’n ko man Simirinin lɔ asɔnun’n i anzi’n: ‘I m’ɔ ti Klikli’n nin Kasiɛn’n,’+ m’ɔ wuli, kpɛkun ɔ ɲannin nguan ekun’n,+ i ndɛ m’ɔ kan’n yɛ: 9 ‘N si kɛ ɲrɛnnɛn o ɔ su, yɛ n si kɛ a di yalɛ, sanngɛ a ti aɲanbeunfuɛ.+ Be nga be se be wun kɛ be ti Zifu kusu nn be timan Zifu’n, n si kɛ be kan ɔ wun ndɛ tɛtɛ. Sran sɔ’m be ti Satan i sran.+ 10 Nán maan ɲrɛnnɛn m’ɔ su wa tɔ amun su’n ti’n, srɛ kun amun.+ An nian! Suɛn Tɔnfuɛ’n su yaciman amun nun wie’m be bisua wlalɛ. Ɔ́ yó sɔ kpa fá sá amun nían. Ɔ maan amún wún ɲrɛnnɛn cɛn ba blu. Sɛ be waan bé kún amun bɔbɔ’n, an jran kekle. Sɛ an yo sɔ’n, ń mán amun i nuan akatua.*+ 11 Amun sie amun su kpa be tie+ ndɛ nga Ɲanmiɛn wawɛ’n kan kle asɔnun mun’n: Sran ng’ɔ kwla’n,+ wie’n i nɲɔn su’n su yomɛn i like fi mlɔnmlɔn.’+

12 “Klɛ ndɛ yɛ’n ko man Pɛɛgamun lɔ asɔnun’n i anzi’n: Sran ng’ɔ le tokofi tɛnndɛn m’ɔ la kpa’n, m’ɔ lɛ i ɲrun lɛ i sin’n,+ i ndɛ m’ɔ kan’n yɛ: 13 ‘N si lika nga a tran’n. Yɛle kɛ a tran lika nga Satan i bia’n wo lɛ’n. Sanngɛ w’a kpɔciman min le.+ N si ekun kɛ i nun nga be kunnin+ min sufuɛ nanwlɛfuɛ+ Antipasi ɔ wun lɛ’n, kan Satan tran lɛ’n, w’a seman kɛ a lafiman min su kun.+

14 “‘Sanngɛ ɔ wun sa wie’m be o min klun. Yɛle kɛ a kplin su kɛ be nga be fa like nga Balaamun kle’n su’n,+ be tran ɔ wun lɛ. Balaamun sɔ’n yɛ ɔ seli Balaki+ kɛ ɔ laka Izraɛlifuɛ mun naan be yo sa tɛ’n niɔn. Ɔ yoli maan be dili ninnge nga be fa sɔ amuin mun’n. Asa ekun’n, be kunndɛli bla nin bian sukusuku, yɛ be yoli i wunsu ɲannzuɛn sa mun.*+ 15 I wafa kunngba’n, a kplin su kɛ be nga be fa like nga Nikolafuɛ’m be kle’n su’n,+ be tran ɔ wun lɛ wie. 16 I sɔ’n ti’n, kaci ɔ akunndan’n. Ɔ timɛn i ti’n, ń má tó ɔ lɔ ndɛndɛ kpa. Yɛ ń má fá tokofi tɛnndɛn m’ɔ fin min nuan nun fite’n,+ kpɛkun e nin be é kún alɛ.

17 “‘Amun sie amun su kpa be tie ndɛ nga Ɲanmiɛn wawɛ’n kan kle asɔnun mun’n:+ Sran ng’ɔ kwla’n,+ ń mɛ́n i manin m’ɔ ti fiawa’n.+ Asa ekun’n, ń mɛ́n i yɔbuɛ ufue kun. Dunman uflɛuflɛ kun o yɔbuɛ’n su. Sran fi siman dunman sɔ’n, saan sran ng’ɔ ɲan yɔbuɛ’n yɛ ɔ si i-ɔ.’

18 “Klɛ ndɛ yɛ’n ko man Tiatii+ lɔ asɔnun’n i anzi’n: Ɲanmiɛn i Wa’n, mɔ i ɲinma’m be ti kɛ sin taaman sa’n,+ mɔ i ja’m be ti kɛ aaba kpakpa’n sa’n,+ i ndɛ m’ɔ kan’n yɛ: 19 ‘N si ninnge nga a yo be’n. N si kɛ a yi klolɛ’n i nglo, a lafi Ɲanmiɛn su, a di i junman’n, yɛ a tra wɔ awlɛn. N si ekun kɛ ninnge nga a yo be siɛn’n, be sɔnnin tra nga a yoli be i klikli’n nun’n.

20 “‘Sanngɛ ɔ wun sa o min klun. Yɛle kɛ a kplin su kɛ bla nga be flɛ i Zezabɛli+ m’ɔ se i wun kɛ ɔ ti Ɲanmiɛn nuan ijɔfuɛ’n, ɔ tran ɔ wun lɛ. Like ng’ɔ kle’n yo maan min sran’m be mlin. Ɔ maan be kunndɛ bla nin bian sukusuku yɛ be yo i wunsu ɲannzuɛn sa mun,*+ kpɛkun be di ninnge nga be fa sɔ amuin mun’n. 21 N mɛnnin i blɛ kɛ ɔ kaci i akunndan’n. Sanngɛ ɔ kunndɛman kɛ ɔ́ káci i akunndan’n naan ɔ́ yáci bian kunndɛlɛ sukusuku’n nin i wunsu ɲannzuɛn sa’m* be yolɛ. 22 Nian! N su wa fa tukpacɛ kekle kpa kun n yi i su. Yɛ sɛ be nga be nin i la’n be kaciman be akunndan’n, naan be yaciman ninnge ng’ɔ yo be’n be yolɛ’n, ń yó maan ɲrɛnnɛn dan kpa tɔ́ be su. 23 Yɛ ń fá tukpacɛ tɛ kpa kun ń kún i mma mun. I liɛ’n, asɔnun’m be kwlaa bé sí kɛ min yɛ n niannian sran’m be klun akunndan’n* ɔ nin be awlɛn’n nun-ɔn. Asa ekun’n, like nga amun tinuntinun amun yo’n, i su yɛ ń nían ń tánnin amun kalɛ-ɔ.+

24 “‘Sanngɛ amun onga nga amun o Tiatii lɔ’n, mɔ amun nantiman like ng’ɔ kle’n su’n, mɔ amun siman like nga sran’m be flɛ i “Satan i ninnge nga be bo ti kploun’n,”+ ń sé amun kɛ: N su faman trɔ uflɛ n takaman amun ti su. 25 Ndɛ kunngba’n yɛ ń kán klé amun-ɔn. Yɛle kɛ maan an tra like nga an le i’n nun kpa lele fa ju min balɛ.+ 26 Sran ng’ɔ kwla’n, m’ɔ nanti min ajalɛ’n su guɛ i ti nin i bo’n, ń mɛ́n i kwlalɛ naan ɔ sie nvlenvle mun,+ 27 kɛ nga min Si mannin min kwlalɛ’n sa. Yɛ sran sɔ’n fá blalɛ kpɔnman+ ɔ́ kánkán be naan be bobo kɛ sɛ mɔ fa yɛ be fa yoli’n sa. 28 Yɛ ń fá nglɛmun nzraama’n+ ń mɛ́n i. 29 Amun sie amun su kpa be tie ndɛ nga Ɲanmiɛn wawɛ’n kan kle asɔnun mun’n.’

3 “Klɛ ndɛ yɛ’n ko man Sadi lɔ asɔnun’n i anzi’n: Sran ng’ɔ le Ɲanmiɛn wawɛ nso’n+ nin nzraama nso’n,+ i ndɛ m’ɔ kan’n yɛ: ‘N si ninnge nga a yo be’n. Yɛ n si kɛ sran’m be kɛn i kɛ ɔ ɲin o su, sanngɛ w’a wu.+ 2 I sɔ’n ti’n, maan ɔ ɲin tran su,+ kpɛkun yo maan ninnge nga be kali lɛ mɔ be su wu’n be ɲan fanngan. Afin n wunnin kɛ junman nga a dili be min Ɲanmiɛn’n i ɲrun’n, w’a guaman be bo. 3 I sɔ’n ti’n, maan ɔ wla kpɛn like nga be fa mannin wɔ’n nin ndɛ nga a tili’n, be su. Yo be nuan su like titi naan kaci wɔ akunndan’n.+ Sanngɛ sɛ w’a tinngeman’n, ń tó wɔ lɔ, ń bá kɛ awiefuɛ sa.+ Yɛ a su siman dɔ nga i su yɛ ń tó wɔ lɔ’n mlɔnmlɔn.+

4 “‘Sanngɛ sran wie’m be o Sadi lɔ’n, b’a yoman be tralɛ’m be fiɛn.+ Sran sɔ’m bé wá wlá tralɛ ufue,+ yɛ be nin min bé nánti, afin be nin i sɔ’n fata. 5 Ɔ maan sran ng’ɔ kwla’n,+ bé wlɛ́ i tralɛ ufue,+ kpɛkun n su nunnunmɛn i dunman’n nguan fluwa’n nun.+ Sanngɛ min Si nin i anzi’m be ɲrun’n, ń sé kɛ n si i.*+ 6 Amun sie amun su kpa be tie ndɛ nga Ɲanmiɛn wawɛ’n kan kle asɔnun mun’n.’

7 “Klɛ ndɛ yɛ’n ko man Filadɛlfi lɔ asɔnun’n i anzi’n: Sran ng’ɔ ti Ɲanmiɛn liɛ’n,+ m’ɔ ti nanwlɛfuɛ’n,+ mɔ Davidi i lakle’n+ wo i sa nun’n, mɔ kɛ ɔ tike anuan’n sran fi kwlá ɲinman’n, mɔ kusu kɛ ɔ ɲin’n, sran fi kwlá tikeman’n, i ndɛ m’ɔ kan’n yɛ: 8 ‘N si ninnge nga a yo be’n. Nian! N tikeli anuan kun n mannin wɔ.+ Sran fi kwlá ɲinman. N si ekun kɛ a le fanngan kan naan a fali min nuan ndɛ’n su naan w’a kpɔciman min. 9 Nian! Satan i sran mɔ be waan be ti Zifu kusu nn be timan Zifu’n,+ (be bua ato), ń má yó maan bé bá yɛ bé wá kóto ɔ bo. Asa ekun’n, ń yó maan bé sí kɛ n klo wɔ. 10 Kɛ n seli ɔ kɛ a jran kekle’n,+ a yoli sɔ titi.* I sɔ’n ti’n, n kusu blɛ nga bé wá sá be kwlaa nga be o mɛn’n nun’n bé nían’n,+ ń sásá wɔ. 11 N su kan min wun n ba.+ Tra like ng’ɔ o ɔ sa nun’n i kekle kpa naan sran fi w’a deman ɔ famiɛn kle’n ɔ sa nun.+

12 “‘Sran ng’ɔ kwla’n, ń fɛ́ i ń yó min Ɲanmiɛn sua’n i ja mlomlo. Ɔ su finman lɔ fiteman mlɔnmlɔn. Ń klɛ́ min Ɲanmiɛn’n i dunman’n sran sɔ’n i wun.+ Yɛ ń klɛ́ min Ɲanmiɛn’n i klɔ’n i dunman mɔ yɛle Zerizalɛmun uflɛ’n+ m’ɔ fin min Ɲanmiɛn bɔbɔ wun lɔ jra’n, sran sɔ’n i wun wie. Asa ekun’n, ń klɛ́ min dunman uflɛ’n sran sɔ’n i wun ekun.+ 13 Amun sie amun su kpa be tie ndɛ nga Ɲanmiɛn wawɛ’n kan kle asɔnun mun’n.’

14 “Klɛ ndɛ yɛ’n ko man Laodise lɔ asɔnun’n+ i anzi’n: Sran nga be flɛ i Maan ɔ yo sɔ’n,+ m’ɔ ti lalofuɛ+ mɔ w’a kpɔciman Ɲanmiɛn le’n, mɔ kusu ɔ ti nanwlɛfuɛ’n,+ m’ɔ ti ninnge nga Ɲanmiɛn yili be’n be nun klikli’n,+ i ndɛ m’ɔ kan’n yɛ: 15 ‘N si ninnge nga a yo be’n. Yɛ n si kɛ a jɔman, kusu a loman. Sɛ ɔ ti kɛ a jɔ annzɛ a lo’n, nn ɔ́ yó min fɛ. 16 Sanngɛ kɛ mɔ a jɔman+ mɔ kusu a loman’n,+ mɔ a o be nɲɔn’n be afiɛn’n ti’n, ń má fí ɔ ń gúa wɔ ase. 17 A se kɛ: “N ti aɲanbeunfuɛ,+ yɛ min aɲanbeun ninnge’m be sɔnnin.” Sanngɛ a siman kɛ a ti ɲrɛnnɛnfuɛ naan a yo annvɔ, naan a ti yalɛfuɛ, naan a ti aɲinsifuɛ, naan ɔ wun ti kplɛn. 18 I sɔ’n ti’n, ń kán klé ɔ kɛ a to sika ɔkwlɛ nga be fa sin be yili i nun fiɛn’n min sa nun, naan a yo aɲanbeunfuɛ. To tralɛ ufue fa wla ɔ wun, naan sran’m b’a wunman kɛ ɔ wun ti kplɛn+ naan ɔ ɲin w’a guaman ase. Yɛ to be ɲinma ya ayre naan fa gua ɔ ɲinma’n su+ naan w’a wun ase kpa.+

19 “‘Be kwlaa nga n klo be’n n ijɔ be, kpɛkun n tu be fɔ.+ I sɔ’n ti’n, yo juejuefuɛ, yɛ kaci ɔ akunndan’n.+ 20 Nian! N jin anuan’n i sin n su bobo. Sran kwlaa ng’ɔ ti min nɛn’n, m’ɔ tike anuan’n, ń wlú i sua’n nun. Kpɛkun e nin i é dí nnɔsua nun aliɛ’n likawlɛ. 21 Sran ng’ɔ kwla’n,+ ń mɛ́n i atin maan e nin i é trán ase min famiɛn bia’n su,+ kɛ nga n kwlali mɔ min nin min Si e trannin ase+ i famiɛn bia’n su’n sa. 22 Amun sie amun su kpa be tie ndɛ nga Ɲanmiɛn wawɛ’n kan kle asɔnun mun’n.’”

4 Kɛ ɔ yoli sɔ’n, ń nían-ɔn, b’a tike anuan kun ɲanmiɛn su lɔ. Yɛ sran klikli nga n tili i nɛn’n, mɔ i nɛn’n tɛ kɛ awɛ sa’n, ɔ nin min ijɔli. Ɔ seli min kɛ: “Fu wa, ń má klé wɔ sa nga bé wá jú’n.” 2 Kɛ ɔ yoli sɔ’n, Ɲanmiɛn wawɛ’n ka lɛ jrali min su. Kpɛkun ń nían-ɔn, famiɛn bia kun o ɲanmiɛn su lɔ, yɛ sran kun ti famiɛn bia sɔ’n su.+ 3 Sran ng’ɔ ti bia’n su’n, i wafa’n ti kɛ yɔbuɛ mɔ be flɛ be zaspu+ nin saaduanin’n* sa. Yɛ ɲanngondin kun mɔ i wafa’n ti kɛ emerodu sa’n, ɔ bo sin yia famiɛn bia’n.+

4 Famiɛn bia ablaɔn-nin-nnan (24) be bo sin yia famiɛn bia’n. Yɛ n wunnin kpɛnngbɛn ablaɔn-nin-nnan (24),+ be titi famiɛn bia sɔ’m be su. Be wun tralɛ’n ti ufue, yɛ sika ɔkwlɛ famiɛn kle o be ti. 5 Lika nga famiɛn bia’n wo lɛ’n, ɲanmiɛn’n kpa sin,+ sran wie’m be nɛn’n tɛ lɔ,+ yɛ ɲanmiɛn’n kpla. Kannin nso mɔ be jue’n, be o famiɛn bia’n i ɲrun lɛ. Kannin sɔ mun yɛle Ɲanmiɛn wawɛ nso mun.+ 6 Like kun m’ɔ ti kɛ jenvie sa’n, ɔ o famiɛn bia’n i ɲrun lɛ. Ɔ ti kɛ vitri sa,+ yɛ ɔ ti kɛ yɔbuɛ mɔ be flɛ i klistali’n sa.

Anzi nnan+ be o afiɛn lɛ, kan famiɛn bia’n wo lɛ’n, yɛ be bo sin yiɛ i. Be ɲrun nin be sin’n ti ɲinma ngunmin. 7 Anzi klikli’n ti kɛ asɔmɔli sa.+ Anzi nɲɔn su’n ti kɛ nannin tola sa.+ Anzi nsan su’n+ i ɲrun’n fa klɔ sran liɛ’n. Yɛ anzi nnan su’n+ ti kɛ anunman ɲin m’ɔ su tu’n sa.+ 8 Anzi nnan sɔ’m be le ndɛwa nsiɛnnsiɛn. Be ɲinma’n wie o be ndɛwa’n su, yɛ wie o be ndɛwa’n bo.+ Wia nun nin kɔnguɛ’n, be se tititi kɛ: “Ɲanmiɛn Zoova* m’ɔ Kwla Like Kwlaa Yo’n, m’ɔ o lɛ laa’n, m’ɔ o lɛ andɛ’n, m’ɔ su ba’n,+ ɔ ti sanwun, ɔ ti sanwun, ɔ ti sanwun.”+

9 Kɛ anzi sɔ’m bé mánmán Sran ng’ɔ ti famiɛn bia’n su m’ɔ o lɛ tititi’n, mɔ bé yí i ayɛ’n, mɔ bé lɛ́ i ase’n,+ 10 kpɛnngbɛn ablaɔn-nin-nnan (24) mun+ be koto Sran m’ɔ ti famiɛn bia’n su’n i ɲrun lɛ wie, yɛ be su Sran m’ɔ o lɛ tititi’n. Be to be famiɛn kle’n be guɛ i famiɛn bia’n i ɲrun lɛ, kpɛkun be se kɛ: 11 “Zoova,* e Ɲanmiɛn, sɛ be manman wɔ,+ be yi wɔ ayɛ+ naan be se kɛ a le tinmin’n,+ ɔ ti su. Afin wɔ yɛ a yili like kwlaa-ɔ.+ A klo kɛ á yí be ti yɛ a yili be-ɔ, yɛ wɔ ti yɛ be o lɛ-ɔ.”

5 I sin’n, n wunnin fluwa kun Sran ng’ɔ ti famiɛn bia’n su’n+ i sa fama’n nun. Be ɲɔnɲɔnnin fluwa sɔ’n. Yɛ be klɛli i bue nɲɔn’n* su, kpɛkun be fali like nso be fa trɛli i nuan’n i ase. 2 Yɛ n wunnin anzi kun. Ɔ le wunmiɛn kpa. Ɔ kpan se kɛ: “?Wan yɛ ɔ le atin tike fluwa’n su-ɔ? ?Wan yɛ ɔ le atin tutu ninnge nga be fa trɛli i nuan’n i ase’n niɔn?” 3 Sanngɛ be nga be o ɲanmiɛn su lɔ’n nin-o, be nga be o asiɛ’n su wa’n nin-o, be nga be o asiɛ’n i bo lɔ’n nin-o, be nun wie fi w’a kwlá tikeman fluwa’n su naan se kɛ ɔ́ nían nun. 4 Ɔ maan n sunnin kpa, afin b’a ɲanman sran fi m’ɔ kwla tike fluwa’n su m’ɔ́ nían nun-ɔn. 5 Sanngɛ kpɛnngbɛn’m be nun kun seli min kɛ: “Yaci sunlɛ. Nian! Zida akpasua’n nun Asɔmɔli’n,+ m’ɔ fin Davidi+ osu’n nun’n,+ ɔ kwlali.+ Ɔ maan ɔ kwla tike fluwa’n su, yɛ ɔ kwla tutu ninnge nso nga be fa trɛli i nuan’n i ase’n.”

6 I sin’n, n wunnin bua ba kun.+ Ɔ jin famiɛn bia’n, nin anzi nnan mun, nin kpɛnngbɛn’m+ be afiɛn lɛ. Ɔ ti kɛ b’a kun i sa.+ Ɔ le wɛ nso nin ɲinma nso. I ɲinma nso mun yɛle Ɲanmiɛn wawɛ nso+ nga be sunmannin be asiɛ wunmuan’n su’n. 7 W’a sisimɛn i bo, ɔ ɔli ko fali fluwa m’ɔ o Sran ng’ɔ ti famiɛn bia’n su’n,+ i sa fama’n nun’n. 8 Kɛ Bua Ba’n fali fluwa’n, anzi nnan mun nin kpɛnngbɛn ablaɔn-nin-nnan (24) mun+ be kotoli i bo. Jru nin sika ɔkwlɛ kpongbo ba o be kwlaa be sa nun sɛsɛsɛ. Ansan w’a yi kpongbo ba sɔ mun. (Ansan’n yɛle srɛlɛ mɔ Ɲanmiɛn i sran’m be srɛ i’n.)+ 9 Be to jue uflɛuflɛ kun+ se kɛ: “Wɔ yɛ a le atin fa fluwa’n niɔn. Yɛ wɔ yɛ a le atin tutu ninnge nga be fa trɛli i nuan’n i ase’n niɔn. Afin be kunnin wɔ, yɛ a fali ɔ mmoja’n toli sran mɔ be fin akpasuaakpasua kwlaa su’n, mɔ be kan aniɛn wafawafa kwlaa’n, mɔ be fin nvlenvle kwlaa nun’n, ɔ nin mɛnmɛn kwlaa nun’n+ mannin Ɲanmiɛn.+ 10 A yoli maan be kacili famiɛn+ nin e Ɲanmiɛn’n i ɲrun jranfuɛ.+ Bé dí famiɛn,+ yɛ bé síe asiɛ’n.”

11 I sin’n, n wunnin anzi kpanngban kpa mɔ b’a sin b’a yia famiɛn bia’n, ɔ nin anzi* nin kpɛnngbɛn mun’n, yɛ n tili be nɛn’n wie. Be ti miliɔn kpanngban, yɛ be ti akpiakpi kpanngban.+ 12 Be kpannin kekle kpa seli kɛ: “Bua Ba mɔ be kunnin i’n,+ ɔ nin kwlalɛ nin aɲanbeun, nin ngwlɛlɛ nin fanngan, nin ayɛ yilɛ nin aɲrunɲan nin suyralɛ fata.”+

13 I sin’n, n tili ndɛ nga ninnge nga be o ɲanmiɛn su lɔ’n, nin ninnge nga be o asiɛ’n su wa’n, ɔ nin ninnge nga be o asiɛ’n i bo lɔ’n,+ ɔ nin ninnge nga be o jenvie’n nun’n be kwlaa be kannin’n. Be seli kɛ: “Maan suyralɛ’n nin ayɛ yilɛ’n+ nin aɲrunɲan’n nin kwlalɛ’n be yo Sran ng’ɔ ti famiɛn bia’n su’n+ nin Bua Ba’n+ be liɛ tititi.”+ 14 Anzi nnan’m be seli kɛ: “Maan ɔ yo sɔ!” Kpɛkun kpɛnngbɛn’m be kotoli, yɛ be suli Ɲanmiɛn.

6 I sin’n, n niannin lɔ ekun. Kɛ Bua Ba’n+ tuli like nso nga be fa trali fluwa’n i nuan’n i ase’n+ be nun kun’n, n tili anzi nnan’m+ be nun kun i nɛn’n. Ɔ tɛ kɛ ɲanmiɛn’n su kpla sa. Ɔ seli kɛ: “Bla!” 2 Kpɛkun n wunnin nnɛn kpanngɔ ufue kun.+ Ta o sran ng’ɔ ti su’n i sa nun. Yɛ be mɛnnin i famiɛn kle kun,+ kpɛkun ɔ ɔli kɛ ɔ nin i kpɔfuɛ’m bé kó kún alɛ naan ɔ́ kwlá be.+

3 Kɛ ɔ tuli like nɲɔn su nga be fa trali fluwa’n i nuan’n i ase’n, n tili anzi nɲɔn su’n+ i nɛn’n. Ɔ seli kɛ: “Bla!” 4 Kpɛkun nnɛn kpanngɔ uflɛ fiteli. Ɔ ti ɔkwlɛ kɛ sin sa. Be mannin sran ng’ɔ ti su’n i atin kɛ ɔ yo naan fɔundi’n tu asiɛ’n su naan klɔ sran’m be kun be wiengu. Kpɛkun be mɛnnin i tokofi dan kpa kun.+

5 Kɛ ɔ tuli like nsan su nga be fa trali fluwa’n i nuan’n i ase’n,+ n tili anzi nsan su’n+ i nɛn’n. Ɔ seli kɛ “Bla!” Kpɛkun n wunnin nnɛn kpanngɔ ble tuun kun. Toe kun wo sran ng’ɔ ti su’n i sa nun. 6 N tili like kun ngan. Ɔ tɛ kɛ sran kun nɛn sa anzi nnan’m be afiɛn lɔ. Ɔ seli kɛ: “Ble kilo* kun ti denie kun,*+ ɔɔzu kilo nsan ti denie kun. Sanngɛ nán an yo olivie ngo’n nin duvɛn’n be finfin.”+

7 Kɛ ɔ tuli like nnan su nga be fa trali fluwa’n i nuan’n i ase’n, n tili anzi nnan su’n+ i nɛn’n. Ɔ seli kɛ: “Bla!” 8 Kpɛkun n wunnin nnɛn kpanngɔ kun. W’a kpa fuai kɛ sran mɔ tukpacɛ w’a ti i kpa’n sa. Be flɛ sran ng’ɔ ti su’n kɛ Wie. Yɛ Ndia’n* su i su, ɔ mɛntɛn i koko kpa. Yɛ be mɛnnin i atin kɛ ɔ fa tokofi tɛnndɛn kun, nin awe,+ nin tukpacɛ tɛ, ɔ nin asiɛ’n su blo nnɛn mun, ɔ fa kun asiɛ’n mɔ be bubuli nun nnan’n i bue kun i sufuɛ mun.+

9 Kɛ ɔ tuli like nnun su nga be fa trali fluwa’n i nuan’n i ase’n, be nga Ɲanmiɛn ndɛ’n nin jasin mɔ be boli’n ti’n be kunnin be’n, n wunnin be mmoja’n+ tɛ yiwlɛ’n+ i bo lɛ.+ 10 Be kpan kekle kpa se kɛ: “?E Min, wɔ mɔ a Sie Like Kwlakwla’n, wɔ mɔ a ti sanwun mɔ a ti nanwlɛfuɛ’n,+ cɛn onin ko yɛ á dí asiɛ’n sufuɛ’m be jɔlɛ-ɔ? ?Cɛn onin ko yɛ á tú e mɔ be guali e mmoja’n i ase’n e klunngbɔ-ɔ?”+ 11 Be mannin be tinuntinun tralɛ ufue tɛnndɛn kun.+ Kpɛkun be seli be kɛ be minndɛ kan naan be wiengu junman difuɛ mɔ be ti be niaan’n, mɔ be su wa kun be wie’n, be nuan yia ka.+

12 I sin’n, n niannin lɔ ekun. Kɛ ɔ tuli like nsiɛn su nga be fa trali fluwa’n i nuan’n i ase’n, asiɛ’n kejeli dan kpa. Yɛ wia’n luli tuun kpa kɛ tralɛ ble mɔ be fali nnɛn ndrɛ* be yoli’n sa. Anglo ba wunmuan’n bloli bioun kɛ mmoja sa.+ 13 Kpɛkun nzraama’m be fin ɲanmiɛn su lɔ be guali asiɛ’n su kɛ figie waka mɔ aunmuan dan wie fitɛ i mɔ i mma amuɛn’m be gua’n sa. 14 Ɲanmiɛn su lɔ’n ɲɔnɲɔnnin kɛ fluwa mɔ b’a ɲɔnɲɔn i’n sa, kpɛkun ɔ mlinnin.+ Yɛ be tuli oka mun nin lika nga nzue bo sin yia be’n be kwlaa be bo be osu’n nun lɛ.+ 15 Ɔ maan asiɛ’n su famiɛn mun nin sran dandan mun, ɔ nin sonja akpi su kpɛn mun nin aɲanbeunfuɛ mun, ɔ nin be nga be le wunmiɛn mun nin kanga mun, ɔ nin diewa mun, be fiali yɔbuɛ buɛ’m be nun nin oka’m be su yɔbuɛ’m be afiɛn.+ 16 Yɛ be se oka mun nin yɔbuɛ’m be kɛ: “Amun tɔ e su,+ yɛ amun fa e fia naan Sran ng’ɔ ti famiɛn bia’n su’n+ w’a wunman e, naan Bua Ba’n w’a yimɛn i ya’n i nglo e su.+ 17 Afin be ya cɛn dan’n w’a ju.+ ?Yɛ wan yɛ ɔ kwla jran be ɲrun-ɔn?”+

7 I sin’n, n wunnin anzi nnan, be jinjin asiɛ’n i cɔnjɔ nnan’m be su. B’a tra asiɛ’n su aunmuan nnan’m be nun naan aunmuan fi w’a fitaman asiɛ’n annzɛ jenvie’n annzɛ waka fi su. 2 N wunnin anzi kun ekun. Ɔ fin wia afiliɛ lɔ yɛ ɔ ba-ɔ. Ɲanmiɛn m’ɔ lafiman’n i like mɔ be fa sie sran’m be nzɔliɛ’n wo i sa nun. Ɔ kpannin kekle kpa kannin ndɛ kleli anzi nnan mɔ be mannin be atin kɛ be saci asiɛ’n nin jenvie’n. 3 Ɔ seli be kɛ: “Nán an saci asiɛ’n annzɛ jenvie’n annzɛ waka mun. Maan e wie Ɲanmiɛn i sran’m be ngban su nzɔliɛ+ sie ka.”+

4 N tili be nga be sieli be nzɔliɛ sɔ’n, be nuan nga be boli’n. Be ti sran akpiakpi ya akpiakpi ablanan-nin-nnan (144.000).+ Be fin Izraɛli nvle’n i akpasua kwlaa su:+

5 Zida akpasua’n nun’n, be sieli sran akpiakpi blu-nin-nɲɔn (12.000) be nzɔliɛ.

Ribɛnin akpasua’n nun’n, sran akpiakpi blu-nin-nɲɔn (12.000).

Gadi akpasua’n nun’n, sran akpiakpi blu-nin-nɲɔn (12.000).

6 Azɛɛ akpasua’n nun’n, sran akpiakpi blu-nin-nɲɔn (12.000).

Nɛftali akpasua’n nun’n, sran akpiakpi blu-nin-nɲɔn (12.000).

Manase+ akpasua’n nun’n, sran akpiakpi blu-nin-nɲɔn (12.000).

7 Simeɔn akpasua’n nun’n, sran akpiakpi blu-nin-nɲɔn (12.000).

Levi akpasua’n nun’n, sran akpiakpi blu-nin-nɲɔn (12.000).

Isakaa akpasua’n nun’n, sran akpiakpi blu-nin-nɲɔn (12.000).

8 Zabulɔn akpasua’n nun’n, sran akpiakpi blu-nin-nɲɔn (12.000).

Zozɛfu akpasua’n nun’n, sran akpiakpi blu-nin-nɲɔn (12.000).

Bɛnzamɛn akpasua’n nun’n, sran akpiakpi blu-nin-nɲɔn (12.000).

9 I sin’n, kɛ n niannin lɔ ekun’n, n wunnin sran kpanngban kpa. Sran fi kwlá kaman be. Be fin nvlenvle kwlaa nun nin akpasua kwlaa su. Sran wafawafa kwlaa o be nun, yɛ be kan aniɛn wafawafa kwlaa.+ Be jinjin famiɛn bia’n nin Bua Ba’n be ɲrun lɛ. Tralɛ ufue tɛnndɛn o be wun sɛsɛsɛ,+ yɛ nglesia nɲa o be sa nun.+ 10 Be kpan kekle kpa se kɛ: “E Ɲanmiɛn m’ɔ ti famiɛn bia’n su’n+ nin Bua Ba’n be ti yɛ y’a ɲan e ti-ɔ.”+

11 Anzi’m be kwlaa be bo sin yiali famiɛn bia’n, nin kpɛnngbɛn mun,+ nin anzi nnan mun. Be utuli be ɲin ase famiɛn bia’n i ɲrun lɛ, kpɛkun be suli Ɲanmiɛn. 12 Be seli kɛ: “Maan ɔ yo sɔ! Maan manmanlɛ’n nin aɲrunɲan’n, ɔ nin ngwlɛlɛ’n nin asenna’n, ɔ nin ayɛ yilɛ’n nin kwlalɛ’n, ɔ nin fanngan’n be yo e Ɲanmiɛn’n i liɛ tititi.+ Maan ɔ yo sɔ.”

13 Kpɛnngbɛn’m be nun kun usali min kɛ: “?Wan mun yɛle be nga tralɛ ufue o be wun’n?+ ?Yɛ nin yɛ be fin-ɔn?” 14 N ka lɛ n seli i kɛ: “Nannan, wɔ yɛ a si nun-ɔn.” Yɛ ɔ seli min kɛ: “Sran sɔ mun yɛle be nga be fin ɲrɛnnɛn dan’n nun’n.+ Be kpuli be tralɛ’n Bua Ba’n i mmoja’n nun, kpɛkun be yoli ufue.+ 15 I sɔ’n ti yɛ be o Ɲanmiɛn i famiɛn bia’n i ɲrun lɛ mɔ be su i wia nun nin kɔnguɛ i sua’n nun’n niɔn. Sran ng’ɔ ti famiɛn bia’n su’n,+ ɔ́ fɛ́ i tannin sua’n káta be su.+ 16 Awe su kunman be kun. Nzuewe su kunman be kun. Wia’n i bolɛ’n su yoman be like fi. Aunyɛyɛ dan’n su kleman be yalɛ.+ 17 Afin Bua Ba’n+ m’ɔ o famiɛn bia’n i afiɛn lɛ’n ɔ́ kánkán be,+ yɛ ɔ́ fá be kɔ́ nzue ti mɔ be man nguan’n be nuan.+ Kpɛkun Ɲanmiɛn núnnún be ɲinmuɛn’n kwlaa.”+

8 Kɛ ɔ+ tuli like nso su nga be fa trali fluwa’n i nuan’n i ase’n,+ lika’n tɔli bliin ɲanmiɛn su lɔ, ɔ dili miniti kɔe ablasan (30). 2 Kpɛkun n wunnin anzi nso+ nga be jran Ɲanmiɛn ɲrun’n. Be mannin be awɛ nso.

3 Anzi uflɛ mɔ sika ɔkwlɛ ansan sɛ* o i sa nun’n, ɔ bali. Ɔ wa jrannin tɛ yiwlɛ’n+ i wun lɛ. Be mɛnnin i ansan+ kpanngban kpa naan ɔ yrɛ i tɛ yiwlɛ mɔ be fali sika ɔkwlɛ yoli+ m’ɔ o famiɛn bia’n i ɲrun lɛ’n su. Kɛ ɔ́ yó sɔ’n nn Ɲanmiɛn tíe srɛlɛ nga i sran’m be srɛ i’n. 4 Ansan ng’ɔ o anzi’n i sa nun’n i wunsrɛn’n nin srɛlɛ+ nga Ɲanmiɛn i sran’m be srɛ i’n, be ɔli Ɲanmiɛn i wun lɔ. 5 Anzi’n fali ansan sɛ’n ndɛndɛ kpa, yɛ ɔ fali tɛ yiwlɛ’n i su sin’n wie, kpɛkun ɔ to yili i asiɛ’n su. Kɛ ɔ yoli sɔ’n, ɲanmiɛn’n kplali kpɛkun ɔ kpali sin,+ asiɛ’n kejeli, yɛ n tili sran wie’m be nɛn. 6 Kpɛkun anzi nso mɔ awɛ nso+ o be sa nun’n, be siesieli be wun naan bé bó be awɛ mun.

7 Anzi klikli’n boli i awɛ’n. Kpɛkun nzraama mɔ kɛ nzue tɔ́’n ɔ gua’n, ɔ nin sin mɔ mmoja sanngan nun’n, be guali asiɛ’n su.+ Asiɛ’n mɔ be bubuli nun akpasua nsan’n, i akpasua kun yrali. Waka mɔ be bubuli be nun akpasua nsan’n, be akpasua kun yrali. Kpɛkun ijre mɔnnɛn’n kwlaa yrali.+

8 Anzi nɲɔn su’n boli i awɛ’n. Kpɛkun like kun m’ɔ ti kɛ oka dan wie m’ɔ su jue’n sa’n, ɔ tɔli jenvie’n nun.+ Jenvie’n mɔ be bubuli nun akpasua nsan’n, i akpasua kun kacili mmoja.+ 9 Jenvie’n nun ninnge nga be le nguan’n, mɔ be bubuli be nun akpasua nsan’n, be akpasua kun wuli.+ Mmeli mɔ be bubuli be nun akpasua nsan’n, be akpasua kun sacili.

10 Anzi nsan su’n boli i awɛ’n. Nzue ba nin nzue ti mɔ be bubuli be nun akpasua nsan’n, nzraama dan kpa kun m’ɔ jue kɛ kannin sa’n, ɔ fin ɲanmiɛn su lɔ tɔli be nun akpasua kun nun.+ 11 Be flɛ nzraama sɔ’n kɛ ijre wiwi. Kpɛkun nzue mɔ be bubuli be nun akpasua nsan’n, be akpasua kun yoli wi. Yɛ nzue sɔ’m be ti’n, sran kpanngban kpa be wuli, afin nzue’m be yo wi.+

12 Anzi nnan su’n boli i awɛ’n. Wia nin anglo nin nzraama mɔ be bubuli be nun akpasua nsannsan’n, be akpasua kun luli tuun.+ Wia nun nin kɔnguɛ mɔ be bubuli be nun akpasua nsannsan’n, be akpasua kun nun’n lika’n w’a kpajaman.

13 Kpɛkun n wunnin anunman ɲin kun. Ɔ tu sin ɲanmiɛn su lɔ. N tili ndɛ ng’ɔ kan’n. Ɔ kpan kekle kpa se kɛ: “Be nga be tran asiɛ’n su’n be yako, be yako, be yako!+ Afin anzi nsan ekun b’a siesie be wun, be su wa bo be awɛ liɛ mun.”+

9 Anzi nnun su’n boli i awɛ’n.+ Kpɛkun n wunnin nzraama kun. Ɔ fin ɲanmiɛn su lɔ tɔli asiɛ’n su. Be fali kunman dan mɔ be simɛn i bo’n+ i lakle’n be mɛnnin i. 2 Kɛ ɔ tikeli kunman dan mɔ be simɛn i bo’n su’n, wunsrɛn fin nun fiteli. Wunsrɛn sɔ’n ti kɛ sin dan wie i wunsrɛn’n sa, kpɛkun ɔ luli wia’n tuun,+ yɛ ɔ jrannin lika’n nun lukuu. 3 Lalo’m be fin wunsrɛn’n nun be truli asiɛ’n su.+ Be mannin be kwlalɛ. Kwlalɛ nga asiɛ’n su ɲannglan’m be le i’n, i kunngba’n yɛ be fa mannin be-ɔ. 4 Be seli be kɛ nán be saci asiɛ’n i su ijre, nin nɲa mɔnnɛn, ɔ nin waka wie fi. Sanngɛ sran nga Ɲanmiɛn i nzɔliɛ’n nunman be ngban’n su’n, be ngunmin yɛ ɔ fata kɛ be yo be tɛ-ɔ.+

5 B’a manman lalo’m be atin kɛ be kun be, sanngɛ be mannin be atin kɛ be kle be ɲrɛnnɛn anglo nnun, naan ɲrɛnnɛn nga be kle sran mun’n, ɔ yo kɛ ɲrɛnnɛn nga kɛ ɲannglan+ san sran’n, ɔ wun i’n sa. 6 Blɛ sɔ’n nun’n, sran’m bé kúnndɛ wie’n, sanngɛ be su wuman. Bé fá be wun mán wie’n, sanngɛ wie’n wánndi be.

7 Lalo’m be ti kɛ nnɛn kpanngɔ mɔ b’a siesie be kɛ be su fa be ko kun alɛ’n sa.+ Like wie o be ti’m be su kɛ sika ɔkwlɛ famiɛn kle sa, kpɛkun be ɲrun’n fa klɔ sran liɛ’n. 8 Be le timuɛn kɛ bla’m be liɛ’n sa. Kpɛkun be je’n ti kɛ asɔmɔli’m be liɛ’n sa.+ 9 Be le like kokloko be wue’n su kɛ blalɛ kokloko nga sonja’m be fa kata be wue’n su’n sa. Kpɛkun be ndɛwa’m be tɛ kɛ kakaklolo mɔ nnɛn kpanngɔ’m be su cuɛn be ndɛndɛ kɔ alɛ kunlɛ’n sa.+ 10 Asa ekun’n, be le lua. I ti’n ti pienbie kɛ ɲannglan’m be liɛ’n sa. Kpɛkun like nga be fa kwla sran mun’n ɔ o be lua’n nun. Bé fá yó sran’m be like yaya anglo nnun.+ 11 Be le famiɛn kun. Famiɛn sɔ’n yɛle kunman dan mɔ be simɛn i bo’n i anzi’n.+ Ebre nun’n, i dunman’n yɛle Abadɔn,* sanngɛ Glɛki nun’n, ɔ suan Apoliɔn.*

12 Ɲrɛnnɛn klikli’n w’a sin. Nian! Ɲrɛnnɛn nɲɔn ekun+ bé wá bɛ́ i sin.

13 Anzi nsiɛn su’n+ boli i awɛ’n.+ Kpɛkun n tili sran kun nɛn tɛ yiwlɛ mɔ be fali sika ɔkwlɛ be yoli+ m’ɔ o Ɲanmiɛn i ɲrun lɛ’n i su wɛ’m be afiɛn. 14 Ɔ seli anzi nsiɛn su’n mɔ awɛ o i sa nun’n kɛ: “Ɲannji anzi nnan nga be cicili be Efrati nzue ba dan’n i wun lɛ’n.”+ 15 Kpɛkun be ɲannjili anzi nnan nga be siesieli be kɛ be minndɛ dɔ’n nin cɛn’n nin anglo’n nin afuɛ’n, naan be kun sran mɔ be bubuli be nun akpasua nsan’n be nun akpasua kun.

16 Sonja nga be fu nnɛn kpanngɔ’n be ti miliɔn ya nɲɔn (200.000.000). Kɛ be boli be nuan’n, n tili. 17 Aolia nun’n, n wunnin nnɛn kpanngɔ mun nin be nga be o be su’n: Be le like kokloko nga sonja’m be fa kata be wue’n su’n. Like kokloko sɔ’m be ti ɔkwlɛ kɛ sin sa, nin ble tuun, ɔ nin youun kɛ sufru sa. Yɛ nnɛn kpanngɔ’m be ti’n ti kɛ asɔmɔli’m+ be liɛ’n sa. Kpɛkun sin nin wunsrɛn, ɔ nin sufru be fin be nuan’n nun fite. 18 Ɲrɛnnɛn nsan mɔ be yɛle sin’n nin wunsrɛn’n, ɔ nin sufru’n be kunnin sran mɔ be bubuli be nun akpasua nsan’n, be nun akpasua kun. 19 Like nga be fa kwla sran mun’n ɔ o be nuan’n nin be lua’n nun. Afin be lua’m be ti kɛ wuo sa, yɛ be le ti. Kpɛkun be fa yo sran’m be like yaya.

20 Sanngɛ sran onga nga ɲrɛnnɛn sɔ’m b’a kunman be’n, b’a yaciman ninnge nga be bɔbɔ be yoli be’n, be sɔlɛ. B’a yaciman mmusu mun nin amuin mɔ be fali sika ɔkwlɛ nin sika, ɔ nin aaba nin yɔbuɛ, ɔ nin waka be yoli be’n be sɔlɛ. Ninnge sɔ’m be wunman ase, be timan sa, yɛ be kwlá nantiman.+ 21 Asa ekun’n, b’a yaciman sran kunlɛ nin bae dilɛ, ɔ nin bla nin bian kunndɛlɛ sukusuku nin i wunsu ɲannzuɛn sa’m* be yolɛ, nin awie wualɛ.

10 I sin’n, n wunnin anzi uflɛ, ɔ le wunmiɛn kpa. Ɔ fin ɲanmiɛn su lɔ ɔ su jra. Ɲanmiɛn ble kun bo sin yiɛ i,* yɛ ɲanngondin kun o i ti su. I ɲrun’n kpaja kɛ wia’n sa,+ yɛ i ja’m be ti kɛ sin sa. 2 Fluwa kaan kun o i sa nun. I nun ti ɲannjiwa. Ɔ tɛkɛli i ja fama’n jenvie’n su, kpɛkun ɔ tɛkɛli i ja bɛ’n asiɛ ba’n su. 3 Ɔ kpannin kekle kpa kɛ asɔmɔli sa.+ Kɛ ɔ kpannin sɔ’n, n tili ɲanmiɛn kplalɛ nso’m be nɛn’n.+

4 Kɛ ɲanmiɛn kplalɛ nso’m be ijɔli’n, min waan ń klɛ́ ndɛ nga be kannin’n. Sanngɛ n tili sran kun nɛn ɲanmiɛn su lɔ.+ Ɔ seli kɛ: “Ndɛ nga ɲanmiɛn kplalɛ nso’m be kannin’n, fia su, nán klɛ.” 5 Anzi nga n wunnin kɛ ɔ jin jenvie’n nin asiɛ ba’n su’n, ɔ tinngɛli i sa fama’n ɲanmiɛn su lɔ. 6 Kpɛkun anzi’n fali Sran m’ɔ o lɛ tititi’n,+ m’ɔ yili ɲanmiɛn m’ɔ la nglo lɔ plaii’n nin ninnge kwlaa nga be o lɔ’n, ɔ nin asiɛ’n nin ninnge kwlaa nga be o su’n, ɔ nin jenvie’n nin ninnge kwlaa nga be o i bo lɔ’n+ ɔ tali nda. Ɔ seli kɛ: “Ɔ su cɛman kun. 7 Sanngɛ kɛ blɛ nga anzi nso su’n+ wá bó i awɛ liɛ’n wá jú’n,+ Ɲanmiɛn i ndɛ m’ɔ ti fiawa+ m’ɔ ti jasin fɛ m’ɔ kan kleli i sran nga be ti i nuan ijɔfuɛ’n,+ ɔ́ kpɛ́n su.”

8 N tili sran’n i nɛn’n ɲanmiɛn su lɔ+ ekun. Ɔ seli min kɛ: “Ko fa fluwa kan nga be ɲɔnɲɔnnin i mɔ be tikeli su’n, m’ɔ o anzi ng’ɔ jin jenvie’n nin asiɛ ba’n su’n, i sa nun’n.”+ 9 N ɔli anzi’n i wun lɔ, kpɛkun n seli i kɛ ɔ fa fluwa kan nga be ɲɔnɲɔnnin i’n man min. Yɛ ɔ seli min kɛ: “De di.+ Ɔ́ yó wi ɔ klun lɔ, sanngɛ ɔ́ yó nɛnkɛnnɛnkɛn ɔ nuan nun kɛ awɛma nzue sa.” 10 N fali fluwa kan’n anzi’n i sa nun, kpɛkun n dili.+ Ɔ yoli nɛnkɛnnɛnkɛn min nuan nun kɛ awɛma nzue sa.+ Sanngɛ kɛ n mɛnnin’n, ɔ yoli wi min klun lɔ. 11 Yɛ be seli min kɛ: “Nvlenvle nin mɛnmɛn’m be nunfuɛ mun, ɔ nin be nga be kan aniɛn wafawafa’n nin famiɛn kpanngban be wun ndɛ nga Ɲanmiɛn kan kleli wɔ’n, ɔ fata kɛ a kɛn i ekun.”

11 I sin’n, ɔ fali ndɛma kun m’ɔ ti kɛ kpɔnman sa’n*+ mannin min. Yɛ ɔ seli kɛ: “Jaso naan sunnzun Ɲanmiɛn i sua’n nin tɛ yiwlɛ’n, yɛ ka be nga be su Ɲanmiɛn i sua’n nun’n.* 2 Sanngɛ Ɲanmiɛn i sua’n i awlo klun’n i liɛ’n, yaci i lɛ, nán sunnzun. Afin be fa mannin be nga be timan Zifu’n. Kpɛkun bé tíatía Ɲanmiɛn i klɔ’n+ su anglo ablanan-nin-nɲɔn (42).+ 3 Ń má yó maan min lalofuɛ nɲɔn’m bé wá wlá bajɛ tralɛ, yɛ bé fá cɛn ba akpi kun ya nɲɔn ablesiɛn (1.260) bé kán min nuan ndɛ.” 4 Olivie waka nɲɔn’n+ nin kannin siewlɛ+ nɲɔn’n be ti min lalofuɛ sɔ’m be nzɔliɛ, yɛ be jinjin asiɛ’n i Min’n i ɲrun lɛ.+

5 Sɛ sran kun waan ɔ́ yó be tɛ’n, sin fín be nuan nun ɔ́ yrá be kpɔfuɛ mun. Sran nga i waan ɔ́ yó be tɛ’n, wafa ng’ɔ fata kɛ be kun i’n yɛ ɔ o lɛ-ɔ. 6 Blɛ nga bé kán Ɲanmiɛn nuan ndɛ’n, be kwla tannin ɲanmiɛn su lɔ’n+ naan nzue w’a tɔman.+ Asa ekun’n, be kwla yo maan nzue kaci mmoja.+ Yɛ blɛ kwlaa nga be klo’n, be kwla fa ɲrɛnnɛn wafawafa kwlaa be yi i asiɛ’n su.

7 Kɛ be ko wie be ndɛ’n i kan’n, nnɛn wlɛfuɛ m’ɔ fin kunman dan mɔ be simɛn i bo’n nun’n, ɔ́ fíte, kpɛkun ɔ nin be kún alɛ, ɔ́ kwlá be, yɛ ɔ́ kún be.+ 8 Be fuɛn’m bé ká klɔ dan’n i akpɔ dan’n su. Sodɔmun nin Ezipti be ti klɔ dan sɔ’n i nzɔliɛ. Lɛ kusu yɛ be kunnin be Min’n waka’n su-ɔ. 9 Yɛ sran wafawafa kwlaa, nin mɛnmɛn kwlaa nunfuɛ mun, ɔ nin be nga be kan aniɛn wafawafa’n, nin nvlenvle kwlaa nunfuɛ’m bé nían be fuɛn’n cɛn ba nsan nin sin.+ Yɛ be su kplinman su kɛ be sie be. 10 I sɔ’n ti’n, be nga be tran asiɛ’n su’n be klun wá jɔ́, yɛ bé wá dí cɛn, kpɛkun bé wá cɛ́ be wiengu like. Afin Ɲanmiɛn nuan ijɔfuɛ nɲɔn sɔ’m be kleli be nga be tran asiɛ’n su’n be yalɛ.

11 Kɛ cɛn ba nsan nin sin’n sinnin’n, Ɲanmiɛn yoli maan be ɲannin nguan ekun.+ Kpɛkun be jaso jrannin be ja’m be su. Ɔ maan srɛ dan kpa kunnin be nga be wunnin be’n. 12 Kpɛkun be tili sran kun nɛn, ɔ tɛli kekle kpa ɲanmiɛn su lɔ. Ɔ seli be kɛ: “An fu wa.” Kpɛkun be fuli ɲanmiɛn ble’n nun be ɔli ɲanmiɛn su lɔ. Kɛ bé fú kɔ́’n, be kpɔfuɛ’m be wunnin be.* 13 Dɔ kunngba sɔ’n su’n, asiɛ’n kejeli dan kpa. Asiɛ’n mɔ be bubuli nun akpasua blu’n, i akpasua kun sacili. Asiɛ’n i kejelɛ’n ti’n, sran akpi nso (7.000) be wuli. Kpɛkun srɛ kunnin be nga b’a wuman’n, ɔ maan be manmannin Ɲanmiɛn m’ɔ o nglo lɔ’n.

14 Ɲrɛnnɛn nɲɔn su’n+ w’a sin. Ɲrɛnnɛn nsan su’n su ba ndɛndɛ kpa.

15 Anzi nso su’n boli i awɛ’n.+ Kpɛkun sran wie’m be nɛn’n tɛli kekle kpa ɲanmiɛn su lɔ. Be seli kɛ: “Mɛn’n i sielɛ’n w’a kaci e Min’n+ nin i Klisi’n+ be liɛ. Yɛ ɔ́ dí famiɛn tititi.”+

16 Kɛ ɔ yoli sɔ’n, kpɛnngbɛn ablaɔn-nin-nnan (24)+ nga be titi famiɛn bia’m be su Ɲanmiɛn i ɲrun’n, be utuli be ɲin ase be suli Ɲanmiɛn. 17 Be seli kɛ: “Ɲanmiɛn Zoova,* wɔ mɔ a Kwla Like Kwlaa Yo’n, mɔ a o lɛ’n,+ mɔ kɛ ɔ fɛ i laa lele’n a o lɛ’n, é lá wɔ ase. Afin a fali ɔ kwlalɛ dan’n, kpɛkun a boli famiɛn dilɛ bo.+ 18 Sanngɛ nvlenvle’m be nunfuɛ’m be fali ya, yɛ a yili ɔ ya’n i nglo. Blɛ nga á dí be nga b’a wu’n be jɔlɛ’n w’a ju. Ɔ nuan ijɔfuɛ mun+ nin ɔ sran mun, ɔ nin be nga be sro wɔ’n, sɛ be le ɲrun-o, sɛ be leman ɲrun-o, blɛ nga á yó be mo’n w’a ju.+ Yɛ blɛ nga á núnnún be nga be saci asiɛ’n w’a ju.”+

19 Kpɛkun Ɲanmiɛn i sua m’ɔ o ɲanmiɛn su lɔ’n i anuan’m be tikeli. Ɔ maan n wunnin aenguɛ’n i alaka m’ɔ o Ɲanmiɛn i sua’n nun lɔ’n.+ Kpɛkun ɲanmiɛn’n kpali sin, ɔ kplali, asiɛ’n kejeli, nzraama nga kɛ nzue tɔ́’n be gua’n, be guali, yɛ n tili sran wie’m be nɛn.

12 Nzɔliɛ dan kun fiteli ɲanmiɛn su lɔ. Yɛle kɛ bla kun+ wlali wia’n kɛ tralɛ sa, yɛ anglo ba’n wo i ja bo. Kpɛkun famiɛn kle kun wo i ti. Nzraama blu-nin-nɲɔn (12) be o famiɛn kle sɔ’n su. 2 Bla’n ti wunnzɛfuɛ, yɛ i ba wulɛ blɛ’n w’a ju. Ɔ maan i klun m’ɔ yo i ya’n ti’n, ɔ kpan.

3 Nzɔliɛ kun ekun fiteli ɲanmiɛn su lɔ. Yɛle kɛ n wunnin dragɔn*+ dan kun. Ɔ blo kɛ sin sa. I ti’m be ti nso, yɛ i wɛ’m be ti blu. Kpɛkun famiɛn kle o i ti nso’m be su. 4 Ɲanmiɛn su lɔ nzraama+ mɔ be bubuli be nun akpasua nsan’n, dragɔn i lua’n kuannin be nun akpasua kun guali asiɛ’n su wa.+ Kpɛkun ɔ ko trannin bla+ m’ɔ su wa wu ba’n i ɲrun lɛ. I liɛ’n, kɛ ɔ wu ba cɛ’n, ɔ́ dí i wa’n.

5 Bla’n wuli ba+ yasua kun. Ba yasua sɔ’n, ɔ́ wá fá blalɛ kpɔnman kánkán mɛnmɛn’m be nunfuɛ’m be kwlaa.+ Be fali bla’n i wa’n ndɛndɛ be ɔli Ɲanmiɛn nin i famiɛn bia’n be wun lɔ. 6 Kpɛkun bla’n wanndi ɔli aawlɛ flɛnnɛn’n nun lɔ. Ɲanmiɛn siesieli lika kun lɔ mɛnnin i naan be mɛn i like lɔ naan ɔ di. Ɔ́ trán lɔ lele cɛn ba akpi kun ya nɲɔn ablesiɛn (1.260).+

7 Kpɛkun alɛ tɔli ɲanmiɛn su lɔ: Misɛli*+ nin i anzi mun, be nin dragɔn’n be kunnin. Yɛ dragɔn nin i anzi’m be nin be kunnin. 8 Sanngɛ dragɔn’n nin i anzi mun b’a kwlaman be,* yɛ b’a ɲanman tranwlɛ ɲanmiɛn su lɔ kun mlɔnmlɔn. 9 Be kannin dragɔn+ dan’n i bo. Dragɔn sɔ’n yɛle wuo lalaa+ mɔ be flɛ i Suɛn Tɔnfuɛ+ nin Satan’n.+ I yɛ ɔ laka asiɛ’n sufuɛ’m be kwlaa mɔ be mlin’n niɔn.+ Be kɛnnin i nin i anzi’m be bo guali be asiɛ’n su.+ 10 N tili sran kun nɛn ɲanmiɛn su lɔ, ɔ tɛli kekle kpa. Ɔ seli kɛ:

“Siɛn’n, e Ɲanmiɛn’n ti’n sran’m b’a ɲan be ti.+ W’a yi i tinmin’n i nglo. I Sielɛ’n+ w’a bo i bo, yɛ i Klisi’n w’a bo sran’m be sielɛ bo. Afin sran ng’ɔ tɔn e niaan’m be suɛn wia nun nin kɔnguɛ Ɲanmiɛn ɲrun’n,+ b’a kɛn i bo b’a yi i asiɛ’n su! 11 Be kwlɛli i,+ Bua Ba’n i mmoja’n+ nin jasin nga be boli’n ti.+ Yɛ kannzɛ bɔbɔ be waan bé kún be’n, b’a sroman wie’n.+ 12 I sɔ’n ti’n, ɲanmiɛn su lɔ’n nin amun mɔ amun tran lɔ’n, maan amun klun jɔ! Sanngɛ asiɛ’n nin jenvie’n,+ amun yako. Afin Suɛn Tɔnfuɛ’n w’a to amun lɔ. Yɛ w’a fa ya dan kpa afin ɔ si kɛ i blɛ’n w’a sɔnman kun.”+

13 Kɛ dragɔn’n wunnin kɛ b’a kɛn i bo b’a yi i asiɛ’n su’n,+ ɔ kleli bla+ m’ɔ wuli ba yasua’n i ɲrɛnnɛn. 14 Sanngɛ be fali anunman ɲin dan’n+ i ndɛwa nɲɔn’n mannin bla’n naan ɔ tu wɔ wuo’n+ i wun mmua, ɔ tu wɔ i tranwlɛ m’ɔ o aawlɛ flɛnnɛn’n nun lɔ’n nun. Bé mɛ́n i like lɔ naan ɔ di, blɛ kun nin blɛ kpanngban nin blɛ kun i bue.*+

15 Kpɛkun wuo’n fili nzue dan wie guali naan ɔ mɛn bla’n. 16 Sanngɛ asiɛ’n deli bla’n. Asiɛ’n trɛli i nuan’n nun ɔ mɛnnin nzue mɔ dragɔn’n fi guali’n. 17 Ɔ maan dragɔn’n fali bla’n i wun ya. Kpɛkun ɔ nin bla’n i osu’n nunfuɛ+ nga be kali lɛ mɔ be nanti Ɲanmiɛn i mmla’m be su’n, mɔ be kan Zezi i ndɛ’n be ko kunnin.+

13 Ɔ* ko jrannin jenvie’n i nuan aunɲan’n nun.

Kpɛkun n wunnin nnɛn wlɛfuɛ+ kun. Ɔ fin jenvie’n nun fiteli.+ Ɔ le wɛ blu, yɛ i ti’n ti nso. Kpɛkun famiɛn kle o i wɛ blu’m be su, yɛ Ɲanmiɛn wun sacilɛ dunman wie’m be o i ti’m be su. 2 Nnɛn nga n wunnin i’n ti kɛ kangale sa. Sanngɛ i ja’m be ti kɛ nnɛn ngble nga be flɛ i ursu’n i liɛ mun sa. Yɛ i nuan’n ti kɛ asɔmɔli liɛ’n sa. Dragɔn’n+ fɛli i tinmin’n nin i famiɛn bia’n, ɔ nin i kwlalɛ dan’n mannin nnɛn sɔ’n.+

3 N wunnin kɛ i ti’m be nun kun ti kɛ b’a bo i fɛ yaya kpa sa. Sanngɛ kannin sɔ’n wa wuli.+ I sɔ’n yoli asiɛ’n sufuɛ’m be kwlaa be ɲɛnmɛn, ɔ maan be suli nnɛn’n i su. 4 Be suli dragɔn’n, afin ɔ mannin nnɛn’n i kwlalɛ. Kpɛkun be suli nnɛn’n, be seli kɛ: “?Wan yɛ ɔ ti kɛ nnɛn’n sa-ɔ? ?Yɛ wan yɛ ɔ nin i be kwla kun-ɔn?” 5 Be mannin nnɛn’n i atin kɛ ɔ kan ndɛ dandan mun, naan ɔ saci Ɲanmiɛn wun. Be mɛnnin i atin kɛ ɔ yo sa sɔ mun anglo ablanan-nin-nɲɔn (42).+ 6 Yɛ ɔ ukeli i nuan sacili Ɲanmiɛn wun-ɔn.+ Ɔ sacili i dunman, yɛ ɔ kɛnnin i tranwlɛ’n i wun ndɛ tɛtɛ. Kpɛkun ɔ sacili be nga be tran ɲanmiɛn su lɔ’n be dunman wie.+ 7 Be mɛnnin i atin kɛ ɔ nin Ɲanmiɛn i sran’m be kun alɛ. Yɛ be mɛnnin i atin kɛ ɔ kwla be.+ Asa ekun’n, be mɛnnin i atin kɛ ɔ sie akpasua kwlaa nunfuɛ mun nin nvlenvle kwlaa nunfuɛ mun, ɔ nin be nga be kan aniɛn wafawafa kwlaa’n, ɔ nin mɛnmɛn kwlaa nunfuɛ mun. 8 Kpɛkun be kwlaa nga be tran asiɛ’n su’n, bé sú i. Kɛ ɔ fɛ i mɛn’n i bo bolɛ nun’n,* b’a klɛman be nun wie fi i dunman Bua Ba mɔ be kunnin i’n,+ i nguan fluwa’n nun.+

9 Sran ng’ɔ si fa sie’n, maan ɔ fa sie.*+ 10 Sɛ ɔ fata kɛ be wla sran kun i bisua’n, saan bé wlɛ́ i bisua. Yɛ sran ng’ɔ fa tokofi kun i wiengu’n,* ɔ fata kɛ be fa tokofi be kun i.+ I lɛ nun’n, ɔ fata kɛ Ɲanmiɛn i sran’m+ be tra be awlɛn,+ yɛ be lafi i su.+

11 Kpɛkun n wunnin nnɛn kun ekun, ɔ fin asiɛ’n i bo fiteli. Ɔ le wɛ nɲɔn. Be ti kɛ bua ba’m be liɛ’n sa. Sanngɛ ɔ ijɔ kɛ dragɔn sa.+ 12 Ɔ fa kwlalɛ nga nnɛn+ klikli’n le i’n fa sie sran mun nnɛn klikli’n i ɲrun lɛ. Ɔ yo maan asiɛ’n sufuɛ’m be su nnɛn klikli mɔ be boli i fɛ yaya kpa mɔ i kannin’n wuli’n.+ 13 Ɔ yo sa dandan mun. Ɔ yo maan sin fin ɲanmiɛn su lɔ jra asiɛ’n su. Ɔ yo i sɔ klɔ sran’m be kwlaa be ɲrun.

14 Sa dandan mɔ be mɛnnin i atin kɛ ɔ yo be nnɛn’n i ɲrun lɛ’n ti’n, ɔ laka asiɛ’n sufuɛ mun maan be mlin. Asa kusu’n, ɔ se asiɛ’n sufuɛ’m be kɛ be yo nzɔliɛ kun+ be fa man nnɛn mɔ be fali tokofi be finnin i’n, m’ɔ ɲannin nguan ekun’n.+ 15 Be mɛnnin i atin kɛ ɔ fita nnɛn’n i wunsu nga be yoli’n i su naan ɔ mɛn i nguan, naan nnɛn’n i wunsu sɔ’n ɔ ijɔ. Kpɛkun ɔ yo naan be kun be nga be waan be suman nnɛn’n i wunsu’n.

16 Ɔ mian sran’m be kwlaa, i bakan-o, i kpɛnngbɛn-o, i aɲanbeunfuɛ-o, i yalɛfuɛ-o, i diewa-o, i kanga-o be kɛ be kplin su kɛ be sie be nzɔliɛ be sa fama’n su, annzɛ be ngban’n su.+ 17 I liɛ’n, sran ng’ɔ leman nzɔliɛ’n ɔ su kwlá toman like annzɛ ɔ su kwlá yoman like atɛ. Nzɔliɛ sɔ’n ti nnɛn’n i dunman+ annzɛ ɔ ti like nuan m’ɔ nin i dunman’n ti kun’n.+ 18 Sran ng’ɔ si ngwlɛlɛ’n, maan ɔ wun nnɛn’n i like nuan’n i wlɛ, afin like nuan sɔ’n ti klɔ sran like nuan, yɛ i nuan yɛle ya nsiɛn ablesiɛn-nin-nsiɛn (666).+ Sran ng’ɔ si ngwlɛlɛ’n yɛ ɔ kwla wun ndɛ sɔ’n i wlɛ-ɔ.

14 I sin’n, ń nían-ɔn, Bua Ba’n+ jin Siɔn Oka’n su.+ Ɔ nin sran akpiakpi ya akpiakpi ablanan-nin-nnan (144.000)+ mɔ i dunman’n nin i Si i dunman’n+ klɛ be ngban su’n, be o lɛ. 2 N tili like kun ngan ɲanmiɛn su lɔ. Ɔ tɛ kɛ nzue kpanngban yɛ ɔ su sonji sa. Ɔ tɛ kɛ ɲanmiɛn’n su kpla kekle kpa sa. Yɛ like nga n tili i ngan’n, ɔ tɛ kɛ jue tofuɛ mɔ be su to jue mɔ be bo jru’n sa. 3 Ɔ ti kɛ jue uflɛuflɛ kun+ yɛ be su to sa. Be to i famiɛn bia’n nin anzi nnan mun,+ ɔ nin kpɛnngbɛn’m+ be ɲrun lɛ. Sran fi kwlá suanman jue sɔ’n, saan sran akpiakpi ya akpiakpi ablanan-nin-nnan (144.000)+ mɔ be toli be asiɛ’n su’n. 4 Sran sɔ’m b’a kunndɛman bla b’a yoman be wun fiɛn. I kpa bɔbɔ’n, b’a kunndɛman bla le.+ Be yɛ lika kwlaa nga Bua Ba’n kɔ́’n, be su i su titi’n niɔn.+ Be toli sran sɔ mun+ klɔ sran’m be afiɛn naan be yo kɛ fie su ninnge’m be mma klikli+ mɔ b’a fa man Ɲanmiɛn nin Bua Ba’n sa. 5 B’a timan gblɛ ndɛ fi be nuan’n nun le. Fiɛn kaan sa nunman be wun.+

6 N wunnin anzi kun ekun, ɔ tu sin ɲanmiɛn su lɔ. Jasin fɛ kpa kun m’ɔ ti anannganman’n wo i nuan. Ɔ bo jasin sɔ’n kle be kwlaa nga be tran asiɛ’n su’n nin be nga be o mɛnmɛn kwlaa nun’n, ɔ nin be nga be fin akpasuaakpasua kwlaa su’n nin be nga be kan aniɛn wafawafa kwlaa’n, ɔ nin sran wafawafa kwlaa.+ 7 Ɔ kpannin kekle kpa seli kɛ: “An sro Ɲanmiɛn, yɛ an yi i ayɛ. Afin blɛ ng’ɔ́ wá dí sran’m be jɔlɛ’n, w’a ju.+ I sɔ’n ti’n, an su Sran ng’ɔ yili nglo’n nin asiɛ’n nin jenvie’n+ nin nzue ti mun’n.”

8 Anzi uflɛ kun ekun suli i su. Ɔ ti be nɲɔn su’n. Ɔ seli kɛ: “W’a tɔ! Babilɔnin Klɔ Dan’n+ w’a tɔ!+ Ɔ yoli maan mɛnmɛn’m be nunfuɛ’m be nɔnnin i nzan mɔ i ti’n, be konvi sɔli bla nin bian kunndɛlɛ sukusuku’n nin i wunsu ɲannzuɛn sa mun’n.”*+

9 Anzi uflɛ kun ekun suli be su. Ɔ ti be nsan su’n. Ɔ kpannin kekle kpa seli kɛ: “Sran kwlaa ng’ɔ su nnɛn’n+ nin i wunsu’n, naan be fa nzɔliɛ be tɛ i ngban’n su’n annzɛ i sa’n su’n,+ 10 ɔ́ nɔ́n Ɲanmiɛn i nzan mɔ b’a faman like b’a sannganman nun mɔ be fa guali i ya klowa nun’n wie.+ Ɲanmiɛn i nzan sɔ’n yɛle i ya m’ɔ fa’n. Asa ekun’n, bé fá sin nin sufru+ bé klé i yalɛ Ɲanmiɛn i anzi mun nin Bua Ba’n be ɲrun. 11 Ɲrɛnnɛn nga bé wá klé be’n,* i wunsrɛn’n fú kɔ́ nglo tititi.+ Asa kusu’n, be kwlaa nga be su nnɛn’n nin i wunsu’n, ɔ nin be nga i dunman’n i nzɔliɛ o be wun’n,+ wia nun-o, kɔnguɛ-o, be loman wunmiɛn. 12 I lɛ nun’n, ɔ fata kɛ Ɲanmiɛn i sran mɔ be fɛ i mmla’m be su titi’n, mɔ be lafi Ɲanmiɛn su kpa+ kɛ Zezi sa’n, be jran kekle.”+

13 N tili sran kun nɛn ɲanmiɛn su lɔ. Ɔ seli kɛ: “Klɛ ndɛ nga: Kɛ ɔ fɛ i andɛ’n, be kwlaa nga be nin e Min’n be o nun mɔ be wu’n,+ be liɛ su ti ye. Ɲanmiɛn wawɛ’n se kɛ junman nga be dili’n ti’n, maan be lo wunmiɛn. Afin be nin ninnge nga be yoli’n yɛ be kɔ-ɔ.”

14 I sin’n, n wunnin ɲanmiɛn ufue kun. Sran ng’ɔ ti su’n, ɔ fa sran wa.+ Sika ɔkwlɛ famiɛn kle kun o i ti, kpɛkun wlɔsɔ kun m’ɔ la kpa’n wo i sa nun.

15 Anzi kun ekun fin Ɲanmiɛn i sua’n nun fiteli. Ɔ kpannin kekle kpa seli anzi ng’ɔ o ɲanmiɛn ufue’n su’n kɛ: “Fa ɔ wlɔsɔ’n naan kpɛkpɛ ninnge mun afin be kpɛlɛ blɛ’n w’a ju. Afin asiɛ’n su ninnge’m b’a blo.”+ 16 Kpɛkun anzi ng’ɔ o ɲanmiɛn ufue’n su’n fɛli i wlɔsɔ’n wlɛli i asiɛ’n su ninnge’m be nun naan w’a kpɛkpɛ be.

17 Anzi kun ekun fin Ɲanmiɛn i sua’n m’ɔ o ɲanmiɛn su lɔ’n nun fiteli. Wlɔsɔ m’ɔ la kpa’n wo i sa nun wie.

18 Anzi kun ekun fin tɛ yiwlɛ’n i wun lɔ. I yɛ ɔ nian sin’n su-ɔ. Ɔ kpannin kekle kpa seli anzi nga wlɔsɔ m’ɔ la kpa’n wo i sa nun’n kɛ: “Fa ɔ wlɔsɔ’n wla viɲin mma sɔsɔwa nga be o asiɛ’n su’n be nun naan kpɛkpɛ be, afin b’a blo.”+ 19 Yɛ anzi’n fɛli i wlɔsɔ’n wlɛli i asiɛ’n su ninnge’m be nun-ɔn. Ɔ fa kpɛkpɛli viɲin mma nga be o asiɛ’n su’n, kpɛkun ɔ to be guɛli i Ɲanmiɛn i duvɛn yiwlɛ dan’n nun. Ɲanmiɛn i duvɛn yiwlɛ dan sɔ’n yɛle i ya mɔ w’a fa’n.+ 20 Be tiatiali viɲin mma’m be su* klɔ’n i sin lɔ. Mmoja fin duvɛn yiwlɛ’n nun fiteli. I sɔnlɛ m’ɔ sɔnnin dan’n ti’n, sɛ nnɛn kpanngɔ kun jran nun’n, ɔ ju blalɛ nga be fa wlɛ i nuan nun’n su. Mmoja’n dili klɔ’n lele fa juli kilo ya nɲɔn ablangwlan-nin-nsiɛn (296).*

15 N wunnin sa kun ekun ɲanmiɛn su lɔ. Ɔ yo sro, yɛ ɔ ti abonuan. N wunnin anzi nso+ nin be sa nun ɲrɛnnɛn nso. Ɲrɛnnɛn sɔ’m be ti ɲrɛnnɛn’m be kwlaa be kasiɛn, afin be su yɛ Ɲanmiɛn i ya’n kwlaa wíe-ɔ.+

2 Kpɛkun n wunnin like kun kɛ jenvie’n sa, ɔ ti kɛ vitri sa,+ yɛ sin sanngan nun. Be nga be kwlali+ nnɛn’n, nin i wunsu nga be yoli’n,+ ɔ nin i like nuan m’ɔ nin i dunman’n+ ti kun’n, be jinjin jenvie sɔ m’ɔ ti kɛ vitri sa’n i nuan lɛ. Yɛ Ɲanmiɛn i jru’m be o be sa nun. 3 Be su to Moizi+ m’ɔ ti Ɲanmiɛn i sran’n, ɔ nin Bua Ba’n+ be jue’n. Be se kɛ:

“Ɲanmiɛn Zoova,* wɔ mɔ a Kwla Like Kwlaa Yo’n,+ sa nga a yo be’n be ti dandan,+ yɛ be ti abonuan. Wɔ mɔ a ti Famiɛn m’ɔ o lɛ titi’n,+ ɔ atin’m be ti seiin, yɛ be ti kpa.+ 4 Zoova,* ɔ kunngba cɛ yɛ a ti nanwlɛfuɛ-ɔ. ?Ɔ maan wan cɛ yɛ ɔ su sroman wɔ-ɔ? ?Wan yɛ ɔ su boman ɔ dunman fɛ-ɔ?+ Nvlenvle’m be kwlaa be nunfuɛ’m bé bá ɔ ɲrun, yɛ bé mánmán wɔ.+ Afin be wunnin weiin kɛ jɔlɛ nga a di’n, ɔ ti su.”

5 I sin’n, n wunnin Ɲanmiɛn i tannin sua nga i lalofuɛ’n+ wo nun’n, ɲanmiɛn su lɔ. I anuan’m be la su.+ 6 Kpɛkun anzi nso nin be sa nun ɲrɛnnɛn nso’m+ be fin Ɲanmiɛn i sua’n nun lɔ be fiteli. Be wun lɛn tralɛ’n ti sanwun, ɔ bo mianmianmian. Kpɛkun like ng’ɔ ci be wue nun’n ti sika ɔkwlɛ. 7 Anzi nnan’m be nun kun fali sika ɔkwlɛ kpongbo ba nso mannin anzi nso mun. Ɲanmiɛn m’ɔ o lɛ tititi’n, i ya’n+ w’a yi kpongbo ba sɔ mun. 8 Kpɛkun Ɲanmiɛn i aɲrunɲan’n nin i tinmin’n ti’n, wunsrɛn yili Ɲanmiɛn i sua’n.+ Yɛ sran fi w’a kwlá wluman Ɲanmiɛn i sua’n nun lɔ lele ɲrɛnnɛn nso+ nga be o anzi nso’m be sa nun’n be wieli.

16 N tili sran kun nɛn, ɔ tɛli kekle kpa Ɲanmiɛn i sua’n nun lɔ.+ Ɔ seli anzi nso’m be kɛ: “An wɔ naan an ko utu Ɲanmiɛn i ya m’ɔ o kpongbo ba nso’m be nun’n asiɛ’n su.”+

2 Be nun klikli’n ko utuli like ng’ɔ o i kpongbo ba’n nun’n asiɛ’n su.+ Kpɛkun kannin tɛ kun m’ɔ trɛ ndɛndɛ’n,+ ɔ fiteli be nga nnɛn wlɛfuɛ’n i nzɔliɛ o be wun+ mɔ be su i wunsu nga be yoli’n,+ be wunnɛn’n su.

3 I nɲɔn su’n utuli like ng’ɔ o i kpongbo ba’n nun’n jenvie’n nun.+ Kpɛkun jenvie’n kacili mmoja.+ Mmoja sɔ’n ti kɛ sran mɔ w’a wu’n i mmoja’n sa. Ɔ maan ninnge kwlaa nga nguan o be nun mɔ be o jenvie nun’n, be wuli.+

4 I nsan su’n utuli like ng’ɔ o i kpongbo ba’n nun’n nzue ba mun nin nzue ti’m be nun.+ Kpɛkun be kacili mmoja.+ 5 N tili ndɛ nga anzi ng’ɔ o nzue’m be su’n, ɔ kannin’n. Ɔ seli kɛ: “Wɔ mɔ a o lɛ’n, mɔ a o lɛ lalaa’n,+ mɔ a kpɔciman ɔ nvle nunfuɛ mun’n,+ a yo sa i nuan su sɛsɛ. Afin a seli kɛ maan sa sɔ’m be ju.+ 6 Yɛle kɛ be guali ɔ sran mun nin ɔ nuan ijɔfuɛ’m be mmoja’n i ase.+ Yɛ ɔ kusu a mannin be mmoja naan be nɔn.+ I sɔ mɔ a yoli be’n, ɔ nin be fata.”+ 7 Kpɛkun n tili ndɛ nga tɛ yiwlɛ’n kannin’n. Ɔ seli kɛ: “Ɲanmiɛn Zoova,* wɔ mɔ a Kwla Like Kwlaa Yo’n,+ jɔlɛ nga a di be’n be ti nanwlɛ, yɛ be ti su.”+

8 I nnan su’n utuli like ng’ɔ o i kpongbo ba’n nun’n wia’n su.+ Kpɛkun be mannin wia’n i atin kɛ ɔ yra sran mun. 9 Kɛ ɔ yoli sɔ’n, aunyɛyɛ dan kpa kunnin sran mun. Sanngɛ sran’m be sacili Ɲanmiɛn mɔ i ti yɛ maan ɲrɛnnɛn sɔ’m be ju’n, i dunman. Kpɛkun b’a kaciman be akunndan’n naan se kɛ bé yí i ayɛ.

10 I nnun su’n utuli like ng’ɔ o i kpongbo ba’n nun’n nnɛn’n i bia’n su. Kɛ ɔ yoli sɔ’n, aosin tɔli i famiɛn diwlɛ’n su,+ ɔ yoli sran’m be ya. I sɔ’n ti’n, be kakali be taaman mun. 11 Ɲrɛnnɛn m’ɔ o be su’n nin kannin m’ɔ o be wun’n ti’n, be kannin Ɲanmiɛn m’ɔ o nglo lɔ’n i ndɛ tɛtɛ. Yɛ b’a kaciman be nzuɛn’n.

12 I nsiɛn su’n utuli like ng’ɔ o i kpongbo ba’n nun’n nzue ba dan mɔ be flɛ i Efrati’n nun.+ Kɛ ɔ yoli sɔ’n, nzue’n wieli nun.+ Ɔ yoli sɔ naan famiɛn nga be fin wia afiliɛ lɔ’n, b’a ɲan sinwlɛ.+

13 N wunnin ndɛ tɛtɛ nsan, be ti kɛ klɛ sa. Be fin dragɔn’n+ nin nnɛn wlɛfuɛ’n, ɔ nin sran ng’ɔ tɔn i wun suɛn kɛ ɔ ti Ɲanmiɛn nuan ijɔfuɛ’n be nuan nun fiteli. 14 Ndɛ sɔ’m be fin mmusu mun. Be yi atrɛ,+ yɛ be kɔ famiɛn nga be o asiɛ wunmuan’n su’n be sin. Be yiayia be naan be kun alɛ+ Ɲanmiɛn m’ɔ Kwla Like Kwlaa Yo’n i cɛn dan’n nun.+

15 “Nian! Ń bá kɛ awiefuɛ sa.+ Ɔ maan sran nga i ɲin tran su+ naan b’a demɛn i tralɛ’n i sa nun’n, i liɛ su ti ye. Afin ɔ su fɛmɛn i wun kplɛn wlanwlanman naan sran’m b’a wun i naan w’a wun ɲannzuɛn.”+

16 Be yiayiali be lika nga Ebre nun’n be flɛ i Aamagedɔn’n* i nun.+

17 I nso su’n utuli like ng’ɔ o i kpongbo ba’n nun aunmuan’n nun. Kɛ ɔ yoli sɔ’n, sran kun nɛn tɛli kekle kpa Ɲanmiɛn i sua’n nun lɔ,+ lika nga famiɛn bia’n wo lɔ’n. Ɔ seli kɛ: “W’a wie!” 18 Kpɛkun ɲanmiɛn’n kpali sin, ɔ kplali kekle kpa yɛ n tili sran wie’m be nɛn. Asiɛ’n kejeli dan kpa. Kɛ ɔ fɛ i cɛn nga klɔ sran’m be trannin asiɛ’n su lele’n, ɔ nin-a kejeman sɔ le.+ Ɔ kejeli juli mmua, yɛ i kejelɛ sɔ’n yoli dan. 19 Klɔ dan’n+ i nun bubuli nsan. Klɔ nga be o nvlenvle’m be kwlaa be nun’n be sacili. Yɛ Ɲanmiɛn i wla kpɛnnin Babilɔnin Klɔ Dan’n+ su naan be fa klowa mɔ nzan o nun’n, be mɛn i naan ɔ nɔn. Nzan sɔ’n yɛle i ya dan’n.+ 20 Asa ekun’n, asiɛ nga nzue bo sin yia be’n, be wanndili, yɛ b’a wunman oka’m be kun.+ 21 I sin’n, nzraama nga kɛ nzue tɔ́’n be gua’n, i dandan kpa mɔ kun kwla ju talan kun’n,* be fin ɲanmiɛn su lɔ be guali sran’m be su.+ Nzraama mɔ be guali sran’m be su’n ti’n,+ sran’m be kannin Ɲanmiɛn i wun ndɛ tɛtɛ, afin ɲrɛnnɛn’n yoli dan.

17 Anzi nso nga kpongbo ba nso+ o be sa nun’n, be nun kun bali. Kpɛkun ɔ seli min kɛ: “Bla maan n kle wɔ fɔ nga bé wá fá tú tekle bla dan m’ɔ ti nzue kpanngban su’n.+ 2 Asiɛ’n su famiɛn’m be nin i lali.*+ Yɛ be nga be tran asiɛ’n su’n, be nɔnnin i nzan’n lele be boli. I nzan sɔ’n, yɛle bla nin bian kunndɛlɛ sukusuku nin i wunsu ɲannzuɛn sa’m be yolɛ’n.”*+

3 Ɲanmiɛn wawɛ’n yoli maan ɔ fa min ɔli aawlɛ flɛnnɛn kun nun. Kpɛkun n wunnin bla kun. Ɔ ti nnɛn ɔkwlɛ bioun kun su. Ɲanmiɛn i wun sacilɛ dunman kpanngban o nnɛn sɔ’n i wun. I ti’n ti nso, yɛ i wɛ’m be ti blu. 4 Bla sɔ’n, i wun tralɛ’n ti ɔkwlɛ kankan+ nin ɔkwlɛ bioun. Sika ɔkwlɛ nin yɔbuɛ kpakpa mun nin afle o i wun.+ Sika ɔkwlɛ klowa o i sa nun. I ninnge kainkain mun nin i bian kunndɛlɛ* ninnge fiɛnfiɛn’m b’a yi klowa sɔ’n. 5 Be klɛli dunman kun i ngban’n su. Dunman sɔ mɔ sran fi simɛn i bo’n yɛ: “Babilɔnin Klɔ Dan’n, tekle bla+ mun nin asiɛ’n su ninnge kainkain’m be nin.”+ 6 N wunnin kɛ bla’n w’a nɔn Ɲanmiɛn i sran mun nin Zezi i lalofuɛ’m be mmoja’n+ lele w’a bo.

Nanwlɛ, kɛ n wunnin i’n, ɔ boli min nuan dan. 7 Yɛ anzi’n seli min kɛ: “?Ngue ti yɛ ɔ bo ɔ nuan-ɔn? Bla’n,+ ɔ nin nnɛn ng’ɔ ti su mɔ i ti’n ti nso’n, mɔ i wɛ’m be ti blu’n,+ ń má tú be wun ndɛ m’ɔ ti fiawa’n, i bo ń klé wɔ: 8 Nnɛn nga a wunnin i’n, ɔ o lɛ laa. Ɔ nunman lɛ dɔ nga su. Sanngɛ ɔ cɛ kan’n, ɔ́ wá fín kunman dan mɔ be simɛn i bo’n+ i nun fíte, yɛ bé wá núnnún i. Asiɛ’n sufuɛ mɔ kɛ mɛn’n bó i bo’n,* b’a klɛman be dunman nguan fluwa’n nun’n,+ kɛ bé wá wún kɛ nnɛn’n wo lɛ laa’n naan ɔ nunman lɛ dɔ nga su’n, naan ɔ́ wá bá’n, ɔ́ bó be nuan.

9 “Ɔ fata kɛ sran si ngwlɛlɛ naan w’a wun ndɛ yɛ’n i wlɛ: Nnɛn’n i ti nso’m+ be ti oka nso. Yɛ bla’n ti oka sɔ’m be su. 10 Famiɛn nso be o lɛ: Be nun nnun b’a tɔ. Kun o lɛ, yɛ kun nin-a baman. Sanngɛ sɛ ɔ ba’n, ɔ su cɛman. 11 Nnɛn ng’ɔ o lɛ laa m’ɔ nunman lɛ dɔ nga su’n,+ ɔ ti famiɛn’m be mɔcuɛ su’n. Sanngɛ ɔ fin be nso mun. Yɛ bé wá núnnún i.

12 “Wɛ blu nga a wunnin be’n, be ti famiɛn blu mɔ be nin-a boman sran’m be sielɛ bo’n. Sanngɛ be mannin be kwlalɛ naan be nin nnɛn’n be di famiɛn dɔ kun. 13 Be akunndan’n ti kun. Ɔ maan be fali be tinmin’n nin be kwlalɛ’n mannin nnɛn’n. 14 Famiɛn sɔ’m be nin Bua Ba’n,+ bé wá kún alɛ. Sanngɛ Bua Ba’n kwlá be,+ afin ɔ ti miɛn’m be Miɛn nin famiɛn’m be Famiɛn.+ Be nga be o i sin mɔ Ɲanmiɛn flɛli be’n, m’ɔ kpali be’n, mɔ be ti nanwlɛfuɛ’n, bé kwlá wie.”+

15 Kpɛkun ɔ seli min kɛ: “Nzue nga a wunnin be lika nga tekle bla’n ti lɛ’n, be yɛle sran wafawafa mun, ɔ nin sran kpanngban kpa, ɔ nin nvlenvle’m be nunfuɛ mun, ɔ nin be nga be kan aniɛn wafawafa’n.+ 16 Yɛ nnɛn’n i wɛ blu+ nga a wunnin be’n, be nin nnɛn wlɛfuɛ’n+ bé wá kpɔ́ tekle bla’n,+ yɛ bé dé i wun ninnge mun, ɔ maan i wun ká kplɛn. Kpɛkun bé dí i nnɛn’n, yɛ bé yrɛ́ i kɔlikɔli.+ 17 Afin Ɲanmiɛn fali akunndan kun wlali be ti nun naan be yo i klun sa’n,+ naan be yo like kunngba ng’ɔ o be kwlaa be akunndan’n nun’n. Yɛle kɛ be fa famiɛn dilɛ’n be man nnɛn wlɛfuɛ’n+ lele saan Ɲanmiɛn i ndɛ’n i nuan w’a yia. 18 Yɛ bla+ nga a wunnin i’n, yɛle klɔ dan’n. Ɔ sie asiɛ’n su famiɛn mun.”

18 I sin’n, n wunnin anzi kun ekun. Ɔ fin ɲanmiɛn su lɔ su jra, ɔ le kwlalɛ kpa. I ɲrun ɲanɲan’n kpajali asiɛ’n su. 2 Ɔ kpannin kekle kpa seli kɛ: “W’a tɔ! Babilɔnin Klɔ Dan’n w’a tɔ,+ yɛ w’a kaci mmusu’m be lawlɛ. Lɔ yɛ mmusu mun* nin anunman tɛtɛ mɔ sran’m be kpɔ be’n, be fia-ɔ!+ 3 I konvi m’ɔ sɔ bla nin bian kunndɛlɛ sukusuku nin i wunsu ɲannzuɛn sa mun’n* ti’n, ɔ yoli maan nvlenvle’m be nunfuɛ’m be nɔnnin i nzan’n lele be boli.+ Asa ekun’n, asiɛ’n su famiɛn’m be nin i lali.+ Yɛ aata difuɛ’m* be kusu be ɲannin be wun kpa, afin bla sɔ’n tiantiannin aɲanbeun ninnge kpanngban kpa nuan. Yɛ i sɔ yolɛ’n kunmɛn i ɲannzuɛn.”

4 N tili sran kun nɛn ekun ɲanmiɛn su lɔ. Ɔ seli kɛ: “Min sran mun, an fin klɔ’n nun fite,+ naan amun a yoman sa tɛ ng’ɔ yo’n wie, naan ɲrɛnnɛn ng’ɔ́ wá tɔ́ i su’n, w’a tɔman amun su wie.+ 5 Afin i sa tɛtɛ mun b’a sɔn lele b’a ju ɲanmiɛn su lɔ.+ Yɛ Ɲanmiɛn i wla w’a kpɛn be su.+ 6 Like ng’ɔ fa yoli sran mun’n, maan an yo i wunsu be mɛn i.+ I kpa bɔbɔ’n, maan an yo i wunsu sɔ kpɛ nɲɔn be mɛn i.+ Yɛ klowa+ ng’ɔ sanngannin nzan nun’n, an sanngan nzan nun sɔ kpɛ nɲɔn be mɛn i.+ 7 Ɔ buli i wun sran dan ngboko, be dimɛn i sa nun ninnge kpakpa’m be yalɛ, yɛ i sɔ’n kunmɛn i ɲannzuɛn. Ɔ maan an niɛn i sɔ’n su naan an kle i ɲrɛnnɛn naan ɔ bo awuyomo. Afin ɔ se i klun lɔ titi kɛ: ‘N ti famiɛn bla, yɛ n ti famiɛn bia’n su. N timan angbeti, n su boman awuyomo le.’+ 8 I sɔ’n ti’n, ɲrɛnnɛn wá tɔ́ i su cɛn kunngba. Ɲrɛnnɛn sɔ’n yɛle wie’n, nin sunlɛ’n, nin awe’n. Kpɛkun bé yrɛ́ i sin nun kɔlikɔli.+ Afin Ɲanmiɛn Zoova* m’ɔ buli i fɔ’n, i tinmin’n cɛnnin.+

9 “Kɛ asiɛ’n su famiɛn nga be nin i lali’n,* mɔ i sa nun ninnge kpanngban’m be ti’n be nin i trannin pɔɔ nun’n, bé wún kɛ b’a yrɛ i sin’n nun’n, mɔ bé wún i wunsrɛn’n, bé sún. Kpɛkun awlabɔɛ’n ti’n, bé fínfín be wue’n nun. 10 Kɛ bé wún ɲrɛnnɛn nga w’a tɔ i su’n, srɛ kún be, ɔ maan bé jrán mmua lɔ bé sé kɛ: ‘?Ngue ɲrɛnnɛn sa yɛle nga? ?Ngue ɲrɛnnɛn sa yɛle nga? Babilɔnin, wɔ mɔ a ti klɔ dan’n,+ mɔ be sisili ɔ wun kpa’n, dɔ kunngba su’n, b’a tu ɔ fɔ!’

11 “Asa ekun’n, asiɛ’n su aata difuɛ’m bé sún, yɛ bé bó awuyomo. Afin sran fi nunman lɛ kun naan w’a to ninnge kpanngban nga be yo be atɛ’n. 12 Ninnge sɔ mun yɛle sika ɔkwlɛ, nin sika, nin yɔbuɛ kpakpa mun, nin afle mun, nin lɛn kpakpa mun, nin tralɛ ɔkwlɛ kankan, nin tralɛ nga be fali jese be yoli’n, nin tralɛ ɔkwlɛ bioun, nin ninnge nga be fali waka nga be bɔn fannin’n be yoli’n, nin ninnge nga be fali sui je be yoli’n, ɔ nin ninnge nga be fali waka kpakpa mun nin aaba, nin blalɛ, nin yɔbuɛ klanman kpa nga be flɛ i mablu’n be yoli’n. 13 Wie mun ekun yɛle sinamɔmun nin Ɛndi lɔ ijre nga be bɔn fannin’n, ɔ nin ansan nin ngo ng’ɔ bɔn fannin’n, ɔ nin ansan ufue nin duvɛn, ɔ nin olivie ngo nin sanmlɛn mlɛnnɛnnɛn, ɔ nin ble nin nannin, ɔ nin bua nin nnɛn kpanngɔ, ɔ nin kakaklolo nin kanga, ɔ nin sran mun. 14 Ninnge kpakpa nga ɔ konvi sɔli be’n, be nunman lɛ kun. Aliɛ nga be yo fɛ kpa’n nin ɔ sa nun ninnge kpakpa’m b’a ka lɛ b’a mlin. A su ɲanman be kun.

15 “Aata difuɛ nga be yoli be ninnge’m be atɛ i sa nun mɔ i dunman nun ti’n, be kacili aɲanbeunfuɛ’n, ɲrɛnnɛn mɔ w’a tɔ i su’n ti’n, srɛ kún be. Ɔ maan bé jrán mmua lɔ, yɛ bé sún, bé bó awuyomo. 16 Bé sé kɛ: ‘?Ngue ɲrɛnnɛn sa yɛle nga? ?Ngue ɲrɛnnɛn sa yɛle nga? Klɔ dan’n, m’ɔ wla tralɛ mɔ be fali lɛn kpakpa mun be yoli’n, nin tralɛ ɔkwlɛ kankan nin tralɛ ɔkwlɛ bioun’n, m’ɔ wla sika ɔkwlɛ nin yɔbuɛ kpakpa mun nin afle mun’n,+ 17 dɔ kunngba su’n, i aɲanbeun ninnge kpanngban sɔ’n i kwlaa w’a saci!’

“Be nga be ti mmeli’m be su kpɛn’n nin be nga be di junman mmeli’m be nun’n, ɔ nin be nga be wlanwlan sin jenvie’n su’n, ɔ nin be kwlaa nga jenvie’n yɛ maan be ɲan be nuan nun aliɛ’n, bé jrán mmua lɔ, 18 kpɛkun kɛ bé wún kɛ b’a yrɛ i naan wunsrɛn su fin lɔ fite’n, bé kpán bé sé kɛ: ‘?Klɔ onin yɛ ɔ ti kɛ klɔ dan nga sa-ɔ?’ 19 Bé tó ndutre gúa be ti su, kpɛkun bé kpán, yɛ bé sún, bé bó awuyomo bé sé kɛ: ‘?Ngue ɲrɛnnɛn sa yɛle nga? ?Ngue ɲrɛnnɛn sa yɛle nga? Klɔ dan mɔ i aɲanbeun’n ti’n, be kwlaa nga be le mmeli jenvie’n su’n, be kacili aɲanbeunfuɛ’n, be sacili i dɔ kunngba su!’+

20 “Amun mɔ amun o ɲanmiɛn su lɔ’n,+ bla sɔ’n ti’n, maan amun klun jɔ. Yɛ amun mɔ amun ti Ɲanmiɛn i sran+ nin akoto mun nin Ɲanmiɛn nuan ijɔfuɛ mun’n, bla sɔ’n ti’n, maan amun klun jɔ wie! Afin amun dunman nun ti yɛ Ɲanmiɛn buli i fɔ-ɔ!”+

21 Anzi kun m’ɔ le wunmiɛn kpa’n mannin yɔbuɛ kun m’ɔ ti kɛ yɔbuɛ dan nga be fa tin like sa’n su, ɔ to yili i jenvie’n nun. Kpɛkun ɔ seli kɛ: “Kɛ bé wá mán Babilɔnin m’ɔ ti klɔ dan’n su bé tó yí i lɔ kpɛ kunngba kɛ nga sa. Yɛ be su wunmɛn i kun mlɔnmlɔnmlɔn.+ 22 Ɔ maan be su timan jue tofuɛ mɔ be bo jru’n, be ngan ɔ su lɔ kun. Be su timan ngowa kanfuɛ, ɔ nin blo bofuɛ nin awɛ bofuɛ’m be ngan ɔ su lɔ kun. Yɛ be su wunman kɛ ajuin difuɛ wie su di aata ɔ su lɔ kun. Be su timan yɔbuɛ nga be fa tin like’n i ngan ɔ su lɔ kun. 23 Kannin su kpajaman ɔ su lɔ kun. Yɛ be su timan yasua nin bla nga b’a ja uflɛuflɛ’n be ngan ɔ su lɔ kun. Afin be nga be di aata ɔ su lɔ’n, be yɛ laa be ti asiɛ’n su sran dandan mun-ɔn. A fali ɔ bae’n+ lakali nvlenvle kwlaa be nunfuɛ mun. 24 Be wunnin Ɲanmiɛn nuan ijɔfuɛ mun nin Ɲanmiɛn i sran mun,+ ɔ nin be kwlaa nga be kunnin be asiɛ’n su’n, be mmoja’n i su lɔ.”+

19 Kɛ ɔ yoli sɔ’n, n tili like kun ngan. Ɔ tɛ kɛ sran kpanngban kpa yɛ be su ijɔ ɲanmiɛn su lɔ sa. Be se kɛ: “An manman Ya!*+ E delɛ’n fin e Ɲanmiɛn’n. Maan aɲrunɲan’n nin tinmin’n be yo i liɛ. 2 Afin jɔlɛ ng’ɔ di’n ti nanwlɛ, yɛ ɔ ti su.+ Yɛle kɛ tekle bla dan m’ɔ fɛli i bian kunndɛlɛ sukusuku nin i wunsu ɲannzuɛn sa’m be yolɛ’n* sacili asiɛ’n sufuɛ mun’n, ɔ tuli i fɔ. Ɔ tuli i sufuɛ mɔ bla sɔ’n guali be mmoja ase’n be klunngbɔ wie.”+ 3 Kpɛkun i kpɛ nɲɔn su’n, be seli kɛ: “An manman Ya!*+ Yɛ maan wunsrɛn’n fin klɔ’n nun fu wɔ nglo tititi.”+

4 Kɛ ɔ yoli sɔʼn, kpɛnngbɛn ablaɔn-nin-nnan (24) mun+ nin anzi nnan’m+ be utuli be ɲin ase be suli Ɲanmiɛn m’ɔ ti famiɛn bia’n su’n. Be seli kɛ: “Maan ɔ yo sɔ! An manman Ya!”*+

5 Asa ekun’n, sran kun nɛn tɛli famiɛn bia’n i wun lɔ. Ɔ seli kɛ: “Amun mɔ amun ti Ɲanmiɛn i junman difuɛ+ mɔ an sro i’n, i bakan-o, i kpɛnngbɛn-o,+ an manman Ɲanmiɛn.”

6 N tili like kun ekun ngan. Ɔ tɛ kɛ sran kpanngban kpa be nɛn’n sa, ɔ tɛ kɛ nzue kpanngban kpa su sonji sa, yɛ ɔ tɛ kɛ ɲanmiɛn’n su kpla kekle kpa sa. Be se kɛ: “An manman Ya,*+ afin e Ɲanmiɛn Zoova* m’ɔ Kwla Like Kwlaa Yo’n,+ w’a bo famiɛn dilɛ bo!+ 7 Maan e klun jɔ, maan e klun jɔ tratra su, yɛ maan e mɛnmɛn i. Afin Bua Ba’n i aja cɛn’n w’a ju, yɛ i yi’n w’a siesie i wun. 8 Be mɛnnin i atin kɛ ɔ wla lɛn m’ɔ ti kpa’n, m’ɔ ti ɲanɲanɲan’n, m’ɔ ti yɛiin’n. Afin lɛn m’ɔ ti kpa’n, ɔ ti sa kpa nga Ɲanmiɛn i sran’m be yo’n i nzɔliɛ.”+

9 Kpɛkun ɔ seli min kɛ: “Klɛ ndɛ nga: Be nga be yiali be Bua Ba’n i aja’n i nnɔsua nun aliɛ’n i dilɛ’n bo’n, be liɛ su ti ye.”+ Asa ekun’n, ɔ seli min kɛ: “Ndɛ nga’m be ti Ɲanmiɛn i ndɛ sakpa, be ti nanwlɛ.” 10 Kɛ ɔ yoli sɔ’n, n kotoli i ja’n wun lɛ naan ń sú i. Sanngɛ ɔ seli min kɛ: “Cɛcɛ! Nán yo sɔ!+ N ti wɔ nin ɔ niaan mɔ be kan Zezi i ndɛ’n,+ amun wiengu junman difuɛ. Su Ɲanmiɛn!+ Afin Zezi i ndɛ’n i kanlɛ ti yɛ sran’m be ijɔ Ɲanmiɛn nuan-ɔn.”+

11 N wunnin kɛ ɲanmiɛn su lɔ’n tikeli muaan. Kpɛkun n wunnin nnɛn kpanngɔ ufue kun.+ Sran ng’ɔ ti su’n, be flɛ i kɛ Sran mɔ be kwla lafi i su’n+ nin Sran m’ɔ di nanwlɛ’n.+ Jɔlɛ ng’ɔ di’n ti su, yɛ alɛ ng’ɔ kun’n ti su.+ 12 I ɲinma’m be jue kɛ sin sa,+ yɛ like m’ɔ ti kɛ famiɛn kle sa’n, i kpanngban wo i ti. Dunman kun klɛ i wun. Sran fi siman dunman sɔ’n, saan i bɔbɔ yɛ ɔ si i-ɔ. 13 Mmoja o* tralɛ ng’ɔ o i wun’n nun. Yɛ dunman nga be fa flɛ i’n, yɛle Ɲanmiɛn Ndɛ’n.+ 14 Asa ekun’n, ɲanmiɛn su lɔ alɛ kunfuɛ mɔ be o nnɛn kpanngɔ ufue’m be su’n, be su i su. Be wun tralɛ’n ti lɛn m’ɔ ti kpa, ɔ ti ufue, yɛ ɔ ti yɛiin. 15 Tokofi tɛnndɛn+ kpa kun m’ɔ la kpa’n wo i nuan nun. Ɔ́ fá kún nvlenvle’m be nunfuɛ mun. Kpɛkun ɔ́ fá blalɛ kpɔnman kánkán be.+ Asa ekun’n, ɔ́ tíatía viɲin mma’m be su Ɲanmiɛn m’ɔ Kwla Like Kwlaa Yo’n i duvɛn yiwlɛ’n nun. Duvɛn yiwlɛ sɔ’n yɛle Ɲanmiɛn i ya dan mɔ w’a fa’n.+ 16 Dunman kun klɛ i tralɛ’n su, kan i sɔwa’n wo lɛ’n. Dunman sɔ’n yɛle famiɛn’m be Famiɛn nin miɛn’m be Miɛn.+

17 N wunnin anzi kun, ɔ jin wia’n i nun. Ɔ kpannin kekle kpa seli anunman nga be tu sin ɲanmiɛn su lɔ’n be kwlaa be kɛ: “An bla wa, maan amun ti yia Ɲanmiɛn i nnɔsua nun aliɛ dan’n i dilɛ’n bo,+ 18 naan amun di famiɛn mun nin sonja su kpɛn mun, ɔ nin be nga be le wunmiɛn mun,+ nin nnɛn kpanngɔ mun, ɔ nin be nga be ti be su’n be nnɛn’n.+ I diewa-o, i kanga-o, i be nga be leman ɲrun-o, i be nga be le ɲrun-o, an di be kwlaa be nnɛn’n.”

19 Kpɛkun n wunnin nnɛn’n, nin asiɛ’n su famiɛn mun nin be alɛ kunfuɛ mun. Be ti w’a yia kɛ be nin sran ng’ɔ ti nnɛn kpanngɔ’n su’n nin i alɛ kunfuɛ’m bé kún alɛ.+ 20 Be trali nnɛn’n nin sran ng’ɔ tɔn i wun suɛn kɛ ɔ ti Ɲanmiɛn nuan ijɔfuɛ’n,+ m’ɔ yo abonuan sa mun nnɛn wlɛfuɛ’n i ɲrun lɛ’n. Ɔ yoli abonuan sa sɔ mun fa lakali be nga nnɛn wlɛfuɛ’n i nzɔliɛ o be wun’n,+ ɔ nin be nga be su i wunsu nga be yoli’n.+ Be toli be nɲɔn’n be yili i sin dan m’ɔ jue kpa mɔ sufru o nun’n i nun,+ kɛ ɔ́ yó sɔ’n nn be ɲin te o su. 21 Sanngɛ be onga’m be liɛ’n, tokofi tɛnndɛn ng’ɔ fin sran ng’ɔ ti nnɛn kpanngɔ’n su’n i nuan nun fite’n yɛ ɔ kunnin be-ɔ.+ Kpɛkun anunman’m be dili be nnɛn’n lele be ku yili.+

20 N wunnin anzi kun, ɔ fin ɲanmiɛn su lɔ su jra. Kunman dan mɔ be simɛn i bo’n i lakle’n+ nin jrɔkɔ dan kun be wo i sa nun. 2 Ɔ trali dragɔn+ mɔ yɛle wuo lalaa’n,+ mɔ yɛle Suɛn Tɔnfuɛ’n+ nin Satan’n.+ Ɔ cili i naan ɔ ka sɔ lele afuɛ akpi (1.000). 3 Kpɛkun ɔ to i yili kunman dan mɔ be simɛn i bo’n nun.+ Ɔ toli nun yɛ ɔ fali nzɔliɛ kun sieli su. Ɔ yoli sɔ naan w’a lakaman nvlenvle’m be nunfuɛ’m be kun lele naan afuɛ akpi’n (1.000) i nuan w’a yia. Kɛ blɛ sɔ’n ko sin’n, bé yáci i nun le nɲɔn kun.+

4 N wunnin famiɛn bia mun, yɛ be mannin be nga be titi bia sɔ’m be su’n be atin kɛ be di sran’m be jɔlɛ. Kpɛkun n wunnin be nga Zezi nin Ɲanmiɛn be ndɛ’n i kanlɛ ti’n be kunnin be’n* be mmoja’n, ɔ nin be nga b’a kotoman nnɛn’n annzɛ i wunsu nga be yoli’n i bo’n, mɔ i nzɔliɛ nunman be ngban’n su nin be sa’n su’n.+ Be mannin sran sɔ’m be nguan ekun yɛ be nin Klisi’n be dili famiɛn+ afuɛ akpi (1.000). 5 (Be nga be wuli’n be onga’m+ b’a ɲanman nguan lele naan afuɛ akpi’n (1.000) w’a wie.) Sran cɛnlɛ klikli’n yɛ ɔ o lɛ-ɔ.+ 6 Be nga be cɛn be sran cɛnlɛ klikli’n nun’n, be liɛ su ti ye, be ti Ɲanmiɛn liɛ klonglo.+ Wie’n i nɲɔn su’n+ su kwlaman be.+ Sanngɛ bé yó Ɲanmiɛn nin Klisi’n be ɲrun jranfuɛ,+ kpɛkun be nin i bé dí famiɛn afuɛ akpi (1.000).+

7 Kɛ afuɛ akpi’n (1.000) i nuan ko yia’n, bé yáci Satan nun, ɔ́ fín bisua fíte. 8 Ɔ́ kɔ́ asiɛ’n i bue nnan’m be su, ɔ́ kó láka nvlenvle’m be nunfuɛ mɔ be yɛle Gɔgu nin Magɔgu’n, naan ɔ́ yíayía be naan be kun alɛ. Sran sɔ’m be sɔnnin kpa kɛ jenvie nuan aunɲan’n sa. 9 Be truli asiɛ wunmuan’n su, yɛ be bo sin yiali Ɲanmiɛn i sran’m be nanmue’n ɔ nin klɔ nga Ɲanmiɛn klo i’n. Sanngɛ sin fin ɲanmiɛn su lɔ yrali be kɔlikɔli.+ 10 Be toli Suɛn Tɔnfuɛ m’ɔ lakali sran mun’n be yili i sin dan m’ɔ jue kpa’n mɔ sufru o nun’n, i nun. Lɔ yɛ nnɛn wlɛfuɛ’n+ nin sran ng’ɔ tɔn i wun suɛn kɛ ɔ ti Ɲanmiɛn nuan ijɔfuɛ’n be wo-ɔ.+ Yɛ bé klé be ɲrɛnnɛn* wia nun nin kɔnguɛ tititi.

11 I sin’n, n wunnin famiɛn bia dan kun, ɔ ti ufue. Yɛ n wunnin Sran ng’ɔ ti su’n.+ Asiɛ’n nin ɲanmiɛn ng’ɔ la nglo lɔ plaii’n, be wanndili i ɲrun lɛ.+ Kpɛkun b’a wunman be kun. 12 N wunnin be nga be wuli’n. Be nga be le ɲrun-o, be nga be leman ɲrun-o, n wunnin be. Be jinjin famiɛn bia’n i ɲrun lɛ, kpɛkun be tikeli fluwa wie’m be su. Be tikeli fluwa kun ekun su, nguan fluwa’n niɔn.+ Ndɛ ng’ɔ o fluwa sɔ’m be nun’n nin be nga be wuli’n be ayeliɛ’n, be su yɛ be niannin be dili be jɔlɛ-ɔ.+ 13 Be nga be wuli mɔ be o jenvie’n nun’n, jenvie’n yili be mannin. Be nga be wuli mɔ be o wie’n i sa nun’n, wie’n yili be mannin. Yɛ be nga be wuli mɔ be o Ndia’n* nun’n, ɔ yili be mannin. Kpɛkun like nga sran kun yoli’n, i su yɛ be niannin be dili i jɔlɛ-ɔ.+ 14 Be toli wie’n nin Ndia’n* be yili be sin dan’n nun.+ Sin dan’n yɛle wie’n i nɲɔn su’n.+ 15 Asa ekun’n, be nga be dunman nunman nguan fluwa’n nun’n,+ be to be yili i sin dan’n nun.+

21 I sin’n, n wunnin ɲanmiɛn su uflɛuflɛ kun, ɔ nin asiɛ uflɛuflɛ kun.+ Afin ɲanmiɛn su lɔ laa liɛ’n nin asiɛ laa liɛ’n be nunnunnin, yɛ jenvie’n+ nunman lɛ kun.+ 2 Asa ekun’n, n wunnin Ɲanmiɛn klɔ mɔ yɛle Zerizalɛmun uflɛ’n. Ɔ fin nglo lɔ, ɔ fin Ɲanmiɛn wun lɔ ɔ su jra.+ W’a siesie i wun kɛ atɔnvlɛ m’ɔ su minndɛ i wun’n sa.+ 3 Kɛ ɔ yoli sɔ’n, n tili sran kun nɛn kekle kpa famiɛn bia’n i wun lɔ. Ɔ seli kɛ: “Nian! Ɲanmiɛn i tannin sua’n wo klɔ sran’m be afiɛn. Ɔ nin be trán, bé yó i sran. Ɲanmiɛn bɔbɔ nin be trán.+ 4 Kpɛkun ɔ́ núnnún be ɲinmuɛn’n kwlaa,+ wie’n su tranman lɛ kun,+ be su yoman sɛ kun, be su sunman kun, be su wunman ɲrɛnnɛn kun.+ Laa ninnge’m be nunman lɛ kun.”

5 Yɛ Sran ng’ɔ ti famiɛn bia’n su’n+ seli kɛ: “Nian! N su yo like kwlaa uflɛ.”+ Ɔ seli ekun kɛ: “Klɛ ndɛ sɔ mun, afin be ti nanwlɛ, yɛ be kwla lafi su.” 6 Kpɛkun ɔ seli min kɛ: “Ndɛ sɔ’m b’a kpɛn su! N ti Alfa nin Omega,* n ti bo bolɛ nin awieliɛ.+ Sran kwlaa nga nzuewe kun i’n, ń fá nzue ti m’ɔ man nguan’n i nun nzue’n ń mɛ́n i, ɔ su yiman like fi.+ 7 Sran ng’ɔ kwla’n, ń fá ninnge sɔ mun ń mɛ́n i, yɛ ń yó i Ɲanmiɛn, kpɛkun ɔ́ yó min wa. 8 Sanngɛ srɛfuɛ mun nin be nga be lafiman Ɲanmiɛn su’n,+ ɔ nin be nga be ti fiɛn mɔ be yo sa kainkain mun’n, ɔ nin sran kunfuɛ mun,+ ɔ nin be nga be kunndɛ bla nin bian sukusuku mɔ be yo i wunsu ɲannzuɛn sa mun’n,*+ nin be nga be nin mmusu’m be wla asa’n, ɔ nin amuin sɔfuɛ mun nin be kwlaa nga be ti ato buafuɛ’n,+ be lika liɛ’n yɛle sin dan mɔ sufru o nun+ mɔ yɛle wie’n i nɲɔn su’n.”+

9 Anzi nso mɔ ɲrɛnnɛn kasiɛn nso’m+ be o be kpongbo ba nso’m be nun’n, be nun kun bali. Kpɛkun ɔ seli min kɛ: “Bla maan n fa atɔnvlɛ’n n kle wɔ, Bua Ba’n i yi’n niɔn.”+ 10 Yɛ Ɲanmiɛn wawɛ’n i fanngan nun’n, ɔ fa min ɔli oka dan fleiin kpa kun su. Kpɛkun ɔ fali Ɲanmiɛn klɔ mɔ yɛle Zerizalɛmun uflɛ’n kleli min. Ɔ fin nglo lɔ, ɔ fin Ɲanmiɛn wun lɔ ɔ su jra,+ 11 yɛ Ɲanmiɛn i aɲrunɲan’n kpɛjɛ i su.+ Ɔ kpaja kɛ yɔbuɛ kpakpa sa. Ɔ fa yɔbuɛ nga be flɛ i kɛ zaspu’n. Yɔbuɛ sɔ’n ti kɛ vitri sa. Kɛ be nian nun’n, be wun i bue kun lɔ.+ 12 Klɔ’n i wun talɛ’n ti dan, yɛ ɔ ti nglonglo kpa. I anuan’m be ti blu-nin-nɲɔn (12), yɛ anzi blu-nin-nɲɔn (12) be jinjin be ɲrun lɛ. Kpɛkun be klɛli Izraɛli i mma’m be akpasua blu-nin-nɲɔn (12) mun be dunman be su kunngunngun. 13 I bue ng’ɔ o wia afiliɛ lɔ’n, i anuan’n ti nsan. I bue ng’ɔ o nglo lɔ lika’n nun’n, i anuan’n ti nsan. I bue ng’ɔ o ngua lɔ lika’n nun’n, i anuan’n ti nsan. Kpɛkun i bue ng’ɔ o wia atɔliɛ lɔ’n, i anuan’n ti nsan.+ 14 Be fali yɔbuɛ blu-nin-nɲɔn (12) be wlali klɔ’n i wun talɛ’n i bo ase. Kpɛkun be klɛli Bua Ba’n i akoto blu-nin-nɲɔn (12) mun be dunman blu-nin-nɲɔn (12) mun+ yɔbuɛ sɔ’m be su kunngunngun.

15 Sika ɔkwlɛ ndɛma mɔ be fa sunnzun like’n, ɔ o sran ng’ɔ su kan ndɛ kle min’n i sa nun, naan ɔ́ fá súnnzun klɔ’n nin i anuan mun, ɔ nin i wun talɛ’n.+ 16 Klɔ’n i bue nnan’m be sɛ. I tɛnndɛn nun nin i tɛtrɛ nun’n, be sɛ. Ɔ fali ndɛma’n sunnzunnin klɔ’n, ɔ ti kilo kɔe akpi nɲɔn ya nɲɔn ablaɔn (2.220).* I tɛnndɛn nun’n nin i tɛtrɛ nun’n, ɔ nin i nglonglo’n be sɛ. 17 Ɔ sunnzunnin klɔ’n i wun talɛ’n wie. Ɔ ti kude ya kun ablanan-nin-nnan (144).* Ɔ sunnzunnin i kɛ klɔ sran mun nin anzi’m be fa sunnzun like’n sa. 18 Zaspu+ yɛ be fa kplannin klɔ’n i wun talɛ’n niɔn. Yɛ klɔ’n ti sika ɔkwlɛ ngunmin. Ɔ ti kɛ vitri m’ɔ ti yɛiin’n sa. 19 Be fali yɔbuɛ kpakpa fanunfanun be fa yoli yɔbuɛ nga be fa wlali klɔ’n i wun talɛ’n i bo ase’n, be klanman kpa. Be nun klikli’n yɛle zaspu, i nɲɔn su’n yɛle safiri. I nsan su’n yɛle kaliseduanin, yɛ i nnan su’n yɛle emerodu. 20 I nnun su’n yɛle saadonisi, i nsiɛn su’n yɛle saaduanin, i nso su’n yɛle klizoliti, i mɔcuɛ su’n yɛle berili, i ngwlan su’n yɛle topazi, i blu su’n yɛle klizoplazi, i blu-nin-kun (11) su’n yɛle yasɛnti, i blu-nin-nɲɔn (12) su’n yɛle ametisi. 21 Asa ekun’n, klɔ’n i anuan blu-nin-nɲɔn (12) mun be ti afle mma blu-nin-nɲɔn (12). Yɛle kɛ be fali afle mma kun be yoli anuan kun. Klɔ’n i akpɔ dan’n ti sika ɔkwlɛ ngunmin. Ɔ fa vitri mɔ kɛ be nian nun’n, be wun i bue kun lɔ’n.

22 M’an wunman Ɲanmiɛn sua klɔ’n su. Afin Ɲanmiɛn Zoova* m’ɔ Kwla Like Kwlaa Yo’n+ nin Bua Ba’n yɛ be ti Ɲanmiɛn sua klɔ sɔ’n su-ɔ. 23 Klɔ’n mianman wia’n nin anglo ba’n be kpajalɛ’n i wun. Afin Ɲanmiɛn i ɲrun ɲanɲan’n kpaja klɔ’n su.+ Yɛ klɔ’n i su kannin’n yɛle Bua Ba’n.+ 24 I kpajalɛ’n ti’n,+ nvlenvle’m be nunfuɛ’m bé wún ase bé nánti. Kpɛkun asiɛ’n su famiɛn’m bé fá be aɲrunɲan’n wlú klɔ’n nun. 25 Klɔ sɔ’n i anuan’m bé lá su wia nun tititi. Afin aliɛ su sanman klɔ sɔ’n su.+ 26 Yɛ bé fá nvlenvle’m be aɲrunɲan’n bé wlú klɔ’n nun, kpɛkun bé yí i ayɛ.+ 27 Like fiɛn fi su wluman klɔ sɔ’n nun mlɔnmlɔn. Yɛ sran kwlaa ng’ɔ yo tete sa’n, m’ɔ laka sran naan ɔ mlin’n, ɔ su wluman klɔ sɔ’n nun wie mlɔnmlɔn.+ Saan be nga be dunman klɛ Bua Ba’n i nguan fluwa’n nun’n, be yɛ bé wlú nun-ɔn.+

22 Ɔ kleli min nzue ba kun. Nzue ba sɔ’n i nun nzue’n man nguan.+ Ɔ ti klengle kɛ klistali sa. Ɔ fin Ɲanmiɛn nin Bua Ba’n+ be famiɛn bia’n nun 2 ɔ sonji gua klɔ’n i akpɔ dan’n su. Waka mɔ be man nguan’n, be o nzue ba sɔ’n i bue nɲɔn’n su. Be su mma kpɛ blu-nin-nɲɔn (12). Anglo kwlaa nun be su. Yɛ be nɲa’m be ti nvlenvle’m be nunfuɛ’m be juejue yolɛ liɛ.+

3 Ɲanmiɛn su boman klɔ’n i sannzan. Sanngɛ Ɲanmiɛn nin Bua Ba’n be famiɛn bia’n,+ ɔ́ trán klɔ’n nun. Yɛ i sufuɛ’m bé sú i. 4 Be ɲin tɛ́ i ɲrun.+ Bé klɛ́ i dunman’n be ngban’n su.+ 5 Asa ekun’n, lika’n su sanman kun.+ Yɛ be su mianman kannin annzɛ wia’n i kpajalɛ’n i wun.+ Afin Ɲanmiɛn Zoova* bɔbɔ ɔ́ kpája be su, yɛ bé dí famiɛn tititi.+

6 Ɔ seli min kɛ: “Ndɛ sɔ’m be ti nanwlɛ, yɛ be kwla lafi su.+ Ɲanmiɛn Zoova* m’ɔ fɛli i ndɛ’n wlɛli i nuan ijɔfuɛ’m be nuan’n,+ ɔ sunmɛnnin i anzi’n kɛ ɔ fa sa nga ɔ cɛ kan bé jú’n, ɔ kle i sran mun. 7 Nian! N su kan min wun n ba.+ Sran ng’ɔ fa Ɲanmiɛn i nuan ndɛ ng’ɔ o fluwa nga nun’n su’n, i liɛ su ti ye.”+

8 Min Zan, min yɛ n wunnin ninnge sɔ mun-ɔn, kpɛkun min yɛ n tili ndɛ sɔ mun-ɔn. Kɛ n wunnin ninnge sɔ mun mɔ n tili ndɛ sɔ mun’n, n kotoli anzi ng’ɔ kleli min ninnge sɔ mun’n i bo kɛ ń sú i. 9 Sanngɛ ɔ seli min kɛ: “Cɛcɛ! Nán yo sɔ! N ti wɔ nin ɔ niaan nga be ti Ɲanmiɛn nuan ijɔfuɛ’n, ɔ nin be nga be fa ndɛ ng’ɔ o fluwa nga nun’n su’n, amun wiengu junman difuɛ. Su Ɲanmiɛn.”+

10 Ɔ seli min ekun kɛ: “Nán fia Ɲanmiɛn nuan ndɛ ng’ɔ o fluwa nga nun’n su. Afin blɛ nga be sieli’n, w’a mantan koko kpa. 11 I sɔ’n ti’n, maan sa tɛ yofuɛ’n, ɔ yo sa tɛ’n wɔ i ɲrun. Yɛ maan sran ng’ɔ yo ninnge fiɛnfiɛn mun’n, ɔ yo i ninnge fiɛnfiɛn mun wɔ i ɲrun titi. Sanngɛ maan sran kpa’n, ɔ yo sa kpa’n wɔ i ɲrun. Yɛ maan Ɲanmiɛn i sran’n, ɔ yo ninnge nga be ti kpa Ɲanmiɛn ɲrun’n, ɔ wɔ i ɲrun.

12 “‘Nian! N su kan min wun n ba. Like nga ń fá túa sran’m be kalɛ’n, ɔ o min sa nun. Ɔ maan junman nga sran kun dili’n, i su yɛ ń nían ń túɛ i kalɛ-ɔ.+ 13 N ti Alfa nin Omega,*+ n ti klikli’n nin kasiɛn’n, n ti bo bolɛ nin awieliɛ. 14 Be nga be kpuli be tralɛ’n,+ mɔ bé mán be atin kɛ be wunnge nguan waka’m be wun lɔ’n,+ mɔ bé wá sín klɔ’n i anuan’m be nun bé wlú klɔ’n nun’n, be liɛ su+ ti ye. 15 Sanngɛ alua mun* nin baefuɛ mun nin be nga be kunndɛ bla nin bian sukusuku annzɛ be yo i wunsu ɲannzuɛn sa mun’n,* ɔ nin sran kunfuɛ mun nin amuin sɔfuɛ mun, ɔ nin be kwlaa nga be klo ato bualɛ mɔ be yo ninnge mun gblɛ nun’n, bé ká gua su lɔ.’+

16 “‘Min Zezi, n sunmannin min anzi’n kɛ ɔ ko bo ninnge sɔ’m be su kle amun, asɔnun’m be liɛ ti. N ti Davidi i osu’n nunfuɛ, yɛ n ti i anunman.+ Asa kusu’n, n ti nglɛmun nzraama m’ɔ kpaja’n.’”+

17 Ɲanmiɛn wawɛ’n nin atɔnvlɛ’n+ be se kɛ: “Bla!” Maan sran ng’ɔ ti’n, ɔ se kɛ: “Bla!” Yɛ maan sran nga nzuewe kun i’n, ɔ bla.+ Sran ng’ɔ klo kɛ ɔ́ fá nzue ng’ɔ man nguan’n, maan ɔ fa, ɔ su yiman like fi.+

18 “Sran kwlaa ng’ɔ ti sa nga bé wá jú’n be su ndɛ ng’ɔ o fluwa nga nun’n, ń kán klé i kɛ: Sɛ sran kun fa ndɛ uflɛ uka nga’m be su’n,+ Ɲanmiɛn fá ɲrɛnnɛn nga be kan be ndɛ fluwa nga nun’n yí i su.+ 19 Asa kusu’n, sɛ sran wie kpɛ fluwa yɛ m’ɔ kle sa nga bé wá jú’n i nun ndɛ wie yi’n, Ɲanmiɛn su kplinman su kɛ ɔ ɲan ninnge kpakpa nga be kannin be ndɛ fluwa nga nun’n wie. Yɛle kɛ Ɲanmiɛn su mɛnmɛn i atin kɛ ɔ di nguan waka’m be su mma’n wie.+ Kpɛkun ɔ su mɛnmɛn i atin kɛ ɔ wlu Ɲanmiɛn i klɔ’n nun wie.+

20 “Sran ng’ɔ kan ninnge sɔ’m be ndɛ’n se kɛ: ‘Ɛɛn-ɛn, n su kan min wun n ba.’”+

“Maan ɔ yo sɔ! E Min Zezi, bla.”

21 Maan e Min Zezi yo Ɲanmiɛn i sran’m be kwlaa be ye.