Kɛ ɔ fɛ i Zezi i awuliɛ cɛn’n lele i wie cɛn’n

Be sunmannin Anzi Gabliɛli talua klanman nga be flɛ i Mali’n i wun lɔ. Ɔ seli i kɛ ɔ́ wá wú ba kun, m’ɔ́ káci famiɛn tititi ɔ. Ba sɔ mɔ be flɛ i Zezi’n be wuli i nnɛn tuin nun. Lɛ yɛ nnɛn sunianfuɛ’m be bɛli i osu nianlɛ ɔ. I sin’n, nzraama kun kleli sran nga be fin wia afiliɛ lɔ’n be atin. É wá súan sran m’ɔ yili nzraama’n i nglo’n i su like, ɔ nin wafa nga b’a kwlá kunman Zezi’n i bakan nun’n.

I sin’n, é wá wún kɛ, kɛ Zezi ɲannin afuɛ 12, ɔ nin be nga be ti fluwa klefuɛ Ɲanmiɛn sua’n nun lɔ’n be kokoli yalɛ. Kpɛkun, kɛ afuɛ blu nin mɔcuɛ’n sinnin’n, be yoli i batɛmu’n, yɛ ɔ boli Sielɛ Blɛ jasin fɛ’n junman dilɛ’n i bo ɔ. Kɛ ɔ ko yo naan b’a ukɛ i junman sɔ nun ti’n, Zezi kpali akoto blu nin nɲɔn (12).

Zezi yili atrɛ kpanngban kpa wie mun. Ɔ fali jue nin kpaun kanngan wie mun fa tali sran ko ju akpiakpi mun. Ɔ jasoli tukpacifuɛ mun, ɔ cɛnnin wie’m be nguan bɔbɔ. I atabo su’n, like sunman nga be tɔli Zezi su i nguan cɛn’n i blɛ kasiɛn nun’n, ɔ nin wafa nga be fa kunnin i’n yɛ é wá súan ɔn. Zezi boli jasin fɛ’n afuɛ ko ju nsan nin sin. Fluwa’n i Akpasua NSIƐN’N i nun ndɛ kwlaa dili afuɛ ablasan nin nnan (34) tra su.