Like suanlɛ 11
Ɲanmiɛn sulɛ wafa nin nzuɛn nga Ɲanmiɛn kpɔ be’n
?Ɲanmiɛn sulɛ wafa nin nzuɛn mennin yɛ be ti tɛ ɔ? (1)
?Ɔ fata kɛ Klistfuɛ’m be bui kɛ Ɲanmiɛn Kpli ti Atre nsan? (2)
?Ngue like ti yɛ Klistfuɛ kpa’m be diman Nowɛli, Paki nin Zanvie nin awuliɛ cɛn’n niɔn? (3, 4)
?Be nga be wuli’n be kwla yo be nga be ɲin o su’n be abɔlɛ? (5)
?Waka nda su yɛ Zezi wuli ɔ? (6)
?Ɲanmiɛn Kpli i ɲrun dunman kunndɛlɛ’n ti cinnjin kpa? (7)
1. Nán Ɲanmiɛn sulɛ wafa nin nzuɛn kwlaa yɛ be ti tɛ ɔ. Sanngɛ be nun nga be finman Biblu’n nun annzɛ be ti Ɲanmiɛn sulɛ nga be diman nanwlɛ’n be ayeliɛ’n, Ɲanmiɛn Kpli i klun jɔman be su.—Matie 15:6.
2. Atre nsan: ?Zoova ti Atre nsan, yɛle kɛ Ɲanmiɛn Kpli kunngba’n ti sran nsan? Cɛcɛ! E si Zoova ‘i kunngba cɛ yɛ ɔ ti Ɲanmiɛn’n niɔn’ (Zan 17:3; Mark 12:29). Zezi ti i Wa kpɛn’n, ɔ fɛ i wun man Ɲanmiɛn kɛ ɔ sie i (1 Korɛntfuɛ Mun 11:3). Siɛ’n le ɲrun tra ba’n (Zan 14:28). Nán sran yɛle Ɲanmiɛn i wawɛ’n; ɔ ti i wunmiɛn’n m’ɔ fa yo like kwlaa ɔ.—Bo Bolɛ 1:2; Sa Nga Be Yoli’n 2:18.
3. Nowɛli nin Paki nin Zanvie dilɛ: Nán Desamblu i le 25 su yɛ be wuli Zezi ɔ. Kɛ bé wúnnge Ɔktɔblu i cɛn ba klikli i wun lɔ’n, yɛ be wuli i ɔ. I blɛ sɔ nun’n, kɔnguɛ’n, bua sunianfuɛ’m be kwla yaci be nnɛn’m be guasu (Lik 2:8-12). Zezi w’a seman Klistfuɛ’m be kɛ be di i awuliɛ cɛn’n le. Sanngɛ cɛn nga ɔ kan kle be kɛ be di’n, yɛle i wie cɛn’n (Lik 22:19, 20). Nowɛli dilɛ nin i sin ninnge nga be yo’n, be fin lalafuɛ nun Ɲanmiɛn sulɛ nga be ti tɛ’n be nzuɛn’n. I kunngba’n yɛle Paki dilɛ liɛ’n ɔ nin Zanvie dilɛ’n wie. Klistfuɛ klikli’m b’a diman Nowɛli nin Paki nin Zanvie, kpɔkun andɛ Klistfuɛ kpa’m be kusu be yomɛn i sɔ ninnge’n wie.
4. Awuliɛ Cɛn: Awuliɛ cɛn nɲɔn nga be kan be ndɛ Biblu’n nun’n, yɛle nga be mɔ be suman Zoova be dili’n (Bo Bolɛ 40:20-22; Mark 6:21, 22, 24-27). Klistfuɛ klikli’m b’a diman awuliɛ cɛn. Lalafuɛ nun Ɲanmiɛn sulɛ wafa tɛtɛ’m be nzuɛn yɛle awuliɛ cɛn dilɛ’n. Afuɛ nuan kun nun’n, Klistfuɛ kpa’m be minndɛman cɛn dilɛ blɛ nun naan b’a cɛ be wun like, annzɛ naan b’a di fɛ.
5. Be nga be wuli’n be srolɛ: Be nga be wuli’n be kwlá yoman like fi; be wunman sa wlɛ kun. E kwlá ukaman be, kpɔkun be kwlá yoman e abɔlɛ (Jue Mun 146:4; Akunndanfuɛ’n 9:5, 10). Klɔ sran’n wu; kɛ ɔ ko wu’n, like fi nunmɛn i sin kun (Ezekiɛl 18:4). Sanngɛ wie liɛ’n, mmusu’m be ba kɛ be nga be wuli’n be wunmiɛn mun sa. Be nga be wuli’n be srolɛ o, ɔ nin be wunmiɛn’m be sɔlɛ o, i kwlaa ngalɛ’n ti ayeliɛ tɛ kpa.—Ezai 8:19.
6. Waka nda: Nán waka nda su yɛ Zezi wuli ɔ. Waka flolo ngbɛn nga be kplɛn i sa’n, i su yɛ ɔ wuli ɔ. Biblu kaka nun’n, lika nga be klɛ “waka nda” lɛ’n, glɛki aniɛn nun’n, i bo’n yɛle waka flolo kunngba cɛ. Nzɔliɛ like kɛ waka nda falɛ sa’n, ɔ fin lalafuɛ nun Ɲanmiɛn sulɛ tɛtɛ’m be nzuɛn’n nun. Klistfuɛ klikli’m b’a faman waka nda, i kusu b’a sɔmɛn i. ?I sɔ ti’n niɔn, ɔ bu amun kɛ waka nda i Ɲanmiɛn fa sulɛ nun’n ti like kpa?—Mmla’n 7:26; 1 Korɛntfuɛ Mun 10:14.
7. Ɲanmiɛn sulɛ wafa nin nzuɛn ngalɛ’m be nun, wie’m be ase wlalɛ’n kwla yo kekle kpa amun sa nun. Amun osufuɛ nin amun janvuɛ’m be kwla mianmian amun kɛ nán amun wla ayeliɛ tɛtɛ sɔ’m be ase. Sanngɛ nanwlɛ, Ɲanmiɛn Kpli ɲrun dunman kunndɛlɛ ti cinnjin kpa tra klɔ sran’m be ɲrun dunman kunndɛlɛ.—Nyanndra Mun 29: 25; Matie 10:36, 37.
[Foto, bue 22]
Ɲanmiɛn Kpli timan Atre nsan.
[Foto, bue 23]
Nowɛli nin Paki be fin lalafuɛ nun Ɲanmiɛn sulɛ tɛtɛ’m
be nun.
[Foto, bue 23]
Be wunman like nga ti m’ɔ fata kɛ be sro be nga be wuli’n annzɛ be sɔ be wunmiɛn’n.