Ɲanmiɛn i janvuɛ’m be yo sa kpakpa mun

Sɛ amun le janvuɛ kun naan i wun yo amun fɛ’n, naan amun ɲin yi i’n, amún kúnndɛ kɛ bé fɛ́ i ajalɛ’n su. Biblu’n waan: “[Zoova] ti kpa, ɔ ti sɛsɛ.” (Jue Mun 25:8.) Sɛ e waan é yó Ɲanmiɛn i janvuɛ’n, ɔ fata kɛ e yo sran kpa. Biblu’n se kɛ: “Kɛ an ti Nyanmiɛn i anwlɛn su ba’n, an nian like nga ɔ yo’n su, an yo. Sa kwlaa nga amún yó’n, an yo i sran klolɛ ti.” (Efɛzfuɛ Mun 5:1, 2). Wafa nga be kwla yo i sɔ’n yɛ:

Maan amun yo sran ye. “E yo sran’m be kwlaa be ye.”—Galasifuɛ Mun 6:10.

Maan amun di junman kekle. “Sran ng’ɔ wua’n, maan ɔ yaci, ɔ di junman naan ɔ nyɛn i nuan nun aliɛ naan ɔ nyan wie ti sran wie’m be wun nyanman nun.”—Efɛzfuɛ Mun 4:28.

Maan e wunnɛn’n nin e akunndan’n nun yo yɛiin. “Maan e wla sa ng’ɔ saci sran’n i kwlaa nin akunndan tɛtɛ’n kwlaa be ase. Sɛ e waan e nyin yi Nyanmiɛn’n, maan e nian e wun kpa kɛ nán maan sa kaan sa tran e nin i ye afiɛn.”—2 Korɛntfuɛ Mun 7:1.

Maan amun nin amun awlofuɛ’m be tran klolɛ nin aɲinyiɛ nun. “Maan yasua kun klo i yi kɛ ɔ fa klo i bɔbɔ wun’n sa, yɛ maan mmla’m be kusu, be bu be wun’m be sran. Ba kanngan mun, maan amun nyin yi amun si nin amun nin.”—Efɛzfuɛ Mun 5:33–6:1

Maan amun klo amun wiengu mun. “Maan e klo e wun, afin sran klolɛ’n fin Nyanmiɛn.”—1 Zan 4:7.

Maan amun ɲin yi amun klɔ’n su lɔ mmla mun. “Maan sran kwlaa i nyin yi [famiɛn] mun. [...] Be kalɛ kwlaa ng’ɔ o amun su’n, an tua man be. Sran nga be su lapo mɛn i’n, an su mɛn i.”—Rɔmfuɛ Mun 13:1, 7.