?Amun mɛn dilɛ’n fa amun kɔ nin?
• Mɛn nun’n ninnge’m be kunndɛlɛ w’a kun sran’m be kpo. Ɔ maan lika nga be mɛn dilɛ’n fa be kɔ’n, be faman be ɲin sieman su.
• Biblu’n kan e ɲrun lɔ abonuan sa wie’m be ndɛ. Ɔ se ekun kɛ mɛn nun ninnge nga sran’m be siesieli be naan be mɛn dilɛ’n w’a yo ye’n, bé sánngansánngan. Sɛ e waan é ɲán Biblu’n nun ndɛ’n i su mmlusuɛ’n, naan sa yalɛ sɔ’n san e wun’n, ajalɛ nga e waan é fá’n maan e ka lɛ e fɛ i kpɛ kun.
• Sran wie’m be si ndɛ nga Biblu’n kan’n, be waan bé nánti su, sanngɛ ngokoɛ’n ti maan be to fuan atin’n.
• ?Amun bɔbɔ’n, amun mɛn dilɛ wafa’n yo amun fɛ? ?Sɛ like wie yɛ amun sunnzinnin kɛ amún yó’n, wafa nga ɔ́ ɲán ta amun mɛn dilɛ’n su’n, amun bu i angunndan?
[Kuku/Foto mun, bue 9]
?Ngue yɛ ɔ ti amun awlɛn su like’n niɔn?
Ajalɛ wie mun yɛ be lɔngɔ su yɛ.
Be nun sunman ti cinnjin sɔ. ?Sanngɛ ngue yɛ amun sa nun’n, ɔ́ yó klikli ɔ? ?Ngue yɛ ɔ́ yó i nɲɔn su lele i awieliɛ ɔ?
․․․ Be ɲin su yiyilɛ
․․․ Min junman’n
․․․ Min aunkpinndiɛ’n
․․․ Min aklunjuɛ dilɛ’n
․․․ Min yi’n annzɛ min wun’n
․․․ Min si nin min nin
․․․ Min mma mun
․․․ Sua klanman nin tralɛ kpakpa mun
․․․ Like kwlaa nun dunman kunndɛlɛ
․․․ Ɲanmiɛn sulɛ’n
[Kuku, bue 10, 11]
?Ajalɛ nga amun fa’n, be fa amun kɔ lika nga amun klo’n?
NDƐ NGA BE SU ANGUNNDAN BULƐ
BE ƝIN SU YIYILƐ: ?Min ɲin su yiyilɛ’n man min wunmiɛn? ?Ngowa kekleekle mɔ be kwla kpɛ min nguan’n i sin’n, yɛ n kan ɔn? ?Min “ngowa kanlɛ’n,” ɔ ti like m’ɔ man min aklunjuɛ kan, kpɔkun i sin’n ɔ man min awlaboɛ dan ɔn? ?Sɛ bɔbɔ min ɲin su yiyilɛ’n nin i fata’n, sanngɛ min wun mɔ n fa wla nun dan’n ti’n, min ɲin kpa ninnge cinnjin’m be yolɛ’n su?
MIN JUNMAN’N: ?Junman nga n di’n, ɔ man min nuan nun like annzɛ n kaci i kanga? ?Min junman’n ti’n, n timan juejue? ?Kɛ min junman’n su lɔ jralɛ dɔ’n ko ju’n, n ka junman’n su lɔ n di i ekun, annzɛ n fa blɛ sɔ’n e nin min awlobofuɛ mun e bo nzɛmunlɛ? ?Sɛ min min’n man min junman naan i dilɛ’n sanngan min angunndan’n, annzɛ ɔ fa min Ɲanmiɛn junman dilɛ’n i blɛ liɛ’n titi’n, kɛ ɔ ko yo naan min junman’n w’a saciman’n ti’n, n di junman sɔ’n?
MIN AUNKPINNDIƐ’N: ?Min ɲin kpa su annzɛ n nian min wun su? ?Min yalɛ kokolɛ kwlaa nun’n, min aunkpinndiɛ’n i ndɛ ngunmin yɛ n kan ɔn? ?Wafa nga n nian min wun su’n, ɔ kle kɛ min awlobofuɛ’m be ndɛ lo min wie?
MIN AKLUNJUƐ DILƐ’N: ?Min aklunjuɛ kunndɛlɛ’n yɛ ɔ dun mmua like kwlaa ɲrun ɔn? ?Min aklunjuɛ liɛ’n i kunndɛlɛ’n ɔ lo min tra min yi annzɛ min wun nin min mma’m be liɛ’n? ?Min Ɲanmiɛn sulɛ’n ɔ nin wafa nga n kunndɛ aklunjuɛ’n, be kɔ likawlɛ?
MIN YI’N ANNZƐ MIN WUN’N: ?Kɛ n klun jɔ’n yɛ n bu min wun annzɛ min yi i angunndan ɔn? ?N bu min yi annzɛ min wun i sran? ?Min Ɲanmiɛn sulafilɛ’n i ɲin fite wafa nga n bu min yi annzɛ min wun’n, i nun?
MIN SI NIN MIN NIN: ?Sɛ n te yo bakan’n min ɲin yi min si nin min nin? ?Yɛle kɛ, sɛ be usa min sa’n, n tɛ be su amanniɛn su, annzɛ junman nga be fa man min’n, n di i kpa? ?Kɛ n fite’n, dɔ nga be kle min’n su yɛ n ba ɔ? ?Kɛ be tannin min janvuɛ tɛtɛ’m be tralɛ’n, n tra be? ?Ninnge nga be tannin min yolɛ’n, n yo be? ?Sɛ n ti sran kaklaka kusu’n, n fa min su n sie i min si nin min nin be ndɛ’n i bo aɲinyiɛ su? ?Sɛ be sa mian’n, n uka be? ?E nin be e tranlɛ’n taka min klunklo like liɛ’n su, annzɛ ɔ taka Ɲanmiɛn Ndɛ’n su?
MIN MMA MUN: ?N wun i wlɛ kɛ min yɛ ɔ fata kɛ n kle min mma mun nzuɛn kpa, annzɛ suklu’n yɛ n minndɛ kɛ ɔ kle be ɔ? ?N fa blɛ naan e nin min mma mun y’a bo nzɛmunlɛ? ?Annzɛ n kunndɛ kɛ ngowa kanlɛ ninnge mun, ɔ nin televiziɔn, annzɛ ɔrdinatɛli’n yɛ be fa yiyi be ɲin su blɛ kwlaa nun ɔn? ?Cɛn kwlaa nga min mma’m be fɔn Ɲanmiɛn mmla yɛ n tu be fɔ annzɛ kɛ be kun min ya’n, yɛ n tu be fɔ ɔ?
SUA KLANMAN NIN TRALƐ KPAKPA MUN: ?Ngue ti yɛ n fa min ɲin n sie i min wun wlawlalɛ’n nin ninnge nga n le be’n, be su ɔ? ?Min waan ń fá min wun ń klé ti ɔ? ?Annzɛ min awlobofuɛ’m be kpa yolɛ liɛ ti ɔ? ?Ɲanmiɛn mɔ n su i’n ti ɔ?
LIKE KWLAA NUN DUNMAN KUNNDƐLƐ: ?Ninnge nga n yo be’n, n wun kɛ ɔ ti cinnjin kɛ n yo be kpa? ?N si akplowa naan like nga ń yó’n, n yo i kpa tra sran kwlaa? ?Sɛ sran wie si junman di tra min’n, ɔ yo min ya?
ƝANMIƐN SULƐ’N: ?Sɛ Ɲanmiɛn klun jɔ min wun’n, ɔ ti cinnjin kpa tra kɛ min yi annzɛ min wun, nin min mma mun, ɔ nin min si nin min nin, ɔ nin min junman lɔ min’n, be klun jɔ min wun? ?Aɲanbeun ninnge’m be ti’n, n fa Ɲanmiɛn junman’n n sie min sin?
AN BU BIBLU’N NUN AFƆTUƐ’M BE SU ANGUNNDAN KPA
?Ɲanmiɛn sulɛ’n ti min sɛ?
Akunndanfuɛ’n 12:13: ‘E sie e su e tie ndɛ’n kwlaa ng’ɔ o lɛ’m be atabo’n: maan ɔ ɲin yi Ɲanmiɛn, yɛ nanti i mmla’m be su. Like ng’ɔ fata kɛ klɔ sran kwlakwla yo’n yɛ ɔ o lɛ ɔ.’
AMUN USA AMUN WUN KƐ: ?Min ayeliɛ’n kle kɛ n fa ndɛ sɔ’n su? ?Ɲanmiɛn mmla’n su yɛ n nian n yo min ninnge mun awlo lɔ, annzɛ junman su lɔ, annzɛ suklu lɔ ɔ? ?E awlɛn su like uflɛ annzɛ sa m’ɔ o e su’n yɛ ɔ kle blɛ nga n fa yo Ɲanmiɛn ninnge mun ɔn?
?E nin Ɲanmiɛn e afiɛn’n ti sɛ?
Nyanndra Mun 3:5, 6: ‘Nán lafi ɔ bɔbɔ wɔ angunndan liɛ’n su. Anannganman i su yɛ lafi ɔ. Sɛ á fín ase o á jáo o, Anannganman i dunman yɛ bo ɔ. Sɛ a bo i dunman’n, ɔ́ bó ɔ ɲrun atin’n.’
Matie 4:10: ‘Koto ɔ Min Ɲanmiɛn’n i bo, yɛ su i kunngba cɛ.’
AMUN USA AMUN WUN KƐ: ?N wun Ɲanmiɛn kɛ nga be kɛn i ndɛ Biblu’n nun ndɛ mma ngalɛ’m be nun’n sa? ?Ninnge nga n yo be cɛn kwlaa ɔ nin ajalɛ nga kɛ lika’n yo kekle min su n fa be’n, be kle kɛ n lafi Ɲanmiɛn su naan n su i?
?Ɔ ti amun cinnjin kɛ amun kanngan Biblu’n nun naan amun suan nun ndɛ?
Zan 17:3: ‘Kɛ be se kɛ bé ɲán anannganman nguan’n, i bo’n yɛle kɛ bé sí wɔ mɔ ɔ kunngba cɛ yɛ a ti Ɲanmiɛn’n nin Zezi Klist mɔ a sunmɛnnin i’n.’
AMUN USA AMUN WUN KƐ: ?Min Ɲanmiɛn Ndɛ nun kannganlɛ nin i su angunndan bulɛ’n ɔ kle kɛ n lafi ndɛ sɔ’n su sakpa?
?Ɔ ti amun cinnjin kɛ amun wɔ asɔnun aɲia’m be bo?
Ebre Mun 10:24, 25: ‘Maan e bu e wiengu’m be angunndan e wla be fanngan naan be klo be wun yɛ be yo sran ye. Nán maan e yaci yialɛ’n. Siɛn’n mɔ an wun kɛ e Min’n i cɛn’n su mantan’n, an yo i sɔ tra su.’
Jue Mun 122:1: “Kɛ be wa se min kɛ: ‘E wɔ Anannganman i sua’n nun lɔ’n,’ n klun jɔ.”
AMUN USA AMUN WUN KƐ: ?Ajalɛ nga n fa’n, ɔ kle kɛ n si Ɲanmiɛn Ndɛ sɔ’n i su ye? ?Ninnge wie’m be ti’n, m’an ɔman aɲia’m be bo anglo ng’ɔ sinnin lɛ’n nun?
?Juejue su yɛ amun kan Ɲanmiɛn nin i klun sa’m be ndɛ kle amun wiengu mun ɔn?
Matie 24:14: ‘Bé wá kán Ɲanmiɛn sielɛ’n i jasin fɛ nga mɛn wunmuan’n nun naan be ti Ɲanmiɛn ndɛ’n. I sin yɛ mɛn i awieliɛ’n ɔ́ jú ɔ.’
Matie 28:19, 20: ‘I sɔ’n ti, an wɔ ko kle nvlenvle’n kwlaa be like maan be kaci n sɔnnzɔnfuɛ. Yɛ like kwlaa nga n kleli amun’n, amun kusu an kle be maan be fa su.’
Jue Mun 96:2: ‘Amun to jue be manman Anannganman, amun lɛ i ase. Ɔ ti defuɛ, amun kɛn i jasin fɛ’n cɛn kwlaa.’
AMUN USA AMUN WUN KƐ: ?Junman sɔ’n ti min cinnjin kɛ ɔ nin i fata’n sa? ?Wafa nga n bo jasin fɛ’n, ɔ kle kɛ n wun i wlɛ sakpa kɛ blɛ nga e o nun yɛ’n, ɔ ti i liɛ ngunmin?