LIKE SUANLƐ 16
?Junman benin yɛ asɔnunfuɛ’m be lika nianfuɛ’m be di ɔ?
Birmani
Be tinngɛ aɲia’n i bue wie mun
Yɛ jasin fɛ’n bolɛ aɲia’n
Be yo Ɲanmiɛn Sielɛ Sua’n i yɛinyɛin
Biblu’n kan Klistfuɛ yasua akpasua nɲɔn mɔ be di junman asɔnun’n nun’n, be ndɛ. Be yɛle ‘asɔnun i sunianfuɛ mun [yɛle kɛ asɔnun kpɛnngbɛn mun], nin asɔnunfuɛ’m be lika nianfuɛ mun.’ (Filipfuɛ Mun 1:1) Blɛ sunman’n, yasua sɔ’m be sɔnnin asɔnun’m be nun. ?Sanngɛ asɔnunfuɛ’m be lika nianfuɛ’m be junman liɛ nga be di’n, yɛle benin?
Be uka asɔnun kpɛnngbɛn mun. Asɔnunfuɛ’m be lika nianfuɛ’m be nun wie’m be ti kpɛnngbɛn, kpɛkun wie’m be ti gbanflɛn. Be kwlaa be ti sran kpa, yɛ be nin Ɲanmiɛn be afiɛn mantan kpa. Kpɛkun junman nga be fa man be kɛ be di’n, be nian nun di i kpa. Blɛ sunman’n, be junman’n yɛle ninnge’m be siesielɛ’n. Nanwlɛ, junman sɔ’n timan kaan. Be junman nga be di’n, ɔ yo maan asɔnun kpɛnngbɛn’m be ɲan blɛ be fa be ɲin sie i asɔnun’n nunfuɛ’m be like klelɛ’n nin be lika nianlɛ’n su.
Be yo ninnge cinnjin wie mun ekun. Asɔnunfuɛ’m be lika nianfuɛ’m be nun wie’m be sɔ sran nga be ba aɲia’m be bo’n be nun, yɛ be man be tranwlɛ. Be nun wie’m be kusu be cisan miziki bolɛ mannzin’n nun, kpɛkun be siesie miklo mun. Asa ekun’n, be fa fluwa mun be man sran mun aɲia’m be bo lɔ. Be junman’n i wie ekun yɛle kɛ be titi asɔnun’n i sika’n nun yɛbuɛ. Kpɛkun lika nga ɔ fata kɛ asɔnun’n nunfuɛ’m be ko bo jasin fɛ’n lɔ’n, be klekle be, yɛ Ɲanmiɛn Sielɛ Sua’n i yɛinyɛin yolɛ’n ti be junman wie. Asa kusu’n, asɔnun kpɛnngbɛn’m be kwla se be kɛ be ko nian sran kpɛnngbɛn’m be lika. Junman kwlaa nga be fa man asɔnunfuɛ’m be lika nianfuɛ mun’n, be sisiman be bo, be tu be klun be di i klanman cɛ. I kwlaa ngalɛ’n ti’n, asɔnun’n nunfuɛ’m be ɲin yi be.—1 Timote 3:13.
Be kle ajalɛ kpa. Yasua nga be kpa be kɛ be yo asɔnunfuɛ’m be lika nianfuɛ’n, be nzuɛn’n ti kpa. Kɛ bé tínngɛ aɲia’n i bue wie mun’n, be wla asɔnun’n nunfuɛ’m be fanngan. Asa ekun’n, be kle ajalɛ kpa yɛ be bo jasin fɛ’n i juejue su. Ɔ maan asɔnun’n nunfuɛ’m be kusu be nian su be yo kɛ be sa. Asa kusu’n, be nin asɔnun kpɛnngbɛn mun be bo ti kun. I ti’n, asɔnun’n nunfuɛ’m be di aklunjuɛ, kpɛkun be di anuannzɛ. (Efɛzfuɛ Mun 4:16) Cɛn wie lele’n, be kusu bé kwlá káci asɔnun kpɛnngbɛn wie.
?Asɔnun’n nun yasua benin mun yɛ be kaci asɔnunfuɛ’m be lika nianfuɛ ɔ?
?Junman benin yɛ asɔnunfuɛ’m be lika nianfuɛ’m be di fa uka asɔnun’n niɔn?