Anzi’m be seli kɛ b’a wu Zezi

Sezaa Ogisi m’ɔ ti Rɔmun siefuɛ’n seli kɛ maan Zifu’m be kwlakwla be wɔ be klɔ naan be ko klɛ be dunman. Ɔ maan Zozɛfu nin Mari be ɔli Bɛtleɛmun, afin lɔ yɛ Zozɛfu fin-ɔn. Blɛ sɔ’n nun’n, nn Mari i ba wulɛ su wa ju.

Kɛ be juli Bɛtleɛmun lɔ’n, b’a ɲanman lawlɛ lika fi nun. Nnɛn’m be lawlɛ kun nun yɛ be ko sikeli-ɔ. Lɔ yɛ Mari wuli Zezi-ɔ. Ɔ fali tannin kpa kun cicili i wun, kpɛkun ɔ lɛli i nnɛn’m be like diwlɛ kun nun.

Bɛtleɛmun i wun koko lɛ’n, bua tafuɛ wie’m be lali gua su kɔnguɛ naan bé nían be nnɛn’m be su. Bé nían-ɔn, anzi kun yɛ ɔ jin be ɲrun yɛ. Kpɛkun Zoova i ɲrun ɲanɲan’n kpajali be su. Srɛ kunnin be dan kpa. Sanngɛ anzi’n seli be kɛ: ‘Nán srɛ kun amun. Ndɛ fɛ o min nuan. Yɛle kɛ andɛ’n, b’a wu Mesi’n Bɛtleɛmun lɔ.’ Kɛ ɔ yoli sɔ’n, anzi kpanngban be fiteli ɲanmiɛn su lɔ. Be seli kɛ: ‘Maan manmanlɛ’n yo Ɲanmiɛn m’ɔ o ɲanmiɛn su lɔ’n i liɛ, yɛ maan fɔundi tran asiɛ’n su.’ I sin’n anzi’m be ɔli. ?Ngue yɛ bua tafuɛ’m be yoli-ɔ?

Bua tafuɛ’m be seli be wiengu kɛ: ‘Maan e wɔ Bɛtleɛmun icra’n.’ Be ɔli ndɛndɛ be ko toli Zozɛfu nin Mari nin ba nɔnman’n nnɛn’m be lawlɛ’n nun lɔ.

Be kwlaa nga be tili ndɛ nga anzi’n kan kleli bua tafuɛ mun’n be nuan boli be wun. Mari buli ndɛ nga anzi’n kannin’n i akunndan kpa, yɛ i wla w’a fiman su le. Bua tafuɛ’m be sali be sin be nnɛn’m be wun lɔ. Like nga be wunnin i’n, ɔ nin ndɛ nga be tili’n ti’n, be lali Ɲanmiɛn ase.