Zezi wuli Gɔlgota lɔ

Ɲanmiɛn ɲrun jranfuɛ’m be su kpɛn’m be fa Zezi ɔli Pilati i awlo lɔ. Pilati usali be kɛ: ‘?Sa tɛ benin yɛ bian nga yoli-ɔ?’ Be tɛli i su kɛ: ‘I waan ɔ ti famiɛn.’ Pilati usali Zezi kɛ: “?Wɔ yɛ a ti Zifu’m be Famiɛn’n niɔn?” Zezi tɛli i su kɛ: “Min Famiɛn Dilɛ’n finman klɔ sran mun.”

Pilati fɛ i ɔli Erɔdu m’ɔ ti Galile mɛn’n i siefuɛ’n i ja su naan ɔ usɛ i sa, sɛ ɔ kwla wun ndɛ wie i wun-o. Erɔdu wunnin kɛ Zezi w’a yoman sa tɛ fi. Ɔ maan ɔ fɛ i sɛli i sin Pilati ja su. Pilati seli Zifu’m kɛ: ‘E nin Erɔdu y’a wunman sa tɛ kaan sa i wun. Ń má yáci i nun.’ Sran’m be kpan seli kɛ: ‘Kun i! Kun i!’ Sonja’m be fali ngble be boli i, be tili be nuan nzue tɛli i wun, yɛ be boli i acɔliɛ. Be fali owieowie wɔli famiɛn kle, kpɛkun be fa wlɛli i ti. Be yoli i finfin, yɛ be seli i kɛ: ‘Zifu’m be Famiɛn, é yó ɔ like-o.’ Pilati seli ekun kɛ: ‘M’an wunman kɛ bian nga yoli sa tɛ.’ Sran’m be kpan seli kɛ: “Bobo i waka’n su!” Ɔ maan Pilati fali Zezi mannin be naan be ko bobo i waka’n su.

Be fa Zezi ɔli lika kun mɔ be flɛ i Gɔlgota’n. Be boboli i waka kun su, kpɛkun be mannin waka’n su. Zezi srɛli Ɲanmiɛn seli kɛ: ‘Min Si, yaci be wun sa’n cɛ be. Afin be siman like nga be su yo’n.’ Sran’m be srili Zezi, be seli i kɛ: ‘Sɛ a ti Ɲanmiɛn i Wa sakpa’n fin waka’n su jra. De ɔ bɔbɔ wun.’

Sa tɛ yofuɛ nga be boboli be waka su Zezi i wun lɛ’n, be nun kun seli i kɛ: “Sɛ a ju ɔ Famiɛn diwlɛ’n nun lɔ’n, maan ɔ wla kpɛn min su.” Yɛ Zezi seli i kɛ: “E nin wɔ é trán Mɛn klanman’n nun lɔ.” Cɛn sɔ’n nun’n, nnɔsua wia nun’n lika’n luli tuun nvle wunmuan’n nun lele dɔ nsan. Zezi i sɔnnzɔnfuɛ wie’m be jinjin waka nga be boboli i su’n i wun koko lɛ. Be nun kun yɛle Zezi i nin Mari. Zezi seli Zan kɛ ɔ nian Mari su kɛ i bɔbɔ i nin sa.

I agualiɛ su’n, Zezi seli kɛ: “I kwlaa i ti w’a yia!” Ɔ kɛnnin i ti ase, yɛ ɔ wuli-ɔ. Kɛ ɔ yoli sɔ’n, asiɛ’n kejeli dan kpa. Ɲanmiɛn i sua’n nun lɔ’n, tannin ng’ɔ o Sua Ba m’ɔ ti Ɲanmiɛn liɛ Klonglo’n, ɔ nin Sua Ba Ngunmin Kun m’ɔ ti Ɲanmiɛn liɛ Klonglo’n be afiɛn’n, i nun kpacili nɲɔn. Sonja’m be su kpɛn kun seli kɛ: ‘Nanwlɛ, bian sɔ’n ti Ɲanmiɛn i Wa sakpa.’