Fluwa’n nun kannganfuɛ’m be kosan mun

?Wafa sɛ yɛ ɔ fata kɛ Klistfuɛ’m be bu koniɛn dilɛ nin jue tralɛ’n niɔn?

Biblu’n w’a tanninman sran mun koniɛn dilɛ nin jue tralɛ’n. (Mmla’n 14:4, 5, 9, 20; Matie 17:27; Zan 21:6) Sanngɛ, ɔ fata kɛ Klistfuɛ ng’ɔ di koniɛn’n annzɛ ɔ tra jue’n, ɔ bu Biblu’n nun mmla wie’m be sin.

Ɲanmiɛn seli Nowe nin i mma’m be kɛ be kwla kun nnɛn mun naan be di be. Sanngɛ, ɔ fata kɛ be kpɛ be kɔmin naan b’a di. (Bo Bolɛ 9:3, 4) I sɔ mmla’n kle kɛ nnɛn’m be nguan’n ti like cinnjin, afin be nguan’n fin Ɲanmiɛn. Ɔ maan, ɔ fataman kɛ Klistfuɛ’m be kun nnɛn mun ngbɛn sa be fa yiyi be ɲin su. Annzɛ kusu, ɔ fataman kɛ be kle be ɲrɛnnɛn kɛ be nguan’n timan like sa.—Nyanndra Mun 12:10.

Ɔ le like kun ekun mɔ i ti yɛ ɔ fata kɛ e nian e wun ɔn. Akoto nga be ti jue trafuɛ’n be kunnin jue kpanngban. Sanngɛ Biblu’n w’a kleman kɛ be fɛli i sɔ’n dili be nuan. Annzɛ w’a seman kɛ be sili akplowa jue tralɛ nun, annzɛ kusu be kunndɛli kɛ bé klé kɛ be ti yasua sran ti yɛ be yoli sɔ ɔ. Annzɛ kusu, nán kɛ nnɛn’m be fuanlɛ nin kplilɛ mɔ be nin be kpli’n lele naan b’a kun be’n, i fɛ m’ɔ yo be’n i ti yɛ be di i sɔ junman’n niɔn.—Jue Mun 11:5; Galasifuɛ Mun 5:26.

I sɔ ti’n, ɔ fata kɛ e usa e wun kosan yɛ mun: ‘?Wafa nga Zoova bu nguan’n, i sɔ yɛ n yo naan sran uflɛ w’a nian su ɔ? ?Koniɛn dilɛ’n nin jue tralɛ’n yɛ ɔ o min akunndan nun, annzɛ yɛ ɔ ti min ndɛ mɔ n kan ɔn? ?Min ayeliɛ’n ti koniɛn difuɛ ayeliɛ, annzɛ ɔ kle kɛ n ti Ɲanmiɛn junman difuɛ? ?Koniɛn dilɛ’n, ɔ nin jue tralɛ’n yo maan e nin be nga be suman Ɲanmiɛn mun yɛ e san nun annzɛ ɔ yo maan min ɲin kpa min awlofuɛ’m be su?—Lik 6:45.

Sran nga koniɛn dilɛ’n nin jue tralɛ’n yɛ maan be di like’n, be nun wie’m be kwla bu i kɛ, kɛ i sɔ blɛ’n ko ju’n, sɛ be ɲin kpa Ɲanmiɛn junman’n i dilɛ su’n, be ndɛ yo fɛ. Kusu’n, sɛ e faman like fi e siemɛn i Ɲanmiɛn junman dilɛ’n i ɲrun’n, yɛ e kwla kle kɛ e lafi Ɲanmiɛn su naan e fa e wla guɛ i su ɔ. (Matie 6:33) Asa ekun’n, mmla nga ‘Sezali’ mɛn i koniɛn dilɛ nin jue tralɛ’n su’n, kannzɛ be mian be kɛ be fa su o, annzɛ be mianman be o, Klistfuɛ’m be nanti su.—Matie 22:21; Rɔmfuɛ Mun 13:1.

Kɛ ɔ ko yo naan y’a bu akunndan nga Zoova bu i koniɛn dilɛ’n nin jue tralɛ’n su wie’n, ɔ fata kɛ e nun wie’m be kaci be akunndan naan ɔ yo kɛ Ɲanmiɛn liɛ’n sa. (Efɛzfuɛ Mun 4:22-24) Sanngɛ, ɔ fataman kɛ e ɲin kpa ajalɛ nga sran wie’m be klun akunndan ti’n be fa’n su. Afɔtuɛ nga akoto Pɔlu mannin’n, ɔ nin i sɔ liɛ’n fata. I waan: ‘I sɔ’n ti’n, nán maan e kan e wiengu wun ndɛ kun, sanngɛ an bu akunndan, nán an yo sa ng’ɔ saci amun niaan m’ɔ maan ɔ́ yó sa tɛ’n.’ (Rɔmfuɛ Mun 14:13) Kɛ e klo e wiengu mun mɔ e ɲin yi be sɔ’n, ɔ maan anuansɛ tran asɔnun’n nun. Asa, i sɔ’n yo e Yifuɛ’n, mɔ nguan’n i bo’n fin yi’n i fɛ.—1 Korɛntfuɛ Mun 8:13.a

[Ja ngua lɛ ndɛ’n]