Kosan’m be su tɛlɛ

◼ ?É trán sɛ asɔnun aɲia’m be bo naan e kwlaa y’a kwla ti ndɛ’n i kpa? (Mml. 31:12)

Zoova i aɲinyiɛ ti, yɛ aɲia m’ɔ siesieli mɔ be ti e nanndoliɛ ti, é srɛ́ amun kwlaa kɛ an ju be bo lɔ ndɛ nun naan amun ɲin w’a kan ase diin b’a ti Zoova ndɛ’n. Sɛ amun ju lɔ naan an tran bia nga be o amun ɲrun lɔ su’n, ɔ ti kpa. I liɛ’n, be nga ba o be sa nun’n, ɔ nin be nga ɔ ju wie’n be ka siɛn’n, be kwla tran siɛn lɔ. Be nga be le selilɛli annzɛ i wunsu ninnge wie mun’n, maan be to be amunle naan aɲia’n w’a bo i bo naan w’a kleman aniaan’m be yalɛ. Wie liɛ’n, ninnge kɛ jaojaolɛ sa annzɛ sa uflɛ wie mun’n ti’n, aniaan’m be kwlá faman be ɲin sieman aɲia’n su kpa. Sanngɛ, sɛ ɔ tran e kwlaa e akunndan nun kɛ Ɲanmiɛn yɛ ɔ yiali e’n, kannzɛ i sɔ sa’n ko yo’n, ɔ su sɔnman yɛ ɔ su kleman aniaan’m be yalɛ dan.—Aku. 4:17; Fil. 2:4.

Sɛ sran wie’m be ba uflɛuflɛ naan e si be’n, e kwla ko tran be wun lɛ. Sɛ ba o be sa nun’n, i sɔ’n úka be kpa. Kɛ mɔ blɛ li yɛ be su sɔnnzɔn aɲia’m be bo balɛ’n mɔ kusu be si kɛ ɔ ju wie’n, ɔ fata kɛ be cia be wun kan be ko nian ba’m be lika’n, sɛ e nin be tran siɛn lɔ’n, ɔ́ yó be fɛ. Afin be si kɛ be su kleman sran’m be yalɛ dan. (Nya. 22:6, 15) Ɔ fataman kɛ be nga ba o be sa nun’n be tran aɲia yowlɛ sua ba kaan’n nun. Afin ba’m be tranman diin lɔ. Sɛ siɛ nin niɛn’m be waan bé nían be wa kun lika annzɛ bé tú i fɔ’n, maan be fɛ i fite naan i sin’n, b’a sa be sin aɲia sua’n nun.

Aniaan nga be sɔ sran’m be nun’n, be uka e naan y’a tran Ɲanmiɛn suwlɛ sua’n nun kɛ ng’ɔ nin i fata’n sa. Yɛle kɛ, be uka awloboawlobo’m nin be nga wie liɛ’n be ka siɛn’n naan b’a ɲan tranwlɛ kpa. Sɛ aɲia’n w’a dun mmua bo i bo naan be waan bé mán sran kun bia’n, be yomɛn i gblugblu su. Ɔ timɛn i ti’n, aniaan’m be ɲin kɔ́ lika uflɛ. Sɛ wienun ɔn sa wie yo naan aniaan’m be kwlá sieman be su ndɛ’n i bo kpa’n, be kunndɛ i trawlɛ ngwlɛlɛ su. Ɔ kwla yo bakan kun m’ɔ tranman diin ɔn. I lɛ nun’n, sɛ ɔ ti mɔ be ko uka siɛ nin niɛn’n, be uka be wɛtɛɛ su.

Kɛ nga e fa wun i lɛ’n, e kwlaa e kwla yo naan kɛ e yia aɲia sua’n nun’n, lika’n w’a tɔ bliin naan y’a ti Zoova ndɛ’n. Naan i klun sa mɔ yɛle kɛ fɔundi nin sa sɛsɛ yolɛ’n be tran mɛn klanman’n nun’n, y’a ti i su ndɛ wie.—Ebr. 10:24, 25.