?Ajalɛ benin yɛ e nzuɛn’n kle sran’m be kɛ be fa ɔ?
1 Zezi seli kɛ: “An fa amun ti wla n kɔmin su waka’n bo, yɛ an fa min nzuɛn’n su.” (Mat. 11:29) Ndɛ sɔ’n kle weiin kɛ nán Zezi i nuan nun ndɛ ngunmin yɛ ɔ fa kleli sran’m be atin ɔn. Sanngɛ i nzuɛn m’ɔ ti kpa’n ti’n, be wunnin atin ng’ɔ fata kɛ be fa’n. Zezi klo sran, ɔ ti sran wɛtɛɛfuɛ yɛ ɔ ti klun ufuefuɛ. (Mat. 8:1-3; Mar. 6:30-34) Ɔ kɛn i wun ase, sanngɛ ɔ yomɛn i sɔ gblɛ nun. (Zan 13:2-5) Kɛ i sɔnnzɔnfuɛ mun nin i be bo jasin fɛ’n, be wun kɛ kannzɛ ɔ bo i sɛ’n sanngɛ ɔ fɛman. Yɛ kɛ ɔ kan ndɛ nanwlɛ’n kle sran mun sa’n, be wun kɛ i ndɛ’n ti nanwlɛ. (Lik 8:1; 21:37, 38) Ɔ maan, an bu ajalɛ nga i nzuɛn’n kleli i sɔnnzɔnfuɛ mun kɛ be fa’n i akunndan be nian. ?Yɛ e li? ?Kɛ sran’m be nian sran wafa nga e ti’n jasin fɛ’n bolɛ nun’n, ngue yɛ i sɔ’n su be bo kɛ be yo ɔ?
2 Be nga e bo jasin fɛ’n kle be’n: E wun wlawlalɛ kpa’n, ɔ nin sran nga e to be awlo mɔ e kan Ɲanmiɛn ndɛ’n kle be’n be sran bulɛ’n, ɔ nin wafa nga e kle kɛ be ndɛ lo e’n, ɔ le ta dan. I kwlaa sɔ’n kwla yo maan sran’m be lo. (2 Kor. 6:3; Fil. 1:27) Kɛ e nin bé kókó yalɛ mɔ e fa Biblu’n nun ndɛ’n e suan e ndɛ’n i bo tikatika’n, be sie i nzɔliɛ. Wie’m be liɛ kusu’n, kɛ bé íjɔ mɔ e sie e su aɲinyiɛ su’n, ɔ yo be ɲɛnmɛn. I sɔ’n ti’n, maan e kle ajalɛ kpa ninnge sɔ’m be yolɛ nun. Afin i sɔ nun yɛ sran’m be kwla sɔ Ɲanmiɛn Sielɛ’n i jasin’n nun klanman ɔn. Nán maan e ɲin kpa i sɔ’n su mlɔnmlɔn.
3 E niaan mun: Nán e wla fi su kɛ sɛ e nzuɛn’n ti kpa’n, e niaan’m be kwla nian e liɛ’n su. Sɛ e wun kpɛ kpa jasin fɛ’n bolɛ nun’n, bé nían su. Kɛ bé wún wafa nga e siesie e wun mɔ e yiyi Ɲanmiɛn ndɛ’n nun klanman’n, ɔ́ káci be kɛ limun mɔ be fa si ose’n sa. Ɔ maan, be kusu be síesíe be wun naan b’a si jasin fɛ’n bo kpa w’a tra laa’n. (Nya. 27:17) Be nga Ɲanmiɛn ndɛ lo be’n kusu’n, be su ndɛ nga e klɛ i sɛsɛ e sie’n, kpɛkun i sin’n e ko nian be osu ndɛndɛ’n, kɛ aniaan’m be wun i sɔ’n, be kusu bé yó kɛ e sa wie. Nanwlɛ, junman nga Ɲanmiɛn fa wlali e sa nun’n, sɛ e guɛguɛ i bo’n, e niaan’m bé nían e ajalɛ kpa’n su.—2 Tim. 4:5.
4 Sɛ le mɔcuɛ nun o, annzɛ anglo kwlaa nun o, annzɛ blɛ uflɛ yɛ é fá o, i li maan e sie blɛ kun naan e usa e wun kɛ: ‘?Ndɛ ng’ɔ fin min nuan fite’n ɔ nin min aeliɛ’n, ɔ yo sran’m be kpa annzɛ ɔ fata kɛ n kaci?’ Sɛ e nzuɛn’n ti kpa’n, ɔ́ jɔ́ Zoova klun. Ɔ maan, ndɛ kunngba nga akoto Pɔlu kannin’n, e kan wie ɔ yo ye. Ɔ seli kɛ: “Kɛ n nian like nga Krist yo’n su n yo’n, amun kusu an nian nga n yo’n su, an yo.”—1 Kor. 11:1.
[Kosan mun]
1. ?Ajalɛ benin yɛ Zezi i nzuɛn’n kleli i sɔnnzɔnfuɛ mun kɛ be fa ɔ?
2. ?Ngue yɛ ɔ kle kɛ e aeliɛ’n nin e wun wlawlalɛ’n, be le ta be nga e bo jasin’n kle be’n be su ɔ?
3. ?Ngue yɛ e ajalɛ kpa’n kwla su e niaan’m be bo kɛ be yo ɔ?
4. ?Ngue ti yɛ ɔ fata kɛ e sie blɛ kun naan e fa bu e nzuɛn’n i su akunndan ɔn?