Ɔ fata kɛ Ɲanmiɛn srɛlɛ’n yo jasin bofuɛ’m be cinnjin
1. ?Ngue yɛ ɔ ti cinnjin kɛ e yo naan y’a kwla bo jasin fɛ’n niɔn?
1 E bɔbɔ e fanngan nun e bo jasin fɛ’n, ɔ yoman ye. Zoova man e wunmiɛn, i ti yɛ e kwla junman sɔ’n i di ɔ. (2 Kor.4:7) Ɔ sunmɛn i anzi mun kɛ be kle e sran nga be ti kɛ bua mun sa’n, be sin atin. (Ngl. 14:6, 7) Ndɛ nanwlɛ nga e kan kle sran mun’n, sɛ ɔ ti waka’n, e yɛ e ta yɛ e gua su nzue ɔ. Sanngɛ, Zoova yɛ maan ɔ yo kpa ɔ. (1 Kor. 3:6, 9) Ɔ maan nanwlɛ, ɔ ti cinnjin kpa man jasin bofuɛ mun kɛ, kɛ be nin e Si m’ɔ o nglo lɔ’n be kókó yalɛ’n, be kle kɛ i su yɛ be fa be wla’n kwlaa gua ɔ!
2. ?Sa benin wie’m be ti yɛ ɔ fata kɛ e srɛ Ɲanmiɛn ɔn?
2 E bɔbɔ e ti srɛlɛ: Blɛ kwlaa nga é bó jasin fɛ’n, ɔ fata kɛ e srɛ Ɲanmiɛn. (Efɛ. 6:18) ?Ninnge benin wie mun ti yɛ ɔ fata kɛ e srɛ ɔ? E kwla srɛ Zoova kɛ ɔ uka e naan e jasin bowlɛ nun jasin fɛ’n bolɛ’n yo e fɛ naan e bo i yakpa su. (Yol. 4:29) E kwla srɛ Zoova kɛ sran nanwlɛfuɛ mɔ be ko kplin su kɛ e kle be Biblu’n nun like’n, ɔ kle e be sin atin. Sɛ kusu, e to sran kun i awlo naan ɔ usa e kosan wie’n, e klun lɔ e kwla srɛ Zoova kpe kan kɛ ɔ uka e naan e tɛ su kɛ ng’ɔ nin i fata’n sa. (Nee. 2:4) Wie kusu ɔ, e kwla srɛ Ɲanmiɛn kɛ ɔ man e ngwlɛlɛ naan e fa jasin fɛ’n bolɛ junman’n e dun mmua like kwlaa ɲrun. (Zak 1:5) Like kun ekun mɔ e kwla fa wla e srɛlɛ nun’n, yɛle jasin fɛ bolɛ’n m’ɔ ti cenjele junman mɔ Zoova fa mannin e’n. Sɛ junman sɔ’n ti’n e srɛ i e lɛ i ase’n, ɔ́ yó i fɛ.—Kol. 3:15.
3. ?Wafa sɛ yɛ Ɲanmiɛn srɛlɛ nga e srɛ man sran uflɛ’n, ɔ suan jasin fɛ’n bolɛ junman’n i bo ɔ?
3 Sran uflɛ ti srɛlɛ: Ɔ fata kɛ e “srɛ Nyanmiɛn man [e wiengu]”. Ɔ ju wie bɔbɔ kɛ é srɛ́ é mán e niaan mun’n, ɔ ti mɔ e bobo be dunman. (Zak 5:16; Yol. 12:5) Sɛ tukpacɛ wie ti’n, e bɔbɔ e kwlá boman jasin fɛ’n kɛ nga e fa sunnzun sa’n, maan e srɛ man e niaan nga be ti juejue’n. Nán e bu i le kɛ Ɲanmiɛn srɛlɛ nga e srɛ man be’n, ɔ ti ngbɛn! Asa kusu’n, ɔ nin i fata kɛ e srɛ Ɲanmiɛn naan mɛn siefuɛ’m b’a tanninman e jasin fɛ’n i bolɛ. Naan kusu, e niaan’m be ‘di alaje, yɛ be nyan be ti fɔuun.’—1 Tim. 2:1, 2.
4. ?Ngue ti yɛ ɔ fata kɛ e srɛ Ɲanmiɛn titi naan nán e kpɔnzɔ ɔ?
4 Nanwlɛ, mɛn’n wunmuan nun jasin fɛ’n bolɛ’n, ɔ ti junman m’ɔ yo sro ɔ. Sanngɛ, sɛ e ‘nin Nyanmiɛn e koko yalɛ titi, nán e kpɔnzɔman’n,’ ɔ́ súan e bo naan e sa’n w’a kwla junman’n.—Rɔm. 12:12.