An uka amun mma mun naan b’a si jasin fɛ’n bo
1. ?Ngue yɛ ndɛ ng’ɔ o Jue Mun 148:12, 13 su siɛ nin niɛn’m be bo kɛ be yo ɔ?
1 Zoova yia ba kanngan yɛ gbanflɛn nin talua mun kɛ be bo be flɛ i. (Jue. 148:12, 13) Ɔ maan, nán nanwlɛ ndɛ ng’ɔ o Biblu’n nun’n ɔ nin e aeliɛ’n i su mmla nga Ɲanmiɛn man’n i ngunmin yɛ siɛ nin niɛn’m be kle be mma mun ɔn. Be uka be naan b’a kaci jasin fɛ’n bofuɛ wie. ?Wafa sɛ yɛ be kwla yo i sɔ blɛblɛblɛ ɔ?
2. ?Ngue yɛ siɛ annzɛ niɛn kun i ajalɛ kpa’n kwla kle i mma mun ɔn?
2 Maan amun kle be ajalɛ kpa: Zedeɔn m’ɔ yoli jɔlɛ difuɛ’n seli sran 300 nga be o i sa nun’n be kɛ: “Amun nian nga n yo’n su be yo.” (Jɔl. 7:17) Like nga ba’m be wun i kɛ siɛ nin niɛn’m be yo’n, i wie yɛ be yo ɔ. I wie yɛle siɛ nga liɛ’n. Kɔnguɛ yɛ ɔ di junman ɔn. Sanngɛ kɛ ɔ ba awlo Fue cɛn nglɛmun’n, kannzɛ bɔbɔ w’a fɛ’n naan ɔ kwla lafi lo wunmiɛn’n, sanngɛ ɔ nin i mma’m be kɔ jasin fɛ’n i bolɛ. Ɔ ukemɛn i nuan seman be kɛ jasin fɛ’n i bolɛ yɛ ɔ fata kɛ be fa dun mmua like kwlaa ɲrun ɔn. Sanngɛ i aeliɛ’n kle be sɔ. (Mat. 6:33) ?Amun mma’m be wun kɛ aklunjuɛ su yɛ amun yo ninnge wafawafa kɛ Ɲanmiɛn srɛlɛ’n nin Biblu’n nun kannganlɛ nin kosan’m be su tɛlɛ ɔ nin jasin fɛ’n bolɛ’n sa’n niɔn? Ɔ ju wie’n, amun su kwlá yoman ninnge sɔ’m be ngba. Sanngɛ sɛ amun mma’m be wun kɛ amun tu amun klun be su Zoova’n, i sɔ’n sú be bo naan b’a kle kɛ amun ɲin nga amun mian be kle be Zoova sulɛ’n, ɔ timan ngbɛn.—Mml. 6:6, 7; Rɔm. 2:21, 22.
3. ?Kɛ ba’m be ɲin bé kɔ́’n, Ɲanmiɛn junman benin yɛ ɔ fata kɛ siɛ nin niɛn’m be fa sie be ɲrun ɔn?
3 An fa ninnge wie’m be yolɛ sie be ɲrun: Kɛ ba’m be te yo kanngan’n, siɛ nin niɛn’m be kle be nantilɛ, be kle be ijɔlɛ kpa, be kle be be wun wlawlalɛ, ɔ nin ninnge wie mun ekun. Kɛ be ɲin bé kɔ́’n, nn bé fá ninnge uflɛ yolɛ’n síe be ɲrun. Siɛ nin niɛn nga be su Zoova’n, be uka be mma mun naan b’a fa Zoova i junman wie dilɛ b’a sie be ɲrun. Nán maan like nga be fa sie ba’m be ɲrun’n, ɔ tra be kpɛn. (1 Kor. 9:26) ?Ɔ maan, amun uka amun mma mun naan be tu be klun be yiyi kosan’m be su tɛlɛ’n be nun, naan b’a kannganman be nun tɛɛn b’a guɛmɛn i lɔ? ?Kusu’n, sɛ be man be ijɔlɛ Ɲanmiɛn junman dilɛ suklu nun’n, amun kle be wafa nga be bɔbɔ be kwla siesie be wun’n? (Jue. 35:18) ?Asa ekun’n, amun uka be naan b’a kwla bo jasin fɛ’n i wafawafa mun? ?Amun fa batɛmu yolɛ’n ɔ nin blɛ kwlaa nun Ɲanmiɛn junman dilɛ’n fa sie be ɲrun? ?Amun fa jasin bofuɛ wie mɔ be di aklunjuɛ mɔ be ti juejue kpa’n, be kle amun mma mun naan b’a wla be fanngan?—Nya. 13:20.
4. ?Kɛ siɛ nin niɛn’m be kle be mma mun jasin fɛ’n bolɛ be kaan nun’n, ngue ti yɛ i sɔ’n ti kpa ɔ?
4 Jue tofuɛ’n seli kɛ: “Ee Nyanmiɛn, kɛ ɔ fin min kaan nun’n yɛ a boli min ngwlɛlɛ klelɛ’n i bo-ɔ. N kusu m’an kan wɔ abonuan sa’m be ndɛ lele w’a fa ju ndɛ.” (Jue. 71:17) Kɛ ɔ yo naan amun mma’m b’a yo sran mɔ be si jasin’n i bo’n, amun bo be ukalɛ bo be kaan nun. Lele mɔ bé fá yó kpɛnngbɛn’n, bé ɲán su mmlusuɛ.—Nya. 22:6.