?An kwla bo jasin fɛ’n Mɔnnɛn cɛn?
1. ?Ngue yɛ like nga Pɔlu nin i wiengu’m be yoli’n, ɔ kle e ɔ?
1 Pɔlu nin i wiengu’m be su sinsin klɔ’m be su bé wlá aniaan’m be fanngan. Be wa juli klɔ nga be flɛ i Filipu’n i su lɔ. Cɛn nga be juli klɔ sɔ’n su’n, ɔ ti Wunmiɛn lolɛ cɛn. Ɔ maan Filipufuɛ’m be dan lika be o be awlo’m be nun sɛsɛsɛ. Sanngɛ, klɔ sɔ’n i sufuɛ wie fi w’a kanman be wun ndɛ tɛ, afin Wunmiɛn lolɛ cɛn sɔ’n nun’n, be su di Ɲanmiɛn i junman. Pɔlu nin i wiengu’m be si kɛ cɛn sɔ’n nun’n, Zuifu’m be yia klɔ’n i sin lɔ be srɛ Ɲanmiɛn. Ɔ maan, be fali i sɔ blɛ’n, be kannin Ɲanmiɛn ndɛ’n kleli be. Nanwlɛ, Pɔlu nin i wiengu’m be dili aklunjuɛ dan, afin bla kun mɔ be flɛ i Lidi’n, ɔ nin i awlobofuɛ’m be ngba be wa yoli be batɛmu. (Yol. 16:13-15) Kɛ mɔ Mɔnnɛn cɛn’n, sran’m be dan lika be o be awlo’m be nun’n ti’n, e kwla fa cɛn sɔ’n e kan Ɲanmiɛn ndɛ’n e kle be.
2. ?Kɛ ɔ ko yo naan y’a kwla bo jasin fɛ’n Mɔnnɛn cɛn’n, ngue yɛ Zoova i sufuɛ’m be yoli ɔ?
2 Mɔnnɛn cɛn jasin fɛ’n bolɛ’n i su ndɛ’n: Afuɛ 1927 nun’n, Anuannzɛ’n wlali aniaan’m be fanngan kɛ be fa Mɔnnɛn cɛn nglɛmun annzɛ nnɔsua be bo jasin fɛ’n. Sanngɛ, be tanndannin be ɲrun. Amlɛnkɛn’m be nvle’n nun lɔ’n, be wlali e niaan’m be dan lika be bisua. Afin, be waan aniaan’m be nantiman Wunmiɛn lolɛ cɛn mmla’n i su. Asa ekun, be seli kɛ aniaan’m be kle sran’m be yalɛ, naan cɛn sɔ’n nun’n, be di aata sanngɛ nn be lemɛn i wun fluwa. Sanngɛ, Zoova i sufuɛ’m b’a jranman jasin fɛ’n i bolɛ. Afuɛ 1930 nin 1940 be afiɛn lɔ’n, aniaan’m be fali ajalɛ kun. Be flɛ i kɛ “ campagnes des divisions. ” Yɛle kɛ be wa siesieli i kɛ aniaan’m be kwlaa be fite Mɔnnɛn cɛn, be ko bo jasin fɛ’n. Le kun liɛ’n, aniaan nga polisie’m be wla be bisua’n be sɔnlɛ mɔ be wa sɔnnin’n ti’n, sran’m be wa wunnin i wlɛ kɛ be jran be ɔ, ɔ yoman ye. Aniaan sɔ’m be miannin be ɲin kpa, kɛ ɔ ko yo naan y’a kwla bo jasin fɛ’n Mɔnnɛn cɛn’n ti. ?Amun si i sɔ mɔ be yoli’n i su ye?
3. ?Ngue ti yɛ Mɔnnɛn cɛn’n ti jasin fɛ’n bolɛ cɛn kpa ɔ?
3 Ɔ ti jasin fɛ’n bolɛ cɛn kpa: Mɔnnɛn cɛn’n, sran’m be dan lika be diman junman. Be wo be awlo’m be nun bé ló wunmiɛn. Cɛn sɔ’n nun’n, be nga be kɔ asɔnun’n be nun wie’m be klo Ɲanmiɛn ndɛ’n i su yalɛ kokolɛ. Sɛ e le e asɔnun aɲia’n Mɔnnɛn cɛn’n, e kwla wlawla e wun kɛ e su kɔ jasin fɛ’n bolɛ sa. I liɛ’n, ka naan e aɲia dɔ’n w’a ju’n, annzɛ kɛ e ko wie aɲia’n i yo’n, e kwla ko bo jasin fɛ’n. Sɛ e klo bɔbɔ’n, e kwla fa ndidiɛ like kan e tra nun.
4. ?Sɛ e bo jasin fɛ’n Mɔnnɛn cɛn’n, aklunjuɛ benin yɛ é dí ɔ?
4 Sɛ e fa Mɔnnɛn cɛn nglɛmun annzɛ nnɔsua e bo jasin fɛ’n, blɛ ng’ɔ ka lɛ’n, e kwla fa lo wunmiɛn. Asa kusu, kɛ é ló wunmiɛn’n, e klun jɔ́, afin e si kɛ e dili Ɲanmiɛn i junman’n. (Nya. 19:23) Kpɛkun, atrɛkpa’n, e kwla to sran kɛ Lidi sa! Ɔ maan, Ɲanmiɛn ndɛ’n mɔ sran sɔ’n sɔ́ nun klanman’n ti’n, é dí aklunjuɛ dan.