E periodiki’m be ti sran ngba liɛ
1. ?Wafa sɛ yɛ sran kpa nanwlɛfuɛ m’ɔ si ngwlɛlɛ’n ɔ yo kɛ akoto Pɔlu sa ɔ?
1 Wafa kunngba nga akoto Pɔlu yoli naan w’a bo jasin fɛ’n w’a kle ‘sran wafa’n kwlaa’n,’ yɛ sran kpa nanwlɛfuɛ m’ɔ si ngwlɛlɛ’n nian su fa yi periodiki mun man sran wafawafa kwlaa ɔ. (1 Kor. 9:22, 23) Ɔ maan kɛ é fá fluwa Sasafuɛ Tranwlɛ’n ɔ nin Réveillez-vous ! é dí junman’n, nán e wla fi be nga be dunman nun ti yɛ be yi fluwa sɔ mun’n.
2. ?Fluwa Réveillez-vous ! ti sran wafa benin be liɛ?
2 Réveillez-vous ! : Be nga be dunman nun ti yɛ be yili Réveillez-vous !, be ti kɛ “Atɛnifuɛ” nga Akoto Pɔlu boli jasin’n kleli be’n sa. (Yol. 17:22) Be timan Klistfuɛ, kpɛkun be siman Ɲanmiɛn Ndɛ’n i ninnge kpa. I kunngba’n sran nga be ti yɛ be klɛli fluwa Réveillez-vous !, be siman Ɲanmiɛn Ndɛ’n i ninnge kpa, annzɛ be siman nun ndɛ fi bɔbɔ. Atrɛkpa be siman like nga Klistfuɛ’m be kle’n, asɔnun ndɛ’n w’a flan be, annzɛ be siman kɛ sɛ be nanti Biblu’n nun mmla’m be su’n, ɔ kwla be wun sa ye. Sa nga ti yɛ be yili Réveillez-vous !, i klikli’n yɛle kɛ ɔ uka be nga be kanngan nun’n, naan be wun i wlɛ kɛ Ɲanmiɛn o lɛ, naan be lafi Biblu’n i nun ndɛ’n su, naan be si kpa kɛ Zoova i Lalofuɛ mun nin Ɲanmiɛn sulɛ wafa onga’m be timan kun.
3. ?Sasafuɛ Tranwlɛ’n fluwa’n ti sran wafa benin be liɛ? ?Yɛ wan’m be dunman nun ti yɛ be yili Sasafuɛ Tranwlɛ’n nga be suan nun like’n niɔn?
3 Sasafuɛ Tranwlɛ’n: Be nga be ti yɛ be yili fluwa sɔ’n, be ɲin yi Ɲanmiɛn ɔ nin Ɲanmiɛn ndɛ’n. Be si Biblu’n nun ndɛ wie mun, sanngɛ be wunman like ng’ɔ kle’n i wlɛ kpa. Be ti kɛ sran nga Pɔlu kannin be ndɛ m’ɔ se kɛ be “su Nyanmiɛn’n” sa. (Yol. 13:14-16) Sasafuɛ Tranwlɛ’n nga be suan nun like’n, Zoova i Lalofuɛ’m be ti yɛ be yili ɔ. Pɔlu si kɛ be nga be kɛnngɛn i fluwa’m be nun’n, be si Ɲanmiɛn ndɛ’n yɛ be si ndɛ ng’ɔ ti nanwlɛ’n kpa. (1 Kor. 1:1, 2) I kunngba’n, Sasafuɛ Tranwlɛ’n nga be suan nun like’n, i nun ndɛ’n ti be nga be kɔ e aɲia’m be bo’n, mɔ be si wafa nga Zoova i Lalofuɛ’m be fa ijɔ titi’n, be liɛ. Sanngɛ Sasafuɛ Tranwlɛ’n nga be yi i wawle aniɛn’n nun’n, e fa bo jasin fɛ’n. Afin nán ninnge nga e suan be’n, be ngunmin yɛ be o nun ɔn. Ndɛ ng’ɔ ti jasin bowlɛ’n nun lɔfuɛ’m be liɛ’n, ɔ o nun wie.
4. ?Ngue ti yɛ ɔ fata kɛ periodiki nga e fa bo jasin fɛ’n, e si be kwlaa be nun ndɛ’n niɔn?
4 Kannzɛ bɔbɔ e fa fluwa nɲɔn sɔ mun e fa e man sran mun’n, sanngɛ be nun kunngba cɛ yɛ e nin be e koko su yalɛ ɔ. I sɔ’n ti’n, maan e ta nda kɛ é sí fluwa sɔ’m be kwlaa be nun ndɛ’n. I liɛ’n sran kwlaa nga e to i’n, é sí ng’ɔ fata kɛ e nin i e koko su yalɛ’n naan i nun ndɛ’n w’a yo i fɛ’n.