?Sasafuɛ Tranwlɛ’n sɔ’n kwla uka amun wie?

B’a yi Sasafuɛ Tranwlɛ’n nga e suan nun like’n i wafa uflɛ Angle nun. Angle ng’ɔ o Sasafuɛ Tranwlɛ’n sɔ nun’n, i wlɛ wunlɛ timan kekle. Fluwa sɔ’n, ɔ́ úka sran sunman. I klikli su’n, ɔ́ úka jasin bofuɛ nga be dili suklu, sanngɛ b’a ɔman mmua’n. Afin Angle nga ɔ o fluwa sɔ’n nun’n i wlɛ wunlɛ’n timan kekle. I nɲɔn su’n, ɔ́ úka jasin bofuɛ nga Angle’n timan be klɔ aniɛn’n. I nsan su’n, ɔ́ úka suklu mma kanngan mun nin be nga be kɔ kolɛzi’n. Kpɛkun kasiɛn su’n, ɔ́ úka be nga be suan Biblu’n nun like’n. Afin, ɔ fata kɛ be ka lɛ be wun Ɲanmiɛn ndɛ nga be suan’n i wlɛ’n.

Sasafuɛ Tranwlɛ’n nga ɔ fite titi’n i nun ndɛ kpɔlɛ mun, ɔ nin i nun kosan mun, ɔ nin ndɛ’m be flɛlɛ’n i kunngba’n yɛ ɔ o i uflɛ nun ɔn. Sanngɛ kasiɛnfuɛ nga be yili’n, i nun ndɛ’n ti pɔpɔ. Aniaan ng’ɔ tinngɛ Sasafuɛ Tranwlɛ’n i nun like suanlɛ’n ɔ nin aniaan ng’ɔ kanngan nun’n, ɔ fata kɛ nga m’ɔ fite titi’n yɛ be fa ɔ. Kannzɛ bɔbɔ fluwa kunfuɛ’n yɛ ɔ o nzrafuɛ’m be sa nun’n, sanngɛ bé wún i kɛ Biblu’n nun ndɛ mma mun ɔ nin foto mun ɔ nin ndɛ kpɔlɛ mun be kunngba mun yɛ be o nga ɔ fite titi’n i nun ɔn. Ɔ maan kɛ aniaan’n kánngan nun’n, be kwla nian be fluwa liɛ’n nun. Yɛ be kwla man be sa’n su be tɛ kosan’m be su. Sɛ kusu i uflɛfuɛ’n yɛ nzrafuɛ’m be dan lika be le i’n, maan Sasafuɛ Tranwlɛ’n i tinngɛfuɛ’n ɔ nin aniaan ng’ɔ kanngan nun’n be fɛ i lifuɛ’n.

Sran ng’ɔ wun i kɛ Sasafuɛ Tranwlɛ’n sɔ’n kwla ukɛ i’n, ɔ fata kɛ ɔ ko wun aniaan nga ɔ nian periodiki’m be su’n i wun naan ɔ wla wie bo.