Ajalɛ nnun mɔ maan e kwla bo sran i Biblu’n nun like klelɛ bo’n
1. ?Sɛ amun lika liɛ nun lɔ’n, Biblu’n nun like suanfuɛ ɲanlɛ’n ti kekle man amun’n, ngue yɛ ɔ fata kɛ amun yo ɔ?
1 ?Ɔ ti kekle man amun kɛ amun ɲan sran be kle i Biblu’n nun like? Sɛ ɔ ti sɔ’n niɔn, amun mian amun ɲin. Be nga be yo Zoova i klun sa mɔ be sa sin bubuman be’n, ɔ yra be su. (Gal. 6:9) Maan e kan ajalɛ nnun mɔ be kwla uka amun i sɔ yolɛ nun’n be ndɛ.
2. ?Wafa sɛ yɛ e kwla kan Biblu’n nun like suanlɛ’n i ndɛ trele e kle sran mun ɔn?
2 An kan Biblu’n nun like suanlɛ’n i ndɛ trele: Sran kpanngban be si kɛ e fa e fluwa Sasafuɛ Tranwlɛ’n nin Réveillez-vous ! e man sran mun. Sanngɛ atrɛkpa’n, be siman kɛ e nin sran mun e suan Biblu’n nun like. I sɔ’n ti’n, sɛ e kan Biblu’n nun like suanlɛ’n i ndɛ trele e kle be’n, ɔ ti kpa. Asa ekun’n, e kwla se be nga e nian be osu titi’n be kɛ e kunndɛ kɛ e nin be é súan Biblu’n nun like likawlɛ. Sɛ b’a kplinman su’n, nán maan e se kɛ e faman e fluwa mun e manman be kun annzɛ e su nianman be osu kun. Aniaan bian kun kleli ajalɛ kpa. Ɔ nian bian kun nin i yi be osu titi. Cɛn kun’n, kɛ ɔ fali periodiki mun mannin be’n m’ɔ́ sɛ́ i sin’n, akunndan kun bɛli i ti’n nun. Ɔ usali bian’n nin i yi’n be kɛ: “?Amun kunndɛman kɛ e nin amun e suan Biblu’n nun like?” Ɔ́ nían ɔn, b’a kplin su. Kɛ é sé yɛ’n, b’a yo be batɛmu bɔbɔ.
3. ?Ɔ nin i fata kɛ e se e wun kɛ be kwlaa nga be ba aɲia’m be bo’n, be dun mmua suan Biblu’n nun like laa? ?Ngue ti ɔ?
3 Be nga be ba aɲia’m be bo’n: Nán maan e se e wun kɛ be kwlaa nga be ba aɲia’m be bo’n, be nin Zoova i Lalofuɛ kun be suan Biblu’n nun like. Aniaan bian kun seli kɛ: “Sran nga e nin be suannin Biblu’n nun like’n, be dan lika be fin be nga be ba aɲia’m be bo titi’n.” Aniaan bla kun liɛ’n, ɔ fali ajalɛ kɛ ɔ́ fɛ́ i wun mántan bla kun mɔ b’a yo i wa bla nɲɔn be batɛmu’n. Bla sɔ’n sa ɲan kpa ti’n, kɛ aɲia’n bo i bo’n yɛ ɔ ba ɔ, kpɛkun kɛ ɔ ko wie cɛ, nn ɔ su kɔ. Ɔ yoli sɔ lele afuɛ 15. Kɛ aniaan bla’n wunnin i wun’n, ɔ kplinnin su suannin Biblu’n nun like. I agualiɛ su’n, ɔ wa kacili Zoova i Lalofuɛ. Aniaan bla’n waan: “Nanwlɛ sɛ ɔ ti kɛ n sili sɔ bɔbɔ nn m’an minndɛman afuɛ lele 15 naan m’an kan like suanlɛ ndɛ m’an kle i.”
4. ?Wafa sɛ yɛ sran uflɛ kwla uka e naan y’a ɲan sran y’a kle i Biblu’n nun like ɔ?
4 Maan e sin sran ja su: Aniaan bla kun liɛ’n, kɛ aniaan bla uflɛ’m bé kɔ́ Biblu’n nun like klelɛ’n, ɔ nin be yɛ be kɔ ɔ. Sɛ like klefuɛ’n mɛn i wun atin’n ɔ usa like suanfuɛ’n, sɛ ɔ si sran uflɛ mɔ Biblu’n nun like suanlɛ’n kwla yo i fɛ wie o. Sɛ e kɔ sran kun i osu nianlɛ naan e fa e fluwa Biblu’n kle e mɛn i’n, e kwla usɛ i kɛ: “?A si sran uflɛ mɔ sɛ be fa fluwa nga be mɛn i’n, ɔ́ yó i fɛ ɔ?” Ɔ ju wie’n, sa wie ti’n, jasin bofuɛ wie mun annzɛ atin bofuɛ wie’m be nin sran wie’m be kwlá suanman Biblu’n nun like. I sɔ’n ti’n, maan e bo su e kle e niaan’m be kɛ e su kunndɛ sran e kle i Biblu’n nun like.
5. ?Ngue ti yɛ ɔ ti kpa kɛ e kan Biblu’n nun like suanlɛ’n i ndɛ e kle e niaan Klistfuɛ’m be wun mun annzɛ be yi mun ɔn?
5 Be nga be yi’n annzɛ be wun’n timan e niaan Klistfuɛ’n: ?Jasin bofuɛ nga be yi’n annzɛ be wun’n ɔ suman Ɲanmiɛn’n, be nun wie’m be o amun asɔnun’n nun? Sran wie’m be kplinman su kɛ be nin be yi’n annzɛ be wun’n m’ɔ su Ɲanmiɛn’n bé súan Biblu’n nun like. Sanngɛ sɛ sran uflɛ yɛ ɔ kunndɛ kɛ ɔ nin bé súan Biblu’n nun like’n, i liɛ’n be kplin su. Blɛ sunman’n, ɔ ti kpa kɛ e usa e niaan Klistfuɛ’n i ngwlɛlɛ afɛ naan y’a wun wafa nga e nin i wun’n annzɛ i yi’n y’a kwla koko yalɛ naan w’a yia’n.
6. ?Ngue ti yɛ sɛ é kúnndɛ klé sran kun i Biblu’n nun like’n, Ɲanmiɛn srɛlɛ’n ti cinnjin ɔn?
6 Maan e srɛ Ɲanmiɛn: Ɲanmiɛn i srɛlɛ’n kwla uka e kpa liɛ su. Nán maan e bu i like kaan. (Zak 5:16) Ɲanmiɛn se e kɛ like kwlaa nga e srɛ i’n m’ɔ ti i klun su’n, ɔ́ fá mán e. (1 Zan 5:14) Aniaan bian kun mɔ junman o i su kpa’n, ɔ srɛli Ɲanmiɛn kɛ ɔ ukɛ i naan ɔ ɲan Biblu’n nun like suanfuɛ. I yi’n lafiman su kpa kɛ ɔ kwla yo sɔ sakpa, afin ɔ bu i kɛ i wun’n su ɲanman blɛ naan w’a uka Biblu’n nun like suanfuɛ’n i kpa. Ɔ maan kɛ ɔ́ srɛ́ Zoova ɔ́ mɛ́n i wun’n naan ɔ ɲan Biblu’n nun like suanfuɛ’n, ɔ boli ndɛ sɔ’n su wie. Ɲanmiɛn tɛli srɛlɛ sɔ’n su. Afin kɛ le mɔcuɛ nɲɔn sinnin’n, aniaan bla kun m’ɔ ti atin bofuɛ’n, ɔ ɲannin Biblu’n nun like suanfuɛ kun. Ɔ fɛli i wlali aniaan bian’n i sa nun. Ndɛ nga aniaan bian’n i yi’n kannin’n yɛ: “Maan be kwlaa nga be bu i kɛ be nin sran be kwlá suanman Biblu’n nun like le’n, be si kɛ be kwla ɲan ndɛ sɔ’n i trawlɛ. Maan be bo su trele be kle Ɲanmiɛn kɛ ɔ uka be, yɛ maan be jran su be srɛ i titi. Nanwlɛ m’an lafiman su kɛ é dí aklunjuɛ kɛ ngalɛ’n sa.” Sɛ amun sa sin w’a bubuman amun’n, amun kusu amun kwla ɲan sran be kle i Biblu’n nun like wie. Kɛ ɔ yo sɔ’n, amún úka be naan b’a sin “atin nga be sin nun-ɔn be nyan nguan’n” i nun, yɛ amún dí aklunjuɛ.—Mat. 7:13, 14.