Maan e di Ɲanmiɛn i junman’n i kpa tra laa’n
1. ?Klistfuɛ klikli’m be blɛ su sa benin mun yɛ be kle kɛ ɔ fata kɛ e si Ɲanmiɛn i junman’n i di kpa tra laa ɔ?
1 Ɔ fata kɛ Klistfuɛ’m be di Ɲanmiɛn i junman’n i kpa titi. I sɔ’n ti’n, Zezi kleli i sɔnnzɔnfuɛ’m be like naan b’a si jasin fɛ’n i bo kpa. (Lik 9:1-5; 10:1-11) I sɔ’n kusu ti yɛ Akilasi nin Prisiyi be fali Apolɔsu be ɔli be awlo lɔ be ko “kleli i Nyanmiɛn ndɛ’n weinwein kpa” ɔ. (Yol. 18:24-26) Pɔlu kusu wlali Timote mɔ i sa w’a tɔ jasin bolɛ n nun kpa’n i fanngan. Ɔ seli i kɛ ɔ fa Ɲanmiɛn ndɛ’n i kanlɛ nzra nun’n fa yo i junman naan “sran’n kwlaa be wun kɛ” ɔ su yo kpa tra laa’n. (1 Tim. 4:13-15) Ɔ maan, kannzɛ bɔbɔ e boli e Min’n i junman’n i dilɛ bo w’a cɛ’n, sanngɛ ɔ fata kɛ e mian e ɲin naan e si junman sɔ’n i di kpa ekun.
2. ?Ngue yɛ é yó naan y’a nian e niaan’m be ajalɛ’n su ɔ?
2 Maan e nian e niaan’m be ajalɛ’n su: Sɛ e kunndɛ kɛ é sí jasin fɛ’n i bo kpa tra laa’n, ɔ fata kɛ e nian e niaan’m be ajalɛ’n su. (Nya. 27:17) I sɔ’n ti’n, kɛ e wiengu kun bó jasin’n maan e fa e ɲin e sie su kpa. Kpɛkun, maan e usa be nga be si jasin fɛ’n i bo kpa’n, be ngwlɛlɛ afɛ. Ndɛ nga bé kán klé e’n, maan e sie e su kpa e tie. (Nya. 1:5) Ninnge wie’m be yolɛ’n kwla yo kekle man e. I wie yɛle sran’m be osu nianlɛ’n, annzɛ Biblu’n nun like klelɛ’n, annzɛ kusu jasin fɛ’n i bolɛ wafa uflɛ. Sɛ ɔ ti sɔ’n, maan e se e jasin bolɛ akpasua’n i sunianfuɛ’n, annzɛ aniaan kun mɔ i sa w’a tɔ jasin bolɛ nun kpa’n kɛ ɔ uka e. Kusu’n, nán maan e wla fi su kɛ Zoova i wawɛ’n kwla uka e. I sɔ’n ti’n, maan e srɛ Ɲanmiɛn titi naan ɔ fɛ i wawɛ’n man e.—Lik 11:13.
3. ?Sɛ y’a seman sran kun kɛ ɔ man e afɔtuɛ naan ɔ man e’n, ngue yɛ ɔ fata kɛ e yo ɔ?
3 Ɔ ju wie’n, aniaan wie man e afɔtuɛ. Kannzɛ bɔbɔ y’a usɛmɛn i ngwlɛlɛ afɛ’n, nán maan e fa ya. (Aku. 7:9) Kɛ Apolɔsu sa’n, maan e kan e wun ase naan e kplin su kɛ be uka e. Yɛ maan e si ye. Sɛ e yo sɔ’n, é klé kɛ e ti ngwlɛlɛfuɛ.—Nya. 12:15.
4. ?Ndɛ cinnjin benin yɛ Zezi kannin mɔ i ti yɛ ɔ fata kɛ e bo jasin fɛ’n i kpa tra laa’n?
4 Kɛ e si Ɲanmiɛn i junman’n di kpa tra laa’n, i sɔ’n mɛnmɛn i: Zezi fali sunnzun ase kun wlɛli i sɔnnzɔnfuɛ’m be fanngan kɛ be bo jasin fɛ’n i kpa tra laa’n. Ɔ fɛli i wun sunnzunnin viɲi waka, yɛ fɛli i sɔnnzɔnfuɛ mun sunnzunnin viɲi waka sɔ’n i sa mma mun. Ɔ seli kɛ i Si kpɛkpɛ i sa mma kwlaa ng’ɔ su’n su, ‘naan ɔ yo kpa yɛ ɔ su tra laa liɛ’n.’ (Zan 15:2) Viɲi fie difuɛ kwlaa kunndɛ kɛ i viɲi waka’m be su mma kpanngban. I kunngba’n, Zoova kunndɛ kɛ “asenna like” mɔ e mɛn i’n, sɛ é kwlá sé’n, ɔ́ yó kpa titi. (Ebr. 13:15) ?Kɛ e si jasin fɛ’n i bo kpa tra laa’n, wafa sɛ yɛ i bo’n gua ɔ? Zezi seli kɛ: “Sɛ an yo kɛ waka sama b’ɔ su kpanngban sa’n, [...] i sɔ’n nun yɛ n Si’n nyán kɔmin-ɔn.”—Zan 15:8.