An nian Ɲanmiɛn nuan ijɔfuɛ’m be liɛ’n su: Abakiki
1. ?Ngue ti yɛ e wun kwla yo e kɛ Ɲanmiɛn nuan ijɔfuɛ Abakiki liɛ’n sa ɔ?
1 Kɛ mɔ andɛ’n sa tɛtɛ’m be su sɔn mɛn nun dan ti’n, e wun kwla yo e kɛ Abakiki liɛ’n sa. I blɛ liɛ su’n, sa tɛtɛ’m be ti’n, ɔ usali Zoova kɛ: “?Nguɛ ti yɛ a yo maan n wun sa tɛ nga mun-ɔn? ?Nguɛ ti yɛ i sɔ sa nyrɛnnɛn-nyrɛnnɛn liɛ mun a tran lɛ nian be sɔ-ɔ?” (Aba. 1:3; 2 Tim. 3:1, 13) Abakiki i ndɛ ng’ɔ kannin’n, ɔ nin Ɲanmiɛn su m’ɔ lafili’n, sɛ e bu be su akunndan’n, i sɔ’n úka e naan y’a kwla minndɛ Zoova i jɔlɛ dilɛ cɛn’n.—2 Piɛ. 3:7.
2. ?Ngue yɛ e kwla yo e kle kɛ e lafi Zoova su andɛ ɔ?
2 Maan e lafi Zoova su naan e ɲan nguan: Abakiki w’a yaciman awlabɔɛ’n i lɛ kɛ ɔ tin i su. I ɲin trannin Ɲanmiɛn su, yɛ ɔ suli Ɲanmiɛn juejue su titi. (Aba. 2:1) Zoova kan kleli i nuan ijɔfuɛ’n i weiin kɛ, sɛ i blɛ’n ju’n, i nuan ndɛ’n, ɔ́ kpɛ́n su. Yɛ ‘sran ng’ɔ lafi i su m’ɔ maan ɔ kaci sran kpa’n, ɔ́ ɲán nguan.’ (Aba. 2:2-4) ?Ngue yɛ ndɛ sɔ’n kle Klistfuɛ nga be o mɛn’n i awieliɛ blɛ nun’n niɔn? I sɔ’n kle be kɛ nán cɛn nga mɛn’n wie’n i silɛ’n yɛ ɔ ti cinnjin ɔn. Sanngɛ ng’ɔ ti cinnjin kpa’n yɛle kɛ be lafi su kpa kɛ mɛn’n, ɔ́ wíe sakpa. Ɲanmiɛn su lafilɛ’n yo maan e ɲin tran Ɲanmiɛn i sulɛ’n su, kpɛkun e fa Ɲanmiɛn i junman’n i dilɛ’n e sie i like kwlaa ɲrun.—Ebr. 10:38, 39.
3. ?Ngue ti yɛ ɔ fata kɛ e su Zoova aklunjuɛ su titi ɔ?
3 Zoova dunman nun maan e di aklunjuɛ: Kɛ Gɔgu m’ɔ fin Magɔgu’n wá fá alɛ wlá Zoova i sran’m be sin’n, sɛ e lafi Ɲanmiɛn su kpa’n, annzɛ e lafimɛn i su kpa’n, i ɲin fíte. (Eze. 38:2, 10-12) Kɛ alɛ tɔ’n, lika yo kekle. Be nga be kwla alɛ’n nun bɔbɔ’n, lika yo kekle be su wie. Wie liɛ’n, sran’m be ɲanman aliɛ, sran’m be ninnge’m be fi be sa. Asa ekun’n, be ɲanman be ti be yoman ninnge mun kɛ laa’n sa. ?Kɛ lika’n wá jrán e su’n, ngue yɛ é yó ɔ? Abakiki si kɛ lika’n wá jrɛ́n i su. Sanngɛ ɔ fuali kpa kɛ ɔ́ sú Zoova aklunjuɛ su titi. (Aba. 3:16-19) E kusu’n, “aklunjuɛ ng’ɔ fin Anannganman’n,” ɔ́ úka e wie naan y’a kwla jran e ɲrun lɔ sa’m be ɲrun kekle.—Nee. 8:10; Ebr. 12:2.
4. ?Aklunjuɛ benin yɛ e di i andɛ mɔ e ɲrun lɔ’n, é dí i ekun ɔn?
4 Jɔlɛ dilɛ cɛn nun’n, Zoova maan sran wie’m bé fíte nun. Be wá fa Ɲanmiɛn i mmla’n m’ɔ man nguan’n, bé klé be. (Aba. 2:14) Be nga bé wá ɲán nguan ekun’n, bé wá súan Zoova i su like wie. Dɔ nga su bɔbɔ’n, maan blɛ kwlaa nun’n, e kan Zoova, ɔ nin i abonuan sa ng’ɔ yo be’n be ndɛ e kle sran mun.—Jue. 34:2 ; 71:17.