LIKE NGA KLISFUƐ’M BE YO’N

Ninnge uflɛ wie mɔ é súan be su like e lemɔcuɛ afiɛn aɲia’n i bo’n

Biblu Les Saintes Écritures. Traduction du monde nouveau, édition d’étude (nwtsty) ng’ɔ o ɛntɛnɛti su’n nin a fiteman aniɛn wie’m be nun. Sanngɛ kɛ ɔ fɛ i afuɛ 2018 Zanvie anglo’n nun’n, é súan i nun ndɛ nga be yiyili nun’n, ɔ nin foto nga be o nun’n, be nun wie’m be su like e lemɔcuɛ afiɛn nun aɲia’n i bo. Nanwlɛ, kɛ é síesíe e wun kwlaa naan y’a ɔ aɲia’n i bo’n, ndɛ sɔ’m bé úka e kpa. Ng’ɔ ti cinnjin’n yɛle kɛ i sɔ’n yó maan e nin e Si Zoova m’ɔ klo e’n, e afiɛn mántan kpa ekun.

BIBLU’N NUN NDƐ NGA BE YIYILI NUN’N

Bé úka e naan e wun ndɛ mma wie’m be wlɛ kpa ekun. Naan kusu y’a si lika nga sa kun juli’n, nin laa sran’m be nzuɛn’n, nin be aniɛn’n i kpa.

Matie 12:20

Kannin ɲanman: Laa blɛ nun’n, kannin sɛ’m be ti kannganngan sa. Ufa yɛ be fa wu be-ɔ, kpɛkun be gua nun olivie ngo. Be fa kannin ɲanman’n be wla nun naan w’a kwla kpaja. Glɛki nun’n, kɛ be se kɛ ‘kannin ɲanman fite wɛnsrɛn’n’ atrɛkpa’n i bo yɛle kɛ kannin’n su wa nuan, annzɛ w’a nuan mlɔnmlɔn. Ezai 42:3 boli i jɔ kɛ Zezi wá sí sran’m be aunnvuɛ. Yɛle kɛ, be nga be wla w’a bo be wun mɔ be ti kɛ kannin m’ɔ fite wɛnsrɛn sa’n, ɔ su tinman be su.

Matie 26:13

Nanwlɛ: Glɛki’m be fali ndɛ mma “nanwlɛ’n” Ebre aniɛn’n nun. Ebre nun’n, be se kɛ ʼa·menʹ , yɛ Glɛki’m be se kɛ a·menʹ. I bo yɛle kɛ, “maan ɔ yo sɔ” annzɛ “ɔ́ yó sɔ sakpa.” Kpɛ sunman’n, kwlaa naan Zezi w’a kan ndɛ kun’n, annzɛ w’a se kɛ sa kun wá jú’n, ɔ dun mmua se kɛ “nanwlɛ.” Ɔ kan sɔ naan ɔ́ tín su kpa kɛ ndɛ ng’ɔ kan’n ti su, naan be kwla lafi su. Ɲanmiɛn ndɛ’n nun ngunmin yɛ be kan ndɛ sɔ’n niɔn. Kɛ Zezi kan ndɛ sɔ’n flan nun’n (a·menʹ a·menʹ), be kaci i wawle nun kɛ “maan n di i nanwlɛ kpa n kle amun.” I sɔ wie yɛ be kacili Zan fluwa’n nun-ɔn.—Zn 1:51.

FOTO NIN VIDEO MUN

Foto, nin desɛn, nin video wie mɔ be timan like tɛlɛ nun’n, be yiyi Biblu’n nun ndɛ wie’m be nun.

Bɛtfaze, Olivie oka’n, ɔ nin Zerizalɛmun

Video ng’ɔ o lɛ’n, ɔ kle atin ng’ɔ fɛ i Zerizalɛmun i wia afiliɛ lika’n nun lɔ’n, m’ɔ sin andɛ klɔ nga be flɛ i kɛ Et-Tour lele fa ju Olivie oka’n su lɔ. Atrɛkpa’n Et-Tour klɔ’n yɛ laa’n, be flɛ i kɛ Bɛtfaze’n niɔn. Klɔ nga be flɛ i kɛ Betanin’n ɔ o Bɛtfaze’n i wia afiliɛ lika liɛ’n nun lɔ. Ɔ o Olivie oka’n i bue ng’ɔ o wia afiliɛ lɔ’n su. Titi’n, kɛ Zezi nin i sɔnnzɔnfuɛ’m be o Zerizalɛmun’n, Betanin lɔ yɛ be la-ɔ. Be flɛ i andɛ kɛ ’el-ʽAzariyé (El ʽEïzariya). Arabu aniɛn’n nun-ɔn. I bo yɛle “Lazaa i lika.” Zezi sikeli Marti, nin Mali, nin Lazar be awlo lɔ Betanin lɔ. (Mt 21:17; Mr 11:11; Lk 21:37; Zn 11:1) Kɛ Zezi tú ajalɛ kɔ́ Zerizalɛmun’n, kɔlɛ’n atin nga be kle i video nga nun’n yɛ ɔ fali-ɔ. Afuɛ 33 Nisan i le 9 su’n, kɛ Zezi fuli aflunmun ba kun su m’ɔ sinnin Olivie oka’n su lɛ ɔ ɔli Zerizalɛmun’n, kɔlɛ’n Bɛtfalze lɔ yɛ ɔ fuli aflunmun’n su-ɔ.

Atin ng’ɔ fɛ i Betanin kɔ Bɛtfaze’n
Bɛtfaze
Olivie oka’n
Kidrɔn Kongo’n
Oka nga Nyanmiɛn i sua’n wo su’n

Kpɛngbɛ m’ɔ o sran kun i jasin owie’n nun’n

Foto nga ti sran kun mɔ be boboli i jasin owie nun kpɛngbɛ’n i foto. Kpɛngbɛ sɔ’n i tɛnndɛn nun’n ti santimɛtri 11, 5. Afuɛ 1968 nun, kɛ be nianniannin asiɛ’n bo Zerizalɛmun i wia afiliɛ lɔ’n yɛ be wunnin i-ɔ. Be wunnin kɛ Rɔmufuɛ’m be blɛ su yɛ be boboli sran sɔ’n i kpɛngbɛ-ɔ. I sɔ’n kle kɛ i sɔ blɛ nun’n, be bobo sran mun waka su naan be wu. Atrɛkpa’n kpɛngbɛ kun kɛ nga sa yɛ Rɔmu sonja’m be fa boboli Zezi Klist waka’n su-ɔ. Be wunnin owie sɔ’n lika kun mɔ be sie sran owie’m be lɔ’n nun. Kɛ sran nga be wuli’n be wunnɛn’n ko saci mɔ be owie’n ko wu kee’n yɛ be fa be sie be lika sɔ’n nun lɔ-ɔ. I lɛ’n kle kɛ, kɛ be bobo sran kun waka su’n, i sin’n, be kwla sie i.—Mt 27:35.