Kwlaa naan b’a yi e ti kpɔlɛ tɛ’n be yacili be sa tɛ mun cɛli be

Zezi i mmoja m’ɔ fa kpɔli e ti’n, i ngunmin ti yɛ be kwla yaci e sa tɛ mun cɛ e-ɔ. (Efɛ. 1:7) Sanngɛ Biblu’n se kɛ, ‘kɛ mɔ Ɲanmiɛn blu sa su’n ti’n, ɔ yacili sa tɛ nga sran’m be yoli be laa’n cɛli be’ kwlaa naan Zezi w’a fɛ i wun w’a yi e ti kpɔlɛ tɛ’n. (Rɔm. 3:25) ?I sɔ mɔ Zoova yoli’n ɔ kle kɛ ɔ yoman sa nuan su sɛsɛ?

Zoova seli kɛ “bla’n i osu’n nunfuɛ’n” wá dé be kwlaa nga be lafi i bɔbɔ nin nda ng’ɔ tali be’n be su’n. Kɛ ɔ fɛ i lɛ’n, Zoova ɲrun’n, ɔ ti kɛ w’a yi e ti kpɔlɛ tɛ’n w’a wie sa. (Bob. 3:15; 22:18) Ɲanmiɛn si kɛ blɛ ng’ɔ ti su’n i nun’n, i Wa kunngba cɛ’n ɔ́ fɛ́ i wun yí sran’m be ti tɛ i klun klo su. (Gal. 4:4; Ebr. 10:​7-10) I nun mɔ Zezi o asiɛ’n su’n, kwlaa naan w’a fɛ i wun w’a yi e ti tɛ bɔbɔ’n, Zoova mɛnnin i atin kɛ ɔ yaci klɔ sran’m be sa tɛ mun cɛ be. Zezi si kɛ tɛ ng’ɔ́ wá fɛ́ i wun yí’n, ɔ́ káta be nga be lafi i su’n be sa tɛ’m be su. Ɔ maan ɔ kwla yaci be sa tɛ mun cɛ be.—Mat. 9:​2-6.