Kwlaa naan w’a suan like’n, buabua ɔ wun

Kɛ é súan Biblu’n nun like’n, e kunndɛ kɛ akunndan nga Zoova bu’n ɔ wluwlu e wun lele ɔ ju e awlɛn’n nun lɔ. I lɛ nun’n, Ɛsdrasi kle e ajalɛ kpa. Yɛle kɛ ɔ “buɛbuɛli i wun naan w’a suan Zoova i mmla’n.” (Ɛsd. 7:10) ?Wafa sɛ yɛ a kwla buabua ɔ wun sɔ wie-ɔ?

Srɛ Ɲanmiɛn. Kwlaa naan w’a suan like’n, srɛ Ɲanmiɛn. Srɛ Zoova kɛ ɔ uka ɔ naan a wun like nga á wá súan’n i wlɛ naan a nian su nanti.—Jue. 119:​18, 34.

Kan ɔ wun ase. Be nga be tu be wun mɔ be lafi be ngwlɛlɛ’n su’n, Ɲanmiɛn fa ndɛ nanwlɛ’n fia be wun. (Lik. 10:21) Asa’n nán se kɛ á súan like naan á klé ɔ wiengu’m be kɛ a si like kpanngban. Sɛ a wun kɛ akunndan wie mɔ a bu’n ɔ timan Ɲanmiɛn liɛ’n su’n, kan ɔ wun ase naan kaci ɔ akunndan’n.

Bo Ɲanmiɛn sulɛ jue mun. Jue nga e tie be’n, be kwla ɲan ta e su. I sɔ’n ti’n, kwlaa naan w’a bo like suanlɛ bo’n, sɛ a tie e miziki’m be nun kun’n, i sɔ’n kwla uka ɔ naan w’a fa ɔ ɲin w’a sie i Zoova su. Ɔ maan like nga á wá súan’n, ɔ́ wlúwlú ɔ wun lele jú ɔ awlɛn’n nun lɔ.