8 An kle be ajalɛ kpa

?I BO’N YƐLE BENIN?

Siɛ nin niɛn nga be kle ajalɛ kpa’n, be nanti like nga be bɔbɔ be kle’n su. Wienun-ɔn, amun se amun wa’n kɛ ɔ fata kɛ ɔ di nanwlɛ titi. Kpɛkun, kɛ sran wie bobo anuan’n, kɛ mɔ amun kunndɛman kɛ amún íjɔ’n ti’n, amun se amun wa’n kɛ: “Se i kɛ n nunman awlo wa.” ?Sɛ amun yo sɔ’n, amun kwla lafi su kɛ amun wa’n dí nanwlɛ titi?

“Sran sunman be se kɛ: ‘Fa ndɛ nga n kan’n su’n, nán nian min ayeliɛ’n su.’ Sanngɛ ba kanngan’m be liɛ’n, ndɛ kwlaa nga e kan’n, ɔ nin like kwlaa nga e yo’n, be nian su. I kpa bɔbɔ’n, sɛ e diman ndɛ nga e kan’n su’n, be kwla di e nanwlɛ kɛ e diman su.”—Davidi.

NDƐ NGA BIBLU’N KAN’N: “?Wɔ mɔ a se sran kɛ: “Nán wua,” a wuaman?”​—Rɔmunfuɛ Mun 2:21.

?NGUE TI YƐ I SƆ’N TI CINNJIN-ƆN?

Be nga ba kanngan mun nin gbanflɛn nin talua’m be nian be ayeliɛ’n su dan’n, yɛle be si nin be nin mun. Ɔ maan, sran klikli nga be kwla kle amun mma’m be atin kpa’n yɛle amun bɔbɔ. I sɔ’n ti’n, maan amun nanti like nga amun kle’n su.

“E kwla kan ndɛ kunngba’n e flan nun kpɛ ya, yɛ e usa e wun sɛ e wa’n ti ndɛ nga e kan’n nin o. Sanngɛ, cɛn nga y’a yoman kɛ nga e fa kannin’n sa’n, ba’n kán klé e. Wie liɛ’n, e bu i kɛ ba’m be faman be ɲin sieman like nga e yo’n su, kusu nn be wun i kwlaa.”​—Nikɔlu.

NDƐ NGA BIBLU’N KAN’N: “Ngwlɛlɛ m’ɔ fin ɲanmiɛn su’n, [. . .] ɔ timan gblɛfuɛ.”​—Zaki 3:17.

LIKE NGA AMUN KWLA YO’N

Amun bu amun klun lɔ be nian sɛ an kle ajalɛ kpa o. ?Ngue yɛ amun nian be fa yiyi amun ɲin su-ɔ? ?Wafa sɛ yɛ amun nin amun yi’n annzɛ amun wun’n, nin amun mma’m be tran-ɔn? ?Sran wafa benin mun yɛ be ti amun janvuɛ-ɔ? ?Amun wiengu’m be ndɛ lo amun? ?Nzuɛn nga amun kunndɛ kɛ amun mma’m be fa’n, yɛ amun yi i nglo-ɔ?

“Like nga e nin min wun’n e yoman’n, e seman e wa’n kɛ ɔ yo.”—Klisitinin.

Kɛ amun yo amun wiengu sa’n, amun se i yaci. Amun mma’m be si kɛ amun kwla fɔn. Sɛ amun se amun yi’n annzɛ amun wun’n nin amun mma’m be yaci’n, ba’m be wun i wlɛ kɛ ɔ fata kɛ be di nanwlɛ naan be yo wun ase kanfuɛ.

“Kɛ e fɔn’n, maan e di i nanwlɛ yɛ e se yaci . Sɛ e yo sɔ ba’m be ɲrun’n, ɔ ti kpa. Sanngɛ, sɛ y’a yoman sɔ’n, ba’m bé fía sa tɛ nga be yo’n su.”—Robinin.