2. ?E bɔbɔ e ti yɛ e wun ɲrɛnnɛn-ɔn?

?Ngue ti yɛ kosan sɔ’n ti cinnjin-ɔn?

Ɔ ti cinnjin afin sɛ e tɛ su kɛ ɛɛn’n, nn e kwla yo ninnge wie mun naan y’a wunman ɲrɛnnɛn dan.

Bu ndɛ nga i sin nian

?Sa benin wie mun ti yɛ ɲrɛnnɛn’n o mɛn’n nun-ɔn? Maan e fa e ɲin sie i sa wie’m be su.

Sran kpokokpoko yolɛ.

Anuannzɛ ng’ɔ nian sran’m be aunkpinndiɛ’n su’n seli kɛ sɛ be fa sran kaklaakla 4, be yoli be nun 1 i kpokokpoko i kaan nun. Asa’n, sɛ be fa bla 3, be yoli be nun 1 i sa yaya annzɛ be tɔli i gblu. (Wie’m be liɛ bɔbɔ’n, sa nɲɔn sɔ’m be ɲannin be.)—Organisation Mondiale de la Santé
Sran kunlɛ.

Anuannzɛ kunngba’n seli kɛ: “Afuɛ 2016 nun’n, mɛn wunmuan’n nun’n, sran nga be kunnin be’n be ti sran kɔe 477.000.” Afuɛ kunngba’n nun’n, alɛ’n dili sran kɔe 180.000.
Tukpacɛ mun.

Bla kun suan Flan Simifu. Ɔ ti zronali klɛfuɛ. Ɔ seli kɛ: “Sran miliaa kun tra su be nɔn siklɛti. Kusu nn tukpacɛ nnun nga be kun sran kaka kpa’n, siklɛti nɔnlɛ’n ti yɛ sran’m be tɔ i sɔ tukpacɛ mun-ɔn. Tukpacɛ sɔ mun yɛle awlɛn ba ya, nin be ti nun mmoja ɲanman m’ɔ kpuke’n, nin tukpacɛ ng’ɔ yo maan be kwlá loman wunmiɛn kpa’n, nin afɔkɔ nun tukpacɛ, ɔ nin kansɛli.”—National Geographic
Lufle bulɛ.

Be flɛ fluwa sifuɛ kun kɛ Je Wati. Ɔ seli kɛ: “Sika mɔ sran wie’m be lemɛn i’n annzɛ be wunnɛn kplo’n ti’n, be yo be finfin. Asa ekun’n, be buman bla mun nin be nga be tu be klɔ’n su be ko tran klɔ uflɛ su’n be sran. Asa kusu’n, sran wie’m be bu i kɛ be ninnge yolɛ wafa’n ti kpa tra sran onga’m be liɛ’n. I kwlaa sɔ’n ti’n, sran’m be buman be wun sran kun, be akunndan’n sanngan, yɛ srɛ kun be.”

A KWLA SI NUN KPA EKUN

Kɔ jw.org su naan ko nian video ng’ɔ suan ?Ngue ti yɛ Ɲanmiɛn yili asiɛ’n niɔn?

Ndɛ nga Biblu’n kan’n

Bian nga e kɛnnin i ndɛ’n ɔ la dɔɔtrɔ lɔ. I yi’n w’a kpɛ i ɲin lika uflɛ afin ndɛ nga dɔɔtrɔ bian’n su kan’n ɔ timan kpa.

Ɲrɛnnɛn ng’ɔ o mɛn’n nun’n i dan lika fin klɔ sran mun.

Awa mɔ be waan bé yó naan sran’m be wun be wun fɛ’n, be yɛ be mianman sran mun-ɔn. I sɔ’n ti’n, sran’m be wun be ɲrun.

‘Kɛ sran sie i wiengu’n, ɔ kle i ɲrɛnnɛn.’—AKUNNDANFUƐ’N 8:9.

E su afɛ’n kwla kan ase.

Biblu’n nun mmla’m be uka e naan tukpacɛ wie’m b’a to b’a fuan e, yɛ be uka e naan e nin e wiengu mun y’a tran fɛfɛ.

“Be wla b’ɔ gua ase’n ɔ yo maan be yo juejue, sanngɛ aɲinblɔɛ ɔ ti kɛ ngbaciɛ b’ɔ o be owie’n nun’n sa.”—NYANNDRA MUN 14:30.

“An wla klunngbɔ’n nin awlɛn fufu’n nin ya ble’n nin kpankpanlɛ’n nin nzowa’n, ɔ nin sa tɛtɛ wafawafa’n kwlaa be ase.”—EFƐZIFUƐ MUN 4:31.