Like nga e kwla yo naan y’a di aklunjɔɛ’n
E kwlakwla, i cɛgbaka-o, i be nga b’a ja bian annzɛ bla-o, i kpɛnngbɛn-o, i bakan-o, e kunndɛ kɛ é dí aklunjɔɛ. E Yifuɛ’n kusu kunndɛ kɛ e di aklunjɔɛ. I sɔ’n ti’n, ɔ man e afɔtuɛ kpakpa wie mun. Maan e fa e ɲin e sie i be nun wie’m be su.
Maan e tu e klun e di junman
‘Di junman kekle kpa. Fa ɔ sa di junman kpa naan w’a ɲan like w’a man be nga be sa w’a mian’n.’—EFƐZIFUƐ MUN 4:28.
E Yifuɛ’n wla e fanngan kɛ e tu e klun e di junman. ?Ngue ti-ɔ? Afin sran ng’ɔ tu i klun di junman’n ɔ di aklunjɔɛ. Yɛle kɛ ɔ kwla niɛn i bɔbɔ nin i awlofuɛ’m be lika. Kpɛkun ɔ kwla ti sran uflɛ i wun ɲanman nun. Asa ekun’n, i junman su kpɛn’n lafi i su. Ɔ maan sran ng’ɔ tu i klun di junman’n, i junman’n fimɛn i sa ndɛndɛ. Ɲanmiɛn Ndɛ’n se kɛ kɛ sran kun tu i klun di junman’n i su ye ng’ɔ ɲɛn i’n, “Ɲanmiɛn yɛ ɔ fɛ i sɔ’n mɛn i-ɔ.”—Akunndanfuɛ’n 3:13.
Maan e di nanwlɛ titi
“E si e klun lɔ weiin kɛ y’a yoman sa fi. Yɛ e klo kɛ e nzuɛn’n yo kpa blɛ kwlaa nun.”—EBRE MUN 13:18.
Sran ng’ɔ di nanwlɛ titi’n, i wla gua ase kpɛkun kɛ ɔ la’n ɔ lafi kpa. Asa ekun’n, i wiengu’m be lafi i su yɛ be bu i sran. Sanngɛ sran ng’ɔ diman nanwlɛ’n, i akunndan’n bu i fɔ titi. Kpɛkun i klun titi i afin ɔ si kɛ cɛn kun’n be kwla trɛ i.
Nán e klo sika
“Nán amun klo sika. Maan like nga amun le i dɔ nga su’n, ɔ ju amun.”—EBRE MUN 13:5.
E fa sika e to aliɛ yɛ e fa yo ninnge uflɛ wie mun. Sanngɛ ɔ fataman kɛ ‘e klo sika.’ Afin sran ng’ɔ klo sika’n, ɔ fa sika kunndɛlɛ’n cici i ti. I sɔ’n ti’n, ɔ ɲanman blɛ niɛnmɛn i yi’n annzɛ i wun’n annzɛ i mma’m be lika. Asa’n, i sɔ’n kwla mɛn i tukpacɛ bɔbɔ. (1 Timote 6:9, 10) Kpɛkun sran ng’ɔ klo sika’n ɔ kwla di ndrunmun. Akunndanfuɛ kun seli kɛ: “Sran nga b’ɔ nian sa ng’ɔ ti i su’n su yo’n, saan muae cɛ yɛ ɔ́ nyɛ́n i-ɔ. Sanngɛ sran nga bɔ i waan ɔ́ kplí nyɛ́n i wun’n, saan ɔ́ tɔ́ nyrɛnnɛn nun.”—Nyanndra Mun 28:20.
Maan e kplin su kɛ Ɲanmiɛn kle e like
“Maan akunndan nin ngwlɛlɛ ndɛ nga’m be ka ɔ klun.”—NYANNDRA MUN 3:21.
Sɛ e di suklu naan e si ninnge wie’m be yo’n, i sɔ’n kwla uka e kpa. Sanngɛ suklu dilɛ ngunmin kwlá ukaman e naan e liɛ w’a yo ye. Sɛ e kunndɛ kɛ like kwlaa nga e yo’n ɔ yo ye’n, ɔ fata kɛ e kplin su kɛ Ɲanmiɛn kle e like. Ɲanmiɛn Ndɛ’n se kɛ sran ng’ɔ nanti ndɛ nga Ɲanmiɛn kan’n su’n, ‘like kwlaa ng’ɔ yo’n, saan ɔ́ yó ye i sa nun.’—Jue Mun 1:1-3.