A kwla si ngwlɛlɛ tra laa’n
“Ndɛ kwlaa ng’ɔ o Ɲanmiɛn Ndɛ’n nun’n, Ɲanmiɛn yɛ maan be klɛli-ɔ.” (2 Timote 3:16) Ndɛ mma sɔ’n kle kɛ Ɲanmiɛn i klun ndɛ’n yɛ sran’m be klɛli i Biblu’n nun-ɔn.
Ɲanmiɛn kunndɛ kɛ ɔ́ klé wɔ like
“Min Anannganman, [...] n kle amun like, amun bɔbɔ amun kpa yolɛ ti yɛ n kle amun-ɔn. Min yɛ n kle amun atin ng’ɔ fata kɛ amun sin nun’n niɔn. Sɛ ɔ ti kɛ amun sieli amun su mmla nga m mannin amun’n i bo’n, nn amún dí alaje. Sɛ alaje sɔ’n ti nzue’n, nn ń sé kɛ ɔ́ yó kɛ nzue ba kun m’ɔ sonji kpuu m’ɔ kpɛman’n sa. Sɛ ɔ ti kɛ amun sieli amun su mmla sɔ’n i bo’n, nn amún ɲán muae. Sɛ muae sɔ’n ti jenvie’n, nn ń sé kɛ ɔ́ bó gua cenje’n su tititi.”—EZAI 48:17, 18.
Yo kɛ wɔ yɛ Ɲanmiɛn su kan ndɛ sɔ’n kle wɔ trele sa. Ɔ kunndɛ kɛ ɔ́ úka wɔ naan ɔ liɛ yo ye naan a di aklunjɔɛ.
A kwla ɲan afɔtuɛ kpakpa wie mun Ɲanmiɛn Ndɛ’n nun
‘Bé bó jasin fɛ’n nvlenvle’m be kwlaa be nun.’—MARKI 13:10.
‘Jasin fɛ’ sɔ’n i wie yɛle kɛ Zoova wá yó maan ɲrɛnnɛn kwlaa wíe, ɔ́ yó maan asiɛ’n wunmuan’n káci lika klanman kpɛkun ɔ́ cɛ́n e sran nga be wuli’n be nguan. Jasin fɛ sɔ’n wo Biblu’n nun. Yɛ Zoova i Lalofuɛ’m be bo i mɛn wunmuan’n nun.