Ajulisu mannzin’m be kwla ɲan ta ɔ aja’n su
Kɛ yasua kun nin i yi be fa ajulisu mannzin’m be di junman kɛ ng’ɔ nin i fata’n sa’n, be afiɛn mantan kpa. I wie yɛle kɛ be kwla fa mannzin sɔ’m be koko yalɛ.
Sanngɛ yasua nin bla wie’m be faman ajulisu mannzin’m be diman junman kpa. I sɔ’n ti’n:
be ɲanman blɛ naan b’a yo ninnge wie mun likawlɛ.
kɛ be o awlo lɛ’n be yo ninnge mun kɛ be te o junman su lɔ sa.
be fia ninnge wie’m be wiengu kun’n i wun.
LIKE NG’Ɔ FATA KƐ A WUN I WLƐ’N
KƐ A NIN Ɔ YI ANNZƐ Ɔ WUN’N AMUN WO’N
Be flɛ bian kun kɛ Mikaɛli. Ɔ seli kɛ: “Ɔ ju wie’n min nin min yi e wo likawlɛ, sanngɛ ɔ yo min kɛ ɔ nunman lɛ sa. Afin i ɲin o i pɔɔtablu’n su dan. Kɛ ń kán’n, ɔ se min kɛ: ‘M’an ɲanman min ti naan m’an nian nun ti-ɔ.’” Be flɛ bian kun ekun kɛ Zonatan. I liɛ’n, ɔ seli kɛ: “Kɛ ɔ ko yo kɛ nga sa’n, a nin ɔ yi annzɛ ɔ wun’n amun o likawlɛ sanngɛ ɔ yo wɔ kɛ amun afiɛn ti nun dan kpa sa.”
BU KOSAN NGA I AKUNNDAN: ?Kɛ a nin ɔ yi annzɛ ɔ wun’n amun wo’n, kpɛ nɲɛ yɛ be flɛ wɔ annzɛ be klɛ wɔ mesazi-ɔ?—EFƐZIFUƐ MUN 5:33.
KƐ BE O AWLO LƆ’N Ɔ TI KƐ BE TE O JUNMAN SU LƆ SA
Sran wie’m be junman’n ti’n, be kwla flɛ be annzɛ be kwla klɛ be mesazi dɔ kwlaa su. Kɔnguɛ bɔbɔ’n be kwla flɛ be. Sanngɛ sran wie’m be liɛ’n be junman’n timan sɔ. Ɔ nin i sɔ ngba’n kɛ be o awlo lɔ’n, ɔ ti kɛ be te o junman su lɔ sa. Be flɛ bian kun kɛ Zan. Ɔ seli kɛ: “Min junman’n ti’n, kɛ n wo awlo lɔ bɔbɔ’n be flɛ min annzɛ be blɛ min mesazi. Ɔ ju wie’n, n siesie blɛ kɛ min nin min yi é yó ninnge wie mun likawlɛ. Sanngɛ blɛ sɔ nun bɔbɔ’n be flɛ min. Kɛ ɔ ko yo sɔ’n, n kwlá traman min awlɛn, yɛ n sɔ su.” Be flɛ bla kun kɛ Jɔyi. Ɔ seli kɛ: “N di junman ɛntɛnɛti su awlo lɔ. I ti’n, dɔ kwlaa su n di junman. Yɛ ɔ ju wie’n n siman blɛ ng’ɔ fata kɛ n jrɛn i naan m’an ko yo like uflɛ-ɔ.”
BU KOSAN NGA I AKUNNDAN: ?Kɛ ɔ yi annzɛ ɔ wun kan ndɛ kle wɔ’n, a sie ɔ su kpa i nuan bo?—LIKI 8:18.
AJULISU MANNZIN’M BE KWLA SACI Ɔ AJA’N
Be usali sran wie’m be aja’n i su kosan. Be nun kpanngban be seli kɛ be nin be yi annzɛ be wun be kacikacili be nuan. Afin be yi annzɛ be wun sɔ’n kannin ndɛ wie annzɛ ɔ yoli like wie ɛntɛnɛti su mɔ w’a yoman be fɛ-ɔ. Be nun wie mun bɔbɔ be seli kɛ be fia be wun’n annzɛ be yi’n be wun be sie ninnge wie mun ɛntɛnɛti su.
Sran sunman be waan ɛntɛnɛti saci aja. Afin ninnge nga be o lɔ’n be kwla yo maan sran kun kunndɛ bla i yi bo annzɛ ɔ kunndɛ bian i wun bo. I ti’n, be nga be kpli sran’m be ti jɔlɛ difuɛ’m be ja su’n, be nun wie’m be seli kɛ ɛntɛnɛti’n saci aja.
BU KOSAN NGA I AKUNNDAN: ?A fia ɔ wun’n i wun a nin yasua uflɛ be koko yalɛ ɛntɛnɛti su? ?Annzɛ a fia ɔ yi’n i wun a nin bla uflɛ be koko yalɛ ɛntɛnɛti su?—NYANNDRA MUN 4:23.
LIKE NGA A KWLA YO’N
Ɔ FATA KƐ A WUN NINNGE NGA BE TI CINNJIN KPA’N BE WLƐ
Sran nga i ɲinfu ɔ diman like mlɔnmlɔn’n, ɔ kwla tɔ tukpacɛ. I wafa kunngba’n, sran nga i ɲinfu ɔ kunndɛman kɛ ɔ nin i yi annzɛ i wun bé yó ninnge wie mun likawlɛ’n, i aja’n kwla saci.—Efɛzifuɛ Mun 5:28, 29.
BIBLU’N NUN AFƆTUƐ: “Amun wun ninnge nga be ti cinnjin kpa’n be wlɛ.”—FILIPUFUƐ MUN 1:10.
A nin ɔ yi annzɛ ɔ wun an koko ajalɛ nga’m be su yalɛ, annzɛ an klɛ ajalɛ nga amun kwla fa be naan ajulisu mannzin’m b’a saciman amun aja’n be su ndɛ.
Aliɛ ba kun nun’n, é mían e ɲin é dí like likawlɛ. Kannzɛ amun yo sɔ kpɛ kunngba bɔbɔ’n, ɔ ti kpa.
É síe blɛ kun mɔ i nun’n e su faman e ajulisu mannzin mun e diman junman-ɔn.
É síe blɛ kun é fá yó ninnge wie mun likawlɛ.
Kɛ é kɔ́ lalɛ’n, é núan e ajulisu mannzin mun kpɛkun é síe be mmua lɔ.
Cɛn kwlakwla’n, é fá miniti 15 kun é kókó yalɛ. Blɛ sɔ’n nun’n, é núan e ajulisu mannzin mun.
Cɛn kwlakwla’n, é síe blɛ kun mɔ i nun’n e nun wie fi su kɔman ɛntɛnɛti su-ɔ.