Like nga siansifuɛ’m be simɛn i’n

Siansifuɛ’m b’a suan ninnge nga be o mɛn’n nun’n be nun kpanngban be su like. Sanngɛ ninnge cinnjin wie’m be o lɛ mɔ be nin-a wunman be wlɛ-ɔ.

?Siansifuɛ’m be kwla yiyi wafa nga mɛn’n boli i bo’n i nun? Kosan sɔ’n i su tɛlɛ’n ti kpe kan. Yɛle cɛcɛ. Sran wie’m be waan siansifuɛ nga be suan nglo lɔ ninnge’m be su like’n, be kwla yiyi wafa nga mɛn’n boli i bo’n i nun. Sanngɛ fluwa sifuɛ dan kun mɔ be flɛ i kɛ Maaselo Glezɛɛ’n, ɔ seli kɛ: “E kwlá yiyiman wafa nga mɛn’n boli i bo’n nun kpa sa.”

Siansifuɛ’m be fluwa kun kannin ndɛ kunngba’n wie. Ɔ seli kɛ: “Siansifuɛ’m be kwlá yiyiman wafa nga asiɛ’n su ninnge’m be boli be bo’n i nun. Afin yɔbuɛ nin lalafuɛ ninnge wie mɔ be kwla uka be naan b’a yo sɔ’n be nun sunman be nunnunnin i osu w’a cɛ kpa.” Ɔ maan lele nin andɛ’n siansifuɛ’m be nin-a kwlá yiyiman wafa nga mɛn’n boli i bo’n i nun.

Sanngɛ a kwla usa ɔ wun kɛ: ‘?Sɛ sran kun yɛ ɔ yili asiɛ’n nin i su ninnge mun’n, nn wan-ɔn?’ Asa kusu’n, a kwla usa ɔ wun kɛ: ‘?Sɛ sran kun m’ɔ si ngwlɛlɛ kpɛkun ɔ klo sran yɛ ɔ yili ninnge mun’n, nn ngue ti yɛ ɔ yaci sran m’ɔ yili be’n be lɛ mɔ be wun ɲrɛnnɛn sɔ-ɔ? ?Ngue ti yɛ wafa nga be su i’n ɔ sɔnnin sɔ-ɔ? ?Ngue ti yɛ ɔ yaci i sufuɛ’m be lɛ mɔ be yo sa tɛtɛ mun-ɔn?’

Siansifuɛ’m be kwlá tɛman kosan sɔ’m be su. Sanngɛ i sɔ’n kleman kɛ a kwlá siman kosan sɔ’m be su tɛlɛ’n. Biblu’n kwla uka wɔ naan w’a si be su tɛlɛ’n.

Kɛ siansifuɛ wie’m be boli be ɲin ase be suannin Biblu’n nun like kpa’n, be wunnin i wlɛ kɛ sran kun yɛ ɔ yili ninnge mun-ɔn. Sɛ a kunndɛ kɛ á sí like nga ti yɛ be fɛli i sɔ ajalɛ’n, kɔ jw.org su naan kunndɛ “Nguan’n i finwlɛ’n i su akunndan nga sran’m be bu’n.”

Siansi’n nin Biblu’n be ukali be kpa

Zɔɔzi Koidan, ɔ ti siansifuɛ

“Min junman liɛ nga n di’n yɛle kɛ n sanngansanngan ninnge mun naan be kaci like uflɛ. Min junman ti tɛkɛtɛkɛ dan ti’n, ka naan m’an yo like kun’n ɔ fata kɛ n siesie i kwlaa n sie. Afin sɛ min wla fi like kun su’n, like nga min waan ń yó’n ɔ su yoman ye. Min junman’n ti kekle sɔ sanngɛ kɛ n fa sunnzun junman nga selili’m be di’n, min junman liɛ’n timan like fi. I sɔ’n ti’n, n ma wunnin i wlɛ kɛ siansifuɛ dan kpa kun o lɛ naan ɔ si junman nga n di’n i su like kaka tra min. Siansifuɛ sɔ’n yɛ ɔ yili ninnge mun-ɔn.

“Kɛ n suannin Biblu’n nun like’n, n wunnin i wlɛ kɛ ɔ timan kɛ fluwa onga’m be sa. Be klɛli Biblu’n i afuɛ kɔe 2.000 yɛ, sanngɛ i nun ndɛ’n te yo e ye andɛ. Biblu’n kle e wafa nga e kwla siesie ndɛ ng’ɔ tɔ awlo nun annzɛ junman su lɔ annzɛ e nin e mantanfuɛ mun e afiɛn’n. Kɛ n buli i kwlaa sɔ’n i akunndan’n, n wunnin i wlɛ kɛ sran kun m’ɔ si ngwlɛlɛ tra sran’m be lelele’n yɛ ɔ yoli maan be klɛli ndɛ sɔ mun-ɔn.”

Yan Dɛɛ Suu, ɔ ti siansifuɛ

“Kɛ bla kun wunnzɛ’n, ba’n i nun selili’m be di junman likawlɛ naan ba’n w’a yo kpa. Selili sɔ’m be nun wie’m be kaci ndin, wie’m be kaci owie, wie’m be kaci mmoja yɛ wie’m be kaci i wunnɛn nun ninnge uflɛ wie mun ekun. Sanngɛ wafa nga selili’m be kacikaci lele mɔ ba’n yo sran’n, e nin-a wunmɛn i wlɛ kpa sa. Kɛ n niɛn i sa’n, sran kun m’ɔ si ngwlɛlɛ kpa’n yɛ ɔ siesieli i kwlaa sɔ’n niɔn.

“Jue Mun 139:15, 16 kan wafa nga ba m’ɔ o i nin ku sɛ nun’n yo kpa’n i ndɛ. Ndɛ sɔ mɔ Biblu’n kan’n ɔ nin kuɛ’n i su ninnge nga siansifuɛ’m be wunnin be koko nun wa’n be kɔ likawlɛ. Kusu nn Biblu’n kannin ndɛ sɔ’n w’a di afuɛ kpanngban kpa. ?Sɛ nán sran ng’ɔ yili sran mun’n yɛ ɔ yoli maan be klɛli ndɛ sɔ’n nn wan-ɔn?”

Nian video Rocío Picado Herrero: Un professeur de chimie parle de sa foi. Ɔ o jw.org su.