?Ngue ti yɛ ndɛ sɔ’n ti cinnjin-ɔn?

?Ngue ti yɛ ɔ fata kɛ a si kɛ sran kun yɛ ɔ yili ninnge mun-ɔn? Sɛ a wun i wlɛ kɛ Ɲanmiɛn Kpli o lɛ naan i yɛ ɔ yili ninnge mun’n, á wún i wlɛ kɛ Biblu’n nun ndɛ’n fin i. Kpɛkun sɛ a nanti Biblu’n nun ndɛ’n su’n, á ɲán su ye kaka. Be nun wie mun yɛ:

Á dí aklunjɔɛ kpa ekun

NDƐ NGA BIBLU’N KAN’N: “[Ɲanmiɛn] yoli ninnge kpakpa mun fa yili i sran’n i wafa ng’ɔ ti’n i nglo. Yɛle kɛ ɔ tɔ nzue man amun, kpɛkun ɔ yo maan amun fie’m be yo kpa, ɔ maan amun ku yi, yɛ amun klun jɔ dan.”—Sa Nga Be Yoli’n 14:17.

LIKE NGA NDƐ SƆ’N KLE E’N: Ninnge kwlaa nga be bo sin yia e’n, Ɲanmiɛn yɛ ɔ fa mannin e-ɔ. I sɔ’n kle kɛ e ndɛ lo i. Sɛ a wun i sɔ liɛ’n i wlɛ’n, á sí ninnge ng’ɔ fa mannin e’n be su ye kpa ekun.

Á wún afɔtuɛ wie mɔ be kwla uka wɔ kpa’n

NDƐ NGA BIBLU’N KAN’N: “Á wún sa ng’ɔ ti kpa’n, nin ng’ɔ ti su’n, nin ng’ɔ ti sɛsɛ’n be wlɛ, á wún ajalɛ ng’ɔ ti kpa’n i wlɛ.”—Ɲanndra Mun 2:9.

LIKE NGA NDƐ SƆ’N KLE E’N: Kɛ mɔ Ɲanmiɛn yɛ ɔ yili e’n ti’n, ɔ si like ng’ɔ fata kɛ e yo naan y’a di aklunjɔɛ’n. Sɛ a suan Biblu’n nun like’n, á wún afɔtuɛ wie mɔ be kwla uka wɔ naan ɔ liɛ w’a yo ye’n.

Á sí kosan wie mɔ a fa usa ɔ wun’n be su tɛlɛ’n

NDƐ NGA BIBLU’N KAN’N: “Á wún like nga be flɛ i Zoova i srolɛ’n i wlɛ, yɛ á kwlá sí Ɲanmiɛn.”—Ɲanndra Mun 2:5.

LIKE NGA NDƐ SƆ’N KLE E’N: Sɛ a wun i wlɛ kɛ Ɲanmiɛn o lɛ’n, á sí kosan cinnjin wie’m be su tɛlɛ’n. I wie yɛle kɛ: ?Ngue ti yɛ e o mɛn’n nun-ɔn? ?Ngue ti yɛ e wun ɲrɛnnɛn-ɔn? ?Be wu be o lɔ? Biblu’n tɛ kosan sɔ’m be su.

Á fá ɔ wla gúa like kpa kun su

NDƐ NGA BIBLU’N KAN’N: “Zoova waan yoo: ‘Amun wun akunndan nga n bu’n, min bɔbɔ yɛ n si i kpa-ɔ. Fɔundi yɛ n kunndɛ kɛ amun di-ɔ, n kunndɛman kɛ amun wun ɲrɛnnɛn. N kunndɛ kɛ amun ɲrun lɔ’n yo kpa naan amun wla gua ase.’” —Zeremin 29:11.

LIKE NGA NDƐ SƆ’N KLE E’N: Ɲanmiɛn tali e nda kɛ cɛn wie lele’n ɔ́ yó maan klunwi’n nin ɲrɛnnɛn’n nin wie’n be su tranman lɛ kun. Sɛ a lafi ndɛ sɔ’n su’n, i sɔ’n mán ɔ wunmiɛn naan w’a kwla jran sa nga be tɔ ɔ su’n be ɲrun kekle.

Be nga be lafi su kɛ sran kun yɛ ɔ yili ninnge mun’n be ɲan su ye

“Kɛ n wun wafa nga Ɲanmiɛn uka e sa fanunfanun nun’n, i sɔ’n yo min fɛ dan. Ɔ uka e naan y’a wun ninnge nga be ti cinnjin kpa’n be wlɛ. Kpɛkun ɔ uka e naan e nin e wiengu mun y’a tran klanman. Yɛ ɔ uka e naan y’a kaci i janvuɛ.”—Sindi, Etazinin.

“Kɛ mɔ n lafi su kɛ Ɲanmiɛn yɛ ɔ yili ninnge mun ti’n, n di aklunjɔɛ. Afin cɛn kwlaa’n n suɛn i bɔbɔ nin ninnge ng’ɔ yili be’n nin i nuan Ndɛ’n be su like.”—Elizi, Aflansi.

“Kɛ n nanti ndɛ nga Biblu’n kan’n su’n, n di aklunjɔɛ. Biblu’n ti’n n planman dan kun, sran ndɛ lo min yɛ min ɲin yi like nga n le i’n. Asa’n ɔ ukali min maan n yoli siɛ kpa.”—Pitɛɛ, Peiba.

“Laa’n, like nga n yo’n yɛle aliɛ dilɛ nin lafilɛ nin junman dilɛ. Ɔ maan n diman aklunjɔɛ. Sanngɛ kɛ n ma sili kɛ Ɲanmiɛn o lɛ naan i yɛ ɔ mannin e nguan’n, n ma dili aklunjɔɛ kpa siɛn’n.”—Lizi, Ɛstonin.

“Laa’n, n koko dan. Sanngɛ kɛ n ma wunnin i wlɛ kɛ klunwi’n nin sran lufle bulɛ’n nin ɲrɛnnɛn’n bé wíe’n, min wla guali ase. I sɔ’n ti’n, n kokoman dan kun.”—Adriɛn, Aflansi.