MƐN’N W’A YO KEKLE

2 | Yo ɔ sika’n i cɛcɛ

?NGUE TI YƐ I SƆ’N TI CINNJIN-ƆN?

Andɛ’n, kɛ ɔ ko yo naan sran wie’m b’a ɲan be nuan nun aliɛ b’a di’n ɔ ti kekle. Yɛ sa nga be ju mɛn’n nun’n be ti’n, lika’n yo kekle be su tra laa’n. ?Wafa sɛ?

Kɛ sa kekle ko tɔ lika kun’n, sran’m be uka ninnge kɛ aliɛ nin sua sa’n be gua’n su.
Kɛ lika’n sanngan’n, sran’m be ɲanman junman be diman. Yɛ be nga be di junman kusu’n, be kpɛ be akatua’n su.
Kɛ sanvuɛsa tɔ lika kun’n, sran’m be aata diwlɛ mun nin be sua mun nin be ninnge uflɛ wie mun ekun be saci. Ɔ maan sran’m be di yalɛ dan.

Like ng’ɔ fata kɛ a wun i wlɛ’n

Sɛ a yo ɔ sika’n i cɛcɛ’n, sɛ sa wie tɔ ɔ su’n á kwlá ɲán wie tí ɔ wun ɲanman nun.
Andɛ’n a kwla ɲan sika, kpɛkun ainman’n a di yalɛ. Ɔ sa nun ninnge’m be kwla ka lɛ fi ɔ sa.
Sika kwlá toman like ngba. I wie yɛle aklunjɔɛ nin awlobo tranlɛ fɛ’n.

Like nga a kwla yo’n

Biblu’n se kɛ: “Sɛ e ɲan like e di’n, yɛ sɛ e ɲan tralɛ e wla’n, maan ɔ ju e.”—1 Timote 6:8.

Sɛ e waan é klé kɛ like nga e le i’n ju e’n, ɔ fataman kɛ e kunndɛ ninnge kpanngban. Sanngɛ ɔ fata kɛ e klun jɔ like kan nga e le i’n su. I li sɛ sika ndɛ’n ti kekle e su’n, yɛ ɔ fata kɛ e yo i sɔ kpa’n niɔn.

Sɛ ɔ waan á klé kɛ like nga a le i’n ju wɔ’n, nán kunndɛ ninnge kpanngban. Sɛ ninnge nga ɔ sa juman su’n yɛ a kunndɛ’n, yalɛ’n dí wɔ.

LIKE NGA A KWLA YO’N—Afɔtuɛ wie mun

Sɛ sa tɔ ɔ su naan a yo ninnge nga mun’n, á ɲán sika tí ɔ wun ɲanman nun.

NÁN TO NINNGE KAKA

Nán to ninnge kaka

Nán to ninnge nga ɔ sa mianman be wun sakpa’n. A kwla usa ɔ wun kɛ: ‘?Ɔ ti cinnjin kɛ n to loto? ?Yɛ sɛ n di fie kan nin?’
Kwlaa naan w’a to like kun’n, usa ɔ wun kɛ: ‘?N miɛn i wun sakpa? ?Min sika’n ju?’
Sɛ awa’n annzɛ anuannzɛ wie uka sran mun’n, ko klɛ ɔ dunman naan be uka wɔ wie.

Be flɛ bian kun kɛ Gifu. Ɔ seli kɛ: “Min nin min awlobofuɛ mun e tran buli ninnge nga e to be’n be akunndan. Ɔ maan e kpɛli e ɲin su yiyilɛ sika’n su. Kpɛkun y’a tɔnman aliɛ nga be le gua’n kun.”

KLƐ NINNGE NGA Á TÓ BE’N SIE

Klɛ ninnge nga á tó be’n sie

Biblu’n se kɛ: “Sran ng’ɔ bo i ɲin ase yo like’n, like ng’ɔ sunnzun kɛ ɔ́ yó’n, ɔ́ yó ye, sanngɛ be kwlaa nga be kpli yo like’n, bé dí yalɛ.” (Ɲanndra Mun 21:5) Sɛ a dun mmua klɛ ninnge nga ɔ waan á tó be’n, a su boman kalɛ.

Klɛ sika nga a kwla ɲɛn i anglo kun nun’n sie.
I sin’n, klɛ sika nga a di i anglo kun nun’n sie.
Kpɛkun fa sika nga a ɲɛn i anglo kun nun’n sunnzun nga a di’n. Sɛ a wun i kɛ sika nga a di’n sɔnnin tra nga a ɲɛn i’n, yaci ninnge wie’m be tolɛ.

Be flɛ bian kun kɛ Kaalɔsu. Ɔ seli kɛ: “Anglo kwlaa nun’n, e klɛ sika nga e ɲɛn i’n ɔ nin nga e di’n e sie. Kpɛkun e mian e ɲin e sie sika kan naan sɛ e sa mian’n y’a fa ti e wun ɲanman nun. I sɔ mɔ e yo’n ti’n, e klun titiman e afin e si like nga é fá e sika’n é yó’n.”

NÁN TA KALƐ FA YƐ SIE Ɔ SIKA’N WIE

Nán ta kalɛ fa yɛ sie ɔ sika’n wie

Mian ɔ ɲin naan w’a faman kalɛ. Sɛ a ɲɛn i wun alaje bɔbɔ’n, nán fa kalɛ le. Sɛ ɔ waan á tó like kun’n, siesie ɔ sika’n kanngan naan w’a to.
Anglo kwlaa nun’n, sie sika kan. I liɛ’n, sɛ sa wie fu ɔ nun’n, á fá tí ɔ wun ɲanman nun.

TU Ɔ KLUN DI JUNMAN

Biblu’n se kɛ: “Junman kwlaa nga be mian be ɲin be di’n, be ɲan su ye.”—Ɲanndra Mun 14:23

Tu ɔ klun di junman

Bu junman nga a di’n i cinnjin. Kannzɛ nán junman nga a kunndɛ kɛ á dí’n yɛ a di i dɔ nga su’n, sanngɛ i dunman nun’n a ɲan sika kan.
Mian ɔ ɲin di junman naan be lafi ɔ su. I liɛ’n, ɔ junman’n su fiman ɔ sa ndɛndɛ. Yɛ kannzɛ bɔbɔ ɔ fi ɔ sa’n, á ɲán uflɛ ndɛndɛ.

Be flɛ bian kun kɛ Dimitri. Ɔ seli kɛ: “Junman kwlaa nga n sa tɔ su’n, n di. Kannzɛ bɔbɔ n klomɛn i’n annzɛ n ɲanman nun sika kaka’n, n sɔ nun. Kpɛkun n tu n klun n di junman’n kɛ n bɔbɔ min liɛ yɛ n su di sa.”

Sɛ a su kunndɛ junman’n…

Nán tran lɛ sa ngbɛn. Flɛ be nga a kwla ɲan junman be sa nun’n. Kannzɛ bɔbɔ b’a bomɛn i ndolo kɛ be su kunndɛ sran’n, ɔ li flɛ be. Kpɛkun se ɔ janvuɛ nin ɔ osufuɛ’m be kɛ a su kunndɛ junman.
Nán kpa junman nun. Afin nán cɛn ngba yɛ á ɲán junman nga a kunndɛ’n niɔn.