?ASIƐ’N YÓ KPA EKUN?

NZUE NGA BE KWLA NƆN’N

SƐ NZUE’N nunman lɛ’n like fi kwlá tranman nguan nun. Nzue sɔnnin ninnge nga be o nguan nun’n be nun kpa. Fɛtɛ mun nin nzue ba mun nin fɔkɔ’m be nun nzue’n nin nzue ng’ɔ o asiɛ’n i bo lɔ’n be yɛ be yo maan sran mun, nin nnɛn mun nin waka mun be ɲan nzue be nɔn-ɔn. Asa’n, be ti yɛ maan fie’m be yo kpa-ɔ.

Nzue nga e kwla nɔn’n su wie

Asiɛ’n i dan lika ti nzue. Sanngɛ anuannzɛ kun seli kɛ “nzue sɔ’n i bue kaan sa yɛ be kwla nɔn-ɔn.” Ɔ ti kaan sɔ, sanngɛ ɔ ju klɔ sran’m be kwlaa. Sanngɛ i dan lika su yo fiɛn. Asa’n kɛ mɔ sran kpanngban be kunndɛ nzue’n mɔ kusu lika’n su wu kee’n ti’n, be ɲanman nzue. Fluwa sifuɛ’m be waan lele m’ɔ́ fá dí afuɛ 30, sran miliaa nnun be su ɲanman nzue kpa sa be nɔnman.

Wafa nga Ɲanmiɛn yili asiɛ’n ti’n ɔ kwla sin i osu laa’n nun ekun

Wafa nga Ɲanmiɛn yili asiɛ’n ti’n, nzue trán su titi. Asiɛ’n nin ninnge nga be o nzue’n nun’n, ɔ nin wia’n bɔbɔ be yo maan nzue’n yo sanwun. Maan e kan ninnge wie mɔ be kle kɛ wafa nga be yili asiɛ’n ti’n ɔ kwla saciman’n be ndɛ.

Fluwa sifuɛ wie’m be waan asiɛ’n kwla kpukpu nzue’n su, kpɛkun ɔ yo sanwun. Fɔkɔ’m be nun’n, waka wie’m be kwla yo maan ayre tɛtɛ nga sran’m be fa guɛ i nzue’m be nun’n be wie.
Fluwa sifuɛ wie’m be waan sɛ nzue’n ti fiɛn’n ninnge wie mɔ be o nzue’n nun’n be kwla yo maan ɔ yo sanwun ekun. Kɛ nzue’n sonjí kɔ́ ndɛndɛ’n ninnge nga be yo i fiɛn’n be ta’n i su kpɛ, yɛ i sin’n nzue’n yo sanwun blɛblɛblɛ.
Jenvie’n nun ninnge wie’m be o lɛ’n be kwla yo maan nzue’n yo sanwun. Be kwla yo i sɔ ndɛndɛ kpa tra mannzin nga klɔ sran’m be yili be mɔ be fa yi nzue’n i nun fiɛn’n bɔbɔ.
Like nga mɔ maan nzue’n tɔ’n ti’n, nzue’n kwlá wieman asiɛ’n su. Asa’n asiɛ’n su ninnge uflɛ wie mun ekun be yo maan nzue’n kaciman kpukpuwa, annzɛ ɔ wieman.

?AMUN SI SƆ?

Asiɛ ba’n yo nzue’n i sanwun

Kɛ nzue’n ng’ɔ ti fiɛn’n wlu asiɛ’n nun’n, i nun fiɛn’n ka asiɛ’n nun. Ɔ maan lele m’ɔ́ tó asiɛ’n i bo lɔ nzue nga e kwla nɔn’n nn w’a yo sanwun.

Ninnge nga be di junman kɛ kpukpusu sa’n

Aunɲan’n nin yɔbuɛ’m be di junman kɛ kpukpusu sa. Nzue’n i nun fiɛn’n ka nun.

Kakaa wie mɔ be yo nzue’n i sanwun’n

Kakaa wie’m be o asiɛ’n nun. Be yo maan nzue nun fiɛn m’ɔ kwla yo sran’m be abɔlɛ’n ɔ wie. Kakaa sɔ’m be nun wie’m be yo maan ngo nga be kwla kun sran’n ɔ kaci aunmuan tɛ nga be flɛ i diɔsidi de kaabɔnin’n nin nzue.

Kolan ng’ɔ o asiɛ’n nun’n ɔ yo nzue’n i sanwun

Like kɛ kolan sa’n o asiɛ’n nun. Ɔ maan kɛ nzue fiɛn’n wlu asiɛ’n nun’n ɔ trɛ i nun fiɛn’n. I sɔ junman’n yɛ ufa’n di-ɔ.

Like nga sran’m be yo’n

Foto mun: 1. Bian kun su tannin i loto’n i ngo guawlɛ m’ɔ fitili’n. Ɔ fa like sɔ i bo naan ngo’n gua nun. 2. Bian kun w’a fa ayre tɛtɛ wie mun w’a wɔ naan be di su junman. — Kɛ e siesie e loto’n i ngo guawlɛ’n i ye’n annzɛ e gua ayre tɛ’m be blo kɛ ng’ɔ nin i fata’n sa’n, ɔ yo maan nzue nga e nɔn’n ɔ ka sanwun.

Fluwa sifuɛ’m be waan ɔ fataman kɛ e saci nzue’n. Be waan kɛ ɔ ko yo naan y’a saciman nzue’n, sɛ loto kun i ngo guawlɛ’n fiti’n ɔ fata kɛ e tannin i. Asa’n ɔ fataman kɛ e fa ayre nga be timan kpa kun’n e guɛ i atin nun kɔwlɛ’n nun, yɛ ɔ fataman kɛ e fa ninnge nga be kwla kun sran’n e guɛ i nzue siwlɛ kun nun.

Be yili mannzin wie mun mɔ be kwla yi nzue’n i nun njin’n. Be yo sɔ naan nzue nga e kwla nɔn’n w’a sɔn.

Sanngɛ i sɔ’n kwlá yoman ye. Afin nzue’n i nun njin yilɛ’n ɔ di sika kaka, yɛ ɔ di kolan kaka. Afuɛ 2021 nun’n, anuannzɛ nga be flɛ i ONU seli kɛ: “Ninnge nga e yo be naan y’a ɲan nzue kpa titi’n ɔ juman. Ɔ fata kɛ ɔ tra nga e yo be andɛ’n kpɛ nɲɔn.”

Ndɛ nga Biblu’n kan m’ɔ gua e awlɛn su nzue’n

“Ɲanmiɛn […] cuɛn nzue m’ɔ kpɛnkpɛn’n kɔ nglo. Kpukpuwa’n yo kpikplikpi kpɛkun ɔ kaci nzue. Kpɛkun ɲanmiɛn ble’m be yo maan nzue’n gua. Ɔ gua kpanngban kpa klɔ sran’m be su.”—Zɔbu 36:26-28.

Ɲanmiɛn siesieli ninnge wie mun naan nzue’n w’a wieman asiɛ’n su. —Akunndanfuɛ’n 1:7.

?Sɛ Ɲanmiɛn siesieli ninnge wie mun naan nzue’n w’a yo sanwun asiɛ’n su’n, ɔ kwlá yoman naan like nga klɔ sran’m be sacili i’n w’a sɛ i sin i osu laa’n nun ekun? An nian ndɛ nga be flɛ i kɛ “Ɲanmiɛn tali nda kɛ asiɛ’n yó kpa ekun” nun. Ɔ o fluwa nga i bue 15 su.