?ASIƐ’N YÓ KPA EKUN?
AUNMUAN’N
AUNMUAN’N ti yɛ e kwla lo wunmiɛn-ɔn. Sanngɛ nɛ́n i ngba-ɔ. Aunmuan’n sasa asiɛ’n naan wia’n i je’n w’a boman e su w’a tratraman su. Asa’n sɛ ɔ ti kɛ aunmuan’n nunman lɛ sa’n, nn lika’n kwlaa káci laglasi.
Aunmuan kpa’n su wie
Sɛ ninnge nga be o nguan nun’n be ɲanman aunmuan kpa naan b’a lo wunmiɛn’n , be kwla wu. Anuannzɛ ng’ɔ nian sran’m be ayre yolɛ’n su mɛn wunmuan’n nun’n seli kɛ sɛ be fa sran ya’n, be nun kunngba cɛ yɛ ɔ ɲan aunmuan kpa-ɔ.
Kɛ e ɲanman aunmuan kpa’n i sɔ’n kwla man e tukpacɛ wie mun. I wie yɛle kɛ ɔ kwla man e afɔkɔ’n nun kannin, annzɛ awlɛn ba ya, annzɛ tukpacɛ uflɛ wie mun ekun. Aunmuan’n m’ɔ timan kpa kun’n ti’n, afuɛ kwlakwla’n, sran miliɔn nso be wu.
Wafa nga Ɲanmiɛn yili asiɛ’n ti’n ɔ kwla sin i osu laa’n nun ekun
Wafa nga Ɲanmiɛn yili asiɛ’n ti’n, ninnge kwlaa nga be nguan nun’n be kwla ɲan aunmuan kpa be lo wunmiɛn. Kɛ ɔ ko yo naan i sɔ liɛ’n w’a kwla yo ye’n, ɔ fata kɛ sran’m be nian be wun su naan aunmuan’n w’a yo sanwun titi. Maan e fa e ɲin e sie i sa nga’m be su:
Sran sunman be si kɛ bo’m be cuɛn kpukpuwa tɛ nga be flɛ i kɛ diɔsidi de Kaabɔnun m’ɔ o aunmuan’n nun’n. Sanngɛ sran sunman siman kɛ fɔkɔ nga be mantan jenvie mun’n be nun waka nga be fifi’n, be di junman kunngba sɔ’n wie. I kpa bɔbɔ’n, fɔkɔ sɔ’m be diɔsidi de kaabɔnun nga be cuɛn’n ɔ tra bo ble’m be liɛ’n kpɛ nnun.
Koko nun wa’n, siansifuɛ wie’m be wunnin i kɛ nzue bo lɔ ijre dandan wie’m be cuɛn diɔsidi de kaabɔnun ng’ɔ o aunmuan’n nun’n. Nzue bo lɔ ijre kun o lɛ’n i nɲa’m be bo ti leklelekle yɛ aunmuan o be nun. Ɔ maan nzue’n kwla fɛ i kɔ mmua. Kɛ ɔ ko ju nzue’n i afiɛn lɔ’n, i bo leklelekle’m be kpukekpuke, kpɛkun ijre sɔ mɔ diɔsidi de kaabɔnun o be nun’n be mlɔn nzue’n i bo lɔ. Be ka nzue’n i bo lɔ afuɛ ya kpanngban.
Koronavirisi blɛ nun mɔ sran’m be kwlá fiteman sa’n, e wunnin i kɛ aunmuan’n kwla sɛ i sin yo kpa ekun. Afuɛ 2020 nun’n, kɛ ninnge yiwlɛ dandan’m be yacili like yilɛ mɔ loto’m b’a nantiman kun’n, aunmuan’n yoli kpa ndɛndɛ. Kɛ afuɛ 2020 nun’n nvle wie’m be nun awa’m be seli sran’m be kɛ be ka be awlo’n, fluwa sifuɛ wie’m be kannin wafa nga aunmuan’n wa yoli sanwun blɛ sɔ’n nun’n i ndɛ. Be seli kɛ w’a cɛman naan aunmuan’n w’a yo sanwun nvle sɔ’m be nun sunman nun. Kɛ be fa nvle sɔ’m be nun ya kun’n be sieli i sɔ liɛ’n i nzɔliɛ nvle ablaɔcuɛ tra su be nun.
Like nga sran’m be yo’n
Kɛ e fa kpanngɔ’n aunmuan’n yoman fiɛn dan.
Awa’m be jran susute nga be yi ninnge mun’n be wun kɛ be yo like kwlaa nga be kwla yo naan wafa nga be saci aunmuan’n ɔ yo sɔsɔ. Asa’n, kɛ afuɛ’m bé sín’n nn siansifuɛ’m bé wún ajalɛ uflɛ wie mɔ sran’m be kwla fa naan aunmuan’n w’a sɛ i sin w’a yo sanwun ekun’n. I wie yɛle kɛ be fa kakaa wie mun be yo naan aunmuan’n nun fiɛn’n kaci yo kpa naan sran’m b’a ɲanman su tukpacɛ. Asa’n be wla sran’m be fanngan kɛ sɛ be waan bé kɔ́ lika’n be nanti annzɛ be fa kpanngɔ, yɛ awlo lɔ’n be yo kolan’n i cɛcɛ.
Awa wie’m be fa ninnge nga be kwla fa trɔ sin naan aunmuan’n w’a saciman’n be man sran mun. Sanngɛ sran kpanngban be kwlá ɲanman ninnge sɔ mun.
Sanngɛ ninnge sɔ mɔ be yo be’n be ngunmin be su kwlá yoman naan aunmuan’n w’a yo sanwun. I sɔ ndɛ’n yɛ afuɛ 2022 nun’n siansifuɛ mun nin anuannzɛ wie’m be kɛnnin i fluwa kun nun-ɔn.
Fluwa sɔ’n se kɛ afuɛ 2020 nun’n, sɛ be bubu sran nga be o mɛn wunmuan’n nun’n be nun akpasua nsan’n, ninnge nga akpasua kun fa tɔn like’n be saci aunmuan’n. Nvle kpanngban nun’n, be nga be kwla to ninnge nga be fa trɔ sin naan b’a saciman aunmuan’n b’a sɔnman.
Ndɛ nga Biblu’n kan m’ɔ gua e awlɛn su nzue’n
‘Ɲanmiɛn Kpli Zoova m’ɔ yili ɲanmiɛn m’ɔ la nglo lɔ plaii’n, i m’ɔ yili asiɛ’n nin i su ninnge mun’n, i m’ɔ man sran nga be o asiɛ’n su’n be nguan’n, i ndɛ ng’ɔ kan’n yɛ.’—Ezai 42:5.
Ɲanmiɛn yɛ ɔ yili aunmuan’n nin ninnge nga be kwla yo aunmuan’n i sanwun’n niɔn. Asa’n i tinmin’n ti dan, yɛ ɔ klo sran mun tankaan kpa. Ɔ maan e kwla lafi su kɛ ɔ́ yó maan aunmuan’n sɛ́ i sin yó sanwun ekun. An nian ndɛ akpasua nga be flɛ i kɛ “Ɲanmiɛn tali nda kɛ asiɛ’n yó kpa ekun” nun.