Kɛ be deli be Ezipti lɔ lele Izraɛli famiɛn klikli’n i blɛ’n su

Moizi deli Izraɛlifuɛ mun kanga nun Ezipti lɔ lele ɔ fa be juli Sinai oka’n bo lɔ. Lɛ’n yɛ Ɲanmiɛn fɛli i mmla mun mannin be ɔ. I sin’n, Moizi sunmannin sran yasua blu nin nɲɔn (12) kɛ be ko kpla Kanaan mɛn’n be nian. Sanngɛ like nga be ɔli i yolɛ’n, be nun blu (10) b’a kɛnmɛn i su ndɛ kpa. Be yoli maan sran’m be kunndɛli kɛ bé sá be sin Ezipti mɛn’n nun lɔ. Kɛ mɔ b’a lafiman Ɲanmiɛn su’n ti’n, Ɲanmiɛn tuli be fɔ, ɔ maan be wlannin aawlɛ flɛnnɛn nun sa daan lele afuɛ ablanan (40).

I agualiɛ su’n, Zozie yɛ Ɲanmiɛn sieli i kɛ ɔ fa Izraɛlifuɛ mun wlu Kanaan mɛn’n nun lɔ ɔ. Kɛ ɔ kɔ yo naan b’a de mɛn’n, Zoova yili abonuan sa mun. Ɔ yoli maan Zurdɛn nzue’n ɔ kpɛli, Zeriko i talɛ’n bubuli, yɛ wia’n kali su cɛn ba klonglo kun. Ɔ dili afuɛ nsiɛn (6) naan b’a de mɛn’n Kanaanfuɛ’m be sa nun.

Kɛ ɔ fin Zozie blɛ su’n, jɔlɛ difuɛ mun yɛ be sieli Izraɛlifuɛ mun afuɛ lele ya nsan afuɛ ablenun nin nsiɛn (356) ɔn. Ndɛ nga bé bɛ́ i sin lɔ’n, bé kán jɔlɛ difuɛ Baraki, Zedeɔn, ɔ nin Zɛfte, nin Samsɔn yɛ Samiɛli be ndɛ. Bé wá kán bla wie mun kɛ Raabu, nin Debora, nin Zaɛli, nin Riti nin Naomi yɛ Delila sa be ndɛ. Sa nga be kan be ndɛ Akpasua NSAN’N nun’n, kɛ be bo be bo lele mɔ bé jú be agualiɛ su’n, ɔ dili afuɛ ya nsan afuɛ ablangwlan nin nsiɛn (396).