Wia’n jrannin i osu’n nun

AMUN nian Zozie. Ɔ su se kɛ: ‘Wia, jran diin!’ Kpɛkun wia’n jrannin. Wia’n kɛli i osu nun lɛ ɲanmiɛn ble’n i afiɛn sa lele cɛn ba kun. Zoova yɛ maan ɔ yoli sɔ ɔ. Sanngɛ amun maan e wun sa nga ti yɛ Zozie kunndɛli kɛ nán wia’n yaci bolɛ’n.

I nun mɔ Kanaan mɛn nun lɔ famiɛn tɛfuɛ nnun’n be nin Gabaɔnfuɛ’m be boli alɛ kunlɛ’n bo’n, yɛ Gabaɔnfuɛ’m be sunmannin sran Zozie sin kɛ ɔ bla ɔ wa uka be ɔ. Be ko seli i kɛ: ‘Bla ndɛndɛ bla wa uka ye, bla wa de ye! Famiɛn nga be tran oka’m be su lɔ’n be nin ɔ sran’m b’a ba kunlɛ.’

Zozie w’a sisimɛn i bo kaan sa. Yɛ trɛlɛ, ɔ fɛ i sonja’m be kwlaa yɛ be ɔli ɔ. Be nantili kɔnguɛ wunmuan sɔ’n nun. Kɛ be juli Gabaɔn lɔ’n, famiɛn nnun be sonja’m be klun titili be, ɔ maan be boli wanndilɛ bo. Zoova kusu yoli maan nzraama dandan nga kɛ nzue tɔ’n be gua’n, be guali be su. Ɔ maan sran nga nzraama sɔ’m be kunnin be’n, be sɔnnin tra be nga Zozie i sonja’m be kunnin be’n.

Zozie wun i kɛ sɛnzɛ su wa tɔ naan ɔ ka kaan lika’n su wa wla aosin. Ɔ maan famiɛn tɛtɛ nnun be sonja’m be nun sunman bé ɲán wanndiwlɛ. I sɔ ti Zozie srɛli Zoova kɛ: ‘Wia, jran diin!’ Kpɛkun kɛ mɔ wia’n kɛli i osu nun ti’n, Izraɛlifuɛ’m be kusu be ɲannin atin be kunnin alɛ’n lele be kwlali famiɛn nnun mun.

Kanaan mɛn nun famiɛn tɛtɛ nga be kpɔ Ɲanmiɛn i nvlefuɛ’m be sɔnnin. Lele nin i kɛ Zozie fá wíe be mɛn’n nun famiɛn ablasan nin kun’n (31) be kún’n, ɔ dili afuɛ kɔe nsiɛn (6). Kɛ i sɔ’n wieli’n, Zozie fɛ i ɲin’n sieli i Kanaan mɛn’n i cɛcɛlɛ’n su. Akpasua nga be nin a ɲanman tranwlɛ’n, ɔ cɛcɛli asiɛ’n nun mannin be.

Ɔ cɛli lele i sin’n naan Zozie wa wu. Kɛ ɔ́ wú’n, nn ɔ le afuɛ ya afuɛ blu (110). I nun mɔ Zozie nin i wiengu’m be ɲin te o su’n, nvlefuɛ’m be ɲin yili Zoova. Sanngɛ kɛ sran kpa sɔ’m be wieli wu’n, nvlefuɛ’m be sali be sin be yoli sa tɛtɛ mun ekun, ɔ maan be wa wunnin be ɲrun. I blɛ sɔ’n nun’n, be bo flɛ Ɲanmiɛn kɛ ɔ de be.