Be minndɛli Zerizalɛmu lɔ

SRAN nga amun wun be yɛ’n, Zezi i sɔnnzɔnfuɛ mun ɔn. Be fali Zezi i ndɛ’n su yɛ be kali Zerizalɛmu lɛ. Yɛ kɛ be o likawlɛ bé mínndɛ’n, like kun kplali dan kpa yɛ ɔ fali sua mɔ be o nun’n i wunmuan’n niɔn. Like sɔ’n yoli kɛ aunmuan dan kun sa. Kpɛkun like wie m’ɔ ti kɛ sin taaman sa’n, ɔ trantrannin Zezi i sɔnnzɔnfuɛ’m be kwlaa be ti su. ?Amun wun sin taaman nga ɔ o be ti su kunngunngun lɛ’n? ?I ngba ngalɛ’n, i bo’n yɛle benin?

Abonuan sa kun ɔn! Zezi sɛli i sin i Si wun lɔ ɲanmiɛn su lɔ, ɔ maan ɔ su fa Ɲanmiɛn i wawɛ’n ɔ́ fá mán i sɔnnzɔnfuɛ mun. ?Amun si like nga Ɲanmiɛn i wawɛ’n suli be bo mɔ be yoli’n? Be kwlaa be wa kannin aniɛn fanunfanun mun.

Sran sunman lika nga be o Zerizalɛmu’n, be tili like nga ɔ bali kɛ aunmuan dan sa’n, ɔ maan be bali sa sɔ’n i nianlɛ. Be nun wie’m be ti nvle uflɛ nunfuɛ, yɛ be bali Izraɛlifuɛ’m be Pantekɔti cɛn’n i dilɛ wie. Abonuan sa benin yɛ sran sɔ’m be wunnin i ɔ! Be wunnin kɛ Zezi i sɔnnzɔnfuɛ’m be su kan abonuan ninnge nga Ɲanmiɛn yoli be’n, sran nga be o lɛ sɔ’n, be bɔbɔ be klɔ aniɛn’m be nun.

Sran sɔ’m be seli kɛ: ‘?Ai! Be kwlaa nga be ijɔ yɛ’n, naan Galilefuɛ mun ɔn, ɔ yo sɛ yɛ maan e kwlaa e ti e bɔbɔ e aniɛn’n be nuan nun ɔn?’

Piɛli jasoli naan w’a yiyi nun w’a kle be. Ɔ mɛnnin i nɛn’n su, yɛ wafa nga be kunnin Zezi ɔ nin wafa nga Zoova cɛnnin i nguan’n, ɔ kannin i ndɛ kleli sran mun. Ɔ seli kɛ: ‘Siɛn’n Zezi o Ɲanmiɛn i fama su ɲanmiɛn su lɔ. Ɲanmiɛn fɛli i wawɛ m’ɔ seli kɛ ɔ́ fá mán’n, ɔ fa mɛnnin i, yɛ ɔ fali like nga amun wun i mɔ amun ti i ngan yɛ’n mannin sran mun ɔn.’

Kɛ Piɛli wieli ndɛ’n i kan’n, ɔ wluwluli be nun sunman lika be wun. Yɛ be usali kɛ: ‘?É yó i sɛ?’ Piɛli seli be kɛ: ‘An kaci amun nzuɛn’n maan be yo amun batɛmu.’ Ɔ maan cɛn sɔ nun’n sran mɔ be ju bɔɔ akpi nsan (3.000) kun be kacili Zezi i sɔnnzɔnfuɛ.