Awlobo tranlɛ fɛ

?Awlobofuɛ’m be kwla ɲan aunjuɛ sakpa?

?Wafa sɛ yɛ ɔ kwla yo sɔ ɔ?

?Amun si awlobofuɛ nga be afiɛn’n sɛ mɔ be le aunjuɛ kɛ be nga be o fluwa nga nun yɛ’n sa? Lika kwlaa nun’n, awlobo’m b’a tɔ nvati. Like nga ɔ saci lika’n ekun’n, yɛle yasua nin bla be wun yralɛ’n, annzɛ junman kpa mɔ be ɲɛnmɛn i diman’n, ɔ nin siɛ annzɛ niɛn mɔ i ngunmin yɛ ɔ tɛ i wa’n, annzɛ awlabɔɛ’n. Fluwa sifuɛ kun m’ɔ di awlobo tranlɛ’n i su junman’n, i kokolɛ m’ɔ koko’n yɛ: “Awlobo’m be tɔlɛ i ndɛ nga be kannin’n, sran ngba wun i siɛn’n.”

?Ngue ti yɛ andɛ’n sa dandan kɛ nga sa’m be tɔ awlobo’m be su sɔ ɔ? ?Wafa sɛ yɛ e awlobo tranlɛ’n kwla yo fɛ ɔ?

?Wan yɛ ɔ kpɛli awlobo’n i ba ɔ?

Sɛ e kunndɛ kɛ é sí kosan sɔ’m be su tɛlɛ’n, ɔ fata kɛ e si sran ng’ɔ kpɛli aja’n nin awlobo’n be ba’n. Sɛ sran kun yɛ ɔ yili ninnge sɔ mun’n, maan awlobofuɛ’m be kunndɛ i atin’n be nanti su. Afin wafa nga awlobo tranlɛ’n kwla yo fɛ kpa’n, i yɛ ɔ si i kpa lele tra su ɔ.

Like ng’ɔ ti abonuan ekun’n, yɛle kɛ sran kaka bu i kɛ nán sran kun yɛ ɔ kpɛli awlobo’n i ba ɔ. Fluwa nga be flɛ i The Encyclopedia Americana waan yoo: “Fluwa sifuɛ dandan wie’m be liɛ’n, be waan sran’m be aja’n, i bo’n fin nnɛn’m be wun kunndɛlɛ’n.” I kusu, Zezi Klist kannin yasua nin bla’m be yilɛ i ndɛ. I waan i bo bolɛ nun ndɛ nga Biblu’n kannin’n yɛ: ‘Like nga Ɲanmiɛn kan be bo nun’n, nán man sran fi ti be nun.’—Matie 19:4-6.

Zezi Klist i ndɛ yo fɛ sakpa. Afin, Ɲanmiɛn ngwlɛlɛfuɛ’n yɛ ɔ yili yasua nin bla klikli’n, kpɔkun yɛ ɔ kpɛli awlobo tranlɛ fɛ’n i ba ɔ. Ɲanmiɛn maan yasua nin bla klikli sɔ’m be jali be wun. I sin’n, ɔ seli yasua’n kɛ ɔ ‘fɛ i wun mɛntɛn i yi naan be nɲɔn’n be kaci sran wunmuan.’ (Bo Bolɛ 2:22-24) ?Amun wunman kɛ sa ng’ɔ tɔ awlobo’m be su andɛ’n, ɔ fin ayeliɛ nga ɔ timan Ɲanmiɛn Ndɛ’n su mɔ be ɲin blo i wun’n?

?Atin ng’ɔ ti kpa’n yɛle mennin?

Sran kun i bɔbɔ i ngunmin i kpa yolɛ’n, yɛ ɔ ti andɛ mɛn’n, i nun ndɛ cinnjin ɔn. Amlɛkɛn’m be klɔ lɔ’n, kɛ bé mán suklu mma’m be sasu’n, sikafuɛ kun seli be kɛ: “Sɛ ɔ ɲin ti kpli’n, ɔ ti like kpa, afin, ɔ ɲin kwla yo kpli, kpɔkun ɔ wun kwla sanndi ɔ kpa.” Sanngɛ sɛ mɛn nun ninnge’m be ɲanlɛ ti yɛ e kpli’n, ɔ su yoman ye manman e. Nanwlɛ, be ɲin m’ɔ blo mɛn nun ninnge’m be wun’n, i lifuɛ’n, ɔ ti tɛ kpa man awlobo’n. Afin, ɔ sanngan sran’m be afiɛn, ɔ saci awlo, ɔ saci be sika, kpɔkun ɔ ti be wun yalɛ klelɛ ngbɛn. Sanngɛ, e nian wafa nga Biblu’n nun ɲanndra nɲɔn nga’m be kwla uka e naan y’a wun like nga ɔ ti cinnjin aunjuɛ ɲanlɛ nun’n.

‘Kɛ n ko tran kan klolɛ nunman lɛ mɔ sanngɛ nannin nnɛn kpakpa’n yɛ be di i lɛ’n, ɔ flunman kɛ n ko tran kan nɲa ngbɛn yɛ be di i lɛ mɔ sanngɛ klolɛ o lɛ’n.’

‘Sɛ a ɲan ɔ kpaun kee sin kan a di naan ndɛnngan nunmɛn i sin’n, i li flunman tra kɛ a ɲan aliɛ fɛ di sanngɛ awlo nga a o nun’n ɔ ti ndɛnnganndɛnngan ngunmin’n.’ Nyanndra Mun 15:17; 17:1.

?Amun wunmɛn i sɔ? An bu i sin be nian. ?An wunman kɛ sɛ ɔ ti kɛ awlobo kwlaa’m be fɛ i sɔ ndɛ’n be cici be ti’n, nn asiɛ’n wá káci’n? Biblu’n kusu kle wafa nga awlobofuɛ’m be kwla tran sɛsɛ’n. Be nun wie mun yɛ ɔ o yɛ.

Yasua mun: “An klo amun yi mun kɛ an fa klo amun bɔbɔ amun wun’n sa.” —Efɛzfuɛ Mun 5:28-30.

An wunman kɛ ɔ ti pɔpɔ’n! Biblu’n se wie kɛ yasua ɔ ‘bu i yi sran.’ (1 Piɛr 3:7) I sɔ yolɛ nun’n, ɔ fɛ i ɲin sie i su kpa, nán ɔ yo i kpokokpoko, sɛ bla’n kan ndɛ’n, ɔ sie i su tie, kpɔkun ɔ yo maan i wla gua ase. (Fa sunnzun Bo Bolɛ 21:12.) ?An wunmɛn i kɛ sɛ awlobo kwlaa nun yasua’n bu i yi’n i sran’n kɛ ɔ klo kɛ be bu i bɔbɔ sa’n, ɔ́ yó kpa mán awlobo sɔ’n?—Matie 7:12.

Bla mun: “Amun bu amun wun’m be sran.”—Efɛzfuɛ Mun 5:33.

Sɛ junman dilɛ nun’n, bla kun ukɛ i wun’n, i sɔ’n man awlobo’n i aunjuɛ. Like nga ti yɛ Ɲanmiɛn yili bla’n naan ɔ yo yasua “i ukafuɛ kun” m’ɔ nin i bé kwlá trán’n, yɛ ɔ o lɛ ɔ. (Bo Bolɛ 2:18) ?Amun wunman kɛ sɛ bla kun bu i wun sran naan ɔ suɛn i bo’n, naan ɔ ukɛ i be di junman’n, awlobo tranlɛ’n ɔ́ yó fɛ kpa’n?

Yasua nin bla mun: ‘Be mɔ b’a ja be wun’n, nán maan be yo sa sukusuku.’—Ebre Mun 13:4.

Sɛ be yoman sa sukusuku’n, ɔ leman i yowlɛ, saan awlobo tranlɛ’n, ɔ́ yó fɛ. Be wun annzɛ be yi, i bo bian annzɛ bla kunndɛlɛ, ɔ saci awlobo. (Nyanndra Mun 6:27-29, 32) Ngwlɛlɛ su, Biblu’n wla e fanngan kɛ: ‘Ɔ gbaflɛn nun bla’n yɛ klo i titi ɔ. Maan i klolɛ’n ti ɔ klun jɔ titi. ?Ɔo, min wa, sran wie yi i klolɛ liɛ tre?’—Nyanndra Mun 5:18-20.

Siɛ nin niɛn mun: ‘Atin m’ɔ ti klanman mɔ bakan’n ko fa su’n, kle i i bakan nun.’—Nyanndra Mun 22:6.

Sɛ siɛ nin niɛn’m be nian ba’m be lika kpa’n, saan awlobo tranlɛ’n yó fɛ kɔ́ i ɲrun. I sɔ ti’n, Biblu’n wla siɛ nin niɛn’m be fanngan kɛ ‘sɛ be ti awlo lɔ o, sɛ be o atin’n su be su kɔ lika o, sɛ bé wá lá o, sɛ bé tínnge o,’ be kle be mma’m be mmla kpa mun. (Mmla’n 11:19) Biblu’n se siɛ nin niɛn’m be kɛ, sɛ bé tú be mma’m be fɔ’n, be yo i klolɛ su.—Efɛzfuɛ Mun 6:4.

Ba kanngan mun: ‘Ba kanngan mun, maan amun ɲin yi amun si nin amun nin e Min’n liɛ mɔ an ti’n ti.’—Efɛzfuɛ Mun 6:1.

Nanwlɛ, andɛ mɛn nga w’a tɔ nvati yɛ’n, i nun’n, amun si nin amun nin’m be ɲin yilɛ’n kwla yo kekle man amun. ?Ɔ maan, an wunman kɛ sran nga ɔ kpɛli awlobo i ba’n, sɛ an fɛ i ndɛ’n su’n, ɔ ti ngwlɛlɛ like’n? Ɔ si like ng’ɔ kwla uka e naan e awlobo tranlɛ’n w’a yo fɛ’n. I sɔ’n ti, amun mian amun ɲin naan amun ɲin’n yi amun si nin amun nin. Amun mian be ɲin kpa, naan amun sa w’a kanman mɛn nun ninnge tɛtɛ mun.—Nyanndra Mun 1:10-19.

Sɛ awlobofuɛ kwlaa’m be fa Biblu’n i nun afɔtuɛ’n su’n, awlobo tranlɛ’n yó kpa kɔ́ i ɲrun. Nán kɛ andɛ awlobo tranlɛ fɛ ngunmin yɛ ɔ́ ɲɛ́n i ɔ. Sanngɛ kusu, ɔ́ ɲán be ɲrun lɔ asiɛ uflɛ’n i su tranlɛ ɲɛnmɛn nga Ɲanmiɛn sunnzun kɛ ɔ́ mán e’n, i wie. (2 Piɛr 3:13; Sa Nglo Yilɛ 21:3, 4) I sɔ’n ti’n, maan Biblu’n nun ninnge suanlɛ’n kaci awlobofuɛ kwlaa’m be nzuɛn! Asiɛ wunmuan’n su, awlobo kaka’m be wunnin kɛ afɔtuɛ ng’ɔ o fluwa Le secret du bonheur familial nun’n, ɔ ukali be kpa.

Sɛ b’a bo’a Biblu uflɛ i dunman’n, ndɛ mma’m be fin Nyanmiɛn Ndɛ’n nun. E siesieli be nɛn’n i kacikacilɛ nzɔliɛ’n i kpa naan kannganlɛ’n w’a yo pɔpɔ.