Like suanlɛ 16

Amun fua kɛ amún sú Ɲanmiɛn Kpli

?Ngue yɛ ɔ fata kɛ an yo naan amun a yo Ɲanmiɛn Kpli i janvuɛ ɔ? (1, 2)

?Amún yó sɛ naan amun a fa amun wun b’a man Ɲanmiɛn Kpli? (1)

?Ngue yɛ ɔ fata kɛ amun yo naan amun a yo amun batɛmu’n niɔn? (2)

?Sɛ yɛ amún kwlá ɲán wunmiɛn bé láfi Ɲanmiɛn Kpli su kpa ɔ? (3)

1. Sɛ amun waan amún yó Ɲanmiɛn Kpli i janvuɛ’n, maan amun wun Biblu’n nun sa nga ɔ ti nanwlɛ’n i wlɛ kpa (1 Timote 2:3, 4), amun lafi ninnge nga amun suannin’n su (Ebre Mun 11:6), amun kaci amun nzuɛn tɛ’n (Sa Nga Be Yoli’n 17:30, 31), naan amun sa amun sin Ɲanmiɛn wun (Sa Nga Be Yoli’n 3:19). Kpɔkun maan amun Ɲanmiɛn klolɛ’n yo naan amun fa amun wun be mɛn i. Be wun Ɲanmiɛn fa manlɛ’n yɛle kɛ e nin i e koko e afiɛn yalɛ, e se i kɛ é fá e wun é mɛ́n i naan é yó i klun sa.—Matie 16:24; 22:37.

2. Kɛ amun ko fa amun wun ko man Ɲanmiɛn’n, maan be yo amun batɛmu (Matie 28:19, 20). I liɛ’n, sran kwlaa sí kɛ amun fali amun wun mannin Zoova. Sran nga be wun sa wlɛ’n, mɔ be kwla se kɛ bé sú Ɲanmiɛn’n, be liɛ yɛle batɛmu’n. Kɛ be wunnɛn wunmuan’n ko mlɔn nzue nun kan’n, nn b’a yo batɛmu’n.a—Mark 1:9, 10; Sa Nga Be Yoli’n 8:36.

3. Kɛ amun ko fa amun wun ko man Zoova’n, ɔ́ kúnndɛ kɛ amun nanti ndɛ nga ɔ fin amun nuan nun fiteli’n su (Jue Mun 50:14; Akunndanfuɛ’n 5:4, 5). Bae’n wá kúnndɛ kɛ amun yaci Zoova i sulɛ (1 Piɛr 5:8). Sanngɛ amun fa amun wun mantan Ɲanmiɛn i srɛlɛ nun (Filipfuɛ Mun 4:6, 7). Amun suan Ɲanmiɛn Ndɛ’n nun ninnge cɛn kwlaa (Jue Mun 1:1-3). Nán amun kpɔci asɔnun kpa’n (Ebre Mun 13:17). Sɛ amun yo ninnge wunmuan ngalɛ mun’n, amun kwlá ɲán wunmiɛn bé yó sran m’ɔ kpɔciman Ɲanmiɛn ɔn. I liɛ’n like nga Ɲanmiɛn Kpli kunndɛ kɛ amun yo’n yɛ amún yó i tititi ɔ!

[Ja ngua lɛ ndɛ’n]