Ndɛ tre nsan

An fa Ɲanmiɛn Ndɛ’n su kpa

1. (a) ?Wafa sɛ yɛ laa nun Izraɛlifuɛ’m be wunnin i wlɛ kɛ be kwla fa be wla gua Ɲanmiɛn nuan ndɛ’n su ɔ? (b) ?Ngue ti yɛ i sɔ’n ti cinnjin man e ɔ?

KƐ IZRAƐLIFUƐ’M be juli Mɛn Klanman’n nun lɔ’n, ndɛ nga Zozie kan kle be kpɛnngbɛn mun’n yɛ: ‘Amun bɔbɔ amun si jrɛiin kɛ kasiɛ nga Anannganman m’ɔ ti amun Ɲanmiɛn’n boli amun’n, i wie fi nunman lɛ m’ɔ kali ngbɛn ɔn. Be kwlaa be nuan yiali, wie fi a kaman.’ (Zozie 23:14-16) Nanwlɛ, Zoova yiali kasiɛ ng’ɔ boli be’n, be nuan. Ɲanmiɛn maan be klɛli ndɛ’n sɔ’n nin Biblu’n i wunmuan’n be sieli naan “e fa e wla’n guɛ i su.”—Rɔmfuɛ Mun 15:4.

2. (a) ?Wafa sɛ yɛ e kwla se kɛ ‘Ɲanmiɛn Ndɛ nga be klɛli’n, i bɔbɔ yɛ ɔ fɛ i kwlaa mannin sran mun yɛ be klɛli ɔ’? (b) ?Kɛ mɔ e si kɛ Biblu’n fin Ɲanmiɛn’n ti’n, junman benin yɛ ɔ fata kɛ e di ɔ?

² Kannzɛ bɔɔ sran kɔe 40 yɛ be klɛli Biblu’n, sanngɛ Biblu’n fin Zoova bɔbɔ. ?I sɔ liɛ’n kle kɛ ninnge kwlaa nga be klɛli be Biblu’n nun’n, i sa o nun? Ɛɛn. I wawɛ m’ɔ le wunmiɛn’n m’ɔ fa yo ninnge mun’n, yɛ ɔ fa dili i sɔ junman’n niɔn. Akoto Pɔlu dili i nanwlɛ weiin kɛ: ‘Ɲanmiɛn Ndɛ nga be klɛli’n, i bɔbɔ yɛ ɔ fɛ i kwlaa mannin sran mun yɛ be klɛli ɔ. Naan Ɲanmiɛn sran’n ɔ ɲan like m’ɔ kwla fa di junman kwlaa ng’ɔ ti kpa’n.’ Lika kwlaa nun’n, sran nga be wun i wlɛ weiin kɛ Biblu’n fin Ɲanmiɛn’n, be nian like nga Biblu’n kle’n su yɛ be nanti ɔ.—2 Timote 3:16, 17; 1 Tɛsalonikfuɛ Mun 2:13.

Maan e uka sran uflɛ mun naan be klo Biblu’n

3. ?Be nga be lafiman su kɛ Biblu’n ti Ɲanmiɛn ndɛ’n, wafa nga e kwla uka be kpa’n yɛle benin?

³ Sran nga e kan Ɲanmiɛn nuan ndɛ’n e kle be’n, be nun wie’m be lafiman su kɛ Biblu’n ti Ɲanmiɛn ndɛ sakpa. ?Wafa sɛ yɛ e kwla uka be ɔ? Wie liɛ’n, like ng’ɔ fata kɛ e yo’n yɛle kɛ e tike Biblu’n su naan e kle be ndɛ ng’ɔ o nun’n. ‘Afin Ɲanmiɛn i ndɛ nga ɔ ko kan’n, nn w’a kan ɔ kacimɛn i, ɔ maan sran’m be kaci. Sɛ é kwlá sé’n, nn é sé kɛ ɔ la tra tokofi. Ɔ si be klun akunndan’n, ɔ nin be klun sa’n.’ (Ebre Mun 4:12) ‘Ɲanmiɛn i ndɛ’n,’ ɔ timan lalafuɛ nun ndɛ ngbɛn wie m’ɔ kwlá yoman like fi ye kun ɔn. Ɔ kaciman! Nda nga Ɲanmiɛn tali be mɔ be o Biblu’n nun’n, saan bé kpɛ́n su. Wafa nga Biblu’n nun ndɛ’n kwla kaci sran kun i klun lɔ akunndan’n, ɔ tra ndɛ ngba nga e kwla kan’n.

4. ?Biblu’n nun nanwlɛ ndɛ benin mun yɛ be nun yiyilɛ’n ɔ kacili sran wie’m be akunndan nga be bu i Biblu’n su’n niɔn? ?Yɛ ngue ti ɔ?

⁴ Kɛ sran kpanngban be wunnin Ɲanmiɛn i dunman’n Biblu nun’n, i sɔ’n wlali be fanngan maan be niannin Biblu’n nun kpa. Wie’m be liɛ’n, kɛ be kleli be like ti mɔ e o mɛn nun’n, annzɛ like nga ti yɛ Ɲanmiɛn yaci sran’m be lɛ mɔ be yo klunwi ninnge mun’n, ɔ maan be fali ajalɛ kɛ bé súan Biblu’n nun like. Wie mun ekun be liɛ’n, kɛ be wunnin sa nga e wun be andɛ’n be bo’n, annzɛ kɛ be wunnin anannganman nguan mɔ e lafi su kɛ é ɲɛ́n i asiɛ’n m’ɔ́ káci mɛn klanman nun’n i su ndɛ nga Biblu’n kan’n, yɛ be fali ajalɛ kɛ bé súan Biblu’n nun like ɔ. Lika wie’m be nun’n, Ɲanmiɛn sulɛ wafa’m be ninnge yolɛ’m be ti’n, mmusu’m be kle sran’m be yalɛ. Like ng’ɔ kpɛ sa sɔ’m be ba’n, ɔ nin wafa nga be kwla ɲan be ti’n lika sɔ’m be nun’n, wafa nga Biblu’n yiyi nun’n, ɔ yo maan sran’m be fa be ɲin sie i Ɲanmiɛn Ndɛ’n su. ?Ngue ti yɛ i sɔ liɛ’n ɔ ɲan ta sran nga be di nanwlɛ’n be su ɔ? Afin, Biblu’n i kunngba cɛ yɛ ɔ kwla yiyi ninnge cinnjin sɔ’m be nun klanman ɔn.—Jue Mun 119:130.

5. (a) ?Sa benin wie’m be ti yɛ sran’m be se kɛ be lafiman Biblu’n su ɔ? (b) ?Wafa sɛ yɛ e kwla uka sran sɔ mun ɔn?

⁵ ?Yɛ sɛ sran’m be se e kɛ be lafiman Biblu’n nun ndɛ’n su’n nin? ?Ɔ fata kɛ e nin be e yaci yalɛ kokolɛ? Sɛ be bu ndɛ nga e kan kle be’n i su akunndan naan be kpaloman e nuan’n, e kwla koko yalɛ’n e kɔ e ɲrun. Atrɛkpa’n, be bu i kɛ Biblu’n ti be nga be tɔn be wun suɛn kɛ be ti Klistfuɛ’n be fluwa. Klistfuɛ wafa sɔ’m be di be sa nɲɔn nun, be fa be nuan wla politiki nun, kpɛkun be mianmian sran mun kɛ be man be sika. Wie liɛ’n, i sɔ liɛ’n yɛ ɔ yo maan sran’m be kloman Biblu’n niɔn. Sɛ e usa be naan be waan ayeliɛ sɔ’m be ti yɛ be kloman Biblu’n, maan e kle be kɛ Biblu’n bu i sɔ ayeliɛ’m be fɔ. Kpɛkun e kle be ngbaciɛ ng’ɔ o Klistfuɛ wafa sɔ mun ɔ nin Klistfuɛ kpa’m be afiɛn’n. I sɔ’n kwla yo maan sran sɔ’m bé fá be ɲin síe i Biblu’n nun ndɛ’n su.—Mise 3:11, 12; Matie 15:7-9; Zak 4:4.

6. (a) ?Ngue yɛ ɔ yoli maan a wunnin i wlɛ weiin kɛ Biblu’n ti Ɲanmiɛn Ndɛ’n sakpa ɔ? (b) ?Ninnge benin mun ekun yɛ be kwla fa uka sran mun naan b’a wun i wlɛ kɛ Biblu’n fin Ɲanmiɛn sakpa ɔ?

⁶ Sran wie mun ekun be liɛ’n, sɛ e yiyi ninnge nga be kle weiin kɛ Biblu’n fin Ɲanmiɛn’n be nun trele’n, ɔ kwla uka be kpa. ?Ngue like yɛ ɔ kle wɔ weiin kɛ Biblu’n fin Ɲanmiɛn Zoova ɔ? ?Ndɛ nga Biblu’n bɔbɔ kɛn i finwlɛ’n su’n ti ɔ? ?Annzɛ Ɲanmiɛn nuan ijɔfuɛ’m be ndɛ mɔ saan aolia nun sran cɛ yɛ ɔ kwla kan be’n, mɔ be yiyi be ɲrun lɔ sa’m be su ndɛ’n i ngbɛsungbɛsu’m be nun’n, be ti ɔ? (2 Piɛr 1:20, 21) Sran 40 yɛ be klɛli Biblu’n niɔn. Junman sɔ’n dili afuɛ kɔe 1.600. Sanngɛ i nun ndɛ’n sɛnsɛnmɛn i wun. ?Atrɛkpa’n, i sɔ liɛ’n ti yɛ a lafi su kɛ Biblu’n fin Ɲanmiɛn ɔn? Biblu’n nun ndɛ’n nin fluwa sifuɛ dandan’m be liɛ’n be sansanman be wun. Sanngɛ i nun mɔ bé klɛ́ Biblu’n, fluwa nga be klɛli be blɛ kunngba sɔ nun’n, be liɛ’n be nun ndɛ’n nin fluwa sifuɛ dandan’m be liɛ’n be sansan be wun. ?I sɔ’n ti yɛ a lafi Biblu’n su ɔ? ?Annzɛ kusu’n, nanwlɛ mɔ Biblu’n i klɛfuɛ’m be dili’n ti ɔ? ?Annzɛ, sran’m be ɲin mɔ be kplinnin i kɛ bé núnnún i osu’n mɔ sanngɛ w’a yoman ye’n, i ti ɔ? Like kwlaa ng’ɔ kannin wɔ awlɛn’n, a kwla fa uka sran uflɛ.a

Maan e kanngan Biblu’n nun

7, 8. (a) ?Ngue like yɛ ɔ nin i fata kɛ e fa Biblu’n e yo ɔ? (b) ?Ngue yɛ ɔ fata kɛ e fa uka e bɔbɔ e Biblu’n nun kannganlɛ’n su ɔ? (c) ?Wafa sɛ yɛ e bɔbɔ e wunnin ninnge nga Zoova waan ɔ́ yó be’n be wlɛ kpa ekun ɔn?

⁷ Kɛ é úka e wiengu mun naan be lafi Biblu’n su’n, ɔ fata kusu kɛ e bɔbɔ e kanngan Biblu’n nun wie titi. ?I sɔ yɛ a yo ɔ? Fluwa kwlaa nga be yili be’n be nun’n, Biblu’n yɛ ɔ ti be nun cinnjin kpafuɛ’n niɔn. Sanngɛ nanwlɛ, i sɔ’n kleman kɛ sɛ e ngunmin e kanngan nun’n, nn w’a wie. Ɲanmiɛn Ndɛ’n wla e fanngan kɛ nán maan e ngunmin e tran. Ɔ fataman kɛ e bu i kɛ e ngunmin e kwla wun kosan kwlaa nga e fa usa e wun’n be su tɛlɛ’n. Kɛ ɔ ko yo naan y’a yo Klistfuɛ kun m’ɔ ti akunndan sɛsɛfuɛ’n ti’n, ɔ fata kɛ e bɔbɔ e suan Biblu’n nun like naan e wɔ Ɲanmiɛn i nvle nunfuɛ’m be aɲia’m be bo titi.—Nyanndra Mun 18:1; Ebre Mun 10:24, 25.

⁸ I sɔ yɛ Biblu’n waan Etiopi bian kun m’ɔ ti sran dan’n, ɔ yoli ɔ. Bian sɔ’n su kanngan Ɲanmiɛn nuan ijɔfuɛ Ezai i fluwa’n nun. Kpɛkun, anzi kun yoli maan Filipu m’ɔ ti jasin bofuɛ’n, ɔ usali bian’n kɛ: “?Ndɛ nga a kɛnngɛn i lɛ’n a si i bo?” Etiopi bian’n kɛnnin i wun ase seli i kɛ: ‘?Sɛ sran a kleman min, ɔ́ yó sɛ yɛ ń sí i bo ɔ?’ Yɛ ndɛndɛ kpa ɔ seli Filipu kɛ ɔ yiyi Ɲanmiɛn ndɛ sɔ’n nun kle i. Filipu sɔ’n timan Biblu’n nun kannganfuɛ mɔ Ɲanmiɛn ninnge’m be nun’n i ngunmin kpaci fɛ i atin liɛ ɔ. Sanngɛ ɔ fɛli i wun mantannin Zoova i anuannzɛ m’ɔ o asiɛ’n su wa’n, i kpa. Ɔ maan, ninnge nga Zoova kle i anuannzɛ’n i nunfuɛ mun’n, yɛ Filipu fa kleli Etiopi bian’n i like ɔ. (Sa Nga Be Yoli’n 6:5, 6; 8:5, 26-35) I kunngba’n, andɛ’n, sran fi bɔbɔ i ngunmin ɔ kwlá wunman ninnge nga Zoova waan ɔ́ yó be’n be wlɛ. I sɔ’n ti’n, saan Zoova i anuannzɛ’n m’ɔ o asiɛ’n su wa’n i kunngba cɛ yɛ ɔ kwla uka e ɔ.

9. ?Biblu’n nun kannganlɛ’n i siesielɛ benin yɛ ɔ kwla uka e ngba ɔ?

⁹ Kɛ ɔ ko yo naan y’a wun Biblu’n i wlɛ ti’n, Zoova i anuannzɛ’n yi fluwa kpanngban mɔ be yiyi Biblu’n nun man e ɔ. Asa ekun’n, mɛn wunmuan’n nun’n, Zoova i Lalofuɛ’m be asɔnun’m be nun’n, be le Ɲanmiɛn junman dilɛ suklu. Suklu sɔ’n nun’n, be siesieli i kɛ e kanngan Biblu’n nun titi. Kɛ e nian Ɲanmiɛn Ndɛ’n nun’n, e bɔbɔ e ɲan su mmlusuɛ. (Jue Mun 1:1-3; 19:8, 9) Maan e kplin e ɲin naan e kanngan Biblu’n nun titi. Kannzɛ bɔbɔ e wunmɛn i nun ndɛ’n i ngbɛsungbɛsu’m be wlɛ’n, sanngɛ sɛ e wun i nun ndɛ’n i bɔbɔ ba’n i wlɛ’n, ɔ ti kpa lele. Ɔ maan, sɛ cɛn kwlakwla e kanngan Biblu’n i bue nnan annzɛ nnun nun’n, kɛ afuɛ nuan kun fá yía’n, é kwlá kánngan Biblu’n i wunmuan’n nun.

10. (a) ?Blɛ benin nun yɛ e kanngan Biblu’n nun ɔn? (b) ?Wan yɛ ɔ fata kɛ e nin i kanngan Biblu’n nun ɔn? ?Yɛ ngue ti yɛ ɔ ti cinnjin kɛ e yo sɔ titi ɔ?

¹⁰ ?Blɛ benin nun yɛ e kwla kanngan Biblu’n nun ɔn? Sɛ cɛn kwlakwla e fa miniti 10 annzɛ 15 e fa kanngan Biblu’n nun’n, é ɲán su mmlusuɛ dan. Sɛ e kwlá yomɛn i sɔ liɛ’n, sanngɛ e kwla siesie i kɛ le mɔcuɛ kwlaa nun’n, é fá cɛn nin dɔ sa é fá kánngan Biblu’n nun. Kpɛkun, maan e jran su e yo. Sɛ e le bla annzɛ bian’n, e kwla kanngan Biblu’n nun e man e yi’n annzɛ e wun’n. Sɛ kusu e le ba mɔ b’a si fluwa nun kanngan’n, be kusu be nin e kwla kanngan Biblu’n nun wie. Ɔ fata kɛ Biblu’n nun kannganlɛ’n kaci e ajuin mlɔnmlɔn kɛ aliɛ dilɛ’n sa. Afin e bɔbɔ e si kɛ sɛ e diman aliɛ’n, e kwlá yoman juejue. Kɛ ɔ ti sɔ Ɲanmiɛn ninnge’m be nun wie ɔ. Kpɛkun, ‘ndɛ kwlaa ng’ɔ fin Ɲanmiɛn nuan fite’n’ m’ɔ ti kɛ aliɛ sa’n, kɛ ɔ ko yo naan y’a ɲan anannganman nguan’n, ɔ fata kɛ e di.—Matie 4:4.

Like nga ti yɛ e kanngan Biblu’n nun’n

11. ?Like benin ti yɛ ɔ fata kɛ e kanngan Biblu’n nun ɔn?

¹¹ ?Like benin ti yɛ ɔ fata kɛ e kanngan Biblu’n nun ɔn? Like nga ti yɛ e kanngan Biblu’n nun’n, nán maan ɔ yo fluwa nun kannganlɛ sa ngbɛn. Sanngɛ, ɔ fata kɛ ɔ yo Ɲanmiɛn i silɛ kpa m’ɔ kwla yo maan e klo i kpa tra laa’n naan i klun w’a jɔ wafa nga e su i’n i su’n ti. (Zan 5:39-42) Ɔ fata kɛ e yo kɛ Biblu’n klɛfuɛ ng’ɔ kannin ndɛ yɛ’n i sa. I waan: “Anannganman, kle min wɔ atin’n, kle min kan n sin’n.”—Jue Mun 25:4.

12. (a) ?Ngue ti yɛ ɔ ti cinnjin kɛ e ‘si Ɲanmiɛn Ndɛ’n i kpa’ ɔ? ?Yɛ kɛ é kánngan fluwa nun’n, ngue yɛ ɔ fata kɛ e mian e ɲin e yo naan y’a si i nun like’n i kpa ɔ? (b) ?Ajalɛ nnan benin mun yɛ e kwla fa be naan y’a ɲan Biblu’n nun kannganlɛ’n i su mmlusuɛ ɔ? (An nian bue 30 nun kuku’n nun.) (c) An tɛ kosan nga be o ndɛ kpɔlɛ nga nun’n be su naan amun fa yiyi ajalɛ sɔ’m be nun. An nian Biblu’n nun ndɛ mma nga be klɛli be lɛ’n be nun.

¹² Kɛ Zoova klé e like’n, maan e kunndɛ kɛ é ‘sí i kpa.’ ?Sɛ ɔ timɛn i ti’n, é yó sɛ yɛ é kwlá fá Ɲanmiɛn Ndɛ’n su kpa e mɛn dilɛ nun ɔn? ?Yɛ é yó sɛ yɛ é kwlá yíyí Ɲanmiɛn Ndɛ’n nun kpa é klé e wiengu mun ɔn? (Kolɔsfuɛ Mun 3:10; 2 Timote 2:15) Kɛ ɔ ko yo naan y’a si Ɲanmiɛn Ndɛ’n i kpa’n, ɔ fata kɛ e bo e ɲin ase e kanngan nun kpa. Kpɛkun, sɛ i akpasua wie i wlɛ wunlɛ timan pɔpɔ’n, maan e kanngan nun e flan nun naan y’a wun i wlɛ. Asa ekun’n, sɛ e bu like nga e kanngan nun’n i ngbɛsungbɛsu’m be su akunndan’n, é ɲán su mmlusuɛ wie. Fluwa’n i bue 30 nun’n, be kannin ajalɛ nnan mɔ e kwla fa be’n be ndɛ. E kwla fa be nun ajalɛ kun annzɛ nɲɔn tra su naan y’a nian Ɲanmiɛn Ndɛ’n i akpasua kpanngban nun. I liɛ’n, bé yó e ye dan. Kɛ é tɛ́ kosan nga be lɔngɔ su yɛ’n be su’n, é wún like ti m’ɔ ti sɔ’n.

(1) Blɛ sunman nun’n, Zoova i sran’n i wafa ng’ɔ ti’n, Ɲanmiɛn Ndɛ’n i akpasua nga e su kanngan nun lɛ’n, ɔ kwla kle e i su like kun. I wie yɛle kɛ Jue Mun 139:13, 14 nun’n e wun kɛ ba m’ɔ te o i nin klun lɔ’n, i ndɛ lo Ɲanmiɛn dan. I waan: ‘Wɔ yɛ a siesieli min ɔn. A wuli min kɛ tannin sa min nin ku sɛ’n nun. Ń yó ɔ mo yilɛ klanman mɔ a yili min’n ti. Ɔ sa nuan ninnge be yo ɲɛnmɛn, n wun i wlɛ sɔ.’ Nanwlɛ, ninnge nga Zoova yili be’n, be yo ɲɛnmɛn dan! Wafa ng’ɔ yili sran’n, ɔ kle kɛ ɔ klo e dan kpa.

Kɛ e nian ndɛ m’ɔ o Zan 14:9, 10 nun’n, wafa nga Zezi nin sran’m be trannin’n, ɔ kle e wafa nga Zoova bɔbɔ nin sran tran’n. ?Sɛ i sɔ liɛ’n ka e ti nun naan e nian sa nga be o Lik 5:12, 13 ɔ nin Lik 7:11-15 be nun’n, ngue ndɛ yɛ e kwla kɛn i Zoova su ɔ?

(2) Maan e nian wafa nga ndɛ mɔ e kanngan nun’n ɔ nin Biblu’n nun ndɛ’n i ba’n be kɔ likawlɛ’n. Ndɛ’n sɔ’n yɛle: atin nga Zoova le i sie nglo nin asiɛ’n i nglo yilɛ’n, ɔ nin Zoova i dunman fɛ bolɛ’n. Zezi Klist m’ɔ ti Bla’n i Osufuɛ mɔ be seli kɛ ɔ́ bá’n, i Sielɛ Blɛ’n yɛ ɔ́ wá yó i sɔ like’n niɔn.

?Wafa sɛ yɛ Ezekiɛli nin Daniɛli be yili Biblu’n nun ndɛ’n i ba’n, i nglo ɔ? (Ezekiɛl 38:21-23; Daniɛl 2:44; 4:17; 7:9-14)

?Wafa sɛ yɛ Biblu’n kle weiin kɛ Zezi ti Abraamu i Osufuɛ mɔ be seli kɛ ɔ́ bá’n niɔn? (Galasifuɛ Mun 3:16)

?Wafa sɛ yɛ Sa Nglo Yilɛ fluwa’n kle like nga Ɲanmiɛn Sielɛ Blɛ’n wá yó’n niɔn? (Sa Nglo Yilɛ 11:15; 12:7-10; 17:16-18; 19:11-16; 20:1-3; 21:1-5)

(3) Wafa nga e kwla fa like nga e su kanngan nun’n i su e nanti’n, maan e fa usa e wun. Yɛle kɛ, kɛ ɔ fɛ i Ezipt Lɔ Tulɛ fluwa’n nun lele m’ɔ́ fá jú Mmla’n fluwa’n nun’n, e kanngan Izraɛlifuɛ’m be amuɛn sɔlɛ’n nin be tekle bolɛ’n, ɔ nin be ɲin kekle yolɛ’n be su ndɛ’n nun. E wun kɛ akunndan nga be buli be’n ɔ nin be ayeliɛ’n be bo nzuɛn’n yoli tɛ kpa mannin be. I sɔ’n ti’n, kɛ ɔ ko yo naan Zoova klun w’a jɔ e wun’n, ɔ fataman kɛ e sɔnnzɔn Izraɛlifuɛ sɔ mun. ‘Sa sɔ’n mɔ be tɔli be su’n, be kle sa m’ɔ́ wá bá’n, yɛ be klɛli be kɛ bé fá tú e mɔ y’a ju mɛn’n i bue nuan’n e fɔ.’—1 Korɛntfuɛ Mun 10:11.

?Ngue yɛ Abɛli i kunlɛ mɔ Kaɛn kunnin i’n, ɔ kle e ɔ? (Bo Bolɛ 4:3-12; Ebre Mun 11:4; 1 Zan 3:10-15; 4:20, 21)

?Afɔtuɛ mɔ be klɛ be mannin Klistfuɛ nga bé kɔ́ ɲanmiɛn su lɔ’n, be ti be nga bé wá ɲán anannganman nguan asiɛ’n su wa’n be liɛ wie? (Kalɛ 15:16; Zan 10:16)

?Kannzɛ bɔbɔ e le ɲrun asɔnun nun’n, sanngɛ ngue ti yɛ ɔ fata kɛ e nian wafa nga e kwla fa Biblu’n nun afɔtuɛ nga e si be laa’n be su kpa’n niɔn? (2 Korɛntfuɛ Mun 13:5; 1 Tɛsalonikfuɛ Mun 4:1)

(4) Wafa ng’ɔ fata kɛ e fa like nga e kanngan nun’n e uka e wiengu mun’n, maan e bu i akunndan. Sran kwlaa be kunndɛ aunkpinndiɛ. Ɔ maan e kwla kanngan like nga Zezi yoli’n nun e kle be naan y’a yiyi ninnge nga i famiɛn dilɛ blɛ nun’n, ɔ́ wá yó be asiɛ wunmuan’n su’n, be nun: ‘Yɛ sran kpanngban kpa be fa cɛcɛwafuɛ mun, nin bubuwafuɛ mun, nin aɲinsifuɛ mun, nin bobofuɛ mun, ɔ nin tukpacifuɛ kpanngban wie mun ekun bali Zezi wun lɛ, naan w’a yo be juejue.’—Matie 15:30.

?Wan yɛ Zairisi i wa bla’n i cɛnlɛ ndɛ’n ɔ kwla ukɛ i ɔ? (Lik 8:41, 42, 49-56)

13. ?Mmlusuɛ benin yɛ Biblu’n nun kannganlɛ titi’n, ɔ nin like nga Zoova i anuannzɛ’n kle e’n i suanlɛ’n be man e ɔ?

¹³ Nanwlɛ, ajalɛ nnan nga e boli be su lɛ’n, kɛ e fa be su’n, Biblu’n nun kannganlɛ’n yo fɛ dan! Sanngɛ nanwlɛ, Biblu’n nun kannganlɛ’n timan pɔpɔ. Kannzɛ bɔbɔ ɔ ti sɔ kusu’n, sanngɛ é ɲán su mmlusuɛ lele é fá wú. Afin, Ɲanmiɛn ninnge’m be nun’n, é yó kpa trá laa’n. Biblu’n nun kannganlɛ titi’n yo maan e fa e wun mantan e Si Zoova nin e niaan Klistfuɛ mun kpa. Ɔ́ úka e maan ‘é fá ndɛ m’ɔ man nguan’n,’ i su kpa.—Filipfuɛ Mun 2:16.

[Ja ngua lɛ ndɛ’n]

I nun flanlɛ

• ?Ngue ti yɛ be klɛli Biblu’n niɔn? ?Yɛ ngue ti yɛ Ɲanmiɛn niannin Biblu’n su lele fa juli andɛ ɔ?

• ?Wafa sɛ yɛ e kwla uka e wiengu mun naan b’a wun i nun ndɛ’n i wlɛ kpa naan b’a klo i ɔ?

• ?Ngue ti yɛ Biblu’n nun kannganlɛ titi’n, ɔ yo e bɔbɔ e ye ɔ? ?Ajalɛ nnan benin yɛ sɛ e fa be su’n, Biblu’n nun kannganlɛ’n kwla yo e ye ɔ?

[Kuku/Foto i su ndɛ, bue 30]

KƐ É KÁNNGAN BIBLU’N NUN’N, MAAN E NIAN

Like ng’ɔ kle e Zoova i sran’n i wafa’n su’n

Wafa ng’ɔ nin Biblu’n nun ndɛ’n i ba’n be kɔ likawlɛ’n

Wafa nga e mɛn dilɛ nun’n, ɔ fata kɛ ɔ uka e’n

Wafa nga e kwla fa uka e wiengu mun’n