AKPASUA 8

Amun yaci ninnge’m be sulɛ naan an su Ɲanmiɛn

1. ?Ɲanmiɛn sulɛ nun’n, ajalɛ benin yɛ ɔ fata kɛ sran’m be fa-ɔ?

EZI seli kɛ: “Sran ng’ɔ nin min nun-man nun’n, ɔ ti n kpɔfuɛ.” (Matie 12:30) Sɛ e timan Zoova liɛ’n, nn e ti Satan liɛ. Sran sunman be bu i kɛ wafa nga be su Ɲanmiɛn’n, ɔ jɔ Zoova klun. Sanngɛ Biblu’n yiyi nun weiin kɛ Satan yɛ ɔ “laka mɛn wunmuan nunfuɛ’m be kwlaa nin-ɔn.” (Sa Nglo Yilɛ 12:9) Sran kpanngban kpa be bu i kɛ Ɲanmiɛn yɛ be su i-ɔ, sanngɛ nn Satan yɛ be su i-ɔ. Andɛ’n, ɔ fata kɛ sran’m be fa ajalɛ kun: Bé sú Zoova m’ɔ ti ‘Ɲanmiɛn m’ɔ buaman ato’n,’ annzɛ kusu bé sú Satan m’ɔ ti “ato buafuɛ’m be si’n.”—Jue Mun 31:6; Zan 8:44.

Amun jaso be nga be suman Ɲanmiɛn kpa’n be afiɛn

2. ?Ninnge nga Satan fa tanndan be nga be kunndɛ kɛ bé sú Zoova be ɲrun’n, be nun kun yɛle benin?

² Sɛ e fa ajalɛ kɛ é sú Zoova’n, nn y’a fa ajalɛ kpa, afin Ɲanmiɛn i klun jɔ́ é wun. Sanngɛ, sran kwlaa ng’ɔ su Ɲanmiɛn’n, Satan i klun su jɔmɛn i wun. I sɔ’n ti’n, ɔ tanndan i sɔfuɛ’n i ɲrun,yɛ ɔ kle i yalɛ. Wie liɛ’n, ɔ su sran’n i janvuɛ mun ɔ nin i awlofuɛ’m be bo kɛ be sri i annzɛ be kle i yalɛ. Zezi seli kɛ: “Sran kun bɔbɔ i awlofuɛ’m be yɛ bé wá yó i kpɔfuɛ-ɔ.”—Matie 10:36.

3. ?Sɛ amun awlofuɛ mun annzɛ amun janvuɛ’m be tanndan amun ɲrun Ɲanmiɛn i sulɛ’n nun’n, ngue yɛ amún yó-ɔ?

³ ?Sɛ i sɔ like ju amun su’n, amun yó sɛ? Sran sunman be si kɛ be suman Ɲanmiɛn kɛ ɔ nin i fata sa’n, sanngɛ i ase wlalɛ’n ti kekle be sa nun. Be bu i kɛ sɛ be yaci i sɔ like liɛ’n i yolɛ’n, nn ɔ ti kɛ be nin be osufuɛ’m b’a kpɛ duo nun sa. ?I sɔ’n ti nanwlɛ? ?Sɛ amun ti i kɛ amun awlofuɛ’m be su nɔn drɔgi’n, amun su tuman be fɔ, yɛ amun su kleman be sa nga ti yɛ drɔgi nɔnlɛ’n timan kpa’n? Kannzɛ ɔ yo sɛ o, amun su faman amun wun wlaman drɔgi nɔnlɛ sɔ’n, i nun wie. ?Nɛ́n i-ɔ?

4. ?Ngue ndɛ yɛ Zozie kan kleli Izraɛlifuɛ mun-ɔn?

⁴ Zozie wlali Izraɛlifuɛ’m be fanngan kɛ be gua be nannan’m be amuɛn be blo. Ɔ seli be kɛ: “I sɔ’n ti, amun nyin yi Nyanmiɛn, amun tu amun klun be su i. Nán amun kpɔci i mlɔnmlɔn. Amun gua amuɛn nga amun nannan’m be sɔ be kɛ be o Efrat i bue kun lɔ’n annzɛ Ezipt lɔ’n be ase naan amun su Anannganman.” (Zozie 24:14) Zozie miɛnnin i ɲin suli Ɲanmiɛn. I ti’n Zoova yrɛli i su. Sɛ e kusu e nin Zoova e nanti ndɛnman su’n, ɔ́ yrá e su wie.—2 Samiɛl 22:26.

Ɲanmiɛn i su like klelɛ’n: Ato’n nin nanwlɛ’n

Atre nsan: Asɔnun sunman be waan Ɲanmiɛn ti atre nsan. Be waan “Siɛ’n ti Ɲanmiɛn, Ba’n (Zezi) ti Ɲanmiɛn, Wawɛ’n ti Ɲanmiɛn. Sanngɛ kusu be nsan sɔ’n be timan Ɲanmiɛn nsan, be ti Ɲanmiɛn kunngba cɛ.”

Ndɛ mma “atre nsan’n,” ɔ nunman Biblu’n nun mlɔnmlɔn. Biblu’n kusu kleman kɛ Zoova ti atre nsan. Zoova kunngba cɛ yɛ ɔ ti Ɲanmiɛn-ɔn. Korɛntfuɛ Mun be fluwa klikli ndɛ tre 8, i mma 6 se kɛ: “Sanngɛ e liɛ’n, e Si Ɲanmiɛn ti kunngba cɛ.” Zoova kunngba cɛ yɛ ɔ ti Ɲanmiɛn Kpli-ɔ. Zezi timan Ɲanmiɛn Kpli, ɔ ti ‘Nyanmiɛn Wa.’ (1 Zan 4:15). Wawɛ kusu’n timan Ɲanmiɛn. I kpa bɔbɔ’n ɔ timan sran. Ɔ ti Ɲanmiɛn i tinmin m’ɔ fa yo ninnge mun’n.—Sa Nga Be Yoli’n 1:8; Efɛzfuɛ Mun 5:18.
Sran’n le i sin like kun: Ɲanmiɛn sulɛ wafawafa be se sran’m be kɛ, kɛ sran wu’n, ɔ le i sin like kun m’ɔ wuman-ɔn. Sanngɛ Biblu’n waan kɛ sran’n ko wu’n, nn w’a wu, ɔ lemɛn i sin like wie fi kun m’ɔ o lɛ-ɔ.—Jue Mun 115:17; 146:4.
Sin fɛtɛ’n: Be nga be su ninnge mun’n be waan sɛ klunwifuɛ kun wu’n, ɔ kɔ sin dan kun nun. Biblu’n se weiin kɛ be nga b’a wu’n, be “wun-man sa fi wlɛ.” (Akunndanfuɛ’n 9:4-5) I kunngba’n, i waan “Nyanmiɛn yɛ ɔ ti sran klofuɛ nin-ɔn.” (1 Zan 4:8) Ɔ maan, ɔ su kpɛnman Ɲanmiɛn m’ɔ ti sran klofuɛ’n i klun nun le kɛ ɔ kle sran ɲrɛnnɛn sin dan kun nun.

Kuku’n nun: ?Ngue ndɛ yɛ Biblu’n kɛn i atre nsan’n, nin sran’n i sin like’n ɔ nin sin fɛtɛ’n, be su-ɔ?

Amun gua ninnge nga an sɔ be’n, be blo

5. ?Ngue ti yɛ ɔ fata kɛ e yi amuɛn ninnge’m be blo-ɔ?

⁵ Sɛ e wan é wlá ninnge’m be sulɛ’n i ase’n, ɔ fata kɛ amuɛn ninnge mun, ɔ nin bannzrɛ mun, ɔ nin tinwa nga mun ɔ nin like kwlaa ng’ɔ nin i sɔ ninnge’m be kɔ likawlɛ’n, e yi be sin nun. Sɛ e yo sɔ’n, ɔ ti kpa, afin ɔ kle kɛ e lafi Zoova su.

6. ?Klistfuɛ klikli’m be yoli be abonuan sa yolɛ fluwa’m be sɛ?

⁶ Kɛ Klistfuɛ klikli’m be fali ajalɛ kɛ bé sú Ɲanmiɛn kɛ ɔ nin i fata sa’n, amun nian like nga be yoli’n. Biblu’n se kɛ: “Sran tinwafuɛ bɔ be yo abonuan sa mun’n be nun kpanngban be fa be fluwa mun bali, be yrali be sran’m be kwlaa be nyrun lɛ.”—Sa Nga Be Yoli’n 19:19.

7. ?Sɛ mmusu’m be yaciman amun yalɛ klelɛ’n, ngue yɛ amun kwla yo-ɔ?

⁷ Atrɛkpa, be nga laa be dili bae annzɛ be yoli abonuan sa mun’n, mɔ siɛn’n be su Zoova’n, mmusu’m be su yaciman be diin. Sɛ i sɔ sa o amun su’n, amun man amun nɛn’n su srɛ Zoova yɛ amun bo i dunman’n. Ɔ́ úka amun.—Nyanndra Mun 18:10; Zak 4:7.

8. ?Wafa sɛ yɛ Klistfuɛ’m be bu ninnge nga sran’m be su be’n mun-ɔn?

⁸ Sran kwlaa ng’ɔ kunndɛ kɛ ɔ́ sú Zoova mlɔnmlɔn’n, ɔ fataman kɛ amuɛn, annzɛ foto annzɛ fafuɛ be trɛn i sa nun. Klistfuɛ nanwlɛfuɛ’m be waan: “E wun-mɛn i, sanngɛ i su bɔ e lafi’n ti’n, e kɔ e nyrun.” (2 Korɛntfuɛ Mun 5:7) Ɲanmiɛn i mmla ng’ɔ tannin amuɛn’m be falɛ’n i su yɛ be nanti-ɔ.—Ezipt Lɔ Tulɛ 20:4, 5.

Amun nin Zoova i nvle nunfuɛ’m be nanti

Bla kun nin i wla bla kan’n, be su tɔn like.

9. ?Afɔtuɛ benin yɛ Biblu’n man be nga be kunndɛ kɛ bé káci ngwlɛlɛfuɛ’n niɔn?

⁹ Biblu’n se kɛ: “Sran ng’ɔ fɛ i wun mantan ngwlɛlɛfuɛ’n, ɔ kaci ngwlɛlɛfuɛ.” (Nyanndra Mun 13:20). Sɛ e waan é káci ngwlɛlɛfuɛ’n, ɔ fata kɛ e fa e wun e mantan Zoova i Lalofuɛ mun naan e nin be e nanti. Atin nga be sin su be ɲan nguan’n, be yɛ be nanti su-ɔ.—Matie 7:14.

10. ?Wafa sɛ yɛ Zoova i Lalofuɛ’m be kwla uka amun naan amun a su Ɲanmiɛn-ɔn?

¹⁰ Zoova i Lalofuɛ’m be bu be wiengu’m be akunndan kpa. Be uka sran nga be awlɛn ti kpa’n naan be si Biblu’n nun ndɛ m’ɔ man anannganman nguan’n. Be kwla uka amun naan amun a suan Biblu’n nun like. Amun su tuɛmɛn i ti sika. Bé tɛ́ amun kosan’m be su, kpɛkun bé klé amun wafa nga amun ko yo naan amun a nanti Biblu’n nun ndɛ’n su’n.—Zan 17:3.

11. ?Wafa sɛ yɛ Klistfuɛ’m be asɔnun aɲia’m be bo kɔlɛ’n, ɔ kwla uka amun-ɔn?

¹¹ Sɛ amun kɔ be aɲia nga be yo be Ɲanmiɛn Sielɛ sua nun lɔ’n be bo’n, amún sí Zoova i su like kaka. Amun wun kpája amun Ɲanmiɛn i sulɛ nun. Kpɛkun bé klé amun wafa nga amun kwla uka amun wiengu naan b’a si Biblu’n nun ndɛ’n.—Ebre Mun 10:24, 25.

Be su yo asɔnun aɲia Ɲanmiɛn Sielɛ sua kun nun.

12. ?Wafa sɛ yɛ Ɲanmiɛn i srɛlɛ’n kwla uka amun i sulɛ’n nun-ɔn?

¹² Kɛ amún súan Zoova nin i klun sa’n be silɛ’n kɔ́ amun ɲrun’n, nn amún wún i kɛ Zoova yo ninnge mun klolɛ. Kpɛkun amun sí i su ye kusu. I sɔ’n ti’n, ɔ fata kɛ amun yo Ɲanmiɛn i klun sa’n wɔ amun ɲrun titi, naan amun wla ayeliɛ tɛ’n i ase. Amun kwla srɛ Zoova kɛ ɔ uka amun naan amun yo sa kpa, yɛ amun wla nzuɛn tɛ’n i ase.—1 Korɛntfuɛ Mun 6:9, 10; Filipfuɛ Mun 4:6.

Awlobo kun nunfuɛ’m be su kanngan Biblu’n nun. — ?Wafa sɛ yɛ e kwla su Ɲanmiɛn nanwlɛ su-ɔ?

13. ?É yó sɛ naan Zoova i klun w’a jɔ?

¹³ Ɲanmiɛn ninnge’m be yolɛ’n nun’n, kɛ amún yó kpa tra laa’n, amun kwla bu amun wun Zoova fa manlɛ’n ɔ nin batɛmun yolɛ’n i akunndan. Sɛ amun fa amun wun wla Zoova i sufuɛ’m be nun’n, Zoova i klun jɔ́. (Nyanndra Mun 27:11) Amún trán Ɲanmiɛn i nvle m’ɔ di aklunjuɛ’n i nun wie. Ɲanmiɛn kɛn i ndɛ se kɛ: “Min nin be é trán, é sán nun, ń yó be Nyanmiɛn, yɛ be kusu bé yó n sran.”—2 Korɛntfuɛ Mun 6:16.

N ɲannin min ti Mmusu’m be sa nun

Cɛn kun’n, kɔnguɛ e nin min wun e la lɛ, kpɛkun be flɛli min kpɛ nsan. Ń nían-ɔn, kplalala, sua’n i plafɔn’n nun w’a kpaci. I sin’n, like kun m’ɔ ti kɛ sin taaman sa’n, ɔ tɔli n ku’n su. Min wun liɛ’n, w’a wunmɛn i kwlaa ngalɛ’n wie fi nun. Sanngɛ min liɛ’n, min wunnɛn’n wa loli kpa. Ɔ dili anglo kaka.

Kɛ anglo nsiɛn sinnin’n, be flɛli min ekun. Kpɛkun bli mɔ ḿ bó’n, ɔ yo min kɛ sua wunmuan w’a mlɔn nzue dan kun nun sa. Wuo kpli kpa kun fin nzue’n nun fiteli, ɔ wa toto blablali min sa’n i wun. Kplilɛ nga n kplili naan ń yí min sa’n, ɔ yoli ngbɛn. Srɛ dan kpa kunnin min. Nzue’n nin wuo’n be mlinnin, kpɛkun n fin bɛ’n su n tɔli asiɛ wun yaya kpa. Min ɲrun bluli, ɔ dili dɔ nɲɔn kun. Like nga n tili i nɛn’n, ɔ seli min kɛ, n ko wlu klɔ’n su bae dilɛ sua nga be yo sran’m be ayre nun’n, i nun. Kɛ n usali like sɔ’n i dunman’n, dunman ng’ɔ boli kleli min’n i bo’n yɛle kɛ “á ɲán ɔ wun sanngɛ a su ɲanman ba.” Ɔ boli min kasiɛ kɛ ɔ́ wá klé min nɲa naan n fa yo sran’m be ayre. I liɛ’n ń ɲán min wun.

Kɛ ɔ fɛ i lɛ’n, tukpacifuɛ’m be fin lika kwlaa be ba min wun wunlɛ. Kɛ bé bá’n, n dun mmua n wun be min niannun’n nun ka naan b’a to min sua’n. Kɛ be nun kun ko ju min anuan’n i ɲrun lɛ’n, mɔ n ko sunmɛn i nun cɛ’n, kpɛkun b’a kle min i tukpacɛ’n i su ayre’n annzɛ sa ng’ɔ o sran sɔ’n i su’n. Sika ng’ɔ fata kɛ sran nga n yo be ayre’n be tua’n, n sin like sɔ’n yɛ ɔ kle min-ɔn.

Kɛ mɔ ayre nga n yo’n jaso tukpacifuɛ mun ti’n, sika nga n ɲɛn i’n be kanman. N ‘ɲannin min wun kpa,’ kusu kɛ n sin like’n seli kɛ “a su ɲanman ba’n,” n wunnin ndɛ sɔ’n i nuan wie. Yɛle kɛ kɛ n wunzɛ’n, ba nga n dun mmua wuli i’n, ɔ wu. I sɔ’n boli min wla dan. Afuɛ blu nin nɲɔn (12) nga n suli n sin like sɔ’n i nun’n, min wa nsiɛn be wuli.

N wa srɛli Ɲanmiɛn kɛ ɔ uka min. N srɛli i tankaan kpa. Kpɛkun cɛn kun’n, Zoova i Lalofuɛ’m be wa boboli min anuan. Kannzɛ titi n fuan be’n, sanngɛ cɛn sɔ nun liɛ’n, n fuali kɛ ń tíe be ndɛ’n. Yalɛ nga e nin be e kokoli’n ti’n, n wunnin i wlɛ kɛ kannzu mmusu kun yɛ n su su i-ɔ. N wa tali nda kɛ ń wlá mmusu’m be sulɛ’n, i ase.

Kɛ n boli su n kleli min sin like’n, ɔ wlali min srɛ kɛ ɔ́ yó min like yaya kpa. Sanngɛ n seli i kɛ: “E nin wɔ e liɛ’n w’a wie.”

N wɔli min wunnzue yilɛ ninnge’n kwlaa be nun. E nin Zoova i Lalofuɛ mun e wa suannin Biblu’n nun like, n wa suli Zoova, kpɛkun afuɛ 1973 nun’n, be yoli min batɛmun. Kɛ é sé yɛ’n, n le n klun ba nnun, be ti juejue. Min wun kusu wa yoli Zoova i Lalofuɛ wie.—Zozefini Ikezu yɛ ɔ kannin ndɛ nga-ɔ.

Kuku’n nun: ?Wafa sɛ yɛ bla kun ɲɛnnin i ti mmusu’m be sa nun-ɔn?