NDƐ TRE 35

?Ń yó sɛ naan m’an kaci Ɲanmiɛn i janvuɛ?

Be flɛ gbanflɛn kun kɛ Zeremin. Sa kun m’ɔ tɔli i su’n ti’n, ɔ wunnin i kɛ sɛ sran kun nin Ɲanmiɛn be ti janvuɛ’n ɔ ti kpa. Zeremin waan: “Kɛ n ɲannin afuɛ blu-nin-nɲɔn’n (12), min si tuli awlo’n nun. Cɛn kun kɔnguɛ mɔ n ti min bɛ’n su’n, n srɛli Zoova tankaan kpa kɛ ɔ yo naan min si sɛ i sin.”

I wla m’ɔ boli i wun’n ti’n cɛn kun’n ɔ boli Biblu’n nun kannganlɛ bo. Ndɛ ng’ɔ o Jue Mun 10:14 nun’n wluwluli i wun kpa. Ndɛ mma sɔ’n nun’n, be kan Zoova ndɛ se kɛ: “Ɔ su yɛ nyrɛnnɛnfuɛ’m be kisa-a. Wɔ yɛ a uka aika mun-ɔn.” Zeremin seli kɛ: “Ɔ yoli min kɛ Zoova su kan ndɛ kle min sa. Ɔ su se min kɛ ɔ ti min Si nin min ukafuɛ. ?Nán Siɛ kpafuɛ nga n kwla ɲɛn i’n yɛ ɔ o lɛ-ɔ?”

ATRƐKPA’N sa kunngba ng’ɔ o Zeremin su’n, ɔ o ɔ su wie. I kwlaa yoli-o, Biblu’n waan Zoova kunndɛ kɛ a kaci i janvuɛ. Afin Biblu’n se kɛ: “An fa amun wun mantan Ɲanmiɛn, yɛ ɔ́ fɛ́ i wun mántan amun.” (Zaki 4:8) Bu ndɛ sɔ’n i akunndan nian: Zoova timan ɔ wiengu tukpɛ. Asa ekun’n, a kwlá wunmɛn i. Sanngɛ ɔ klo kɛ ɔ nin wɔ bé trá janvuɛ.

Kɛ ɔ ko yo naan a nin Ɲanmiɛn amun a kwla tra janvuɛ’n, ɔ fata kɛ a yo ninnge wie mun. Ɔ ti kɛ flɛli nga be ta’n sa. Sɛ a ta flɛli naan a kunndɛ kɛ ɔ yo kpa’n, ɔ fata kɛ a tɛ i lika kpa’n nun naan a guɛ i bo nzue. I kunngba’n yɛle janvuɛ nga be nin Ɲanmiɛn be tra’n. ?Ngue yɛ a kwla yo naan a nin Ɲanmiɛn amun afiɛn w’a mantan kpa w’a tra laa-ɔ?

Biblu’n nun like suanlɛ’n ti cinnjin

Kɛ sran nɲɔn be ti janvuɛ’n, be kan be klun ndɛ kle be wiengu, kpɛkun be sie be su be wiengu nuan bo. Kɛ be nin Ɲanmiɛn be tra janvuɛ’n, kɛ be yo sɔ wie-ɔ. Kɛ e kanngan Biblu’n nun mɔ e suan nun like’n, ɔ ti kɛ Ɲanmiɛn su kan ndɛ kle e sa. Yɛ e kusu e sie e su i nuan bo.​—Jue Mun 1:2, 3.

Atrɛkpa’n, a kloman like suanlɛ. Gbanflɛn nin talua sunman be klo televiziɔn nianlɛ nin ze video mun nin be janvuɛ’m be wun kɔlɛ. Sanngɛ sɛ a klo kɛ a nin Ɲanmiɛn bé trá janvuɛ’n, ɔ fata kɛ a sie ɔ su i nuan bo. Yɛle kɛ a suan i nuan ndɛ’n.

Sanngɛ nán maan i sɔ’n kun ɔ srɛ. Biblu’n nun like suanlɛ’n timan junman kekle. Kannzɛ a kloman like suanlɛ’n, sanngɛ a kwla yo maan Biblu’n nun like suanlɛ’n ɔ yo wɔ fɛ. Kɛ ɔ ko yo naan w’a yo sɔ’n, like klikli ng’ɔ fata kɛ a yo’n yɛle kɛ a sie blɛ kun mɔ á fá súan Biblu’n nun like’n. Talua kun mɔ be flɛ i Laisi’n seli kɛ: “N siesieli blɛ nga ń fá yó min ninnge mun’n. Nglɛmun kwlaa, n kanngan Biblu’n nun ndɛ tre kun nun. Kɛ n jaso nglɛmun’n, like klikli nga n yo’n yɛ ɔ o lɛ-ɔ.” Talua kun ekun suan Maria, ɔ le afuɛ blu-nin-nnun (15). I liɛ’n, ɔ siesieli i wun wafa uflɛ. I waan: “Kɔnguɛ’n, kwlaa naan m’an ko la’n n kanngan Biblu’n nun.”

Nian kuku ng’ɔ o bue 292 su’n nun. Kpɛkun blɛ nga a kwla ɲan ɔ ti suan Ɲanmiɛn Ndɛ’n cɛn kwlakwla miniti kɔe ablasan’n (30), klɛ i bo lɛ.

․․․․․

Like klikli nga ɔ fata kɛ a yo’n, yɛle kɛ a bu blɛ nga i nun yɛ á súan Biblu’n nun like’n i akunndan. Kɛ á wá kánngan nun kɔ́’n, á wá wún i kɛ blɛ wie nun’n, i nun ndɛ’n i wlɛ wunlɛ’n timan pɔpɔ. Ɔ maan á wún i kɛ Zizreɛli m’ɔ le afuɛ blu-nin-kun’n (11) i ndɛ yo fɛ. Ɔ seli kɛ: “Ɲanmiɛn Ndɛ’n i bue wie o lɛ’n, ɔ fata kɛ a fa ɔ ɲin sie su kpa naan w’a wun i wlɛ. I kannganlɛ’n yoman fɛ sɔ liɛ.” Ɔ ju wie’n, sɛ ɔ yo ɔ sɔ’n, nán ɔ sa sin bubu ɔ. Se ɔ wun kɛ kɛ a suan Biblu’n nun like’n, blɛ sɔ’n nun’n, ɔ ti kɛ Zoova m’ɔ ti ɔ janvuɛ’n ɔ su kan ndɛ kle wɔ sa. Ɔ maan sɛ a mian ɔ ɲin kpa’n, Biblu’n nun like suanlɛ’n wá yó ɔ fɛ kpa. Kpɛkun á ɲán su ye dan.

Ɲanmiɛn srɛlɛ’n ti cinnjin kpa

Kɛ e srɛ Ɲanmiɛn’n, e kan e klun ndɛ e kle i. Nanwlɛ, Ɲanmiɛn srɛlɛ’n ti i liɛ ngunmin! Afin wia nun-o, kɔnguɛ-o, a kwla srɛ Ɲanmiɛn. A kwla kan ɔ klun ndɛ kle i blɛ kwlaa nun. I kpa bɔbɔ’n, ɔ klo kɛ ɔ́ tí ndɛ nga ɔ waan á kán klé i’n. I sɔ’n ti’n, Biblu’n waan: “Sa kwlaa ng’ɔ o amun su’n, an koko kle Ɲanmiɛn. An tu amun klun kpɛtɛ i, yɛ amun lɛ i ase.”​—Filipufuɛ Mun 4:6.

Biblu’n nun ndɛ sɔ’n kle kɛ ndɛ nga a kwla kan kle Zoova’n, be sɔnnin. I wie yɛle kɛ a kwla kan sa nga be o ɔ su’n nin ninnge nga ti yɛ a wunman ɔ wun fɛ’n be ndɛ kle i. Asa ekun’n, a kwla lɛ i ase ninnge nga ɔ yo mannin wɔ’n ti. Sɛ ɔ sa mian naan ɔ janvuɛ wie ti ɔ wun ɲanman nun’n, á yó i kwla lele. ?Nɛ́n i-ɔ? I kunngba’n, yɛle Zoova liɛ’n. ?I kpa bɔbɔ’n, like nga ɔ yo mannin wɔ’n, ɔ traman nga ɔ janvuɛ’m be yo mannin wɔ’n lele kpɛ blu?​—Jue Mun 106:1.

Ninnge nga ti yɛ a kwla la Zoova i ase’n, klɛ be wa.

․․․․․

Ɔ ju wie’n, sa wie’m be ti’n, ɔ klun titi wɔ yɛ a koko. Ndɛ nga Jue Mun 55:23 kan’n yɛ. Ɔ se kɛ: “Fa sa ng’ɔ o ɔ su’n kwlaa wlɛ i Anannganman sa nun, ɔ́ súan ɔ bo. Ɔ su yacimɛn i sufuɛ kpa’n lɛ maan srɛ kunmɛn i naan i wun usumɛn i.”

Ninnge nga ti yɛ a koko mɔ a klo kɛ á fá wlɛ́ i Ɲanmiɛn sa nun’n, klɛ be wa.

․․․․․

Wafa nga Ɲanmiɛn ukali wɔ’n

Like kun ekun kwla uka wɔ naan a nin Zoova amun afiɛn w’a mantan kpa. Jue tofuɛ kun seli kɛ: “Amun sie amun nyin ase be nian. Amún wá wún kɛ Anannganman ti kpa dan!” (Jue Mun 34:9) Davidi yɛ ɔ kpɛli Jue Mun 34 su’n niɔn. Sa wie ti’n, i ɲin bloli kpa. Yɛle kɛ ɔ su wanndi Famiɛn Saili ɲrun. Afin Famiɛn’n w’a fua kpa kɛ ɔ́ kún i. Nanwlɛ, nán aɔwi ndɛ-ɔ. I sɔ’n ti’n, Davidi ko kunndɛli fiawlɛ Filistifuɛ mɔ be ti i kpɔfuɛ’n be sin. Davidi wunnin i wlɛ kɛ ɔ cɛman naan b’a kun i. I sɔ’n ti’n, ɔ yoli i wun kɛ fiaunfuɛ sa naan w’a ɲɛn i ti.​—1 Samiɛl 21:10-15.

Davidi w’a seman kɛ i ngwlɛlɛ dan m’ɔ si i’n ti yɛ ɔ ɲɛnnin i ti-ɔ. Sanngɛ i waan Zoova ti yɛ ɔ fiteli nun-ɔn. Jue Mun 34 nun’n, ɔ seli kɛ: “N flɛli Anannganman, ɔ tɛli min su. Anannganman maan srɛ b’ɔ kun min’n w’a wie.” (Jue Mun 34:5) Davidi bɔbɔ wunnin wafa nga Ɲanmiɛn ukɛli i sa kekle nun’n. I sɔ’n ti yɛ ɔ wlali sran’m be fanngan kɛ sɛ be ‘sie be ɲin ase be nian’n, bé wá wún kɛ Zoova ti kpa dan’n’ niɔn.a

?Wafa nga Zoova suannin ɔ bo sa kekle wie nun’n, ɔ wla te kpɛn su? Klɛ sa sɔ’n wa. Ɔ nunman nun kɛ ɔ yo abonuan sa wie. Ɔ kwla yo wafa nga ɔ uka wɔ cɛn kwlakwla’n. Kɔlɛ’n sran wie kwla se kɛ ɔ timan cinnjin sɔ liɛ. Sanngɛ ɔ ti cinnjin.

․․․․․

Atrɛkpa’n, ɔ si nin ɔ nin be kleli wɔ Biblu’n nun like. Sɛ be yɛ be yoli sɔ’n, nanwlɛ, be yoli wɔ ye dan. Ɔ nin i sɔ ngba’n, ɔ fata kɛ ɔ bɔbɔ a fa ɔ wun mantan Ɲanmiɛn naan a trɛ i janvuɛ. Sɛ a nin-a yoman sɔ’n, ndɛ ng’ɔ o fluwa nga nun’n kwla uka wɔ naan w’a yo sɔ. Sɛ a yo sɔ’n, Ɲanmiɛn wá yrá ɔ su. Afin Biblu’n waan: “Maan amun srɛ like titi, yɛ bé fá mán amun. Amun kunndɛ like titi, yɛ amún wún i. Amun bobo anuan titi, yɛ bé tíke mán amun.”​—Matie 7:7.

A KWLA SI NUN NDƐ KPA EKUN. NIAN FLUWA NGA I AKPASUA 1, I NDƐ TRE 38 NIN 39 BE NUN.

[Ja nga lɛ ndɛ]

BIBLU’N NUN NDƐ MMA CINNJIN

“Be nga be wun i wlɛ kɛ be mian Ɲanmiɛn wun’n be liɛ su ti ye.”​—Matie 5:3.

YO NGA NIAN

Kanngan Biblu’n i bue nnan nun cɛn kwlakwla. I liɛ’n, kɛ afuɛ nuan kun fá yía’n nn w’a wie Biblu wunmuan’n i nun kanngan.

?A SI SƆ?

Kɛ a fa blɛ kanngan fluwa nga nun’n, mɔ a nanti Biblu’n nun ndɛ nga be o nun’n be su’n, i sɔ’n kle kɛ ɔ ndɛ lo Zoova.​—Zan 6:44.

LIKE NGA Ń YÓ’N!

Kɛ ɔ ko yo naan m’an ɲan Biblu’n nun like suanlɛ’n i su ye kpa’n, ń ․․․․․

Kɛ ɔ ko yo naan m’an kwla srɛ Ɲanmiɛn titi siɛn’n, ń ․․․․․

Kosan nga ń fá úsa min si nin min nin’n be yɛ ․․․․․

?A BU I SƐ?

● ?Ngue yɛ a kwla yo naan ɔ ngunmin ɔ Biblu’n nun like suanlɛ’n w’a yo fɛ kpa-ɔ?

● ?Ngue ti yɛ Zoova klo kɛ ɔ́ síe i su tíe srɛlɛ nga klɔ sran mɔ fɔ o be nun’n be srɛ i’n niɔn?

● ?Ngue yɛ a kwla yo naan w’a tu ɔ klun w’a srɛ Ɲanmiɛn kpa w’a tra laa-ɔ?

[Kuku ng’ɔ o bue 291]

“I nun nga n te yo kaan’n, kɛ ń srɛ́ Ɲanmiɛn’n, ndɛ kunngba’n yɛ n kan flan nun-ɔn. Sanngɛ siɛn’n, n kan sa kpa nin sa tɛ nga be tɔ min su aliɛ ba kwlaa nun’n. Yɛ kɛ mɔ sa nga be tɔ aliɛ ba kwlaa nun be timan kun’n ti’n, kɛ ń srɛ́ Ɲanmiɛn’n, n kanman ndɛ kunngba’n.”​—Ɛvu

[Kuku/​Foto bue 292]

Bo ɔ ɲin ase nian ɔ Biblu’n nun kpa

1. Kpa Biblu’n nun ndɛ nga a klo kɛ á kánngan nun’n. Kpɛkun srɛ Ɲanmiɛn kɛ ɔ uka wɔ naan a wun ndɛ sɔ’n i wlɛ.

2. Kanngan ndɛ’n nun kpa. Nán yo i kplilɛ su. Bu wafa nga sa’m be juli’n i akunndan: Maan ɔ yo ɔ kɛ, kɛ sa sɔ’m bé jú’n nn a o lɛ wie naan a wun be nga be su ijɔ’n, kpɛkun a ti be nɛn’n sa. Sɛ be su kan aunmuan m’ɔ fita’n i ndɛ’n, maan ɔ yo ɔ kɛ ɔ fita ɔ wie sa. Sɛ be su kan aliɛ wie i ndɛ’n, maan ɔ yo ɔ kɛ a su di wie sa.

3. Bu ndɛ nga a kanngannin’n i akunndan. A kwla usa ɔ wun kɛ:

● ?Ngue ti yɛ Zoova yoli maan be klɛli ndɛ sɔ’n Biblu’n nun-ɔn?

● ?Wan mun yɛ ɔ fata kɛ n yo kɛ be sa wie-ɔ? ?Wan mun yɛ ɔ fataman kɛ n yo kɛ be sa-ɔ?

● ?Ngue yɛ ndɛ nga n kɛnngɛnnin i lɛ’n ɔ kle min-ɔn?

● ?Ngue yɛ ndɛ sɔ’n kle min Zoova su-ɔ? ?Wafa nga Zoova yo ninnge mun’n, i su like benin yɛ ndɛ sɔ’n kle min-ɔn?

4. Srɛ Zoova kpe kan. Like nga a suɛnnin i Biblu’n nun’n, ɔ nin wafa nga á nánti su’n, kan kle i. Zoova fɛli i nuan ndɛ mɔ yɛle Biblu’n mannin wɔ. I sɔ’n ti’n, lɛ i ase cɛn kwlakwla.

[Foto]

“Ɔ ndɛ’n ɔ ti kɛ kannin sa, ɔ kpaja min bo. Ɔ kpaja min nyrun atin’n su weiin.”​—Jue Mun 119:105.

[Kuku/​Foto bue 294]

Dun mmua bu ninnge nga be ti cinnjin’n be akunndan

?A ɲanman ɔ ti naan w’a srɛ Ɲanmiɛn? ?A ɲanman ɔ ti naan w’a suan Biblu’n nun like? Blɛ sunman’n i sɔ’n fin like ng’ɔ ti ɔ cinnjin’n.

Yo nga nian: Fa so kun, kpɛkun fa yɔbuɛ dandan wie mun gua nun. I sin’n, gua nun aunɲan. Á wá wún kɛ yɔbuɛ mun nin aunɲan’n be sɔn so’n nun.

I sin’n, utu aunɲan’n nin yɔbuɛ mun. Kpɛkun dun mmua fa aunɲan’n guɛ i so’n nun. I sin’n, fa yɔbuɛ mun gua so’n nun. Á wá wún kɛ yɔbuɛ’m be sɔnman so’n nun. ?Ngue ti-ɔ? Afin a dun mmua guali aunɲan’n kwlaa naan w’a fa yɔbuɛ mun w’a gua su.

?Ngue yɛ i sɔ’n kle e-ɔ? Biblu’n se kɛ: “Amun wun ninnge nga be ti cinnjin kpa’n be wlɛ.” (Filipufuɛ Mun 1:10) Sɛ ninnge kɛ be ɲin su yiyilɛ sa’n yɛ a dun mmua yo be’n, a su ɲanman ɔ ti le naan w’a yo ninnge nga be ti cinnjin’n. Ninnge cinnjin sɔ’n i wie yɛle Ɲanmiɛn sulɛ’n. Sanngɛ sɛ a fa Biblu’n nun ndɛ nga e boli su icra’n lɛ’n su’n, á ɲán ɔ ti sú Ɲanmiɛn, kpɛkun á kwlá ɲán blɛ yíyí ɔ ɲin su kan. Ɔ maan i kwlaa fin like nga a dun mmua yo be’n.

[Foto bue 290]

Janvuɛ nga be nin Ɲanmiɛn be tra’n ɔ ti kɛ flɛli nga be ta’n sa, kɛ be niɛn i lika’n yɛ ɔ yo kpa-ɔ.