LIKE SUANLƐ 11
Be klɛli Zezi i su ndɛ
?A wun sran nga be o desɛn’n su lɛ’n?— Matie, Marki, Liki, Zan, Piɛli, Zaki, Zidi nin Pɔlu ɔ. Sran sɔ’m be ti Zezi i blɛ sufuɛ. Be klɛli Zezi i su ndɛ. Maan e kan sran sɔ’m be ndɛ.
?Ngue yɛ sran nga be o yɛ’n be yoli ɔ?
Be nun nsan be ti Zezi i akoto. Be nin i be boli jasin fɛ’n likawlɛ. ?A si be?— Be yɛle Matie, Zan ɔ nin Piɛli. Matie nin Zan be si Zezi kpa. Fluwa nga be klɛli be’n be nun’n, be kannin ninnge nga Zezi yoli be asiɛ’n su wa’n be ndɛ. Akoto Zan klɛli fluwa wie mun ekun. Ɔ klɛli Sa Nglo Yilɛ fluwa’n, Zan fluwa klikli’n, Zan fluwa nɲɔn su’n, ɔ nin Zan fluwa nsan su’n. Akoto Piɛli klɛli Biblu’n nun fluwa nɲɔn. Be yɛle Piɛli fluwa klikli’n, ɔ nin Piɛli fluwa nɲɔn su’n. Cɛn kun’n, Zoova m’ɔ o ɲanmiɛn su lɔ’n, ɔ kannin Zezi i ndɛ seli kɛ: ‘Min wa’n yɛ, n klo i, n klun jɔ i wun.’ Piɛli klɛli ndɛ sɔ’n i fluwa nɲɔn su’n nun.
Desɛn’n su sran nga be ka lɛ mun’n, be kusu be klɛli Zezi i su ndɛ wie. Be nun kun yɛle Marki. Kɛ bé trá Zezi’n nn atrɛkpa’n ɔ o lɛ. Ɔ maan sa ng’ɔ juli blɛ sɔ’n nun’n, ɔ wunnin i kwlaa nun. Kun ekun yɛle Liki. Ɔ ti dɔɔtrɔ bian. Atrɛkpa’n, Zezi dun mmua wuli naan Liki w’a kaci Klistfuɛ.
Sran nɲɔn nga be klɛli Biblu’n wie mɔ a wun be desɛn’n su lɛ’n, Zezi i sinma mun ɔn. ?A si be dunman?— Kun suan Zaki yɛ kun suan Zidi. I klikli nun’n, b’a lafiman Zezi su. I li bɔbɔ’n, be buli i kɛ ɔ su yo fiaunfuɛ. Sanngɛ kasiɛn su’n, be wa lafili Zezi su, yɛ be kacili Klistfuɛ.
Sran kasiɛn nga a wun i desɛn’n su lɛ’n m’ɔ klɛli Biblu’n wie’n, yɛle Pɔlu. I nun nga ɔ nin a yoman Klistfuɛ’n, be flɛ i kɛ Sɔlu. Ɔ kpɔli Klistfuɛ mun, ɔ kleli be yalɛ laa. ?A si like nga ti yɛ Pɔlu wa kacili Klistfuɛ’n?— Le kun mɔ Pɔlu kɔ́ Damasi’n, ɔ tili sran kun i nɛn. Zezi m’ɔ o ɲanmiɛn su lɔ’n, i nɛn’n niɔn. Ɔ usali Pɔlu kɛ: ‘?Ngue ti yɛ a kle be nga be lafi min su’n, be yalɛ sɔ ɔ?’ Kɛ o yoli sɔ’n Pɔlu kacili i ayeliɛ’n yɛ ɔ kacili Klistfuɛ. Ɔ klɛli Biblu’n nun fluwa 14. Ɔ fɛ i Rɔmfuɛ Mun fluwa’n su lele fa ju Ebre Mun fluwa’n su.
Cɛn kwlakwla e kanngan Biblu’n nun. Kɛ e yo sɔ’n e si Zezi i su like kaka. ?A kunndɛ kɛ á sí Zezi i su like kpanngban kpa ekun?—