NDƐ TRE 1
Ndɛ nɲɔn mɔ be fin Ɲanmiɛn’n
ANZI GABLIƐLI BOLI ZAN BATƐMUN YOFUƐ’N I AWULIƐ’N SU
GABLIƐLI SELI MARI KƐ Ɔ́ WÁ WÚ ZEZI
Biblu’n i nun ndɛ wunmuan’n fin Ɲanmiɛn. E Si m’ɔ o ɲanmiɛn su lɔ’n fa mannin e kɛ ɔ́ fá klé e like. Sanngɛ maan e fa e ɲin e sie i i nun ndɛ cinnjin nɲɔn su. Ɔ kannin ndɛ sɔ mun w’a di afuɛ akpi nɲɔn (2.000) w’a tra su. Anzi kun m’ɔ ‘jin Ɲanmiɛn ɲrun titi’n’ yɛ Ɲanmiɛn sumɛnnin i kɛ ɔ wa kan ndɛ sɔ mun-ɔn. Be flɛ anzi sɔ’n kɛ Gabliɛli. (Liki 1:19) ?Afuɛ benin nun yɛ anzi sɔ’n kannin ndɛ sɔ mun-ɔn? ?Nin yɛ ɔ ɔli ko kannin ndɛ sɔ mun-ɔn? ?Yɛ wan mun yɛ ɔ kan kleli be-ɔ?
Kɛ ɔ ka afuɛ kɔe kun naan b’a wu Zezi’n yɛ anzi’n kannin ndɛ sɔ mun-ɔn. ?Ninfan yɛ Gabliɛli kannin ndɛ klikli’n niɔn? Zide mɛn’n i okaoka lika’n nun lɔ-ɔ. Kɔlɛ lika sɔ’n nin Zerizalɛmun klɔ’n nunman mmua. Lɔ yɛ Zoova ɲrun jranfuɛ m’ɔ suan Zakari’n tran-ɔn. Ɔ nin i yi Elizabɛti b’a yo oke, yɛ be leman ba. Ɲanmiɛn i sua m’ɔ o Zerizalɛmun lɔ’n, i nun Ɲanmiɛn ɲrun jranfuɛ junman dilɛ’n w’a to Zakari siɛn’n. Kɛ Zakari o Ɲanmiɛn i sua’n nun lɔ’n, Gabliɛli fiteli i ɲrun ansan yrawlɛ’n i wun lɛ.
Nanwlɛ, srɛ kunnin Zakari dan. Sanngɛ anzi’n kannin ndɛ kun guɛli i awlɛn su nzue. Ɔ seli i kɛ: “Zakari, nán srɛ kun wɔ. Afin Ɲanmiɛn tili srɛlɛ mɔ a tuli ɔ klun srɛli i’n. Ɔ yi Elizabɛti wá wú ba yasua kun mán wɔ. Tɔn i dunman Zan.” Gabliɛli kan guali su kɛ Zan “wá yó sran dan Zoova ɲrun.” Kpɛkun ɔ́ wá ‘síesíe nvle kun mán Zoova.’—Liki 1:13-17.
Sanngɛ Zakari w’a lafiman su kɛ i sɔ’n kwlá yó ye. ?Ngue ti-ɔ? Afin ɔ nin i yi Elizabɛti b’a yo oke. I sɔ’n ti’n, Gabliɛli seli i kɛ: “A su kwlá ijɔman kun. Ɔ́ yó sɔ lele saan cɛn nga sa sɔ’m bé kpɛ́n su’n w’a ju. Afin w’a lafiman min ndɛ’n su.”—Liki 1:20.
Kɛ ɔ́ yó sɔ’n, sran nga be o gua su lɛ’n be wunnin kɛ Zakari su cɛ sua’n nun lɔ. Sanngɛ be wunman sa ti m’ɔ su cɛ lɔ sɔ’n. I sin’n, ɔ wa fiteli. Sanngɛ ɔ kwlá ijɔman. I sa yɛ ɔ fa kan ndɛ kle be-ɔ. Ɔ maan be wunnin i wlɛ kɛ ɔ wunnin like wie Ɲanmiɛn i sua’n nun lɔ.
Kɛ Zakari wieli i Ɲanmiɛn i sua’n nun junman’n i di’n, ɔ sɛli i sin i awlo. I osu w’a cɛman yɛ Elizabɛti wunnzɛli-ɔ. Ɔ dili anglo nnun awlo’n nun lɔ, w’a fiteman guasu.
I sin’n, Gabliɛli fiteli sran kun ekun ɲrun. ?Wan yɛle sran sɔ’n? Talua kun-ɔn. Ɔ suan Mari. Ɔ nin-a jaman bian, yɛ ɔ tran Nazarɛti. Klɔ sɔ’n wo Galile mɛn’n nun lɔ. Ɔ o Zerizalɛmun klɔ’n i nglo lɔ lika’n nun lɔ. ?Ngue ndɛ yɛ anzi’n kan kleli Mari-ɔ? Ɔ seli i kɛ: “Ɲanmiɛn i klun jɔ ɔ wun.” Ɔ seli i ekun kɛ: “Nian! Á wá wúnnzɛ, yɛ á wú ba yasua kun. Tɔn i dunman Zezi.” Ɔ kan guali su kɛ: “Ɔ́ yó sran dan, yɛ bé wá flɛ́ i Ɲanmiɛn m’ɔ o like kwlaa ti su’n i Wa. [...] Ɔ́ síe Zakɔbu i awlo’n titi. Kpɛkun i Famiɛn dilɛ’n su wieman le.”—Liki 1:30-33.
Nanwlɛ, sunmanlɛ mɔ Ɲanmiɛn sunmannin Gabliɛli kɛ ɔ wa kan ndɛ nɲɔn sɔ mun’n, Gabliɛli buli i i cenjele like dan! Kɛ é kánngan Zan nin Zezi be su ndɛ’n nun é kɔ’n, é wún like nga ti yɛ ndɛ nɲɔn sɔ mɔ be fin Ɲanmiɛn’n be ti cinnjin kpa’n, i wlɛ weiin.