Zezi nin i osufuɛ’m be ɔli Zerizalɛmun

Afuɛ nuan kwlaa nun’n, Zozɛfu nin i awlobofuɛ mun, ɔ nin be janvuɛ mun, ɔ nin be osufuɛ’m be kɔ Zerizalɛmun be ko di Delɛ cɛn’n, kɛ nga Ɲanmiɛn Mmla’n seli kɛ be fa yo’n sa. I blɛ’n w’a ju ekun. (Mmla’n 16:16) Zerizalɛmun nin Nazarɛti be afiɛn’n ti nun kilo ya kun ablaɔn (120). Lika kɔlɛ’n ti’n, sran’m be kwlakwla be wun blibli be, yɛ be su siesie be wun. Zezi kusu i wun blibli i wie. Ɔ kɛ i ngunmin nn w’a ju Ɲanmiɛn i sua’n nun lɔ naan w’a di Delɛ cɛn’n. Blɛ sɔ nun’n, nn ɔ le afuɛ blu-nin-nɲɔn (12).

Zezi nin i osufuɛ’m be liɛ’n, Delɛ cɛn’n timan cɛn ba kun ndɛ. Afin kɛ be wie Delɛ cɛn’n i di’n, i aliɛ m’ɔ́ cɛ́n’n, nn be su bo Kpanwun mɔ be guaman nun kpanwun ayre’n, i cɛn liɛ’n i dilɛ bo. Be di i lele cɛn ba nso. (Marki 14:1) I kwlaa sɔ’n yɛ ɔ ti Delɛ cɛn’n i dilɛ’n niɔn. Kɛ Zezi nin i osufuɛ’m bé fɛ́ i Nazarɛti lɛ mɔ bé fá kɔ́ Zerizalɛmun lɔ’n, ɔ nin blɛ nga bé dí i lɔ’n, ɔ nin be sin salɛ’n, i ngba’n kwla di lemɔcuɛ nɲɔn kun. Sanngɛ afuɛ liɛ’n, sa kun m’ɔ juli lɔ’n ti’n, ɔ́ wá cɛ́ trá titi liɛ’n.

Kɛ Zozɛfu nin Mari bé sá be sin’n, be buli i kɛ Zezi o be osufuɛ nin be janvuɛ nga be nin be be su sa be sin’n, be nun wie. Kɛ aliɛ’n sannin’n mɔ be jrannin naan bé ló wunmiɛn’n, b’a wunman Zezi. Be ko kunndɛli i be nga be nin be be su sa be sin’n be nun, sanngɛ b’a wunmɛn i. I sɔ’n ti’n, be sali be sin Zerizalɛmun, be ko kunndɛli i lɔ wie.

Be kunndɛli i lele cɛn ba kun, sanngɛ b’a wunmɛn i. Kɛ i aliɛ cɛnnin’n, be kunndɛli i ekun lele, sanngɛ ngbɛn-ɔn. I cɛn ba nsan su’n, be ko kunndɛli i Ɲanmiɛn i sua’n i sua ba’m be nun, naan b’a wun i sua ba sɔ’m be nun kun nun. Kɛ bé wún i’n, ɔ ti Zuifu’m be like klefuɛ wie’m be afiɛn lɛ. Ɔ tie be ndɛ’n, ɔ usa be kosan. Yɛ ngwlɛlɛ mɔ Zezi si i’n, ɔ boli like klefuɛ sɔ’m be nuan.

Mari usɛli i kɛ: “?Min wa, ngue ti yɛ a yo e sɔ-ɔ? E nin ɔ si e su kunndɛ wɔ kpa.”​—Liki 2:48.

Kɛ Zezi wunnin i kɛ i si nin i nin b’a kwlá siman lika ng’ɔ o’n, i sɔ’n boli i nuan. Ɔ usali be kɛ: “?Ɔ yo sɛ ti yɛ amun kunndɛ min-ɔn? ?Amun siman kɛ min Si i sua’n nun yɛ ɔ fata kɛ n tran-ɔn?”​—Liki 2:49.

I sin’n, Zezi nin Zozɛfu nin Mari be sali be sin Nazarɛti, yɛ i ɲin yili be titi. Yɛ kɛ ɔ́ ɲín kɔ́’n, nn i ngwlɛlɛ’n kusu úka su kɔ́. Asa ekun’n, kannzɛ ɔ ti gbanflɛn kan’n, sanngɛ i wun yo Ɲanmiɛn nin sran’m be fɛ. Kɛ ɔ fɛ i Zezi i kaan nun m’ɔ́ fá ɲín’n, Ɲanmiɛn ndɛ’n loli i, yɛ i ɲin yili i si nin i nin. Nanwlɛ, Zezi kle e ajalɛ kpa.