Adan nin Ɛvu be ɲin w’a yiman Ɲanmiɛn

Cɛn kun mɔ Ɛvu i ngunmin o lɛ’n, wuo kun wa kannin ndɛ kun kleli i. Wuo’n usɛli i kɛ: ‘?Ɲanmiɛn seli sakpa kɛ nán amun di fie’n su waka mma’m be wie fi?’ Ɛvu tɛli i su kɛ: ‘Waka kunngba cɛ i su mma liɛ’n yɛ i waan nán e di-ɔ, naan sɛ e di’n é wú.’ Wuo’n seli i kɛ: ‘Amun su wuman. I kpa bɔbɔ’n amún yó kɛ Ɲanmiɛn sa.’ ?Ndɛ nga wuo’n kannin’n ti nanwlɛ? Cɛcɛ, ɔ timan nanwlɛ! Sanngɛ Ɛvu fali su. Kɛ ɔ niannin waka mma’n lele’n, i konvi sɔli i. Ɔ dili, kpɛkun ɔ fa wie mannin Adan kɛ ɔ di. Adan si kɛ sɛ be ɲin w’a yiman Ɲanmiɛn naan be di waka’n i mma’n, bé wú. Sanngɛ ɔ dili.

Kɛ ɔ cɛli kan’n, Zoova kannin ndɛ kleli Adan nin Ɛvu. Ɔ usali be sa nga ti yɛ be ɲin w’a yimɛn i’n. Ɛvu waan wuo’n yɛ ɔ yoli-ɔ. Adan kusu waan Ɛvu-ɔ. Sa tɛ mɔ be yoli’n ti’n, Zoova fuannin be Edɛnin fie’n nun. Kɛ ɔ ko yo naan Adan nin Ɛvu b’a saman be sin lɔ kun’n, ɔ fali anzi wie mun ɔ nin kue dan kun m’ɔ kpɛ i wun’n sieli be atin’n nun.

Zoova seli kɛ ɔ́ wá tú sran m’ɔ lakali Ɛvu’n i fɔ wie. Nán wuo’n bɔbɔ yɛ ɔ kannin ndɛ kleli Ɛvu-ɔ. Zoova w’a yiman wuo mun kɛ be ijɔ. Anzi klunwifuɛ kun yɛ ɔ yoli maan wuo’n ijɔli-ɔ. Ɔ yoli sɔ fa lakali Ɛvu. Anzi sɔ’n yɛ be wa flɛli i kɛ Suɛn Tɔnfuɛ Satan’n niɔn. Ɔ cɛ kan’n, Zoova wá núnnún Satan naan w’a lakaman sran mun kun.