Sran 12 nga be sunmannin be’n

Kɛ Izraɛlifuɛ mun be jasoli Sinai Oka’n i bo lɛ’n, be sinnin Paran aawlɛ flɛnnɛn’n nun be ɔli Kadɛsi. Kɛ be juli lɔ’n Zoova seli Moizi kɛ: ‘Sunman sran blu-nin-nɲɔn (12) naan be ko niannian Kanaan mɛn mɔ ń má fá mán Izraɛlifuɛ mun’n i nun. Maan akpasua kun man sran kun.’ Moizi fali sran blu-nin-nɲɔn (12) yɛ ɔ seli be kɛ: ‘Amun ko niannian Kanaan mɛn’n nun lɔ. Amun nian sɛ lɔ asiɛ’n ti kpa-o, sɛ lɔfuɛ mun be le wunmiɛn annzɛ be leman wunmiɛn-o, sɛ be tran tannin sua bo, annzɛ kusu sɛ be tran sua kpakpa mun be nun-o.’ Yɛ sran blu-nin-nɲɔn (12) mun be fali atin’n niɔn. Zozie nin Kalɛbu be o be nun.

Kɛ be dili cɛn ba ablanan (40) lɔ mɔ bé sá be sin’n, be fali figie mma, nin grenadie mma, ɔ nin viɲin mma be bali. Be seli kɛ: ‘Lɔ asiɛ’n ti kpa, sanngɛ sran mun be le wunmiɛn kpa, kpɛkun klɔ’n i wun talɛ mun be ti dandan.’ Kalɛbu seli kɛ: ‘E wɔ e ko fa mɛn sɔ’n, é kwlá be.’ ?A si sa nga ti yɛ Kalɛbu seli sɔ’n? Ɔ nin Zozie be lafi Zoova su ti-ɔ. Be onga mun be tɛli su kɛ: ‘Nán e wɔ. Sran nga be o lɔ’n, be ti jajraajra kpa, kpɛkun be le wunmiɛn. E ti be bo kɛ lalo mun sa.’

Izraɛlifuɛ mun be sa sin bubuli be. Be fali ya yɛ be seli kɛ: ‘Maan e fa sran uflɛ naan ɔ dun e ɲrun mmua naan e sa e sin Ezipti lɔ. Ɔ timɛn i ti’n sɛ e kɔ’n, bé kó kún e.’ Zozie nin Kalɛbu be seli kɛ: ‘Nán amun yo ɲin kekle Zoova su, yɛ nán srɛ kun amun. Zoova wá úka e.’ Sanngɛ Izraɛlifuɛ’m b’a faman be ndɛ’n su. Be waan bé kún Zozie nin Kalɛbu.

?A si like nga Zoova yoli’n? Ɔ seli Moizi kɛ: ‘?Naan like kwlaa nga n yo mannin Izraɛlifuɛ mun lɛ’n, be te yo ɲin kekle min su? Ń má yó maan bé wlánwlán aawlɛ flɛnnɛn’n nun afuɛ ablanan (40) yɛ bé wú. Saan be mma mun, ɔ nin Zozie nin Kalɛbu yɛ bé wlú mɛn nga n waan ń fá mán be’n nun-ɔn.’