Riti nin Naomin

Blɛ wie nun’n, awe kpɛnnin Izraɛli lɔ. I sɔ’n ti’n, Izraɛli bla kun mɔ be flɛ i kɛ Naomin’n, ɔ nin i wun nin be wa yasua nɲɔn mun be ko trannin Moabu mɛn’n nun lɔ. Kɛ be juli lɔ’n, w’a cɛman, Naomin i wun’n wuli. I wa yasua nɲɔn mun be jali Moabu bla. Be flɛ kun i yi’n kɛ Riti, yɛ be flɛ kun liɛ’n kɛ Ɔɔpa. I sin’n, Naomin i wa yasua nɲɔn’m be wuli.

Naomin tili i kɛ awe nunman Izraɛli lɔ kun. Ɔ maan ɔ seli kɛ ɔ́ sɛ́ i sin. Kɛ ɔ́ kɔ́’n, Riti nin Ɔɔpa be suli i su. Sanngɛ ɔ seli be kɛ: ‘Amun ti bla kpa. Amun niannin min nin min mma mun e lika. N kunndɛ kɛ amun ɲan bian ekun be ja. Amun sa amun sin Moabu lɔ.’ Be seli i kɛ: ‘E klo wɔ. E kunndɛman kɛ é yáci wɔ.’ Naomin seli be kpɛ sunman kɛ be sa be sin. Ɔɔpa sɛli i sin. Sanngɛ Riti w’a sɛmɛn i sin wie. Naomin seli Riti kɛ: ‘Ɔɔpa su sɛ i sin i osufuɛ mun nin i amuin mun be wun. A nin i be wɔ. Kɔ ɔ manmin sin.’ Riti seli i kɛ: ‘N su yaciman wɔ. Ɔ nvle’n káci min nvle, yɛ ɔ Ɲanmiɛn’n káci min Ɲanmiɛn.’ ?Kɛ a niɛn i sa’n, ndɛ nga Riti kannin’n ɔ yoli Naomin sɛ?

Ɔɔzu kpɛlɛ blɛ nun yɛ Riti nin Naomin be juli Izraɛli lɔ-ɔ. Cɛn kun’n, Riti ɔli ɔɔzu isalɛ bian kun mɔ be flɛ i kɛ Boazi’n i fie’n su lɔ. Bian sɔ’n ti Raabu i wa. Ɔ tili i kɛ Riti ti Moabufuɛ naan ɔ nin Naomin be tran klanman. I sɔ’n ti’n, ɔ seli i junman difuɛ’m be kɛ be yaci ɔɔzu’n wie fie’n nun naan Riti isa.

Cɛn sɔ’n nun nnɔsua’n, Naomin usali Riti kɛ: ‘?Wan fie su yɛ a dili junman andɛ-ɔ?’ Riti tɛli i su kɛ: ‘Bian kun mɔ be flɛ i kɛ Boazi’n i fie’n su yɛ n ɔli-ɔ.’ Naomin seli i kɛ: ‘Boazi ti min wun’n i osufuɛ. Kɔ i fie’n su lɔ titi naan a nin i talua mun be di junman. Lɔ liɛ’n be su kleman ɔ yalɛ.’

Riti dili junman Boazi i fie’n su lɔ lele be wieli ɔɔzu’n i kpɛ. Boazi wunnin kɛ Riti kwla junman di, naan ɔ ti bla kpa. Blɛ sɔ nun’n, sɛ bla kun nin i wun b’a wuman ba naan bian’n wu’n, i osufuɛ kun kwla fa bla’n yo i yi. Ɔ maan Boazi jali Riti. Kpɛkun be wuli ba yasua kun. Be flɛli i kɛ Obɛdi. Ɔ wa yoli Davidi i nannan. Kɛ Riti wuli ba’n, ɔ yoli Naomin i tranfuɛ’m be fɛ. Be seli Naomin kɛ: ‘Zoova fali Riti mannin wɔ naan ɔ nian ɔ lika. Siɛn’n, w’a man ɔ anunman kun. Maan e la Zoova ase.’